NDANG DEMOKRASI NA MANGARAJAI HURIA, ALAI KRISTOKRASI DO

NDANG DEMOKRASI NA MANGARAJAI HURIA, ALAI KRISTOKRASI DO

                Ido panindangion ni HKBP taringot tu Huria, hombar tu Konfessi HKBP taon 1951 HURIA (Bindu 8 A2). Na mralapatan do i holan Kristus do na marhuaso di Huria jala holan aturan na hombar tu  hataNa do situruton. Panindangion on dibahen laho mangalo pingkiran na manganggap huaso ni angka partogi, angka rapotrapot dohot hak ni ruas na manggomgomi huria i. Di tingki on adong do tubu pingkiran na songon i, lumobi ala sai jotjot dalan laho mamillit partogi manang uluan ni huria i marhite pamilliton di rapotrapot marojahan tu soara na gumodang.  Molo adong na dipatujolo lobi sian sada halak na gabe calon uluan ni HKBP, isara ni tu calon ephorus, d.a.n, ba ise na dapot soara na gumodang manang  na ummotikna  lobi sian satonga ni parrapot  i ma na tarpillit manang na monang.

                Molo songon i pe cara pamilliton i ndang na gabe dohonon  demokrasi ma na manggomgomi huria i. Istilah demokrasi dipangke di pemerintahan do, manang di bidang organisasi sosial politik. Ai lapatan ni demokrasi i ma kekuasaan rakyat. Sian hata Yunani do i, i ma hata demos na marlapatan rakyat, dohot kratia marlapatan kekuasaan.  Jadi demokrasi ima sistem pemerintahan na mangalehon kesempatan tu sude rakyat manang warga negara laho mambuat keputusan. Jadi hata demokrasi dihonahon tu organisasi politis manang pemerintahan do i di sada-sada negara. Ndang sude cara na mambahen pamilliton tu sadasada pemimpin marhite suara  na gumodang gabe dohonon ma i demokrasi. Jadi tu huria ndang boi pangkeon hata demokrasi, ai ndang ruas ni huria manang parhalado manang uluan ni ni huria i na manggomgomi huria, alai Kristus do. Ndang dos huria dohot organisasi politik manang organisasi portibi on. Ndang jolma na pajongjonghon huria, alai Tondi Porbadia do. Jadi ndang boi lomolomo ni halak pajongjonghon huria hombar tu hagiotna. Manang songon na masa di angka tingki na salpu masa perpecahan di huria, ala adong kelompok tertentu na mamaksahon hagiotna di huria i , manang na so olo unduk tu angka aturan manang kebijaksanaan na nidalanhon ni huria i, molo so  hombar tu rohana manang tu pingkiranna. Hape ingkon tongtong do unduk huria i dohot sude angka ruas nang angka parhaladona tu Kristus.  Kristus do na tahaporseai Ulu ni huria, na manggomgomi manang mangarajai huria i.  Sude angka ruasna rap dohot angka parhalado nang  angka uluanna pe pamatang ni Kristus do na ingkon unduk jala pangoloi tu  Kristus. Ala ni do sipata didok, Kristus  do Raja ni Huria i.  On do ojahanna umbahen didok, ndang demokrasi na mangarajai huria, alai Kristokrasi do.  Hata Kristokrasi pe tong do sian hata Yunani, Kristos dohot kratia, na marlapatan hahuasoon ni Kristus.

                Jadi ndang boi padoson huria tu angka organisasi ni portibion, isara ni angka organisasi politik, manang pemerintahan. Sudena i na pinajongjong ni jolma do,  marojahan tu angka sintasinta ni jolma manang angka ideologina be,  alai huria i ndang na pinajongjong ni jolma. Mangihuthon na tahaporseai songon na disurathon di Buku Konfessi i, Huria i ma parpunguan ni angka na porsea di Jesus Kristus di portibion, na jinou, na pinapungupungu, na pinarbadiaan jala na pinatongtong ni Debata marhite Tondi Parbadia. (Konfessi HKBP 1996, Bindu 7 A).  Jadi ndang dos Huria tu angka organisasi portibi on. Sada sian sifat ni Huria i, i ma  “ Na Badia do Huria i”. Alai habadiaon i, ndada ala ni habadiaon ni aangka ruas, manang angka parhalado ro di uluanna, alai ala habadiaon ni Kristus Ulu ni Huria i do. Alai ingkon sude do ruas, parhalado nang angka uluan ni huria mangaradoti  jala mangaramoti habadiaon ni Huria i, unang gabe tercemar dibahen angka haramunon ni portibion. Jadi organisasi ni huria i pe ingkon dohot do mangaradoti habadiaon ni huria i, marhite uluanna. Ala ni sude angka na mangurus organisasi ni huria, termasuk angka uluanna, ingkon unduk do tu panogunoguon ni Jesus Kristus marhite Tondi Parbadia. Na maraturan do huria i, jala Aturan ni Huria  i tahaporseai do marojahan tu Hata ni Debata, i ma ulaula laho parentahon, pasonanghon dohot pauliulihon Huria i. Jadi ingkon unduk do sude ruas, parhalado dohot angka pimpinan ni Huria tu aturan naung ditotophon. Manang ise na so mangihuthon Aturan ni Huria, na mangalo Hata Ni Debata do, manang na mangalo Jesus Kristus Ulu ni Huria i do, jala na mangalo panogunoguon ni Tondi Porbadia. Di Aturan ni HKBP na imbaru, lima ma na gabe unsur pimpinan ni Huria i, i ma Ephorus, Sekretaris Jenderal, Kepala Departemen Koinonia, Kepala Departemen Marturia, Kepala Departemen Diakonia di tingkat Hatopan, jala Praeses ma di tingkat Distrik.  Songon perwakilan ni Kristus do nasida sude laho manguluhon Huria i. Nunga diaturahon di Aturan Huria i, angka ulaonna nasida be, laho manguluhon pardalan ni Huria i dohot sude angka ulaon siulaonna, naung dipasahat Debata tu Huria i. Ala ni ingkon dibagasan hasadaon do nasida, asa utuh pardalan ni Huria i jala di bagasan hasadaoon. Ingkon ganup do nasida unduk tu Jesus Kristus, ndang pangkeonna tohonan manang jabatanna i, laho menonjolkan diri manang mangalului hasangapon dohot paruntungan tu dirina be. Molo songon i, ingkon sursar do ulaon i, jala panghorhonna gabe sega ma Huria i.

                Sude angka unsur pimpinan pusat ni HKBP na ginoaran di ginjang i dohot pimpinan distrik, na pinillit ni synode godang do. Taringot tu cara pamilliton i pe nunga diaturhon di Aturan Huria. Ndang boi manjoloani manang mangalangkai pangaturhon ni Aturan Huria i. Synode godang i pe ndang dos dohot angka rapot ni organisasi haportibion, ai i pe na pinarbadiaan ni Tondi Pobadia do. Sude angka utusan na mandohoti  synode godang i angka naposo ni Debata do naung nitangianghon ni huria i, mewakili sude angka badan, lembaga na adong di HKBP  dohot mewakili sude huria. Jadi songon haparan ni  sude huria na adong di HKBP do Synode godang i. Jadi ndang dos songon angka rapot ni organisasi ni portibion, isara ni organisasi politik manang organisasi pemerintahan. Ganup mambuat haputusan ingkon di bagasan tangiang do jala marojahan tu Bibel, Konfessi, Aturan dohot Paraturan, Ruhut Parmahanion dohot Pamissangon nang  Agenda HKBP. Marhite i do Kristus Raja ni Huria i manggomgomi Synode i. Molo masa pe pemilliton marhite soara na gumodang, ingkon tahaporseai do  ndang holan soara ni ganup pribadi na manghata be di si, alai soara ni Tondi Porbadia do. Jadi ingkon martanggung jawab do ganup pribadi tu Tuhan i. Saboiboina mambuat haputusan ingkon marojahan tu dos ni roha do.  Molo tarpaksa do mambahen haputusan marhite voting, i ma mambuat suara na gumodang.  Alai molo masa pe na songon i di synode pe ndang na gabe demokrasi na marhuaso, alai Kristus do marhite Tondi Parbadia.

                Ala porsea do hita tu panogunoguon ni Tondi Parbadia na mamillit angka na talup gabe pimpinan ni huria i marhite synode godang, ndang  denggan molo pola do mambahen kampanye angka na naeng gabe pimpinan, asa dipillit parsinode ibana, tarmasuk ma dohot na mambahen tim sukses. Sudena i cara-cara ni portibion do, mamabahen nasa usahana asa tarpillit ibana. Sipata do didok na deba  di na kampanye i, adong do na mamangke mamangke hagogoon  manang pengaruh ni uang. Molo di angka kampanye pemilihan pemerintahan, digoari ma na songon i politik uang. Molo pola do adong na ongon i, sega ma huria i, jala ndang huaso ni Tondi Parbadia be na mangula di pamilliton ni angka pemimpin ni huria i, huaso manang pingkiran ni jolma sambing nama. Manjaga asa unang masa do na kampanye on, umbahen ndang adong dope na ditontuhon calon pimpinan andorang so synode, dung pe di synode i,  dipasahat ephorus ma goargoar ni angka naung memenuhi syarat ma sian angka pandita na gabe calon sipilliton ni synode. Jadi molo adong naung barani manghatahon ibana calon ephorus manang unsur pimpinan na asing, jala secara resmi mangangkat panitia laho pamonanghon ibana di pamilliton ni synode i, sahat ro di na mambahen partangiangan di huria laho paborhathon calon ephorus i, nunga mangalo aturan ni huria i, jala manjoloani synode, sekaligus manjoloani Tondi Porbadia. Antong molo tahaholongi do huria i, unduk ma hita tu Kristus marhite angka aturan naung ditotophon jala unduk ma tu panogunoguon ni Tondi Porbadia.  Taloas ma Tondi Parbadia na marsoara marhite angka utusan synode godang laho mamillit na talup gabe angka wakil ni Kristus laho manguluhon Huria i. Tung unang ma dipangke caracara ni portibion, na sai manggulut huaso, hasangapon dohot paruntungan tu diri.  ( pdt msm panjaitan )