LAPATAN NI ACARA NA PINATUPA NI HURIA PABORHATHON NA MONDING

LAPATAN NI ACARA NA PINATUPA NI HURIA PABORHATHON NA MONDING

Di tingki aktif do pe iba manghobasi ulaon di huria, jotjot do binege angka sungkunsungkun sian ruas ni huria i, aha do makna ni acara na pinatupa ni huria laho paborhathon na monding tu inganan paradianan parsatongkinan i. Dia do asingna na pinaborhat langsung sian bagas ni na monding i manang “rumah duka” di tingki on lumobina di kotakota na balga, dohot na pianaborhat sian gareja. Domu tusi angka ise do na talup dipaborhat sian gareja, holan na hea parhalado do isara ni sintua manang boi do angka ruas ni huria biasa. Sahat tu saonari sungkunsungkun on sai jotjot do pe binege. Domu tu angka sungkunsungkun on na parjolo ingkon tangkas do antusanta, ndang na ringkot di na monding i angka acara na pinatupa ni huria laho paborhathon na monding i tu inganan paradianan sisatongkin i, alai na ringkot di angka na mangolu do na tininggalhon ni na monding i, lumobi angka keluarga, sisolhot, nang sude angka donganna saparsaoran tagan di ngoluna, asa tarapul rohanasida jala lam togu haporseaonna laho mangadopi hamatean i, ai nasida pe ingkon mate do muse. Marhite sian acara i, boi angka ende na diendehon disi, angka hata apulapul na pinasahat ni angka na marholong ni roha di keluarga i,  lumobi nang jamita sian hata ni Tuhanta mangarahon rohanasida lam togu nang panghirimonna di hangoluan sogot huhut lam hiras rohana mangarade  dirina managam sihirimon i marhite na lam jonok tu Tuhan i jala lam denggn parsaoranna dohot pambahenanna tu donganna jolma. Anggo angka na mate i nunga sun ulaonna, jala ndang diboto i be manang aha, ndang adong be pardomuanna tu na mangolu, ai ndang marjambar be nasida  di saluhut angka na masa di hasiangan on ( Parjamita 9: 5-6). Ala ni ndang pola be ringkot tangianghonon na monding i asa dijalo Tuhan i ibana hundul tu lambungNa, manang asa bongot ibana tu surgo i. Songon i ndang pola sidohonon tu na mate i “selamat jalan “ laho paborhahon. Tu na mangolu do boi dohonon “selamat jalan”, isara ni molo borhat ibana tu pardalanan na dao, anggiat sehat ibana di pardalanan, tiur pardalananna, dao angka parmaraan, abatabat dohot hasusaan. Ai taboto lapatan ni hata “selamat” na hira dos do lapatanna dohot hata horashoras. Tontu sala do molo nidok tu na mate horas ma ho di pardalanan. Selamat lapatanna, hipas, dao sian parmaraan, hasusaan, bencana, dohot na suman tusi. Jadi laos boi do i  marlapatan hipas, dao sahit.  Jadi molo nidok songon i tu na mate dos do lapatanni tu na manangianghon na mate i, asa selamat ibana sahat tu surgo i, ai manuju surgoi i do pardalanan ni angka na monding, dung jolo maradian satongkin di inganan paradianan i. Jadi tung so adong pe acara penguburan tu ba monding i, anggo tu na monding i ndang adong be panghorhonna, alai tu na mangolu do adong panghorhonna. Na manontuhon sadasada halak masuk tu surgo do manang ndang, haporseaonna tagan di ngoluna do. Pastina sadasada halak masuk surgo dapotna ndang dung mate ibana, alai tingki mangolu do. Angka halak naung porsea tu Tuhan Jesus tagan di ngoluna, i ma naung tubu paduahalihon jala manjalo Jesus Tuhan jala Sipalua di ibana marhite na pasahathon sandok ngoluna  gabe nampuna ni Kristus ( Rom 5: 8-10; Yoh, 3: 16).
Hea do tong adong sungkunsungkun, ia pandita i boasa dipangkulingi na mate i, laho manutup batang mandok; “Sai diramoti Tuhan Debata ma laho ruar dohot laho bongot olat ni on ro di saleleng ni lelengna”. Molo pandita mandok hata i, songon naposo ni Debata do ibana mandok i, pasahathon bangke i tu bagasan pangaramotion ni Debata. Taingot ma ndang sude halak boi mandok songon i tu na monding i, holan naposo ni Tuhan i do, na manghatai atas Goar ni Tuhan i. Hata na nidok ni pandita i pe tong do na dienet sian hata ni Debata, na pabotohon tu huria, ia na monding i nunga di bagasan tangan ni Debata, ndang boi be ibana morot sian i. Songon i di tingki penguburan, adong hata ni pandita mandok: Ale si Anu sian tano do parmulaan ni dagingmu, mulak ma i gabe tano. Alai Tuhan Debata na manompa ho, dohot Tuhan Jesus Kristus na paluahon ho sian dosa, dohot Tondi Porbadia na manjou ho tu hangoluan na so ra suda, i ma mangaramoti orbuk ni bangkem, paima ro ari parpudi i”. Di son pe songon naposo ni Debata do pandita i mandok i, pasahathon bangke ni na monding i tu pangamarotion ni Debata, jala laos paingothon huria i, paboa jolma i na tinompa Debata sian tano, ingkon mulak do i gabe tano pambuatanna hian, marhite hamatean i, songon na hinatahon ni Debata tu si Adam dung madabu ibana tu dosa. ( 1 Musa 3: 19).
Marhite sian hatorangan i boi ma ra antusanta ndang pola marimbar inganan  paborhathon tu na monding, boi do langsung sian bagas ni na monding i manang sian rumah duka manang sian gareja. Ndada molo dipaborhat sian gareja gabe lobi tarjamin ma ibana dijalo Tuhan tu lambungNa manang tu surgo i.Taringot tu sungkun wajib do molo mate sintua ingkon  sian gareja dipaborhat. Olat ni na binoto ndang pola adong aturan mandok ingkon wajib. Tong do targantung tu sisolhot do i. Molo so pola ninna sisolhot ba ndang  pola ingkon dipaksahon. Alai ingkon sai sosohonon ni parhalado do asa sian gareja sintua manang parhalado na monding i dipaborhat, ai nunga  dihasomalhon huria paborhathon parhalado na monding sian gareja, laho manghormati panghobasion ni sintua i tagan di ngoluna asa laos gabe apulapul i di keluarga jala  gabe jamita tu huria i. Angkup ni i  huria i  boi rap martangiang manghamauliatehon panghobasion ni parhalado i  tu Debata, anggiat dipasupasu Tuhan i sude panghabosaionna i di tongatonga ni huria. Jala boi pangulaonna i tiruan tu angka parhalado na asing, manang ruas ni huria.  Jala ndang holan parhalado boi dipaborhat sian gareja, ruas na somal pe boi do, molo apala dipangido ruas i, asal ma di tingki ngoluna na burju do ruas i di ulaon parhuriaon, tau tiruan pangalahona  tu angka ruas ni huria na asing.  Molo so ruas na burju do unang pola dipaborhat sian gareja, ai gabe partuktuhan do i tu angka ruas na asing. Ingkon  boi do ngolu ni ruas i tagan di ngoluna gabe jamita tu huria i sandiri. Parulaon angka na denggan ni angka na monding i tagan di ngoluna, boi do i gabe apulapul di angka sisolhot dohot angka dongan na tininggalhonna di portibi on. (pdt msm panjaitan)