SONGON DIA MA MARGA PANJAITAN TU JOLO?

SONGON DIA MA MARGA PANJAITAN TU JOLO

                Na baru do pe marga Panjaitan se Jabodetabek marpesta bona taon. Nunga dihasomalhon Panjaitan se Jabodetabek marpesta bonataon i sahali sataon ganup bulan Januari. Sada kebanggaan do i di marga Panjaitan na di Jabodetabek boi patupahon ulaon na balga na songon i sahalai sataon, apalagi sai dipatupa do i di Gedung Tennis Indoor Senayan Jakarta. Ndang piga angka punguan marga na di Jabodetabek na boi patupahon na songon i. Ala ni tung sihamauliatehonon ni marga Panjaitan do i. Jadi molo binereng Punguan marga Panjaitan, boi ma ra dohonon hira i ma bohi ni sandok marga Panjaitan.

                Hombar tu naung diaturhon di Punguan Panjaitan se Jabodetabek, ingkon sai marganti do pengurus sahali tolu taon. Jala molo Ketua Umum olat ni sahali do boi dipillit. Dengan do i ala nunga mansai torop marga Panjaitan dohot boruna na maringanan di Jabodetabek. Ringkot do tutu margantiganti angka pengurusna tarlumobi ketua umum i. Di periode 2020 – 2023, tarpillit ma amanta Trimedya Panjaitan gabe Ketua Umum, mangganti amanta Karim Panjaitan. Hira sude do marga Panjaitan na di Jabodetabek mananda amanta Trimedia Panjaitan i, ala nunga tolu periode gabe anggota DPR RI, paopat periodehon ma nuaeng. Ditotophon ma ibana rap dohot angka pengurus na asing na mangula tu periode 2020-2023 di Pesta Bona Taon na salpu marhite Badan  Penasehat ni Punguan Panjaitan se Jabodetabek. Di hata sambutan na pinasahatna hatihai, dipabotohon ibana do na sanga do torop angka tokoh ni Panjaitan na di Jabodetabek mangaraguhon ibana na gabe Ketua umum, ala dianggap halak ndang apala godang diboto ibana taringot tu paradaton, hape ulaon ni ketua na saleleng on godang do di ulaon paradaton. Alai nunga marsitutu ibana gabe ketua ni punguan Pangjaitan i, laho pamajuhonsa. Didok ibana, jala sintong do songon na nidokna i, ndang sai ingkon na malo ketua umum di ulaon paradaton ni halak Batak, ai boi do ulaon paradaton i dipasahat tu dongan na adong di punguan i na malo di ulaon paradaton. Ulaon ni ketua ima manguluhon manang mangkoordinasi sude angka kegiatan ni punguan i na mansai bidang, tarmasuk di bidang adat, bidang sosial dohot pembangunan, bidang pendidikan, bidang  bidang litbang, bidang hubungan masyarakat, bidang hubungan antar lembaga, bidang seni dohot budaya, didang napobulung, marpadot be dohot olah raga dohot angka na asing, homar tu naung diaturhon di punguan i, laho pamjuhon marga panjaitan. Molo naeng mardalan do sude bidang i, ingkon adong do tangkas mangkordinasi. Holan i ndang dope disangkapi di punguan i bidang kerohanian manang partondion, na mansai ringkot situtu. Ala ni i do didok ibana, nunga mansai ringkot adong perkantoran ni punguan i, ndada holan sekedar kantor, alai boi ma disi parpunguan ni angka pangurus, ingan ni  parrapotan, inganan pelatihan di angka ulaon adat, inganan pembinaan tu angka generasi muda di berbagai bidang ketrampilan, kursus-kursus na boi mangurupi angka ianakhon ni Panjaitan dohot boruna, laho mangarade  diri tu angka hamajuon di pendidikan, asa dapot parkarejoan na denggan, ro di angka na asing. Marsitutu do amanta Trimedya, rap dohot tokoh-tokoh Panjaitan na asing, isara ni amanta Jenderal Luhut Panjaitan, laho pasauthon sangkap i. Anggiat ma tutu saut songon na sinangkapan ni roha nasida i. Di angka periode na salpu, nunga leleng naung adong sangkap i, alai ndang boi do pe tulus.

                Na salelengon di Jabodetabek tarsitiruon do marga panjaitan di ulaon paradaton , israna ni ulaon  adat parsaripeon, manang di ulaon adat tu na monding. Di ulaon adat parsaripeon  nunga adong penyederhanaan ni ulos sipasahaton ni suhut tu boru muli manang penganten. Godang ni ulos na marhadohoan sian suhut olat ni sampulu sada bulung ma. Songon i dohot ulos holong sian keluarga manang angka na marhahamaranggi, tong ma olat ni sampulu sada bulung ma. Angka na asing, hepeng ma dipapungu songon ganti ni ulos na dipasahat langsung tu penganten, ndada tu suhut. Molo bere pe na mardongan saripe olat ni sampulu sada bulung ma na gumodang ulos sipasahaton ni tulang tu bere. Pertimbanganna disi, di tingki naung salpu olo do ulos marratus dipasahat tu boru muli sian angka na ginokhon ni parboru, alai pada umumna manigor digadis pihak paranak do angka ulos na ro i. Alani i dipingkiri marga Panjaitan ma dumenggan ma hepeng deba dipasahat, na boi pangkeon ni penganten i laho mamungka parsaripeonna i.

                Taringot tu pangatur ni tingki di pesta pe adong do sitiruon di marga Panjaitan na di Jabodetabek. Pada umumna pesta ni halak batak sai marganjangganjang do. Hira so diboto pahatophon, olo do sipata ulaon i sahat tu pukul 9 borngin.. Alai molo Panjaitan do bolahan amak ni sada pesta, bo pe i pesta pangolihon anak manang pamuli boru, ingkon sai diusahahon do sidung sude ulaon di pesta adat i pukul lima botari. Laho mangatur on memang mansai balga do peranan ni protokol ni ulaon i, na sai paingothon asa sude pihak  boi mamangke tingki i dohot denggan, unang marganjangganjang. Ingkon sude ma nian boi mangargahon tingki i, sadenggandengganna.         Songon i do molo adong na monding na tuatua lumobi pamoruon ni Panjaitan. Holan ulos na marhadohoan i ma sipasahaton disi, i ma ulos tujung manang molo nunga na tuatua na monding i ulos sampe tua tu na mabalu, dohot ulos saput tu na mnonding i. Di deba inganan, molo ulos saput, tulangna do na pasahathon. Alai molo di Toba Habinsaran do, olo do holan sian  hulahula do i duansa. Molo ulos holong tu angka pinompar manang sisolhot ni na monding i, ndang pola be dipasahat. Partimbanganna, di deba halak olo do  ulos holong na pinasahat ni pihak hulahula manang tulang i  tu pinompar manang sisolhot ni  na monding i  gabe manamba boban tu suhut, laho pasahathon pisopisona. Molo godang ulos dijalo ba ingkon godang ma nang pisopiso pasahatonna Hape  najolo sabotulna  ndang adong na ginoaranna ulos holong nuaeng, ai ndang mungkin boi adong halak na boi pasahathon ulos na songon i godangna , ai mansai arga do ulos na jolo. Molo adong pe na pasahathon ulos sian pihak hulahula manang tulang tu angka ibeberena i, olat ni ambara ni berena i do sahat di tingki manortor nasida, dipaulak do i muse di na laho mulak tulangna i, jala disi ma dipasahat berena i pisopiso olat ni tarbahensa. Molo sanga diboan berena i ulos i tu jabu, utang bolon do i di berena i, ingkon tobusonna do i saarga ni sada horbo. Laho paulakhon ulos ni tulangna i, dohonon ni berena i ma, “mulak ma ulosmuna on tulang, ai naung diulosi hamu do hami na jolo”. Jala dibahen ma di lapik ni ulos i pisopiso ni tulangna i. Alai ala mura ni ulos di tingki on, di na deba nunga mansai mura be tulang mangalehon ulos, manang bere manjalo ulos sian tulangna. Alai taringot tu na pasahat ulos on pe sipata do pe marasing pandapot ni angka marga Panjaitan i sandiri, adong  na satuju adong na so satuju.

                Nunga godang nian tiruan sian marga Panjaitan se Jabodetabek taringot  tu ulaon paradaton. Alai adong do na mansai ringkot siparrohahonon ni Punguan on do pe spareahanna tu joloanon. Di marga Panjaitan, hira so merata do pe binereng  na boi mangulahon ulaon paradaton i, lumobi na gabe angka raja parhata manang parsinabung. Olo do binereng, manang di dia pe ulaon i, jala manang ulaon ni ise pe i sian marga Panjaitan hira laos i do halakna na gabe raja Parhata. Nunga mansai balga Punguan Panjaitan se Jabodetabek, pola adong sampulu dua wilayah. Ingkon boi ma nian ganup wilayah berdiri sendiri laho mangulahon adat. Molo ro pe pengurus sian pusat, na mangadopi ulaon i ma i ulaonna, isarana laho pasahathon panumpahion tu na marulaon i, unang pola na gabe maniop pangulahonon di ulaon adat i. Asa boi merata na mangulahon adat on, di ganup wilayah, ingkon mardalan ma prinsip ni halak Batak na di laho mangulahon sada ulaon adat i ma na mandok: molo marulaon (marpesta) hahana, ba anggina ma na mangulahon ulaon i, tarmasuk dohot raja parhata manang parsinabung dohot protokol.Songon i ma sabalikna, molo marulaon anggina, ba hahana ma na mangulahon ulaon i. Jala on igkon di tingki na martonggo raja ma  dihata i, unang pola ditingki mata ni ulaon i asa unang be pola  adong masirenggetan disi, na gabe mangallang tingki. Jadi on hira so mardalan do pe di angka ulaon ni marga Panjaitan na di Jabodetabek na saleleng on. Olo do laos sai holan i do halakna  na mangulahon binereng.  Mungkin ala ibana ma na dianggap mampu mangulahon, jala angka na asing i dianggap ndang mampu. Di ganup wilayah ni Punguan Panjaitan na di Jabodetabek, ingkon boi ma nian prinsip i mardalan tu joloan on. Mangihuthon adat Batak, ndang sigaraon raja parhata i apalagi mambahen patokan. Molo taronjar roha ni hasuhuton mangalehon songon hamauliateonna, ba na denggan ma i, alai ndang paksaan i. Molo adong na manontuhon bayaran tu raja parhata ndang adat be goar ni. Ala adong opat marga Panjaitan marhahamaranggi anak ni Situngo Naiborngon, jala holan Sitongo do anak ni Toga Panjaitan, ba na opat i ingkon boi ma margantiganti laho mangulahon adat i. Molo Martibi Raja marulaon, ba Raja Dogor, manang Siponot, manag Raja Sijanggut ma na mangulahon, songon i ma muse sabalikna. Mungkin ala naung leleng deba  marserak sian bonapasogit, ba ndang sai sude be marga Panjaitan na umboto mangulahon adat i, atik pe nian nunga tardok natuatua ibana. Alai taingot ma na boi guruhononhon do adat  i, manang pangulahonon ni adat . Di son ma ra  mansai ringkot adong pelatihan manang pengkaderan  ni angka marga Panjaitan i asa boi sude margantiganti laho mangulahon adat. Na boi parsiajaran do i molo dilehon rohana tusi. Jala angka naung malo pe di ulaon i, ingkon rade ma mangajari angka donganna na hurang malo do pe asa boi gabe malo. Tu son ma ra deba sipareahan ni Pengurus Punguan Panjaitan na imbaru on, marhite na mangula di bidang adat. Jala ra sai adong do pe angka natuanatua marga Panjaitan na adong di Jabodetabek na boi mangajari. Anggiat ma boi terlaksana i tu tingki na ro. Horas ma tondi madingin, pir ma tondi matogu di hita sude Panjaitan dohot boruna.     ( Pondok Gede, Februari 2020, Pdt Mangontang SM Panjaitan, MTh,  pendeta pensiun).