RENUNGAN MATIUS 7: 1-11, SAI NA MANJALO DO NASA NA MANGIDO ( SETIAP ORANG YANG MEMINTA AKAN MENERIMA ).

SAI NA MANJALO DO NASA NA MANGIDO ( SETIAP ORANG YANG MEMINTA AKAN MENERIMA ).

Mateus 7: 1-11

Horas inima di hita. Selamat Ari Minggu Rogate ( 5 Mei 2024). Rogate marlapatan, martangiang, na marojahan di Jeremia 29: 12, na mandok: "Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu." Asing ni na marende songon na disosohon di minggu na salpu, disosohon Debata do hita asa gabe halak sipartangiang. Marhite na martangiang do hita markomunikasi dohot Debata pasahathon isi ni rohanta, panghilaanta, pangalamanta dohot pangidoanta tu Debata. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium ni si Mateus 7: 1-11, i ma na paposhon rohanta martangiang tu Tuhanta, ai sai na manjalo do hita molo mangido hita tu Debata marhite tangiangta. Laos ditogutogu turpuk on do hita songon dia do ngolu ni halak sipartangiang.

1. Halak sipartangiang ndang manguhumuhumi donganna jolma. Dihatahon Jesus do jamitanaon marhite Jamita Dolok. Disi godang do pangajarion ni Jesus tu angka sisean-Na dohot sude angka na mangihuthon Ibana songon dia do angka na porsea i mangolu di bagasan harajaon ni Debata. Deba sian i i ma songon na dapot di turpukta on, asa unang manghumuhumi dongan jolma. Manguhumi dongan i ma mambahen dirina ukuran ni hasintongan, jala sai mandabuhon uhum tu donganna jolma. Bangko na songon on jotjot dibereng Jesus dapot di tongatonga ni angka pemimpin ni ugamo ni halak Jahudi, i ma angka halak Sibotosurat, Parise rodi Saduse pe. Dibereng Jesus, nasida jotjot dohot hata na kasar, ala na manghaginjanghon dirina, manghuhumi donganna jolma marhite pangaleaion. Unang ma songon i angka sisean ni Tuhan i dohot sude angka na manghihuthon Ibana. Alai ndada holan halak Jahudi i dibereng Jesus songon i, ai nunga pangalaho hatopan di sude hajolmaon naung madabu tu dosa i cenderung sai marusaha mamintori dirina jala mura manguhumi halak na asing. Diboto Jesus do songon dia bangko ni hita jolma na muramura mamereng hasalaan dohot hahurangan ni donganna na metmet situtu, alai ndang mamereng hasalaan dohot hahuranganna sandiri na balga situtu. Sada gombaran dibahen Jesus laho patoranghon i songon on. Sada halak sai girgir paberengbereng silbaksilbak di mata ni donganna, hape na satiang di matana ndang diantoi. Gabe didok Jesus ma: Tung patut ma dohononmu tu donganmi: ua huumpat ma silbaksilnak i sian matami, hape na satiang do di matami? Ndang apala boi nibayanghon aha do na nidokna silbaksilbak dohot na satiang di mata? Alai torang do anggo na ni maksud ni Jesus disi. Molo ndang rade hita mamereng hasalaan niba sandiri, hape sai paberengbereng hasalaan ni dongan, gabe halak pangansi (na munafik) ma hita di ngolunta on. Na dumenggan ima parjolo hita mambolonghon na satiang na di matanta i, i ma paluahon hita sian dosadosanta sandiri, ipe asa talup hita mamissang hahurangan

ni donganta. Jadi maksud ni Jesus ingkon jolo bolong do na satiang di matanta i, ipe asa tarbahen hita torang mamereng silbaksilbak di mata ni dongan laho mangumpat. Jadi mangihuthon Jesus denggan do marmahani dongan, alai asa tarbahen i, jolo tatanda do dirinta jala tasadari dosanta.

2. Tongtong manjamothon arta na badia jala na mararga i di ngolunta i ma Barita Na Uli i.

Asing ni na diorai Jesus angka na mangihuthon Ibana, asa unang manghumuhumi, laos diorai Jesus do asa unang mangaramuni arta na badia i. Didok Jesus: "Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi...". Arta ma badia na nidokna, i ma juhut na dipelehon di bagas na di Jerusalem tu Debata. Ndang tama arta na badia i lehonon tu jurangga manang biang. Di halak Jahudi binatang na ramun do jurangga. Lumobi muse molo mangalehon mutiha (muriara) tu babi. Arta na uli jala na mararga situtu do mutiha. Alai ndang mararga i di babi. Gariada boi do muruk situtu babi i molo dilehon songon i tu ibana, gabe olo mangalotlot jala mangaroso halak na mangalehon mutiha i, ala dilehon tu ibana na so boi sipanganon. Babi pe targoar do di halak Jahudi binatang na na ramun. Aha do arta na badia dohot mutiha na nidokna dison. I ma gombaran ni Barita Na Uli ni Kristus i. Somal do di buku Poda dipatudos angka hata habisuhon dohot mutiha. Jala taboto habisuhon na tumimbo dapot do i di Barita na Uli ni Kristus i. Ise do na nidokna jurangga dohot babi. Halak Jahudi somal do mamangke pandohan i manggoari halak sipelebegu (na so Jahudi). Alai ndang i na nimaksud ni Jesus di son. Ai mangihuthon Evangelium Mateus ingkon sipasahaton do Barita na Uli i tu halak sipelebegu, asa dohot nasida taruli di Barita na Uli i (Mat.28: 19). Jadi na ni maksudna dison jurangga dohot babi i, i ma angka halak naung musu ni Barita na Uli i, angka naung pir rohana, jala na sai olo mangaleai barita na uli i.Sipata do molo pajumpang halak Kristen tu halak sisongon i unang pola manghatahon barita na uli i, unang lam dileai jala diramuni barita na uli i. Jadi tumagon do jolo ditangianghon nasida jala jolo ditogutogu anggiat muba rohana laho manjalo barita na uli i.

3. Tongtong marposniroha hita sai na alusan ni Tuhan i do tangiangta jala lehonon-Na pangidoanta. Ngolu sipartangiang do ngolu ni angka na porsea, jala i do na pinaingothon ni Jesus tu angka na mangihuthon Ibana, asa unang mansohot martangiang pasahahathon pangidoanna tu Tuhan i. Ddi ayat 7 ni turpukta on tolu hali Jesus manosohon tu angka na mangihuthon Ibana asa tongtong dijugulhon martangiang; pangido hamu ma, lului hamu ma jala tuktuhi hamuma, ninna. Laos marjanji doTuhan i tongtong manangihon tangiang ni na martangiang tu Ibana. Ai didok do: "Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi!" Laos pataridahon do i di kenyataan ni ngolu siganupari, asa manjalo manang aha pe sian halak, ingkon jolo adong do pangidoan, jala asa dapotan ingkon jolo luluan do, jala laho masuk tu bagas ni dongan ingkon jolo tuktuhon do pintu ni bagasna i. Maradophon Tuhan i pe ingkon mangulahon na dos dohot i do hita. Molo manghirim hita manjalo manang aha sian Tuhan i, ingkon mangido do hita marhite tangiang. Dihalomohon Debata do molo ro hita tu Ibana, mangido, manjalahi, dohot manuktuhi. Rade do Ibana patuduhon aha na porlu di hita, jala mangungkap pintu ni roha-Na maradophon hita. Jala diboto Debata do tongtong mangalehon aha anggka na denggan na hinaporluhon ni angka jolma na hinaholongan ni rohana i. Pola do dipatudos Ibana i tu bangko ni jolma. Gari jolma naung digomgomi dosa dohot ragam ni hajahaton diboto do mangalehon na patut tu anakhon na mangido tu natorasna. Ndang mungkin natoras mangalehon batu tu anakhonna, molo dipangido roti, jala mangalehon ulok molo dengke dipangido. Lam Debata Amanta na di ginjang i, parholong jala parasi roha i ma lam so mangalehon angka na denggan na hinaporluhon ni hita angka anakhonna. Holan i do tutu ndang sude na tapangido ingkon sai dilehon Tuhanta i. Ai jotjot do sala pangidoannta tu Tuhan, gabe ndang dilehon na tapangido i songon na nidok ni apostel Jakobus di Surat Jakobus 4: 3. Ai didok do: "Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna." Jadi ndang sude na tapangido di tangiangta di lehon Tuhan i. Aha na denggan mangihuthon Tuhan i i do dilehon.

Molo naeng tapansuasaehon do na tapangido i pasauthon hagiot dohot hisaphisap ni rohanta, nda tung lehonon ni Tuhan inon i. Songon nidok ni sahalak ahli teologia do: Tuhan na di banuaginjang i mambalos tangiangta, mamangke habisuhon-Na dohot holong ni roha na singkop do. Ala hurang ni parbinotoanta jotjot hita mangido angka na boi mansegai parngoluonta molo di lehon i tu hita. Ala ni i do dilehon Jesus tiruan ni tangiangta tu Debata, i ma Tangiang Ale Amanami. Di tangiang i na dipatujolo i ma hasasaut ni harajaon dohot lomo ni roha ni Debata di ngolunta, ro di haluaonta sian gomgoman ni sibolis, nang pe di bagasanna tong do adong pangidoan na mardomu tu parngoluon siganup ari. Ala ni tangido ma nang Tondi Parbadia laho mangajari hita taringot tu sipangidoonta tu Tuhan i molo martangiang hita tu Ibana.***

_________________________

Evanelium: Mateus 7:1-11

1. Unang hamu manguhumuhumi, asa unang hona uhum hamu,

2. ai panguhumonmuna i do siuhumhononhon tu hamu, parsuhatonmuna i do sisuhathononhon tu hamu.

3. Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho!

4. Tung patut ma dohononmu tu donganmi: Ua, huumpat ma jolo silbaksilbak i sian matami! Hape na satiang do di matami!

5. E ho pangansi, jumolo ma umpat tiang i sian matami; dung pe i, asa pingkiranmu, manang beha pangumpatmu di silbaksilbak na di mata ni donganmi.

6. Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi, so tung dilotloti i dohot patna, laos humusor manaroso hamu! 7. Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu!

8. Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi!

9. Ai ise sian hamu jolma, na mangalehon batu tu anakna, molo indahan dipangido?

10. Manang na olo mangalehon ulok, molo dengke dipangido?

11. Gari hamu angka parjahat umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana?

Epistel: Psalmen 28:1-2

1. Ende sian si Daud. Tu Ho do ahu joujou, ale Jahowa, partanobatoanku, unang sai sip Ho, manundali ahu, asa unang ahu molo tung laos sip Ho manundali ahu, doshon halak angka na manuruk tanoman.

2. Sai tangihon ma soara ni sombasombangku, molo mangangguhi ahu tu Ho, molo hupaherbang tanganku tu bilut ni habadiaonmu.

Semua tanggapan:

14Raja Hasoge Tim Panjaitan, Ricky Sitopan II dan 12 lainnya

4

Suka

Komentari

Bagikan

 

RENUNGAN MAZMUR 22: 26-32, INGKON MAMUJI JAHOWA DO ANGKA NA USOUSO DI IBANA ( ORANG YANG MENCARI TUHAN AKAN MEMUJI NAMANYA)

 INGKON MAMUJI JAHOWA DO ANGKA NA USOUSO DI IBANA ( ORANG YANG MENCARI TUHAN AKAN MEMUJI NAMANYA)

Psalmen 22: 26-32

Horas ma di hita. Selamat Ari Minggu Kantate (28 April 2024). Kantate lapatanna: Marende ma hamu. Na marojahan do i di Psalmen 98: 1, na mandok: "Endehon hamu ma di Jahowa ende na imbaru sada, ai nunga dipambahen Ibana angka halongangan; nunga ditumpahi siamunNa i dohot tanganNa na badia i Ibana". Ende na imbaru na nidokna ndang sai ende na baru digubah, alai ende na marisi pamujion di habalgaon ni Debata do ndada ende na marisi pamujion tu angka na di portibion. Marhite na marende boi do hita mamuji Debata siala habalgaon dohot sandok pambahenan-Na na gok halonganan. Las ma rohanta marsomba tu Tuhanta, mamuji pasangaphon Goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Psalmen 22: 26-32, ingkon mamuji Jahowa do angka na usouso di Ibana. Angka na usouso di Jahowa i ma angka na mangulului Jahowa siala na masihol jala naeng pajumpang dohot Ibana. Marhite na mamuji Debata do hita boi pajumpang dohot Ibana. Songon dia do dalanta laho mamuji Debata, jala aha panghorhonna di ngolunta i ma deba na boi dapot hita sian turpukta sadarion.

1. Mamuji Debata marhite parendeon.

Buku Psalmen tatanda do songon buku na marisi angka ende. Jala angka ende i, i ma na gabe pujipujian dipangke halak Israel tu Debata marhite na diendehon di tingki panombaon nasida tu Debata.Ragam do isi ni angka ende i, i ma na nigubah ni angka ahli parendeon di tongatonga ni halak Israel rap dohot dohot angka parmusik. Ende i somal diiringi dohot alat musik na tinanda ni halak Israel hatiha i. Adong do angka ende i na songon panindangion ni parpsalmen i taringot tu habalgaon ni Debata, taringot tu ragam ni angka pambahenan ni Debata na nialaman ni parpsalmen i, dohot na nialaman ni angka na porsea di Debata, isara ni na paluahon sian hagogotan dohot ragam ni angka haporsuhon ni parngoluon di tanoon. Adong do na manghatindanghon asi dohot holong ni rohaNa, jala adong do i marrumang panogunoguon di halak Israel laho manghangoluhon parange na denggan songon bangso ni Debata, adong panogunoguon laho pajonokhon diri tu Debata, asa tongtong mangasahon Debata ibana di ngoluna. Asing ni panindangion taringot tu pambahenan ni Debata di ngoluna, adong do psalmen i marrumang tangiang manang joujou tu Debata. Molo turpukta on, marrumang panindangion ni parpsalmen i do, siala naung dialusi Debata tangiangna, jala naung dipalua ibana sian sitaonon na dodokdok situtu. Jala laos di panindangion ni parpsalmen i dihatindanghon do panarihon ni Debata di angka na dangol ro di angka na usouso di Debata na mangonjar roha nasida mamuji pasangaphon Debata. Ala ni i do dipasunggulhon parpsalmen i, tama do angka na usouso manang na manghalungunhon Debata, ingkon mamujimuji Debata, ala nunga dipapatar Debata asi ni roha-Na.

2. Mamuji Debata patubuhon haserepon ni roha. Halak na sai mamuji Tuhan, i ma pataridahon na ditanda Ibana do habalgaon ni Debata, jala ditanda hametmeton ni dirina na so adong pangasahahononna di adopan ni Debata. Ditanda hamuliaon ni Debata dungi laos dibereng haleaon ni dirina na gok haramunon ala ni dosa i. Ala ni panandaon di Debata dohot panandaon di dirina gabe tubu ma haserepon ni roha di ibana. Lam dao ma sian ibana ginjang ni roha, hasombongon, dohot pangalaho na sai mangasahon diri dohot hagogoona sandiri. Molo tatanda hagaleonta, tapatutoru dirinta, marsangap ma Debata marhite hita. Ai mamuji dohot pasangaphon Debata ndang sae holan marhite hata manang pamanganta sambing, alai lumobi do marhite rohanta, na tapatuduhon marhite pangalaho dohot pambahenanta na sai tongtong di bagasan haserepon dohot haunduhon tu Debata. Molo tahaginjanghon do dirinta, lea rohanta mida angka donganta, na mangaleai Debata do hita disi, ai marhite i sai naeng tarajumi dirinta dos dohot Debata.

3. Mamuji Debata, ala manghilala di tangihon Debata do tangiangna. Songon parpsalmen na di turpukta on, ala dihilala naung dipalua Debata ibana sian sitaonon na parir situtu, dung sai joujou ibana tu Debata, gabe dipuji ibana ma Debata. Jadi di bagasan pangalaho na songon on, hira jonok do pangantusion ni na mamuji Debata dohot na mandok mauliate tu Debata. Songon parpsalmen i dipuji ibana Debata, jala diarahon ibana asa dohot saluhut punguan di huria i mamuji Debata ala dihilala parpsalmen i naung ditangihon Debata tangiangna naung nania lelengna sai joujou tu ibana tu Debata. Ala ni hansit ni panghilalaanna jala hira naung sanga dipasombu Debata ibana di sitaononna i, sampe dijoujouna i ibana mandok: "Ale Debatangku Debatangku, boasa tadinghononmu ahu?" Borat ni sitaonon ni parpsalmen i nunga martudutudu tu sitaononon ni Kristus marhite silang i. Ai songon i do dijouhon Jesus di puncak ni sitaonon-Na di hau na pinarsilang i. Alai nang pe songon i borat ni staonon ni parpsalmen i, tongtong do ibana porsea tu Tuhan i, jala dihaporseai ibana holan Tuhan i do na tuk paluahon ibana sian sitaononna i na borat i. Dung leleng marungkil di bagasan haporseaon,diujungna dialusi Debata do tangiangna , dipalua Debata do ibana sian sitaonon na parir i.Ala ni dipuji ibana ma Debata, digarar ma bagabagana tu Debata jala diarahon angka donganna asa dohot manghabiari jala mamuji Debata. Ala ni sitaononna na digombarhon parpsalmen i digoari do psalmen on psalmen silang, ala nunga martudutudu sitaononna i dohot sitaonon ni Kristus Jesus di silang i. Nang pe borat do sitaonon ni parpsalmen i, alai ndang talu haporseaonna dibahen sitaonon i, ujungna dihamonanghon ibana do sitaonon i, sahat ro di na dipuji ibana Debata. Naeng songon i do dipangido sian hita, songon dia pe boratna sipata taadopi sitaonon di parngoluon on, ndang jadi hita menyerah tu keadaan, alai tongtong ma pos rohanta di huaso dohot asi ni roha ni Debata na so pasombuonna hita di parungkilon na taalami. Di bagasan sikap haporseaon na songon i nunga tapuji Debata di ngolunta, ala songon naung ditaringoti di jolo, mamuji Debata ndada holan marhite soara ni pamangan alai dohot do marhite hatoguon ni haporseaonta. Manang songon dia pe hinauli ni soaranta mamuji Debata marhite ende na taendehon, ndada gabe pujipujian i di Debata non i molo ndang tahangoluhon hata ni ende na taendehon i, manang molo ndang tarpuji Debata marhite ngolunta. Songo na nidok ni Epistel sadarion, dipasangap bangso i do Debata marhite pamanganna, alai anggo rohanasida dao do sian Debata.**

________________________________

Evangelium: Psalmen 22: 26-31

26 Asa Ho do haroroan ni pujipujianhu di tongatonga ni huria na ria i, gararonhu ma angka bagabagangku di jolo ni angka na mangkabiari Ibana.

27 Sai mangan do sogot angka na dangol i jala butongan, ingkon mamujimuji Jahowa do angka na usouso di Ibana, sai huminsa do rohamuna salelenglelengna.

28 Ingoton ni isi ni liat portibi on ma i, gabe mulak ma nasida tu Jahowa, jala marsomba tu jolom do sogot sude angka marga ni parbegu.

29 Ai Jahowa do nampuna harajaon, jala panggomgom di angka parbegu.

30 Mangan jala marsomba do sogot sude angka na gok na hum di tano on, marsinggang tu jolona do sogot sude angka na marsingkor ro di na mate gasing.

31 Sai adong do pinompar ni manisia, na mangoloi Ibana, angka na manaringoti Tuhan i tu pinomparna sogot.

32 Ro do angka nasida sogot, manjamitahon hatigoranna tu halak na tubu muse, paboa Ibana do pasunhon.

______________________

Epistel: Mateus 15:8-20

8 "Dipasangap pamangan ni bangso on do Ahu; alai anggo rohanasida dao do sian Ahu.

9 Jala magopo do pambahennasida pasangaphon Ahu, ai poda ni jolma do dipodahon nasida. "

10 Laos dijou ma natorop i tu joloNa, didok ma tu nasida: Tangi jala parateatehon hamu ma!

11 Nda tung gabe ramun jolma hinorhon ni na bongot sian pamanganna; na ruar sian pamanganna, i do mangaramuni jolma.

12 Dung i didapothon angka siseanNa ma Ibana, ninna ma: Diboto Ho do tahe, naung targasip angka Parise umbege hata ondeng?

13 Alai ninna ma mangalusi: Sibutbuton do nasa suansuanan na so sinuan ni Damang na di banua ginjang i.

14 Pasombu hamu ma nasida! Angka partogi na mapitung do nasida manogu na mapitung; alai molo na lonap manogu na mapitung, targodung do nasida duansa.

15Dung i ninna si Petrus ma mandok Ibana: Patorang ma tu hami umpama ondeng!

16 Jadi didok Jesus ma: Tong dope so marroha nang hamu?

17 Ndang diantusi hamu: Na laho tu butuha do na bongot sian pamangan, dung i bolong tu hundulan na soding?

18 Alai angka na ruar sian pamangan, sian roha do i hehe, laos i do mangaramuni jolma i.

19 Ai sian roha do hehe angka pingkiran na jahat, pamunuon, pangalangkupon, harorangon, panangkoon, hata gapgap dohot panginsahion.

20 Angka i do na mangaramuni jolma; alai ndada ramun jolma, anggo mangan so marburi.

Semua tanggapan:

18Nelson Siregar, Leiden Rah Panjaitan dan 16 lainnya

RENUNGAN YOHANES 10: 11-18, JESUS DO PARMAHAN NA DENGGAN ( YESUS GEMBALA YANG BAIK)

 JESUS DO PARMAHAN NA DENGGAN ( YESUS GEMBALA YANG BAIK)

Johannes 10: 11-18.

Horas ma di hita. Selamat Ari Minggu Jubilate (21 April 2024). Jubilate marlapatan: "Marolopolop tu Debata ma ale sandok tanoon", na marojahan di Psalmen 66: 1. Marhite goar ni minggu i disungguli do hita asa dohot marolopolop, marlas ni roha, manghalashon panggomgomion dohot pangaramotion ni Debata di sandok, tanoon ro di nasa isina. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhonononta. Disoarahon hata ni Debata do tu hita sadarion, na dienet sian Evangelium Johannes 10: 11-18, Jesus do Parmahan na denggan. Marhite i dipaingot hita asa tongtong pos rohanta mangolu di bagasan parmahanion ni Jesus, jala dohot hita dipangke gabe parmahan na denggan di parngoluonta di portibion, dungi asa jamot hita maradophon angka parmahan sipaulaupa, i ma parmahan na so sintong, na holan mamingkirhon dirina, dohot upa ni pangulaonna.Ndang sintong ulaonna songon parmahan na denggan, ala so martanggung jawab di angka na pinarmahanna. Ulaon ni parmahan na denggan, i ma mamboan na pinarmahanna tu jampalan na lomak dohot mual na tio dung diparuar sian barana. Dungi diiringiring, ditogutogu, diramoti, diondihon maradophon parmaraan, jala diboan muse mulak tu barana ia dung botari. Hata parmahan boi do i mura diantusi halak Israel, ala marharoroan do i sian lingkungan ni masyarakat pamiaro angka dorbia, isara ni birubiru, lombu ro di angka dorbia na asing. Laho mangaramoti dohot marmudumuduhon angka dorbia i, mansai ringkot adong parmahan. Di buku Padan na robi dipatudos do Debata songon i angka pemimpin ni bangso i tu Parmahan. Jala di buku Psalmen i jotjot do digombarhon parpsalmen i Debata songon Parmahan. PpSi David sandiri songon raja ni halak Israel dihatindanghon do hombar tu na nialamanna sandiri, na Debata Jahowa do Parmahan di dirina, songon na taida di turpuk Epistel sadarion (Psalmen 23). Jala hombar do i tu turpuk evangelium sadarion, na dihatindanghon Jesus sandiri Ibana Parmahan na denggan. Marhite i disosohon do tu hita:

1. Asa tongtong pos rohanta di parmahanion ni Jesus. Jesus sandiri mandok, Ibana do Parmahan na denggan. Maksud-Na disi asa unang ganggu roha ni ganup halak mangihuthon Ibana songon Parmahan na denggan. Hadengganon ni parmahanion ni Jesus lumobi ala rade do Ibana sumeahon hosa-Na humophop angka birubiru-Na. Ndada songon angka parmahan na niupaan, na holan maminggkirhon dirina, jala na holan mangargahon upa sijaloonna, molo ro mara naeng mangagohon na pinarmahanna i, manigor lintun do ibana paluahon dirina. Dipasombu do songon i angka birubiru na pinarmahanna i. Deba nari hadengganon ni parmmahanion ni Jesus i ma na diulahon Ibana do songon parmahanion ni Debata Jahowa, ala memang Anak ni Debata do Ibana na ro tu portibion gabe jolma. Parmahanion ni Debata Jahowa songon na hinatindanghon ni si David di Psalamen 23 i, i ma patongonhon birubiru na pinarmahan-Na tu angka jampalan na lomak, jala manogunogu tu lambung ni aek hasonangan. Dipasabam roha ni na pinarmaha-Na i, asa unang humasusa mamingkirhon ngoluna, huhut ditogutogu tu dalan hatigoran asa unang lilu manang tardempar tu dalan na asing. Dipapos rohanasida asa unang mabiar nang pe mamolus angka rura parmaraan na nilinggoman ni hamatean. I ma parmahanion ni Debata di bangso-Na, jala tarmasuk do hita disi. Jadi songon i do parmahanion ni Jesus di ngolunta, ai ro Ibana tu portibion laho manghophop hita pardosa do asa unang madabu hita tu hamatean saleleng ni lelengna ala ni dosanta. Songon Parmahan na denggan Jesus, rade do Ibana mangalehon hosa-Na laho manghophop birubiru-Na, marhite hamamate-Na di hau na pinarsilang i. Alai ndang na magogopo pengorbanan-Na i. Dipasahat Ama nampuna birubiru i do muse angka na hinophop-Na i tu Ibana, i ma angka na porsea manang huria i. Ala ni hita angka naung hinophop ni Jesus Kristus patut mandok mauliate tu Ibana marhite na tongtong burju mangihuthon Ibana.

Ala ni pos ma rohanta di bagasan parmahanion-Na.

2. Rade ma hita gabe angka parmahan na denggan. Dipassahat do muse ulaon parmahanion i tu angka naposo-Na, i ma angka na pinabangkit-Na gabe angka pamimpin di tongatonga huria i, pamimppin di tongatongatonga ni masyarakat nang bangsonta pe. Angka parmahan do nasida saluhutna na ingkon unduk tu Parmahan na denggan i, i ma Jesus. Alai manang ise pe na pinabangkit-Na gabe angka parmahan, ingkon sai gabe parmahan na denggan ma, na martanggung jawab tu ngolu pardagingon dohot partondion ni na pinarmahanna i. Unang marpangalaho songon parmahan na niupaan manang sipangan gaji sambing. Angka parmahan sisongon on boi do holan sipaulaulaula sambing ibana songon parmahan, alai ndang diulahon tanggung-jawabna songon parmahan na denggan. Molo adong mara, manang molo adong persoalan na maol siselesaihononhon, boi do manigor lintun ibana paulahon diri, ia so i mamangke ilmu selamat laho paluahon dirina. Idaon sai songon na paluahon na pinarmahanna i do ibana, alai dirina do na pinaluana.

Angkup ni sude angka na porsea manang siihuthon Kristus tarjou gabe parmahan, parmahan di tongatonga ni masyarakat, parmahan di tongatonga ni bangso manang huria i. Alai manang songon dia pe rumang ni panjouon i ingkon diulahon be do ulaon i di bagasan tanggung maniru pambahenan ni Jesus songon parmahan na denggan. Paling saotik hita parmahan di rinta, na boi manjagahon dirina asa mangula angka denggan na gabe tiruan tu na humaliang, jala boi mangaramot dirina maradophon elala ni sibolis. Songon babiat na marauang do sibolis i mangonggop hita laho mangalului sibondutonna. Angka natoras ingkon boi gabe parmahan na denggan tu angka anakhon na pinalumehon ni Debata tu nasida paima boi anakhon i muse tang laho manjagahon manang marmahani dirina.

3. Jagahon dirim maradophon parmahan na niupaan. Sada sangkap ni Jesus manghatahon tudosan on tu angka na mangihuthon Ibana, i ma laho pajamothon angka na mangihuthon Ibana i do maradophon angka parmahan na so tutu, i ma angka parmahan na niupaan. Songon naung pinatorang di jolo, angka parmahan na niupaan i ma na so olo maneahon hosana humophop angka na pinarmahanna i. Na porlu di nasida upa sijaloonna i do sian nampuna birubiru na pinarmahanna i, ala i saotikpun ndang olo korban tu na pinarmahanna i. Molo adong ro mara, manigor lintun do nasida paluahon dirina, gabe boi ma disoro babiat panoro na pinarmahanna i. Angka parmahan na niupaan si songon

i i ma angka pamimpin ni halak Jahudi hatiha i, i ma angka Parise, Sibotosurat ro di angka pangituai ni bangso i. Nasida holan mamingkirhon kepentingan nasida sandiri do, ndang parduli di ngolu ni halak Jahudi i, nang pe di ngolu portobion manang ngolu sogot i. Anggo parmahan na denggan i parjolo do diharingkothon parngoluon ni na pinarmahanna. Sudena sai diusahahon do laho mangondingi na pinarmahanna i, maradophon elaela ni sibolis pangago i, maradophon dosa nang hamatean.

Anggo parmahan na holan mangharingkothon upana do, sandok ndang parduli i di na pinarmahanna i. Ala ni i do dipajamot Jesus angka sisean-Na dohot sude na mangihuthon Ibana asa jamot maradophon angka parmahan sisongon i. Di tingkinta sisaonarion pe, lam godang na maggoari dirina parmahan di tongatonga ni huria i. Alai ndang sude i angka parmahan na denggan. Adong do i nang parmahan na mangaliluhon, adong do i parmahan pargapgap. Di son do ringkotna ingkon tatanda soara ni Parmahan na denggan i, i ma soara na manogunogu, soara na maminsang molo sala dalanta, manang soara na mamboan hita tu dalan hatigoran na manogihon tu hangoluan na salelenglelengna. Unang tarela hita di angka soara na tabo begeon ni sipareon, alai soara na mangaliluhon do, manang soara na mangagohon.

________________________________

Evangelium: Johannes 10:11-18

11. Parmahan na denggan do anggo Ahu. Diseahon parmahan na denggan i do hosana humophop angka birubiruna.

12. Alai anggo na niupaan, na so parmahan situtu, na so nampuna birubiru i; diida pe ro babiat, ditadinghon do birubiru i laho maporus, gabe disoro babiat i ma birubiru i jala dipanserakhon.

13. Ai sipangan gaji do ibana, na so sumarihon angka birubiru i.

14. Ahu do Parmahan na denggan. Hutanda do angka na di Ahu, jala ditanda nasida do Ahu.

15. Songon Ama i na tumanda Ahu jala Ahu tumanda Ama i, jala huseahon do hosangKu humophop birubiru i.

16. Adong dope angka birubirungKu na asing, na so sian bara on. Ingkon dohot do angka i togihononHu; tangihononnasida do soarangKu, dung i gabe sada punguan ma i jala sada ma parmahan.

17. Ala ni on do umbahen dihaholongi Ama i Ahu, ala Hulehon hosangKu, asa jaloonHu i muse.

18.Ndang adong na mambuat i sian Ahu, sian lomongKu do i Hulehon. Na marhuaso do Ahu mangalehon, na marhuaso do Ahu manjalo muse. I ma patik na Hujalo sian Damang.

_______________________

Epistel:Psalmen 23:1-6

Ende sian si Daud.

1. Jahowa do Siparmahan ahu, ndang tagamon hurangan ahu.

2. Dipatongon do ahu tu jampalan angka na lomak, ditogutogu do ahu di lambung aek hasonangan.

3. Dipasabam do rohangku, ditogu do ahu di dalan hatigoran, ala ni goarna i.

4. Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahiM mangapuli ahu.

5. Ho do manutup meja di jolongku maradophon angka musungku, dimiahi Ho do ulungku, suksuk do panginumanhu.

6. Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanhu ma bagas ni Jahowa salelenglelengna.

Semua tanggapan:

7Jones Simamora, Ricky Sitopan II dan 5 lainnya