JAMITA NI DEBATA DI ARI HAMAMATE ( MATEUS 27: 45-56 )

JAMITA NI DEBATA DI ARI HAMAMATE

( Mateus 27: 45-56)

                Di hata patujolo ni Pdt Dr Justin Sihombing laho patolhashon turpuk on, didok songon on: Ia di angka huria mulamula najolo, ndang apala masa parjamitaon di ari pesta hamamate ni Tuhan Jesus; holan barita ni sitaononna i do dijaha di punguan ni huria na marhahohomon. Adong do di tingki i sada Uskup, na margoar Innocenz. Molo diigil halak ibana asa marjamita di ari i, didok ibana do : ” songon dia ma tarhona ahu marjamita, hape ia Tuhanku benget jala hohom manaon sitaoonon jala mate. Aha ma hatahononku? Nda lobi mangkorhon hata ni bugangna na lima i sian jamita? Molo so tarharu roha ni jolma dibahen bugangna i, ndang tagamon tarharu bahenon ni jamita ni jolma. Ndang ringkot marjamita di Gogata;  tangis dohot manompuk andora do tama hita disi, ala pola mate Tuhanta ala ni dosanta”.

                Sintong do pandok ni Uskup i. Alai molo borat do jolma marjamita, ise nama na marjamita? Debata ma marjamita. Dipaboa turpuk sadarion do, na Debata marjamita tu hita. Dipatubegehon Ibana do tu hita jamita ari hamamate, na gumogo sian jamita ni jolma. Ia na niondohon ni jamita i, i ma taringot tu:  na mangholom mataniari,  maribak hirehire na di bagas joro, muba roha ni induk ni tentara na mamajal Tuhanta i. “ ( Dienet sian buku, J. Sihombing, Ibana do Pardameanta 2, Pematangsiantar 1973, hal. 87).

                Taringot tu “na mangholom mata ni ari saleleng tolu jom” andorang so mate do pe Jesus di silang i, dipatorang do songon on: “Songon halak na marsiluluton, na martujungkon abit na birong, songon i do mata ni ari martujungkon haholomon siala sitaonon ni Jesus”. Jadi ndang ala ni gerhana  mata niari, manang ala ni na mapultak dolok marapi di tingki i, songon na pinandok ni deba halak. Alai hajujumpang ni na tarsurat di Jesaya 53: 4 i do, na mandok” “Debata maminsang, mamungkul dohot pasipal Ibana”. Dohot na di 2 Kor. 5: 21, na mandok: ”Ai on do dipatupa Debata: Humongkop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana”. Dohot Jesaya 53: 5: “Ampe tu ibana pinsangpinsang parhitean ni hasonanganta”.

                Taringot tu na “maribak hirehire na di bagas joro”,dipatorang songon on: “Ia hirehire i, ima na patorangkon parholangan ni Debata na badia sian jolma pardosa. Songon na nidok ni panurirang Jesayas (59: 2): “Angka hajahatonmuna tahe sumirang hamu sian Debatamuna, jala angka dosamuna mangondingi bohina maradophon hamu, umbahen so ditangihon ibana hamu”. Disi mate Jesus, laos apala di na satongkin i maribak ma hirehire i, matompas ma dorpi parholangan i. I ma hirehire “dosa” i. Songon hirehire na maribak i, songon i maribak daging ni Jesus naung gabe dosa i ( Heber 10: 20). Jadi lungkas ma dalan tu bilut na badia situtu, tu inganan ni Debata. Ndang adong be ambatambat di jolma na porsea marsaor dohot Debata.

                Taringot tu na “muba roha ni induk ni tentara na mamajal Tuhanta i”, songon hatoranganna: “ Alai dung diida induk ni tentara i rap dohot angka donganna na jumaga Jesus,  lalo i ro di angka na masa i, mabiar situtu ma nasida ninna ma: Tutu do On Anak ni Debata! Jala sude natorop i na marluhut mainondur masitompuk andorana marnida na masa i.  Halonganan do panindangion ni tentara i, gabe tiur rohana di na satongkin i. Nunga torop diida ibana na mate di porang alai anggo songon hamamate ni Jesus ndang adong diida, ai hamamate n marmulia do i. Gabe tubu do pingkiranna mandok: na so tigor uhum ni panguhum i tu Jesus. Ibana ma patumonaan ni angka na marriburibu na malua sian sipelebegu hinorhon ni hamamate ni Jesus. Nang angka na torop na maniondur i, tarharu do rohanasida, na manghorhon hamubaon ni rohanasida. On ma patujolo ni angka na porsea di ari pesta Pentakoste. On ma parbue ni tangiang pangondian ni Jesus sian silang i. ( Selamat Ari Parnongatan di hamamate ni Tuhan Jesus. (Pdt MSM Panjaitan, MTh)