PORLAK TANOMAN (GARDEN TOMB) NI JESUS

Porlak Tanoman ( Garden Tomb ) ni Jesus

Taringot tu tanoman ni Jesus di Evanelium Johannes ( 19: 38-42) di dok songon on: “ Dung salpui i  dipangido si Josep na sian Arimatea ma tu si Latus, paijuronna bangke ni Jesus. Sisean ni Jesus do ibana, alai marsibuni do ala ni biarna mida angka Jahudi. Jadi dioloi si Latus ma i. Dung i ro ma ibana, dipaijur ma bangkeNa.Alai ro ma nang si Nikodemus, i ma naung  ro manopot Jesus bornginborngin najolo, diboan ma mir na marsaor aloe arga saratus hati.Dung i dibuat nasida ma bangke ni Jesus, dibaluti ma tu dagangan rap dohot na hushus i mangihuthon adat pananomon ni Jahudi. Alai adong ma mardonokkon hapajalanna i sada porlak, jala di bagasan porlak i adong sada tanoman na imbaru, na so dung hapeahan ni manang ise dope. Asa tusi ma dipeakkon nasida Jesus, siala ari parhobasan ni Jahudi; ai jonok do tanoman i”. ( Joh. 19: 38-42)

Sahat tu saonari adong do pe porlak i di huta Jerusalem, di balian ni parik ni huta Jerusalem na leleng. Alai anggo nuaeng, nunga masuk inganan i tu wilayah ni kota Jerusalem na baru. Jonok tu  porlak i adong ma sada dolok batu, jala di dinding ni dolok batu on, adong ma sada kuburan na rumar, na dihurak tu bagasan dolok batu i. Mangihuthon kalangan gereja Prostentan, kuburan na rumar na dapot di dolok batu i, i ma kuburan ni Jesus na jolo, ala ido na umbuk tu na dibaritahon di evangelium Johannes i. Di panindangion ni Evangelum Johannes i, nampuna ni si Josep Arimatea do porlak i songon i dohot tanoman i. Mangihuthon barita disangkapi do tanoman i tu ibana hian, molo mate ibana. Alai mangihuthon hasomalan ni halak Yahudi, angka tanoman naung hea marpangke, ndang sipangkeon be i muse. Ido umbahen, siala naung hea tartanom Jesus disi, ndang dipangke be tanoman i sahat tu tingki on. Jala jonok tu tanoman i adong ma tong sada dolok batu na suman tu tangkurak ni jolma. Digoari do dolok i di hata Ibrani Golgata, na marlapatan partangkurahan.  Di dolok i ma Jesus diparsilangkon. Sahat tu saonari dipiaro do porlak i dohot denggan, jala di toru ni tano na adong di porlak i adong do mata mual na so hea marsik nang pe ari logo, jala aek i ma dipangke halak na mamiaro porlak i laho maniram angka suansuanan na adong di porlak i, gabe mansai uli ma sude berengon partubu ni angka suansuanan na adong di porlak i. Laos diporlak i adong do sada bagas na metmet, na somal dipangke halak na ro mangebati inganan i gabe bagas partangiangan.

Alai mangihuthon kalangan gereja Katolik, ndang di inganan on, inganan hamamate dohot tanoman ni Jesus, alai di inganan na asing do di topi ni parik ni huta Jerusalem na leleng . Jala di inganan na ni haporseaan nasida inganan ni tanoman dohot hahaheon ni Jesus nunga dipajongjong pihak gereja Katolik sada bagas gareja na bolon, na digoari, Gereja Sepulchre Na Badia ( The Church of the Holy Sepulchre, Latin: Ecclesia Sancti Sepulchri). Gareja on pas ma di ujung ni dalan na metmet di huta Jerusalem na leleng, na diagoari nuaeng dalan haberniton ( Via dolorosa ), i ma dalan na binolus ni Jesus rap dohot angka natorop na mangudurhon Jesus manuju tu dolok Golgata. Ndang apala boi pastihononhon dia ma na sintong sian pandapot ni na dua pihak, i ma pihak Prostentan dohot Katolik,  ala i molo marojahan do tu na dibaritahon di Evanelium Johannes i,  boi dohonon na tumingkos sian na dua i, inganan hamatean dohot tanoman ni Jesus i, ima Porlak Tanoman” (Garden Tomb) na adong di Jerusalem baru, di balian ni parik ni huta Jerusalem  na leleng.

JAMITA NI DEBATA DI ARI HAMAMATE ( MATEUS 27: 45-56 )

JAMITA NI DEBATA DI ARI HAMAMATE

( Mateus 27: 45-56)

                Di hata patujolo ni Pdt Dr Justin Sihombing laho patolhashon turpuk on, didok songon on: Ia di angka huria mulamula najolo, ndang apala masa parjamitaon di ari pesta hamamate ni Tuhan Jesus; holan barita ni sitaononna i do dijaha di punguan ni huria na marhahohomon. Adong do di tingki i sada Uskup, na margoar Innocenz. Molo diigil halak ibana asa marjamita di ari i, didok ibana do : ” songon dia ma tarhona ahu marjamita, hape ia Tuhanku benget jala hohom manaon sitaoonon jala mate. Aha ma hatahononku? Nda lobi mangkorhon hata ni bugangna na lima i sian jamita? Molo so tarharu roha ni jolma dibahen bugangna i, ndang tagamon tarharu bahenon ni jamita ni jolma. Ndang ringkot marjamita di Gogata;  tangis dohot manompuk andora do tama hita disi, ala pola mate Tuhanta ala ni dosanta”.

                Sintong do pandok ni Uskup i. Alai molo borat do jolma marjamita, ise nama na marjamita? Debata ma marjamita. Dipaboa turpuk sadarion do, na Debata marjamita tu hita. Dipatubegehon Ibana do tu hita jamita ari hamamate, na gumogo sian jamita ni jolma. Ia na niondohon ni jamita i, i ma taringot tu:  na mangholom mataniari,  maribak hirehire na di bagas joro, muba roha ni induk ni tentara na mamajal Tuhanta i. “ ( Dienet sian buku, J. Sihombing, Ibana do Pardameanta 2, Pematangsiantar 1973, hal. 87).

                Taringot tu “na mangholom mata ni ari saleleng tolu jom” andorang so mate do pe Jesus di silang i, dipatorang do songon on: “Songon halak na marsiluluton, na martujungkon abit na birong, songon i do mata ni ari martujungkon haholomon siala sitaonon ni Jesus”. Jadi ndang ala ni gerhana  mata niari, manang ala ni na mapultak dolok marapi di tingki i, songon na pinandok ni deba halak. Alai hajujumpang ni na tarsurat di Jesaya 53: 4 i do, na mandok” “Debata maminsang, mamungkul dohot pasipal Ibana”. Dohot na di 2 Kor. 5: 21, na mandok: ”Ai on do dipatupa Debata: Humongkop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana”. Dohot Jesaya 53: 5: “Ampe tu ibana pinsangpinsang parhitean ni hasonanganta”.

                Taringot tu na “maribak hirehire na di bagas joro”,dipatorang songon on: “Ia hirehire i, ima na patorangkon parholangan ni Debata na badia sian jolma pardosa. Songon na nidok ni panurirang Jesayas (59: 2): “Angka hajahatonmuna tahe sumirang hamu sian Debatamuna, jala angka dosamuna mangondingi bohina maradophon hamu, umbahen so ditangihon ibana hamu”. Disi mate Jesus, laos apala di na satongkin i maribak ma hirehire i, matompas ma dorpi parholangan i. I ma hirehire “dosa” i. Songon hirehire na maribak i, songon i maribak daging ni Jesus naung gabe dosa i ( Heber 10: 20). Jadi lungkas ma dalan tu bilut na badia situtu, tu inganan ni Debata. Ndang adong be ambatambat di jolma na porsea marsaor dohot Debata.

                Taringot tu na “muba roha ni induk ni tentara na mamajal Tuhanta i”, songon hatoranganna: “ Alai dung diida induk ni tentara i rap dohot angka donganna na jumaga Jesus,  lalo i ro di angka na masa i, mabiar situtu ma nasida ninna ma: Tutu do On Anak ni Debata! Jala sude natorop i na marluhut mainondur masitompuk andorana marnida na masa i.  Halonganan do panindangion ni tentara i, gabe tiur rohana di na satongkin i. Nunga torop diida ibana na mate di porang alai anggo songon hamamate ni Jesus ndang adong diida, ai hamamate n marmulia do i. Gabe tubu do pingkiranna mandok: na so tigor uhum ni panguhum i tu Jesus. Ibana ma patumonaan ni angka na marriburibu na malua sian sipelebegu hinorhon ni hamamate ni Jesus. Nang angka na torop na maniondur i, tarharu do rohanasida, na manghorhon hamubaon ni rohanasida. On ma patujolo ni angka na porsea di ari pesta Pentakoste. On ma parbue ni tangiang pangondian ni Jesus sian silang i. ( Selamat Ari Parnongatan di hamamate ni Tuhan Jesus. (Pdt MSM Panjaitan, MTh)

PARTORDING NI PUNGUAN NA HOHOM DI ARI PARNINGOTAN HAHAMATE NI TUHAN JESUS ( PULUL 2 )

PARTORDING NI PUNGUAN NA HOHOM DI ARI PARNINGOTAN HAHAMATE NI TUHAN JESUS ( PUKUL 2 )

Pdt MSM Panjaitan, MTh

01.            Marende no.  76: 1.3, Sada na sangkap ni rohangku       (BL199)

1. Sada nama sangkap ni rohangku di sandok portibi on.

    Ndang tagamon na so las rohangku, molo jumpang au inon.

    Naeng ma sai ingoton ni rohangku, na binaen ni Jesus tu tondingku.

    Uju pinorsanNa i, saluhutna dosangki..

3. O Jesusku sai paingot ahu di dosangku, di basaM

    Ai andorang di na holom ahu  dipalambas Ho rohaM

    Nunga leleng dilului Ho do, au na lilu asa unang mago

    Ditaon Ho na bernit i lao manobus tondingki.

02.  Votum, Introitus, Tangiang.

Marhitehite Goar ni Debata Amanta dohot Goar ni AnakNa Tuhan Jesus Kristus dohot Goar ni Tondi Porbadia. Amen.

Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian!(Pang. 5: 12). Haleluya

    Martangiang ma hita: O, Tuhan Jesus, Birubiru ni Debata, na mamorsan dosanami! Na jongjong   do hami di jolom, marningot Ho, na targantung i. Tangkas do huantusi hami  habebernit ni na tinaonMu di dolok Golgata.Tungki do hami marningot dosanami na mangkorhon hamamateM i. Asi ma rohaM, urupi ma hami, asa gabe upa ni halojaonMu hami. Amen.

03.  Marende no. 83: 1, Na lao do birubiru i        BL. 214

1. Na lao do Birubiru i mamorsan angka dosa. Ni nasa hajolmaon i  di benget ni rohana.

   Diporsan do sahitta i dilehon do DiriNa i, tu tangan ni pamunu. Ditaoni do na bernit i,

   ro di na tos hosaNa i, didok : Naeng porsanonku.

04.  Sihajaon  I : (Yesaya 53: 1-7)

1 * Tung ise ma nuaeng porsea di jamitanami? Jala * tangan ni Jahowa, tung ise ma naung tumandasa?

2 Ai simbur do ibana tubu * songon tumbur di adopan ni bohina, jala songon tunas sian tano na mahiang. Ndang adong hinauli ni rupana manang hamuliaonna; ia huida hami ibana, ndang adong rupana umbahen sihalomohononhon ibana.

3 * Dileai jala dipasiding jolma do ibana, baoa na somal mangae pardangolan dohot sahit ibana, pola * ditabunihon halak bohina maradophon ibana, dibahen leana, jadi ndang pola hurajumi hami ibana.

4 Tongon do angka sahitta * diusung ibana, jala angka pardangolanta diporsan; alai anggo rohanta mandok: * Debata do maminsang, mamungkul dohot pasipal ibana.

5 Hape ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala.

6 Luhut do hita * lilu songon birubiru, ** ganup masitondong dalanna be, alai hajahaton ni hita sudena * dihonahon Jahowa tu ibana.

7 Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna.

05.       Marende no.  152: 1,  Jesus na na mamorsan  (BL. 120)

♫      Jesus na mamorsan dosa ni portibi on, pangolu hami.

      Jesus na marmosan dosa ni portibi on, pangolu hami.

                 Jesus  na mamorsan dosa ni portibi on, sai pasonang hami, Amen,Amen,Amen.

06.  Sijahaon II: (Yoh. 19: 16-17a ; Luk. 23: 26-31)

16 Dung i dipasahat ma Ibana tu nasida, asa di parsilangkon; jadi dijalo nasida ma Jesus.

          17 Laos Ibana do mamorsan hau pinarsilang i, laho tu inganan na margoar partangkurahan;  Golgata do goarna anggo di hata Heber.

26 Laho manogihon Ibana, disoro nasida ma sahalak, si Simon sian Kinene do goarna, na ro  sian ladangna; tu ibana ma dipaporsanhon hau pinarsilang i, paihutihut Jesus.

27 Mangihuthon Ibana torop halak nang angka boruboru na mananangisi jala mangandungi Ibana.

28 Jadi didompakkon Jesus ma nasida, ninna ma: Hamu, angka boru Jerusalem, unang ma Ahu tatangisi hamu, dirimuna dohot anakkonmuna ma!

29 Ai na ro ma angka ari sogot, dohononna ma disi: Martua ma angka na hol, angka ina na so dung tubuan jala na so dung panarusan!

30 Disi ma pungkaon ni halak mandok tu angka dolok: Tinggang i ma hami! Dohot tu angka tor: Hungkupi hami!

31 Ai molo songon on pambahennasida tu hau na rata, aha ma tagamon masa tu hau naung masak?

07.  Marende No. 76: 4, Sada na ma sangkap ni rohangku   BL. 199

♫   Gok di Ho ma au ale Tuhanku jala Ho ma jambarhi. Dok ma amen rongkom ma goarMu,

    tu bagasan rohangki. Lomo ni rohaM ma sungkunonku, di sude na naeng  ulahononku.   Olo i ma padanki tu Ho Jesus Tuhanki.

08.  Sijahaon III: ( Luk. 23: 32-34; Joh.19: 19-24);

32 Alai ditogihon dope dua halak nari, parjahat, sipamateon rap dohot Ibana.

33 Asa dung sahat nasida tu dolokdolok na margoar partangkurahan, diparsilangkon ma Ibana disi rap dohot angka parjahat i, na sada tu siamunna, na sada nari tu sihambirangna.

34 Jadi didok Jesus ma: Ale Amang! Marpamuati ma roham mida nasida, ai ndang diboto nasida na binahennasida i. Laho marbagi ulosna, manjomput na sinurat ma nasida.

19 Alai disurat si Latus ma sada boaboa, dipalohot ma i tu hau i. On do hatana: Jesus, halak Nasaret, raja ni Jahudi!

20 Jadi torop ma Jahudi na manjaha boaboa i, ai jonok tu huta i do hapajalan ni Jesus, jala tarsurat do i di hata Heber, di hata Rom dohot di hata Junani.

21 Dung i didok sintua ni angka Jahudi ma tu si Latus: Unang surat i: Raja ni Jahudi; alai na nidokna i ma nian: Ahu do raja ni Jahudi!

22 Dung i dialusi si Latus ma: Na husurat i, naung sinurat do i!

23 Asa dung diparsilangkon angka soldadu i Ibana, dibuat nasida ma angka abitna, diparopat ma i, di ganup soldadu sabagian be, dungkon ni sampesampena. Anggo sampesampe i ndang marpanjaruman, na ditonun sambing do i.

24 Gabe masipandohan ma nasida: Unang ma taribahi on, martondung ma hita taringot tusi, manang di ise i. Jadi jumpang ma Surat i, na mandok: "Dibagi nasida do abithu; tondung do didabu taringot tu sampesampengku."

09.  Marende no. 78: 1.2,  O, ulu na sap mudar BL. 158

♫    O, ulu na sap mudar  binaen ni bugangMi.  Na sian janggarjanggar sisungsang duri i

     O ulu hatongamon hian do tumpalMi.   Ditaon Ho haleaon Ho naeng sombaonki.

♫    O, bohi parsinondang na sangap situtu. Beasa tung marlangan sap ijur hurumMu ?

     Tung aha ma alana umbaen homur mataM ? Na mintop  do sondangna di na lao tos hosaM.

10.  Sijahaon IV: (Mat. 27: 39-44; Luk. 23: 39 b-43)

39 Alai dilealeai angka na mamolus i Ibana, angka dipaelengeleng uluna mandok:

40 E Ho, na mangalohai joro i jala na pajongjongkonsa di bagasan tolu ari! Palua dirim, molo na tutu Ho Anak ni Debata; mijur ma Ho sian hau pinarsilang i!

41 Suman tusi do pangaleai ni angka sintua ni malim sibotosurat dohot sintua ni bangso i, ai didok be:

42 Ia na asing dipalua, dirina so tarpaluasa. Raja ni Israel do Ibana! Antong, mijur ma Ibana sian hau pinarsilang i, asa porsea hami di Ibana!

43 Naung dihaposi Debata; antong, I ma paluahon Ibana nuaeng, molo na lomo rohana, ai ninna do: Anak ni Debata do Ahu!

44 Laos songon i do pangaleai ni panamun i, na rap diparsilangkon dohot Ibana.

39b. “Ai ndada Kristus i Ho? Palua ma dirim, nang hami antong!”

40 Alai dialusi donganna ibana, dipinsang ma, ninna ma: Ndang dihabiari ho hape Debata, atik pe rap hona uhum hita?

41 Uhum na tigor do na tu hita, ai tajalo do upa ni pambahenanta; alai anggo Ibana, ndang adong diula na so ture.

42 Laos ninna ma: O Jesus, ingot ahu, ia dung sahat Ho tu harajaonmi!

43 Gabe ninna Jesus ma mandok ibana: Situtu do hatangkon tu ho: Sadari on do ho rap dohot Ahu di Paradeiso!

11.  Marende no.  79:1. 8, Di na ponjot rohangku (BL. 124)

♫   Di na ponjot rohangku binaen ni dosangki. Paingot au Tuhanku di hamamateMi

    Di hau na pinarsilang i digarar Ho utangku marhite mudarMi.

♫   Sai sonang ma rohangku binaen ni bugangMi. Di na lao tos hosangku marningot mudarMi  Pos ma rohangku baenon ni pamasuhonMu ahu marnida bohiMi.

12.  Sihaon  V: (Mat.27:45-47; Joh.21: 28-30a; Luk. 23: 46)

45 Alai olat ni hos ni ari ro di pungkul tolu holom ma sandok tano i.

46 Alai tar di pungkul tolu dipangiar Jesus ma soarana, dianggukhon ma: Ale Debatangku, Debatangku, boasa tung tadingkononmu Ahu (Eli, Eli, lama sabachtani)?

47 Alai umbege i, ninna na deba sian angka na jongjong disi: Na manjou si Elia do

            28 Jadi dung diboto Jesus, naung marujung saluhutna, asa jumpang na tarsurat i, ninna ma:   Mauas Ahu!

            29 Jadi adong ma disi isian ni tuak na asom, jadi dibutongi nasida ma limut tubagasan tuak na  asom i, dipalohot ma i tu sada tolong, laho manurdukkon tu pamanganna.

            30 Jadi dung dijalo Jesus na asom i, ninna ma: Nunga marujung! 23:46 Dung i marsoara na gogo ma Jesus, ninna ma: Amang! Tu bagasan tanganmu ma hupasahat tondingku! Jadi dung didok i, tos ma hosana.

Tapahohom ma rohanta jala martangiang be di bagasan rohanta.

  (Manguling giringgiring 7 hali marholangholang )

13.  Marende no.  78: 7.8,  O. Ulu na sap mudar ( BL 158 )

♫   Di na tadingkononku sude di tano on. Disi ale Tuhanku  dapothon ma au on.

    Di na ponjot rohangku manostos hosangki. Sai jangkon ma tondingku marhite mudarMi.

♫   Ho ma pangondinganku Siapul rohangki. Di na lao tos hosangku di hamamatengki.

    Disi ma ingotonku sude na tinaonMi. Na timbul do tuangku lao mate songon i.

14.  Sijahaon  VI:  (Mat. 27: 51-54; Luk. 23: 48)

51 (Jadi ida ma ) Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak.

52 Mungkap ma angka tanoman, dung i hehe ma daging ni torop na badia angka na modom disi,

53 gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

54 Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: Tutu do On Anak ni Debata!

48 Jadi sude natorop i, na marluhut mainondur, masitompuk andorana, marnida na masa i, laos mulak ma.

15.                 Marende no 81: 6,  Jesus mual ni ngolungku   (BL. 185)

♫   Sai pinuji ma GoarMu  ala ni na bernit i  Dohot ala ni mudarMu Jesus na nilehonMi

    Lao pasaehon dosanami asa unang mago hami.  Ho hupuji ala ni salelenglelengna i.

16.  Sijahaon  VII:  (Mat. 27: 55; Yoh. 19: 31-36)

55 Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana.

31 Ala tongon ari parhobasan ni pesta na balga, naeng ma unang di hau pinarsilang angka bangke di ari Sabbat i; ala ni i dipangido angka Jahudi ma tu si Latus, asa disuru na mangarosak haehaenasida jala dipaijur.

32 Gabe ro ma angka soldadu i, dirosak ma haehae ni na parjolo i, songon i do donganna na rap tarsilang dohot Jesus.

33 Alai dung sahat nasida tu Jesus, diida ma naung sanga mate Ibana, gabe ndang dirosak be haehaena.

34 Alai ditullangkon sada sian angka soldadu i ma mundimundina tu andora ni Jesus; jadi manigor puas ma sian i mudar mardongan aek.

35 Na marnidasa i do na mangkatindangkon i, jala sintong do na hinatindangkonna i. Ibana do umboto sintong ni na nidokna i, asa anggiat dohot hamu porsea.

36    i na masa do i, asa jumpang na tarsurat i, na mandok: "Ndang jadi ponggolon holiholina!"

17.  Marende no.  85: 1.3, Sai ingoton ni rohangku   ( BL. 227 )

♫   Sai ingoton ni rohangku, hansit naung di taon Tuhanku, uju i di Golgata.

♫   Tung so dapot huhatahon, haporsuhon na ditaonhon, holan ala dosangki

18.  Sijahaon VIII: (Mark. 15: 42-46; Yoh. 19: 38-42; Mark. 15: 46 b; Luk. 23: 55-56)

42 Jadi dung bot ari, di ari parhobasan i, i ma patujolo ni ari Sabbat,

43 ro ma si Josep sian Arimatea, na masuk rapot godang, halak na sangap na maimaima di harajaon ni Debata; dipatomos ma rohana laho bongot tu jolo ni si Latus, mangido bangke ni Jesus.

44 Jadi longang ma roha ni si Latus, ala naung mate; gabe dijou ma letnan i, disungkun ma ibana, manang naung leleng mate.

45 Asa dung ditangkasi i sian letnan i, dipasahat ma bangke i tu si Josep.

46 Dituhor si Josep ma dagangan, dipaijur ma Ibana, dibaluti ma tu dagangan i, dipeakkon ma bangke i tu tanoman sada na niliang tu bagasan batu; dung i digulang ma sada batu tu baba pintu ni tanoman i

38 Dung salpu i dipangido si Josep na sian Arimatea ma tu si Latus, paijuronna bangke ni Jesus. Sisean ni Jesus do ibana, alai marsibuni do ala ni biarna mida angka Jahudi. Jadi dioloi si Latus ma i. Dung i ro ma ibana, dipaijur ma bangkena.

39 Alai ro ma nang si Nikodemus, i ma naung ro manopot Jesus bornginborngin najolo, diboan ma mir na marsaor aloe arga saratus hati.

40 Dung i dibuat nasida ma bangke ni Jesus, dibaluti ma tu dagangan rap dohot na hushus i mangihuthon adat pananomon ni Jahudi.

41 Alai adong ma mardonokkon hapajalanna i sada porlak, jala di bagasan porlak i adong sada tanoman na imbaru, na so dung hapeahan ni manang ise dope.

42 Asa tusi nama dipeakkon nasida Jesus, siala ari parhobasan ni Jahudi;

ai jonok do tanoman i.

46b Dung i digulang ma sada batu tu baba pintu ni tanoman i.

55 Alai mangihut do angka parompuan, naung mandongani Ibana ro sian luat Galilea; dibereng nasida do tanoman i ro di parpeak ni bangke i.

23:56 Dung i muli ma nasida paturehon angka na hushus ro di miak mir. Jala manipat ari Sabbat i, so nasida mangihuthon patik i.

19.  Marende 334: 3, Nasa jolma ingkon mate  (BL. 186 )

♫   Jesus Kristus nunga mate ala ni mangolu au. Singkop tua diparade i pe las rohangku lao,

     manadingkon pardagangan mandapothon hasonangan. mandapothon Jesuski,

     ai malungun au tusi.

20.  Sijahaon  IX :  (Mat. 27: 62-66)

62 Alai torang ni arina i, na mangihut tu ari parhobasan i, marluhut ma angka sintua ni malim ro di Parise.

63 Huingot hami, Tuannami, naung didok Pangansi i, di na mangolu dope Ibana: "Na hehe ma Ahu di ari patoluhon!"

64 Antong, dokkon ma na manjaga tanoman i sahat ro di ari patoluhon, asa unang ro angka siseanna manangko Ibana, jadi dohononnasida ma tu natorop: Naung hehe Ibana sian na mate; gabe rumoa maon sipaotooto parpudi sian na parjolo i.

65 Jadi didok si Latus ma tu nasida: Togihon hamu ma parjaga i! Laho ma hamu mangaramotisa sian nasa rohamuna!

66 Dung i laho ma nasida mangaramoti tanoman i, dipajagahon, huhut ma disahapi batu i.

21.  Marende no. 83: 4, Na lao do birubiru  ( BL 214 )

♫   Saleleng na mangolu au, naeng ingotonku Jesus.Sude na binaenMi di au, hataM naeng hupatulus. Ho naeng haholonganku do , huhut ihuthononku Ho, di dalan hangoluan.  Tung ingkon Ho, nampuna ahu, mangolu manang mate au, sai Ho do tioponku.

22.  Tangiang Panutup/ Pasupasu.