TANGIANG ALE AMANAMI

TANGIANG ALE AMANAMI

    Ganup parmingguon manang partangiangan na pinatupa ni huria sai diujungi do dohot tangiang “ Ale Amanami”, ima tangiang na niajarhon ni Tuhan Jesus tu angka sisean-Na. Alai mansai porlu do ra taantusi aha do lapatan ni Tangiang Ale Amanami i, asa unang holan rumusan ni hatahata na boi taapil sambing non i. Asing do tangiang on sian angka tangiang na asing na pinasahat ni paragenda, manang angka tangiang hapunjungan na pinasahat ni angka ruas ni huria i. Sudena i ima angka tangiang i na nirumushon ni  roha dohot pingkiran ni jolma  sambing do.  Alai anggo Tangiang Ale Amanami ima tangiang  na hinatahon jala na  niajarhon ni Tuhan Jesus sandiri, tu angka siseanNa. Tuhan Jesus do na manusun angka hata ni tangiang i. Sude  tangiang memang tahaporseai ditangihon jala  diargahon Tuhan i do, alai ndang sude pangidoan na tatangiangkon diolohon Tuhan i. Tongtong do Ibana pasahathon silehononNa hombar tu lomo ni roha-Na. Ndang boi paksahonon ni hita jolma ingkon pasauton ni Debata tangiangta. Ala ni do Tuhan Jesus mangajari angka sisean-Na dohot sude angka na porsea songon dia  martangiang na sintong tu Debata. Ndang na mandok ingkon tangiang na niajarhon ni Jesus  i ma tongtong  tangiangta tu Ibana. Alai ima na gabe pedoman di ganup  na porsea molo martangiang ibana tu Debata. Jempek jala bulus do tangiang i, ndang songon partangiangon ni angka pangansi na mangkalomohon jongjong martangiang di angka parguruan dohot di dalan balobung, asa diida jolma i nasida; manang  ndang marnoninoni songon tangiang binahen ni sipelebegu, na mangarimpu tangihonon ni Debata nasida ala ni deak ni hatahatanasida ( pat. Mat. 6: 5.7).

    Dimulai do tangiang i marhite na manjouhon: "Ale Amanami na di banuaginjang". Marhite i boi tabereng, torang do alamat ni tangiang i tu ise pasahaton, i ma tu Debata Ama na maringanan di banuaginjang, ndada tu Tuhan Jesus. Laos tiruan do i di hita, na so tu Tuhan Jesus langsung alamat manang hasahatan ni tangiangta, alai tu Debata Ama i do.  Holan parhitean do Tuhan Jesus di tangiangta, manang na mangondihon hita tu Ama i (pat. Joh. 14: 13). Debata do Ama na sasintongna di hita, jala hita angka anakhon-Na. Di hubungan na songon i ma boi hita di bagasan habaranion dohot pos ni roha mangido tu Ibana songon sahalak anak mangido tu ama na manghaholongi ibana jala na hinaholonganna. 

    Dungi i, di tangiang i adong pitu pangidoanta. Alai ndang sude pangidoan i na mardomua tu haporluanta. Tolu pangidoan na parjolo na mardomu tu hasangapon dohot hamuliaon ni Debata do. Marlapatan di sude tangiangta, ingkon sai patujoloonta do hasangapon dohot hamuliaon ni Debata. Molo tapangido: “Sai pinarbadia ma GoarMu!”,  di sipangidoon parjolo, ndada ala ni na so badia Goar Ni Debata, alai asa tongtong do badia Goar-Na i di roha nang di sandok ngolunta siganup ari. Songon i dohot pangidoan paduahon: “Sai ro ma harajaonMu!”, Ia harajaon ni ni Debata sai na ro do i nang pe so tangido, ai Debata do Raja Na Manggomgomi sandok hasiangan on ro di hajolmaon. Alai asa haru harajaon ni Debata na manggomgomi ngolunta dohot sandok portibion, i do na tapangido disi. Laos tapangido do di sipangidoon patoluhon: “Sai saut ma lomo ni rohaM di banua tonga on songon na di banua ginjang!”, asa lomo ni roha ni Debata  ma ma na  tongtong  saut di ngolunta dohot di sandok portibi on, unang lomo ni rohanta sandiri dohot angka hagiothagiot ni portibi on. 

    Dungi mangihut ma opat pangidoan na  porlu di parngoluonta si ganup ari isara ni sipanganon, hasesaan ni dosa, pangaramotion ni Debata, dohot haluaon. Di sipangadoon paopathon tapangido do: “Lehon ma d hami sadarion hangoluan siap ari” ( di hata Indonesia: Berilah kami pada hari ini makanan kami yang sesukupnya), marlapatan do i ndada holan sipanganon na gabe hangoluan siaganup ari.  Asing ni sipanganon, masuk tu hangoluan siapari do: parabiton, arta, bagas, dongan saripe dohot anakhon na burju, naposo (pangurupi), raja na tigor, dame, hisar ni pamatang dohot partondion,  sangap, aleale na denggan roha, dongan sahuta na ture, ro di nasa na hasea di hajolmaon. Di pangodoanta i, holan tu sadari (hari ini) do na tapangido i, ala ingkon ganup ari do hita mangidohon tu Tuhanta, ndang sae holan sahali mangido bahen haporluan saleleng ni ngolunta. Tongtong do ingkon ganup ari, ganup tingki do hita marsigantung tu Tuhanta i. 

    Na palimahon, tapangido do hasesaan ni dosa: “Sesa ma dosanami songon panesanami di dosa ni angka na mardosa tu hami!” Tapangido do asi ni roha ni Debata, asa anggiat unang dijujur dosanta, jala unang biasan roha-Na mangoloi na itapangido sian Ibana ala ni dosanta i. Alai hita pe ingkon olo do manesa dosa ni angka na mardosa tu hita, dohot sumuan uhum na denggan tu nasida. Jadi ndang une di roha di Debata hita mangido hasesaan ni dosa sian Tuhanta, hape hita sandiri ndang rade manesa dosa manang sala ni donganta tu hita.  

    Paonomhon tapangido do: “Unang hami togihon tu pangunjunan”! Marhite on tapangido do sian Debata, asa diramoti Debata hita unang diansi sibolis i manang hajolmaon manang roha ni dagingta i hita, jala asa unang olo hita manopot pandelean manang haurahon dohot hajahaton na asing; molo tung adong sisongon i ro tu hita, asa ditumpak Debata hita monang, unang talu hita maradophon nasa pangunjunan na boi ro tu hita. 

    Papituhon tapangido do: “Palua ma hami sian na pangago”!  Marhite on tapangido do sian Debata, asa dipadao sian hita nasa hamagoan ni daging, tondi, pansamotan dohot hasangapon; dilehon tu hita hasonangan di hasusuda ni bohalta, jala diboan hita sian rura hasusaan on tu banuagonjang di lambung-Na.

      Dipasimpul do tangiang i dohot doksologi: “Ai Ho do nampuna harajaon dohot hagogoon dohot hasangapon ro di saleleng ni lelengna”. ima pujipujian tu Debata. jala ditutup dohot hata “Amen”. Ingkon sipujionta do Debata di sandok ngolunta, jala dimanang aha pe na taula. Songon na nidok ni apostel Paulus di 1 Korin 10: 31: "Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata!

   Ditutup do tangiang i dohot hata "Amen". Amen  lapatanna, ima na tutu situtu, jumpang ho ma na pinangidom. Tanda ni pos ni roha do i na tangihonon ni Debata na mangajari hita martangiang do tangiangta, jala oloan-Na do na itapangido hombar tu na binagabagahon-Na, ai Ibana do na mandokhon hita mangido sian Ibana. ( pdt msm panjaitan )