ATURAN
NI PARPUNGUAN DI TINGKI PARNINGOTAN DI PANAONON NI TUHAN JESUS
I
01. Marende No. 76: 1-2, Sada nama
sangkap ni rohangku (BL.199)
Ndang tagamon na so las rohangku, molo jumpang au
inon.
Tabereng ma induk ni haporseaon i jala
na paujungkonsa, i ma Jesus, na manaonhon
parsilangon i, singkat ni las ni
roha, tohapna i hian, so dietong i hailaon, gabe hundul di siamun ni habangsa
ni Debata!
Paingotingot hamu ma Ibana, na
pataontaonhon paraloan sisongon i dompak Ibana sian angka sipardosa asa unang marnaloja hamu,
unang mandate tondimuna! Halelya
Martangiang ma hita: Ale Amanami
Parasi roha na sumurung, Debata ni hatuaonnami! Huingot hami do di angka ri ni
panaonon dohot hamamate ni Tuhan Jesus Kristus, Tuhannami. Pahibul ma rohanami jala parbadiai mamingkiri
sude na tinaon-Na i. Patandahon ma tu hami dosanami,asa diarsakhon rohanmai ,
asa hupompomi hami hisaphisap dohot sangkapsangkap ni rohanami, jala asa
hupasaut hami lomo ni roha ni na manobus hami, asa martua hami marhitesian i ro
di salelenglelengna. Sai patupa ma i di hami marhitehite TuhanJesus Kristus,
Anak haholongan ni rohaM. Amen.
Jesus
na mamorsan dosa ni portibi on, sai pasonang hami,Amen,Amen,Amen.
32
Ai pasahaton ma Ibana tu angka parbegu, gabe insahanna, leaanna jala tijuranna
ma Ibana.
33
Linsinganna jala pusaonna do Ibana; dung i mulak mangolu ma Ibana di ari
patoluhon.
34
Ndang diantusi nasida agia otik sian i; na buni do hata i sian rohanasida,
ndang diboto nasida na hinatahonna i.
05. Marende No. 81: 1.3, JESUS MUAL NI NGOLUNGKU ( BL. 185)
♫ Bugang sada tanggurungmu Di na hona
linsing i Hamamalum ni bugangku Na di
rohangki do i Ho do gabe binuraan Au
dapotan hangoluan Ala ni hupuji Ho Tung
marribu hali do.
48
Molo itapasombu Ibana, porsea ma halak saluhutna di Ibana, gabe ro ma halak Rom
maon mangarampas tanonta dohot bangsonta.
49
Alai hehe ma sada sian nasida, i ma si Kayapas, sintua ni malim di na sataon i,
didok ma tu nasida: Na hurang roha do hamu!
50
Ndang dipingkiri rohamuna, dengganan do mate sada halak humongkop natorop i,
unang laho mago sandok bangso i.
51
Alai ndang sian rohana sandiri dihatahon i; ala sintua ni malim ibana di na
sataon i, umbahen na disurirangkon, na naeng mate ma Jesus humongkop bangso i.
52
Alai tahe, ndada holan laho mangkongkop bangso i; alai naeng papunguonna angka
anak ni Debata, angka na marserak dope, laho pasadahonsa.
53
Asa olat ni na sadari i martuptup i ma nasida laho mamusa Ibana.
07. Marende no. 77: 4-5, Hamu saluhut halak ( BL 65 )
♫
Sandok mauliate do au di Ho naung mate, lao pangoluhon au
2
Jadi dipauli nasida ma disi panganon ujuan di Ibana; si Marta do marhobasi, si
Lasarus ma sada donganna mangan disi.
3
Gabe dibuat si Maria ma sahat i miak Nardus na arga na so marsaor, dimiahi ma
pat ni Jesus, obukna ma dibahen mangalapu. Jadi digohi uap ni miak i ma bagas
i.
4
Jadi sada sian angka siseanna, si Judas Iskariot na naeng manjehehon Ibana,
mandok:
5
Boasa so ginadis miak i arga tolu ratus hupang, bahen silehonlehon nian di
angka na pogos?
6
Alai ndada na pogos sinarihonna, umbahen na didok songon i; panangko do ibana
tahe, diusung do asiasi ni halak, ai tu ibana dipasahat puro i.
7 Dung i ninna Jesus ma: Pasombu ma
ibana, ai diparade do i hira tu ari hatatanomhi.
8 Ai tongtong do adong na pogos di
tongatongamuna, alai anggo Ahu ndang tongtong di lambungmuna.
8 Intap na tarbahensa do na niulana
i; na manjoloani do ibana mamiahi pamatangku
songon di na mananom.
9 Situtu do hatangkon tu hamu:
Manang didia di liat portibi on dijamitahon muse barita na uli on, hatahononna
do nang binahenna i gabe baritana.
09. Marende no. 79: 7-8, Di na ponjot rohangku ( BL 124)
13 Jadi dibuat
nasida ma angka maremare, laho manomunomu Ibana huhut dijoujouhon: Hosianna!
Pinanasupasu ma na ro marhite Goar ni Tuhan i, Raja ni Israel!
14 Dung i dapot
Jesus ma halode sada, i ma dihunduli, hombar tu na tarsurat:
15 "Unang
ho mabiar, boru Sion; ida ma, Rajam do na ro, marsihundul di anak ni
halode!"
39 Jala halak Parise i deba, na sian
natorop i, mandok tu ibana: Orai ma antong angka siseanmi, Guru!
40 Jala ninna ma mangalusi: Hudok ma
di hamu: Aut mauhom nasida, joujou ma angka batu!
11. Marende no. 83: 5, Na lao do birubiru i ( BL 214 )
4 Gabe laho
ibana martuptup dohot angka sintua ni malim raphon angka panungganei, manang
dia dalanna pasahathon Ibana tu nasida.
5 Jadi sian las
ni rohanasida marpadan ma nasida, mangalehon hepeng tu ibana.
6 Dioloi si
Judas ma i, jadi dilului ma tingki na une pasahathon Ibana, so sian pamotoan ni
natorop i.
13. Marende 86: 1-2, SILANG NA BADIA BL.
67
♫ Silang na badia i Ho do lombulombungki
16. Tangiang Panutup
/ Pasupasu
II
01. Marende
no. 80: 2,4,5, Mauas Jesus ( BL 39)
♫ Holong ni rohaM o Tuhan Jesus Ise ma na tuk mandodo i ?
02.
Votum, Introitus,
Tangiang
Marhitehite Goar ni
Debata Amanta, dohot Goar ni AnakNa Jesus Kristus, dohot Goar ni Tondi Porbadia, na tumompa langit dohot
tano on. Amen
Songon pangkaholongina di angka na di Ibana
na di portibi on, laos songon i do dihaholongi nasida ro di ujungna. Haleluya
Martangiang
ma hita: Ale tuhan Debata, Ama ni saluhut
parasinirohaon! Nunga ditatap
Ho
hami bangsoM o, ai ndang manjua Ho mangalehon AnakMu na sasada i, Tuhan Jesus. Kristus tu tangan ni pardosa, asa
taonononna haleaon dohot siak ni bagi sahat ro di hau na pinarsilang. Sai
tumpahi hami marhitehite asi ni rohaM, asa margogo hami jala marbeneget ni roha
songon anak haholongan ni rohaM i di angka sitaonon, asa marsangap GoarMu dohot
AnakMu, Tuhan Jesus Kristus, dohot Tondi Porbadia marhitehite hami. Amen.
03. Marende no. 152: 1: Jesus na mamorsan ( BL 120)
♫
Jesus na mamorsan dosa ni portibi on, pangolu hami.
04. Sijahaon 1: Matius 16: 17-18; Mark. 14: 13-17
17 Alai di ari parhobasan parjolo ni pesta Paska i
didapothon siseanna ma Jesus, angka ninna ma: Tudia ma patureonnami di Ho
panganon Paska i, dipangido roham?
18 Gabe didok ma: Laho
ma hamu tu huta i, manopot si anu, dok hamu ma tu ibana: Tona ni Guru i: Na
dapot ne ma tingkingku, di ho ma Ahu sorang, laho mangan Paska i rap dohot
siseanku.
14 Jadi dok hamu ma tu nampuna jabu na
binongotanna i: Tona ni Guru i tu ho: Didia do bilut inganan, asa disi hupangan
hami Paska i rap dohot siseanki?
15 Jadi patuduhononna ma tu hamu bilut
parginjang sada, na lambas, na tipak hinembangan, disi ma pature hamu di hita!
16
Borhat ma siseanna i, dibongoti ma huta i, jadi jumpang nasida ma tutu songon
na nidokna i, gabe dipature ma Paska i.
17 Asa dung bot ari, ro ma Ibana rap
dohot na sampuludua i.
05.
Marende no. 179: 3-4, Adong do
sada mual ( BL 20
♫ Ai mudar ni Tuhanta i, do mual i sintong Durus di Golgata do i mangkophop hita on.
06. Sijahaon 2: Joh. 13: 4-17
5
Diusehon ma aek tu sambong, dung i diburi ma pat ni angka siseanna, diapusi ma dohot
basahan na tinapolhonna i.
6 Dung i sahat ma
Ibana tu si Simon Petrus, jadi didok i ma mandok Ibana: Tung Ho ma, ale Tuhan,
mamburi pathu?
7 Dung i ninna Jesus
ma mangalusi ibana: Ndang diantusi ho pambahenankon na tu ho anggo nuaeng; muse
pe botoonmu i.
8 Dung i didok si
Petrus ma tu Ibana: Matua tano on ndang burionmu pathu! Dung i ninna Jesus ma
mangalusi ibana: Molo so burionku ho, ndang partohap ho di Ahu!
9 Dung i ninna si
Simon Petrus ma: Ale Tuhan, unang ma holan pathu, dohot ma tangan dohot
ulungku!
10 Gabe didok Jesus
ma tu ibana: Halak naung maridi i, ndengkon be burion, ai nunga sude ibana ias.
Naung ias do anggo hamu, alai ndang luhut hamu.
11 Ai ditanda do
sipasahat Ibana, umbahen na didok: Ndang saluhut hamu ias!
12 Asa dung diburi
Jesus patnasida dipangke ma muse ulosna, hundul ma Ibana, didok ma tu nasida:
Ai diantusi hamu do pambahenanki tu hamu?
13 Digoar hamu do Ahu
Guru jala Tuhan, jadi ture do pandokmuna disi; ai i do Ahu tutu.
14 Asa molo Ahu, Tuhan jala
Gurumuna, mamburi patmuna, tama ma nang hamu masiburian pat!
15 Ai sitiruon do
hulehon tu hamu, asa dibahen hamu songon naung hubahen i tu hamu!
16 Na tutu situtu do
na hudok on tu hamu: Ndang umbalga anak somang sian indukna, ndang sumurung
suruan sian na marsuru ibana.
17 Molo diboto hamu
i, martua ma hamu mangulahonsa!
07.
Marende no. 83: 4, Na lao do
birubiru i ( BL. 214)
Saleleng na
mangolu au, naeng ingotonku Jesus. Sude na binaenMi di au,
hataM naeng hupatulus.Ho naeng haholonganku do , huhut ihuthononku Ho
08. Sijahaon 3: Mat. 26:
21-24; Joh. 13: 23-27.30.
21 Jadi di na mangan i nasida,
ninna ma: Situtu do na hudok on di hamu: Sada sian hamu naeng pasahathon Ahu!
22
Dung i marsak situtu ma rohanasida, gabe dipandok be ma tu Ibana: Nda tung ahu
i, Tuhan?
23 Alai ninna ma mangalusi: Ia i
na rap dohot Ahu manurdukkon tanganna tu paringkauan, i do na pasahathon Ahu!
24 Tong do nian ujung ni Anak ni
jolma i, songon na tarsurat hian; alai marjea do halak na pasahathon Anak ni
jolma i? Tagonan unang ma sanga tubu ibana tu hasiangan on!
23
Alai adong ma sada sian angka siseanna i, na hundul jumonok tu Ibana,
haholongan ni Jesus i.
24
I ma dihilap si Petrus jadi ninna ma mandok ibana: Sungkun ma, ise i na nidokna
i!
25
Jadi dipadonok ma tu lambung ni Jesus mandok tu Ibana: Tuhan, ise i?
26
Gabe dialusi Jesus ma: Ia tusi hulehon na santapik na husornophon on, i ma
ibana! Jadi disornophon ma santapik, dilehon ma tu si Judas Iskariot anak ni si
Simon.
27
Jadi dung dibondut i, dibongoti sibolis i ma ibana. Dung i didok Jesus ma tu
ibana: Humatop ma ula siulaonmi!
30
Asa dung dijalo si Judas na santapik i, pintor laho do ibana tu balian; alai
borngin ma uju i!
09.
Marende no. 173: 1.4., Sai mulak
sai mulak ( BL 63)
♫
Sai mulak, sai mulak Ho naung lao jalang i ? Ai na dao ho nuaeng holang
sian tuam. O parjalang ho. Mulak, mulak
ma ho. Mulak, mulak ma ho.
10. Sijahaon 4: Mat. 26: 26-29;
26 Jadi di na mangan i nasida, dihindat
Jesus ma roti, dipasupasu ma, diponggoli jala diparlehon ma tu angka siseanna,
huhut ma didok: Jalo hamu ma, pangan hamu; Dagingku do on!
27 Dung i dihindat ma panginuman,
didok ma mauliate, dilehon ma tu nasida, huhut ma didok: Sude ma hamu manginum
sian i!
28 Ai Mudarhu do on, mudar
parpadanan i, na niusehon humongkop torop, bahen hasesaan ni dosa.
29 Alai hudok ma tu hamu: Na so
tupa be inumonku olat ni on sian parbue ni hau anggur i sahat ro di ari sogot;
disi ma inumonku na imbaru rap dohot hamu di harajaon ni Damang.
11.
Marende 153: 1.4, O Jesus naung
sineat ( BL 126 )
♫
Jesus naung sineat, di hau na pinarsilang. RohaM tongtong daulat,
nang uju Ho tarhilang. Marutang
hosa hami, ditaon Ho dosanami, Asi rohaM o Jesus.
♫ Pelean na badia DagingMu sipanganon. Di angka na porsea MudarMu sinumon. Sai ro ma maringanan Marhite
parpadanan Di hami on, o Jesus.
12. Sijahaon 5: Mat. 26: 30-31.33; Luk. 22: 31-34.
30 Jadi dung diendehon nasida
ende pujipujian i, ruar ma nasida laho tu dolok Jetun.
31 Disi ma didok Jesus tu nasida:
Saluhut do hamu naeng targasip mida Ahu di na saborngin on, ai na tarsurat do:
"Lombutanku ma parmahan i, gabe marserak ma birubiru na sapunguan i."
33 Alai ninna si Petrus ma
mangalusi Ibana: Agia sude nasida targasip mida Ho, anggo ahu, na so tupa
targasip.
31 Alai ninna Jesus
ma mandok ibana: O Simon, Simon nunga dipangido sibolis i, naeng segeonna hamu
songon dahanon.
32 Alai Ahu do
manangiangkon ho, unang mintop haporsaonmi. Jala dung mulak sogot roham,
pargogoi ma roha ni angka hahaanggim!
33 Alai ninna si
Petrus ma mandok Ibana: Tuhan, na hobas do ahu mandongani Ho tu hurungan, nang
tu hamatean pe!
34 Alai ninna Ibana
ma: Hudok ma tu ho, Petrus: Ndang martatahuak manuk saborngin on, so jolo tolu
hali soadahononmu, na so tinandam Ahu.
13.
Marende no. 180: 1.2, Ro tu Jesus ho na loja ( Bl 228 )
♫ Ro tu Jesus ho na loja na maheu i lam lumbang do di lambungNa rohami
14. Jamita:
15.
Marende no. 82: 1-3, O Jesusku tu bugangMu ( BL 21 )
♫ Tu tanganMu ma tondingku, jumpa hamamatengki.Tu lambungMu, o Tuhanku,
alap na tinobusMi.
16. Tangiang Panutup / Pasupasu.
III.
01. Marende no. 83: 1-2, Nalao do birubiru i ( BL 214)
♫ Na lao do Birubiru i mamorsan angka dosa; ni nasa hajolmaon i di benget ni rohana
Diporsan do sahitta i dilehon do DiriNa i, tu tangan ni pamunu.
Ditaoni do na bernit i ro di na tos hosaNa i. Didok : Naeng porsanonku.
♫ Ianggo Birubiru i , Ima
alealengku Na paluahon
tondingki Disuru Debatangku
Didok mandok AnakNa i: Sai topot ma pardosa i, naung sun tinoruanku
Balga tutu do rimashi alai tarbaen do mombun i horhonon ni mudarMu
02. Votum, Introitus, Tangiang
Marhitehite Goar ni Debata Amanta, dohot Goar ni AnakNa Jesus
Kristus, dohot Goar ni Tondi Porbadia, na tumompa langit dohot tano on. Amen
Tagan jolma Ibana, dipelehon do
angka pangidoanna dohot elehelekna, mardongan angguk bolon dohot iluilu tu na
tuk paluahon Ibana sian hamatean; jadi ditangihon do Ibana, gabe malua sian
hatahuton i.Ai atik pe Anak i Ibana, diguruhon do pangoloion marhite sian na
tinaonanna i! Jala dung rimpas gabe sihorhon haluaon salelenglelengna do Ibana
di sude na mangoloi Ibana. Haleluya.
Martangiang
ma hit: Ale tuhan Debata, Amanami na di banuaginjang, Parasi roha na sumurung!
Na mandok mauliate ma hami sian nasa rohanami,ala dilehon Ho AnakMu na sasadai
tu hamatean humophop hami, asa unang mago na porsea di Ibana, alai asa
hangoluan na salelenglelengna di nasida. Tatap ma hami, ale Amanami di bagasan
AnakMu Jesus Kristus, na gabe habadiaon
dohot hatigoran di hami. Sai sesa ma dosanami saluhut ala ni pelean na sun denggan,
na pinelehonNai humophop hami. Sai paeleng ma pinggolMu tu tangiangnami jala
asi ma roham di hami marhitehite AnakMu Tuhan Jesus Kristus Tuhannami. Amen.
03. Marende
no 152: 1, Jesus na mamorsan ( BL 120 )
♫
Jesus na mamorsan dosa ni portibi on, pangolu hami.
Jesus na marmosan dosa ni
portibi on, pangolu hami.
Jesus na mamorsan dosa ni portibi on, sai pasonang
hami, Amen,Amen,Amen.
04. Sijahaon 1: Mat. 26: 36-41;
36 Dung i sahat ma
Jesus rap dohot nasida tu porlak sada na margoar Getsemane. Jadi didok ma tu angka
sisean i: Hundul ma hamu jolo dison, saleleng disan Ahu martangiang.
37
Dung i ditogihon ma si Petrus dohot anak ni si Sebedeus na dua i, dung i gabe
marsak situtu ma Ibana jala bobonosan.
38
Jala didok ma tu nasida: Mansai marsak situtu do rohangku, hira na mate do.
Dison ma hamu, dungo rap dohot Ahu!
39
Dung i laho ma Ibana saotik tujolo, dipatungkap ma bohina tu tano martangiang,
ninna ma: Ale Amang, namun na tarbahen, salpuhon ma siinumon on sian Ahu! Alai
tahe, unang marguru tu rohangku; roham do!
40
Dung i mulak ma Ibana tu angka siseanna, jala tarpodom do nasida didapot, jadi
didok ma tu si Petrus: Ndang margogo hamu hape dungo rap dohot Ahu nanggo
sangombas?
41
Dungo ma hamu jala martangiang, asa unang hamu bongot tu pangunjunan, ai na
girgir do nian tondi i, alai gale do ia daging!
05. Marende
no. 171: 1-2, Tandai ma au ( BL 49 )
♫ Tandai ma au, sungkapi ma dohot rohangku.
Uji ma au, pamanat huhut ma dalanku. Olo
ditanda Ho au Debata.
♫ Asi ma rohaM, taringot tu pangalahongku.
Olo tutu, jotjot
do na lilu dalanku. Sesa dosangku, sude Debata.
06. Sijahaon 2: Mat. 26: 42-46.
42
Dung i laho ma Ibana paduahalihon martangiang, ninna ma: Ale Amang, molo so
tarbahen salpu on, nda ingkon huinum, sai saut ma lomo ni Roham!
43 Dung i di na ro i
Ibana, tarpodom muse ma nasida didapot, ai mansai dokdok do salibonnasida.
44
Jadi ditadingkon ma nasida, diulakkon ma laho martangiang patoluhalihon, mandok
hata ondeng.
45 Dung i didapothon
ma muse angka siseanna jadi didok ma tu nasida: Datdatanmuna dope modom dohot
maradian? Nunga dapot tingkina nuaeng, sahat ma Anak ni jolma i tu tangan ni
pardosa.
46
Hehe ma hamu, laho ma hita! Ndi, nunga, ro na pasahathon Ahu!
07. Marende
no. 79: 7-8, Di na ponjot rohangku ( BL
124 )
♫ Sai naeng ma tiruonku, pambaenanMi di au tu sasude donganku,
Jesus urupi au Manghaholongi
donganki, unang tung marpambuat nang marpangansi pe
♫ Sai sonang ma rohangku Binaen ni bugangMi Di na lao tos hosangku
Marningot mudarMi Pos ma rohangku
baenon ni PamasuhonMu ahu Marnida bohiMi.
08.
Sijahaon 3: Joh. 18:
2-9; Mat. 26: 48-50.
2 Alai
diboto si Judas siparjehe i do inganan i, ai jotjot do marpungu tusi Jesus
dohot angka siseanna.
3 Ia
si Judas i, diarahon ma angka soldadu dohot angka naposo ni sintua ni malim, didapothon
ma tusi, mantat sulusulu, palito dohot sinjata.
4
Diboto Jesus do saluhut na naeng songgop tu Ibana, jadi ruar ma Ibana, didok ma
tu nasida: Ise do na jinalahanmuna i?
5 Gabe
ninna nasida ma mangalusi Ibana: Jesus, halak Nasaret i do! Dung i ninna Jesus
ma mandok nasida: Ahu do i! Alai dohot do si Judas siparjehe i jongjong di
lambungnasida.
6 Asa
dung didok tu nasida: Ahu do i, sumurut ma nasida, angka martinggangan ma tu
tano.
7 Dung
i diulahi ma manungkun nasida: Ise do na niluluanmuna? Jadi didok nasida ma:
Jesus, halak Nasaret i do.
8 Dung
i ninna Jesus ma mangalusi: Nunga hupaboa tu hamu: Ahu do i. Asa molo Ahu
dilului hamu, loas hamu ma laho angka on!
9 Ai
naeng do jumpang hata na nidokna i: Ndang adong na mago hubahen agia sada sian
angka na nilehonmi tu Ahu.
48
Alai nunga dipabotohon parjehe i hian partinandaan tu nasida, ai didok do: Ia i
na huumma, Ibana ma i; i ma tangkup hamu!
49 Asa
pintor didapothon ma Jesus, didok ma: Tabi di Ho, Guru! Laos diumma.
50
Alai ninna Jesus ma mandok ibana: Marhua ho tuson, anggia? O, Judas, pangummaon
do hape dibahen ho pasahathon Anak ni jolma i? Dung i ro ma nasida, dilaluhon
ma tangannasida tu Jesus manangkup Ibana.
09. Marende
no. 180: 1-3, Ro tu Jesus ho na loja (
BL 228 )
♫
Ro tu Jesus ho na loja na maheu i.
Lam lumbang do di lambungNa rohami.
♫ Bereng di hau pinarsilang daon ni sahitmi. Tuhanmi na hona uhum ringkatmi.
♫
Timbang holong ni rohana na sai godang i. Ai dilehon do hosaNa tobusmi.
10. Sijahaon 4: Mat. 26: 51-56.
51
Dung i adong ma sada sian angka dongan ni Jesus mangalaluhon tanganna, disintak
ma podangna, ditampulhon ma tu naposo ni sintua ni malim sahalak, dipisikkon ma
pinggolna.
52
Jadi didok Jesus ma tu ibana: Pasarung podangmi, ai na manintak podang, mago ma
bahenon ni podang!
53 Ai
na so tarbahen Ahu do di roham mangido sian Damang, asa dipadiri di Ahu saonari
lobi sian sampuludua loksa surusuruan?
54
Alai songon dia ma disi saut hata ni Surat i na mandok: Ingkon masa do na
songon i?
55 Uju
i ma didok Jesus tu angka natorop i: Hira na dompak panamun do hamu hehe,
marpodang jala marlombutlombut manangkup Ahu. Ariari do Ahu nian hundul
mangajari di bagas joro, so adong ditangkup hamu Ahu.
56
Alai na masa do sudena on, asa jumpang hata ni angka panurirang i. Dung i
ditadingkon saluhut sisean i ma Ibana laho maporus.
11. Marende
no. 182: 1-2, Haholongan na badia ( BL
24 )
♫ Tu joloM o Debatangku
sai use do rohangkon. Sai pasiat tangiangku
dohot iluilungkon.
♫
Husolsoli do rohangku Na gok dosa i tongtong. Ai godang
ariaringku
na hubahen ambolong.
12. Jamita:
13.
Marende no. 82: 1-3,
O Jesusku tu bugangMu ( BL 21 )
♫
Jesusku, tu bugangMu, ro marsomba
rohangkon.
Sai tarpuji, sai tarpuji, na pamalum
tondingkon.
♫ Tung di patMu, o Jesusku, solsolanku rohangki.
Tangisanku na tinaonMu, ala jat ni rohangki.
♫
Tu tanganMu ma tondingku, jumpa
hamamatengki.
Tu lambungMu, o Tuhanku, alap na tinobusMi.
14.
Tangiang Panutup /
Pasupasu.
IV
01. Marende 84: 1-3, Aut na ginorga tu rohangku ( 195 )
♫ Aut na ginorga tu rohangku, bohiM di na lao mate Ho. Aut na huingot o Tuhanku, tongtong pangkophopMi di au.Ai Ho do paluahon ahu, dosangku do
pinorsanMi.
Didaoni Ho parsahitonku, martua au binahen
ni i.
♫ Sai jalo ma’au ale Tuhanku. Baen upa ni na tinaonMi. Sai naeng ingoton
ni rohangku, tung sasude na binaenMi.Humophop au pardosa godang, dibahen holong
ni rohaM.
Hinorhon ni tarbaen au sonang, laho
mandapothon banuaM
♫ Mauliate ma rohangku, di Ho o Jesus Tuhanki. Ho naeng tongtong haholonganku Marningot denggan basaMi. Antong sai tiop ma tanganku, manogu au tu lambungMi. Dijalo Ho do tangiangku, sai pos do rohangki di si.
02.
Votum, Introitus,
Tangiang.
Marhitehite Goar ni Debata Amanta, dohot Goar ni AnakNa Jesus
Krustus, dohot Goar ni Tondi Porbadia na tumompa langit dohot tano. Amen.
Kristus
manaon na porsuk humongkop hamu, tumadingkon tiruan di hamu, asa diihuthon hamu bogas ni patna:"Ndang adong dosa
diula Ibana; ndang jumpang angkal di bagasan pamanganna. Ndang manginsahi
Ibana, di na hona insak, ndang mangasupi, di na manaon na porsuk; alai
dipasahat do tu Panguhum sitigor roha i. Haleluya.
Martangiang
ma hita: Ale Amanami na di banuaginjang, Parasi roha na sumurung di sude jolma.
Ndang diolani Ho AnakMu na sasada i, dilehon Ho do Ibana humophop hami mamorsan
dosanami sahat tu hau na pinarsilang i. Sai patogu ma rohanami, asa unang
ganggu hami manghaporseai hasesaan ni dosanami, asa unang mandele hami ala ni
dosanami, alai asa pos situtu rohanami di asi ni rohaM na godang i marhitehite
TuhanJesus Kristus Tuhannami, Anak
haholongan ni rohaM. Amen.
03.
Marende no. 152: 1, Jesus na
mamorsan ( BL 120 )
♫
Jesus na mamorsan dosa ni
portibi on, pangolu hami.
Jesus na marmosan dosa ni
portibi on, pangolu hami.
Jesus na mamorsan dosa ni portibi on, sai pasonang
hami, Amen,Amen,Amen.
04. Sijahaon 1: Joh. 18:
12-15. 19-23.
12 Dung i ditangkup angka soldadu
dohot induknasida ro di angka naposo ni Jahudi ma Jesus, jala diihoti.
13 Jadi ditogihon ma Ibana jumolo
tu si Hannas, i ma simatua ni si Kayapas, sintua ni malim di na sataon i.
14 I ma si Kayapas, naung mandok
tu angka Jahudi: Dengganan do mate sada halak humongkop, bangso i.
15 Alai diihuthon si Simon Petrus
dohot sisean na sada nari ma Jesus. Na masitandaan sisean na sada i dohot
sintua ni malim i, jadi bongot ma ibana rap dohot Jesus tu alaman ni malim i.
19 Alai disungkun sintua ni malim
i ma Jesus taringot tu angka siseanna dohot taringot tu podana i.
20 Jadi dialusi Jesus ma ibana,
ninna ma: Patar do hatangki di hatoropan. Na tongtong do Ahu mangajari
nasailaon di bagasan parguruan nang di bagas joro pe, parpunguan ni saluhut
Jahudi; ndang adong manang aha huhatahon marsibuni.
21 Boasa Ahu disungkun ho? Nasida
naung umbege hatangki, i ma sungkun! Ai diboto nasida do na huhatahon i.
22 Dung didok Jesus songon i,
dipastap sada opas na jongjong disi ma Ibana, huhut ma didok: Songon i do
pangalusim di sintua ni malim i?
23 Dung i ninna Jesus ma
mangalusi ibana: Ia na hurang na hudok, hajongjongkon hurangna; alai anggo na
hona do, boasa pastaponmu Ahu?
05.
Marende no. 81: 2.3, Jesua mula
ni ngolungku ( BL185)
♫ Haleaon, insakhinsak, reherehe, tijur pe Tali dohot pastappastap, tung
ditaonhon Ho sude. Paluahon au na pogos, sian tangan ni
sibolis
Alani hupuji Ho, tung marribu hali do.
♫ Bugang sada tanggurungmu Di na hona linsing i Hamamalum ni bugangku Na di rohangki do i. Ho
do gabe binuraan Au dapotan hangoluan.
Ala ni hupuji Ho Tung marribu hali do.
06. Sijahaon:
Mat. 26: 57-63a
57 Asa dung ditangkup nasida
Jesus, ditogihon ma Ibana tujolo ni sintua ni malim si Kayapas, ai nunga pungu
disi angka sibotosurat ro di pangituai.
58 Alai sai mangihut do si Petrus
mandaodao sahat ro di alaman ni sintua ni malim i. Laos bongot ma ibana
tubagasan, laho hundul tusi rap dohot angka naposo marnida ujungna.
59 Alai anggo angka sintua ni
malim ro di sandok rapot godang mangalului panindangion gapgap dompak Jesus, na
tuk mambahen Ibana marutang hosa.
60 Alai nang pe hehe torop
sitindangi gapgap, ndang adong jumpangsa.
61 Alai parpudi ro ma dua halak,
ninna ma: Didok Halak on: Tarbahen Ahu do mangalohai joro ni Debata jala
pajongjong i sumuang di bagasan tolu ari.
62 Dung i hehe ma sintua ni malim
i, mandok tu Ibana: Ndang alusanmu na hinatindangkonnasida dompak Ho?
63
Alai sai hohom do anggo Jesus.
07. Marende
no. 79: 5.6, Di na ponjot rohangku ( BL 124 )
♫ Laos i ma pajujuhon Rohangku sai
tongtong Manggotap hajahaton
Sian rohangkinon Unang huhalupahon be HalojaonMu Tuhan Nang tung
satongkin pe.
♫ Urupi au o Tuhan Tumaon di tano on
Saluhut parsorion Na songgop tu au on
Ho ma hutiru sai tongtong Manaoni na so uhum na di portibi on.
08. Sijahaon 3: Matius 26: 63b-68
63b
Dung i dipanghulingi sintua ni malim i ma Ibana: Hupatolon ma Ho tu Debata
Siparngolu i, asa dipaboa Ho tu hami, manang na tutu Ho Kristus, Anak ni
Debata!
64 Dung i didok Jesus ma tu
ibana: Songon na nidokmi ma tutu! Alai hudok ma tu hamu: Olat ni on ma idaonmuna
Anak ni jolma i, hundul di siamun ni Hagogoon jala ro di atas ombun ni langit.
65 Gabe diribakkon sintua ni
malim ma pangkeanna mandok: Na mangaleai Debata do Ibana! Pola luluan dope
sitindangi? Nunga dibege hamu pangaleaina i!
66 Beha do di rohamu? Dung i
ninna nasida ma mangalusi: Marutang hosa ma Ibana!
67 Jadi ditijuri nasida ma
bohina, na deba manompuk, na deba mangalinsingi,
68 huhut mandok: Surirangi hami,
Kristus, ise do na mamunu Ho?
09.
Marende no. 78: 2-3, O, Ulu na
sap mudar ( BL 158 )
♫
O,bohi parsinondang na sangap situtu Beasa tung marlangan sap tijur hurumMu ?
Tung aha ma alana umbaen homur mataM ? Na mintop do sondangna
di na lao tos hosaM.
♫
Au on tama o Tuhan, manaon na tinaonMi. Dosangku do diporsan Ho na tarsilang i
Sai tatap ale Tuhan, au na
dijoloMon. Huhut sai patuduhon, basaM tu rohangkon.
10.
Sijahaon 4: Mat. 26: 69; Mark.
14: 68-72/
69 Alai na hundul do anggo si
Petrus di alaman i, jadi didapothon sada parompuan ma ibana mandok: Dohot do ho
dongan ni Jesus, na sian Galilea i!
68 Alai diporso si Petrus do,
didok ma: Ndang adong huboto, jala ndang huantusi na nidokmi! Laos ruar ma
ibana tu alaman jolojolo, jala martahuak ma manuk.
69 Alai marnida ibana, diulahi
naposo boruboru i ma mandok tu angka na jongjong disi: On do sada sian nasida!
70 Alai mamorso muse anggo ibana.
Jadi dung satongkin nari, didok angka na jongjong disi ma muse mandok si
Petrus: A, tongon do; dongannasida do ho, ai halak Galilea do ho!
71 Gabe dipungka si Petrus ma
mambuburahon dirina huhut manolonnolon: Ndang hutanda jolma na nidokmuna i!
72 Dung i mamintor martahuak ma
manuk i paduahalihon. Jadi diingot si Petrus ma na nidok ni Jesus tu ibana:
Tolu hali do soadahononmu Ahu, andorang so martahuak manuk paduahalihon. Jala
marningot i, tumatangis ma ibana.
11.
Marende no. 206: 1.5, Na dison do
au Tuhanku ( BL 90 )
♫
Na dison do au Tuhanku na marsomba au tu Ho
Iluilu ni matangku husombahon do tu Ho
RohaMi
ma tu rohangku na masihol au di Ho.
♫
Sai tangihon, ditangishon rohangki
dangolna i
Sai tangihon , ditangishon Tondingki siholna i
Rohami
ma tu rohangku Sai di Ho ma tondingki.
12. Sijahaon 5: Mat. 27: 3-8.
3 Jadi dung diida si Judas,
parjehe i, na naeng hona uhum nama Ibana, disolsoli ma rohana, dipaulak ma na
tolupulu rupia i tu angka sintua ni malim dohot tu sintua ni bangso i;
4 ninna ma: Sala do ahu!
Hujehehon do hape na so marpipot! Alai didok nasida ma: Ndang ro di hami i! Ho
do na sari disi!
5 Jadi ditimpalhon ma perak i tu
bagasan joro i, laos sumurut sian i laho maningkot.
6 Alai dibuat angka sintua ni
malim ma hepeng i, ninna ma: Ndang jadi padomuon i tu arta ni joro, ai tuhor ni
mudar do i!
7 Jala mardos ni roha nasida
manuhorhonsa tu ladang ni pande hudon, bahen parbandaan ni halak dagang.
8 Ala ni i do umbahen na margoar
i ladang mudar ro di sadari on.
13.
Marende n0. 162: 1-3, O, Debata
mansai balga ( BL 27 )
♫ Debata, mansai balga, huhut dokdok dosangku.
Na
so adong di tano on, na tau haporusanku.
♫ Tung
sura lao au tu na dao, mangalap hatuaon.
Ndang
dapot i di tano i, di nasa hajolmaon.
♫
I pe tu Ho nama au ro, sai unang tulak
ahu.
Paombun ma o Debata, rimasMu mida ahu
14. Jamita:
15.
Marende no. 82: 1-3, O
Jesusku tu bugangMu ( BL 21 )
♫
Jesusku, tu bugangMu, ro marsomba
rohangkon.
Sai tarpuji, sai tarpuji, na pamalum
tondingkon.
♫
Tung di
patMu, o Jesusku, solsolanku rohangki.
Tangisanku na tinaonMu, ala jat ni rohangki.
♫
Tu tanganMu ma tondingku, jumpa
hamamatengki.
Tu lambungMu, o Tuhanku, alap na tinobusMi.
16.
Tangiang Panutup / Pasupasu.
V
01. Marende no. 83: 1-3, Na lao do birubiru i ( BL 214 )
♫
Na lao do Birubiru i mamorsan angka dosa ni nasa hajolmaon i di benget ni rohana.
Diporsan do sahitta i dilehon do DiriNa i, tu tangan ni pamunu. Ditaoni do na bernit i
ro di na tos hosaNa
i. Didok : Naeng porsanonku
♫
Ianggo Birubiru i , ima alealengku. Na paluahon tondingki disuru Debatangku
Didok mandok AnakNa i sai topot ma pardosa i, naung sun tinoruanku.
Balga tutu do rimashi, alai tarbaen do mombun i, horhonon ni mudarMu
♫
“Na olo au, ale Amang . sian sandok rohangku. Pasauthon lomo ni rohaM, rohaM sambing do guru”. O holong ni rohaNa i tung aha do tudosanmi, na songon ho margogo ?
Dilehon Debata hape AnakNa lao manaon sude sitaonon ni na mago.
02. Votum, Introitus, Tangiang
Marhitehite Goar ni
Debata Amanta, dohot Goar ni AnakNa Jesus Krustus, dohot Goar ni Tondi Porbadia
na tumompa langit dohot tano. Amen.
Ai
on do dipatupa Debata: Humongkop hita gabe dosa Ibana, na so tumanda dosa, asa
gabe hatigoran ni Debata hita di bagasan
Ibana. Haleluya.
Martangiang
ma hita: Ale Tuhan Jesus, sasada Ho do Sipangolu padomuhon jolma dohot Debata!
Hupuji hami GoarMu, jala hudok hami mauliate tu Ho ala saluhut na binahenMi,
patupahon hangoluannami. Sai dongani ma hami marhitehite asi ni rohaM, asa
dipingkiri hami tongtong na tinaonMu dohot hamamateM, asa huarsakhon hami
dosanami jala asa tubu di hami haporseaon na sintong, jala asa marroha
haholongon hami huhut mandok mauliate tu HO, asa olo hami mangihuthon HO rodi
hamatean. Ale Tuhan Jesus, di Ho ma tama pujipujian di tongatonga ni saluhut
Huria, naung tinobusMu marhitehite mudarMu na badia i, olat ni on ro di
salelenglengna. Amen.
03. Marende
no. 152: 1, Jesus na mamorsan ( BL 120 )
♫ Jesus
na mamorsan dosa ni portibi on, pangolu hami.
Jesus na marmosan dosa ni portibi on, pangolu
hami.
Jesus
na mamorsan dosa ni portibi on, sai pasonang hami,Amen,Amen,Amen.
04.
Sijahaon 1: Joh. 18: 28-31; Luk. 23: 2; Joh. 18: 33-38.
28 Asa ditogihon
nasida ma Jesus sian jolo ni si Kayapas tu kantor. Alai sogot ma i manogot i.
Ndang na bongot anggo nasida tu kantor, asa unang tarsubang nasida laho
manganhon Paska i.
29
Gabe ruar ma si Latus mandapothon nasida, didok ma: Pangaluan dia do diboan
hamu dompak Halak an?
30
Dung i ninna nasida ma mangalusi: Aut unang sibahen na jahat Halak on, ndang
tagamon pasahatonnami Ibana tu ho.
31
Gabe ninna si Latus ma mandok nasida: Boan hamu ma Ibana, uhumi hamu ma Ibana
marguru tu adatmuna. Alai ninna angka Jahudi ma mandok ibana: Ndang jadi
pusaonnami manang ise.
(Luk.
23:2) Dialuhon nasida ma Ibana, ninna ma: Na dapot hami do on pabalikbalikkon
bangsonami jala mangorai mangalehon guguan tu Kesar i; dipandok, Raja Kristus
do Ibana.
33
Jadi dibongoti si Latus muse kantorna, dijou ma Jesus, didok ma tu Ibana:
Atehe, Ho do raja ni Jahudi?
34 Ro
ma alus ni Jesus: Na sian roham do na nidokmi, manang na nidok ni halak do i tu
ho taringot tu Ahu?
35
Gabe dialusi si Latus ma: Ai halak Jahudi do ahu? Bangsomi dohot angka sintua
ni malim i do pasahathon Ho tu ahu. Aha do na binahenmu?
36
Jadi dialusi Jesus ma: Ndang sian portibi on harajaonku. Aut sian portibi on
harajaonku, ndang tarbahen so mangalo angka naposongki, asa unang sahat Ahu tu
angka Jahudi, alai ndang sisongon i harajaonki.
37
Dung i ninna si Latus ma mandok Ibana: Asa raja do Ho? Jadi ninna Jesus ma
mangalusi: Songon na nidokmi ma tutu. Raja do Ahu! Umbahen na tubu Ahu jala
umbahen na ro Ahu tu portibi on, asa huhatindangkon hasintongan i. Ganup na
sian hasintongan i tangihonon ni i do soarangku.
38
Jadi ninna si Latus ma mandok Ibana: Aha ma i, hasintongan i? Jadi dung didok
sisongon i, ruar ma ibana muse manopot angka Jahudi mandok tu nasida: Ndang jumpang
ahu manang dia salana.
05. Marende
no. 81: 4-5, Jesus mual ni ngolungku (
BL 185 )
♫
Sungsang duri ditumpalhon panginsahi i tu Ho; Jala tolong dilibashon tu uluM, pasiak Ho.
I ditaonhon Ho, Tuhanku, ala ni hajungkatonku. Ala ni hupuji Ho tung marribu hali do.
♫
Tung tanganMu dohot patMu ditorusi labang i. Jadi tiris ma mudarMu sian hau parsilang i,
I do mual paridian di au jolma na hansitan. Ala ni
hupuji Ho tung marribu hali do.
06. Sijahaon 2: Luk. 22: 5-12.
5 Alai
lam digogohon nasida do mandok: Digunturi Ibana do bangso i, ai sai mangajari
Ibana di sandok tano Judea, mamungka sian Galilea sahat ro tuson.
6 Alai
umbege i si Latus, manungkun ma ibana, manang halak Galilea Ibana?
7 Jala
dung diboto, na sian gomgoman ni si Herodes Ibana, disuru ma Ibana tujolo ni si
Herodes, ai tongon do ibana di huta Jerusalem uju i.
8
Marnida Jesus si Herodes i, las situtu ma rohana; ai nunga na nia lelengna, sai
naeng idaonna Ibana, ala naung dibege baritana, jala diarop rohana, idaonna
tanda sada sipatupaonna.
9 Jadi
godanggodang ma disungkunhon tu Ibana; alai ndang adong dialusi Jesus ibana.
10
Disi do angka sintua ni malim ro di sibotosurat, jala gogogogo do Ibana
dialuhon.
11 Ia
si Herodes rap dohot angka donganna, direhei jala dilealeai do Ibana,
disolukkon ma pangkean na arga tu Ibana, laos songon i ma disuru Ibana mulak tu
si Latus.
12
Jadi di na sadari i ma maraleale si Herodes dohot si Latus, ai na masihosoman
do nasida anggo nasailaon.
07. Marende
76: 1-2, Sada na ma sangkap ni rohangku
( BL 199 )
♫
Sada nama sangkap ni rohangku di sandok
portibi on. Ndang tagamon na so las rohangku, molo jumpang au inon.Naeng ma sai
ingoton ni rohangku, na binaen ni Jesus tu tondingku. Uju pinorsanNa i, saluhutna dosangki..
♫
Ingkon sai Ibana ingotonku, uju na tarpajal
i. Tu hau pinarsilang ginantungkon, sai mabaor mudarNa i.Ai humophop au ditaon
uasNa, asa dohot au muse upaNa.
Ai ditatap do au on, di pandokNa: “Nunga sun !”
08. Sijahaon 3: Mat. 27: 15-23.
15
Alai peam do dipalua panguhum i di pesta i sada halak na tarhurung, marguru tu
na tinodo ni natorop.
16
Alai adong ma tarhurung uju i sada parjahat na sumalin, na margoar si Barabas.
17 Jadi di na pungu i
nasida, didok si Latus ma tu nasida: Ise do dipangido hamu paluaonku, si
Barabas manang Jesus na targoar Kristus?
18 Ai diboto do, late ni
rohanasida do umbahen na dipasahat nasida Ibana.
19 Alai di na hundul
i ibana di habangsa paruhuman i, ditonahon jolmana ma tu ibana: So tung dihahua
ho halak na tigor i, ai susa situtu do ahu naborngin di nipingku ala Ibana.
20
Alai sai disosoi angka sintua ni malim rap dohot sintua ni bangso i natorop,
asa dipangido nasida, malua si Barabas, alai pusaon do anggo Jesus.
21
Dung i ninna panguhum i ma mandok nasida: Ise sian na dua i dipangido hamu
paluaonku? Jadi didok nasida ma: Si Barabas!
22
Dung i didok si Latus ma tu nasida: Antong, aha ma bahenonku tu Jesus, na
targoar Kristus? Gabe saluhut nasida, mandok: Parsilangkon ma!
23
Alai ninna panguhum i ma: Ai aha na jahat dibahen? Jadi lam gogo ma
dipanjoujouhon: Parsilangkon ma!
09. Marende
no. 77: 2.6, Hamu saluhut halak ( BL 65)
♫ Patangkas ma luhutna sap mudar do dagingna sai hir hodokna i
Buas huhut
hosana hinorhon ni bernitna. Modar sude dagingna i
♫ IluiluM o Jesus mudarMu pe na durus, nang angguhanggukmi
I ma parhiteanku di na lao tos hosangku manopot hasonangan i.
10. Sijahaon 4: Joh. 19: 1-15.
1 Dung
i ditogu si Latus ma Jesus, didokkon ma linsingan.
2 Jadi
didandani angka soldadu ma sungsang duri bahen tumpal, diampehon ma i tu uluna;
baju dapdap ma dialithon tu dagingna.
3 Dung
i ro ma nasida tu jolona mandok: Tabi di Ho, ale raja ni Jahudi! Laos dipastapi
ma Ibana.
4 Dung
i ruar ma muse si Latus, didok ma tu angka Jahudi: Ida hamu ma, hutogihon do
Ibana tu jolomuna, asa diboto hamu, na so adong jumpang ahu salana.
5 Laos
ruar ma Jesus manjujung sungsang duri jala marbaju dapdap. Jadi didok si Latus
ma tu nasida: Ida hamu ma Jolma i!
6 Asa
dung diida angka sintua ni malim dohot angka naposo Ibana, dijouhon nasida ma:
Parsilangkon, parsilangkon ma Ibana! Dung i didok si Latus ma tu nasida: Boan
hamu ma Ibana, parsilangkon hamu ma; ai ndang jumpang ahu salana.
7 Gabe
dialusi angka Jahudi ma Ibana, ninna ma: Marguru tu patiknami ingkon marutang
hosa Ibana, ai dibahen do dirina Anak ni Debata.
8
Umbege i si Latus lam ganda ma biarna.
9 Dung
i diulahi muse tu kantorna, didok ma tu Jesus: Sian dia do Ho? Alai ndang
dialusi Jesus ibana.
10
Dung i didok si Latus ma tu Ibana: Ndang angkupanmu ahu mangkatai? Ndang diboto
Ho, marhuaso ahu paluahon Ho, jala marhuaso pasilangkon Ho?
11
Jadi dialusi Jesus ma: Ndang adong huasom mangago Ahu, aut unang nilehon i tu
ho sian ginjang. Dibahen i gumodang do dosa ni na pasahathon Ahu tu ho.
12
Jadi olat ni i ma dilului si Latus dalan paluahon Ibana. Alai manjoujou ma
angka Jahudi, ninna do: Molo dipalua ho On, ndang aleale ni Kesar ho! Ai na
mangalo Kesar i do ganup na mambahen dirina raja.
13 Asa
dung dibege si Latus hata i, ditogihon ma Jesus haruar, laos hundul ma ibana di
habangsa paruhuman na di inganan na margoar: Pantar batu, alai anggo di hata
Heber: Gabbata.
14 I
ma na masa di ari parhobasan Paska, mareak hos ni ari. Dung i didok ma tu angka
Jahudi: Ida hamu ma rajamuna!
15
Alai digogo nasida ma manjouhon: Padao, padao ma I: Parsilangkon ma Ibana! Dung
i didok si Latus ma tu nasida: Parsilangkononku ma rajamuna? Jadi dialusi angka
sintua ni malim ma: Ndang adong rajanami dungk
Tidak ada komentar:
Posting Komentar