RENUNGAN YESAYA 35: 1-4, RO DO JAHOWA TONGON PALUAHON BANGSONA ( ALLAH DATANG MENYELAMATKAN UMATNYA)

 RO DO JAHOWA TONGON PALUAHON BANGSONA ( ALLAH DATANG MENYELAMATKAN UMATNYA)

Horas ma di hita. Selamat Ari Minggu Advent IV (24 Desember 2023), i ma minggu Advent na parpudi. Marsogot sahat ma hia tu Ari Pesta Parningotan Hatutubu ni Jesus. Di bagasan Jesus ro do Debata paluahon hita jolma sian dosa.

1. Konteks historis ni turpuk (Jesaya 35: 1-4).

Sian mulai madabu jolma tu dosa, nunga dosa i na mangarajai ngoluna, na mambahen hita jolma mangihuthon hagiothagiot ni portibion.

Dibereng Debata do songon dia jorbut ni parngoluon ni hita jolma molo dipasombu dosa i mangarajai ngolunta . Asing ni na lam rarat hajahaton, halumlamon, hamagoan na saleleng ni lelengna na ma jambarta. Alai ala holong do roha ni Debata di jolma na tinompa-Na i manigor disangkapi Debata do paluahon hita jolma sian gomgoman ni dosa i. Realisasi ni sangkap i, mulai tarida di usaha ni Debata pajongjonghon sada bangso gabe bangso-Na, asa marhite bangso i Debata mandalanhon missi-Na i ma paluahon saluhut jolma sian gomgoman ni dosa. Di mulai ma i sian pamilliton-Na di si Abraham. Dipasupasu Debata si Abraham asa gabe pasupasu tu saluhut bangso, jala dibahen maringanan di tano Kanan, i ma tano na strategis, na boi dohonon pusat ni portibion, na manghubunghon tolu benua, i ma Asia, Afrika dohot Eropa. Sian pinompar ni si Abraham ma, i ma halak Israel dipajongjong Debata sada bangso gabe bangso-Na, na diihoti Debata marhite sada padan na dipatolhas di dolok Sinai, di pardalananan ni halak Israel ruar sian parhatobanan ni bangso i di tano Misir manuju tu tano Kanan, ima tano na nijanjihon ni Debata bahen ingananan nasida. Marhite saluhut pengalaman ni parngoluon ni bangso i di bagasan panogunoguon ni Debata Jahowa, i ma Debata naung nipadanhon ni bangso i gabe Debata nasida, Debata na gabe sisombaon jala siihuthonon nasida di sandok parngoluon. Alai songon bangso ni Debata nasida ingkon radotan nasida do patik naung pinasahat ni Debata tu nasida marhite si Musa, asa marhite i boi gabe tiruan nasida di haporseaon dohot parange na denggan di sude rumang ni parngoluon tu angka bangso na humaliang. Domu tusi marpadan do Debata, molo diradoti nasida patik i ingkon sai tarpasupasu ma nasida, alai molo dilaosi do jala manimbil nasida gabe siihuthon debata sileban ingkon uhumon ni Debata do nasida. Di bagasan sejarah ni ngolu nasida na gok tantangan dohot perjuangan, sai ditogutogu Debata do nasida marhite angka naposo na pinabangkit ni Debata, asa tangkas nasida mananda jala manghaporseai na Sasada Debata Jahowa do Debata na sintong na patut sisombaon jala sioloan ni sandok jolma manang bangso. I do sasintongna missi Debata pabangkithon nasida gabe bangso-Na asa sude bangso na di portibion mananda jala manghaporseai Debata Jahowa, jala marhite haporseaon i ma boi nasida malua sian gogomgoman ni

dosa dohot sian panghorhon ni dosa i. Alai jotjot do bangso i ndang mangingot padanna, ala jotjot do nasida mangihuthon angka debata sileban, jala ndang marparange songon bangso ni Debata. Ala ni jotjot do hona uhum ni Debata nasida, disosak angka bangso na humaliang. Ala manabu do angka raja ni bangso i holan manggulut huaso harajaon portibi, lupa ma nasida songon bangso ni Debata, na ingkon tongtong marrajahon Debata, ujungna dung salpu raja Salomo, mabola dua do harajaon Israel i, i ma harajaon Israel Utara (sampulu marga) na marpusat di huta Samaria, jala harajaon Selatan ( dua marga) na margoar harajaon Juda marpusat di Yerusalem. Harajaon Israel Utara na so marrajahon dinasti ni si David be, gabe hona uhum ni Debata, madabu ma nasida tu gomgoman ni harajaon Assur taon 722 sM. Sian mulai i nunga mago be harajaon i.Tading ma holan harajaon Juda na holan dua marga nama ima marga Juda dohot Benjamin mamboanhon goar Israel i, alai on pe boi martahan olat ni taon 587 sM do. Ai madabu do nasida marsorinsorin tu gomgoman ni harajaon na asing, mulai sian harajaon Babel, Persia, Junani dohot Rom. Si Jesaya dipabangkit Debata gabe panurirang di tongatonga ni harajaon Juda, mulai sian taon 740 sM. Situasi na krisis do hatiha i di bidang politik. Nunga manggogo harajaon Assur naeng manguasai Israel Utara, jala ujungna taon 722 sM madabu ma haraon i tu tangan ni harajaon Assur. Harajaon Juda i pe disosak harajaon Assur do sian Utara, harajaon Mesir sian Selatan jala harajaon Babel sian Timur. Hira na targogot ma panghilaan nasida. Disituasi na songon i ma ro hata ni Debata paposhon rohanasida, asa unang mabiar jala asa tongtong marsihohot marsigantung tu Debata Jahowa. Dibagabagahon ma na ro do Jahowa paluahon bangsona i, sian hagogotan i, asalma tongtong marpos ni roha nasida tu Debata.

2. Haroro ni Tuhan i manghorhon las ni roha dohot ololop. Dijouhon panurirang Jesaya do tu bangso ni Debata asa marlas ni roha manjanghon haroro ni Tuhan i paluahon bangso-Na. Dipatudos do bangso naung mandate i songon halongonan, songon tano bangkal bangkal dohot adaran naung hasang, na so tubuan manang be. Secara geografisna, memang gomodang do Tano Juda songon halongonan, parhorsihan, manang tano bangkalbangkal ro di adaran na so tubuan manang aha. Tudos tusi ma ngolu ni halak Israel naung mansai hasang ala so dibornohi hata ni Debata be, gabe ndang marparbuehon angka na uli dohot na denggan be di ngoluna di adopan ni Ddebata nang tu angka na humaliang. Laos songon i do nang parngoluon ni hita jolma naung digomgomi dosa, jala naung mansai dao sian Debata gabe patuduhon angka pangalaho na mansai jorbut, i ma angka na masihosoman, masilatean sahat ro di na masibunuan. Alai molo dung ro Tuhan i paluahon bangso-Na sian dosa, muba ma tano parhorsihan dohot tano bangkalbangkal i gabe tano na napu hatubuan ni hau na denggan, hau na uli ro di angka bunga na uli na mambahen las jala dame roha ni halak na jonok tu inganan i. Dipatudos do hamubaon ni tano parhorsihan dohot tano bangkalbangkal i, gabe songon hamuliaon ni Libanon dohot haulion ni Karmel dohot Saron. Di buku Padan Na Robi tarbarita do Libanon ala ni haulion ni luat i dohot ala ni hamoraon ni luat i di sumber daya alam i ma angka hau na mansai denggan, isara ni hau ares na mansai denggan dipangke bahen parhau ni jabu. Parhau ni bagas joro na di Jerusalem pe godang do mamangke hau ares sian Libanon. Hamubaon i dipatudos nang tu hinauli ni Karmel dohot Saron. Karmel i ma sada pegunungan di tano Israel di pesisir ni Laut Tengah. Mansai uli do inganan i ala ni angka suansuanan na marragam disi , jala sahat saonari ditata pemerintahan Israel do inganan i na gabe daerah wisata na uli situtu. Saron sada dataran na mansai bidang di holangholang ni dolok Tabor dohot Tao Tiberias (2 Kronika 5: 16) na tarbarita ala hatutubuan ni bunga "panssur" (mawar). Tarbarita do di sandok portibi on, haulion ni bunga mawar Saron na mansai dihalomohon halak, na marragam rupana, adong na bontar, na rara, da merah jambu dohot na ungu. Tudos tu hamuliaon ni Libanon, dohot hinauli ni Karmel dohot Saron ma muse hamuliaon dohot haulion ni parrohaon ni jolma naung sinodangan ni hamuliaon ni Debata na ro paubahon parrohaon ni jolma i. Haroro ni Debata na disuriranghon si Jesaya dipasaut marhite haroro ni Jesus Kristus. Haroro ni Jesus i manosohon tu ganup hita laho paubahon roha, sian parrohaon na hasang, parrohaon na mansai roa, gabe parrohaon marmulia jala uli, na gabe sihalomohonon ni Debata dohot dongan jolma.

3. Haroro ni Tuhan i papirhon tondinta asa unang mabiar. Ala ni dosa nunga digohi biar roha ni hita jolma. Roha biar tubu ala sai hira na adong mangaletei hita naeng mamunu manang mansusai hita. Mabiar do hita mardalan sasada hita so tung adong maon na mangganggu hita. Mabiar do hita taringot ngolunta, manang taringot tu ari pangapudianta. Boi do tubu biar ala manghilala hagaleonna, manang ala so adong parondingondinganna. Bangso Juda di zaman ni si Jesaya mabiar mamereng hagogoon ni bangso na humaliang nasida na sai manosak nasida. Manghilala nasida ndang adong gogo ni tanganna laho mangalo dohot gogo ni patna marlojong laho maringkati paluahon diri, gabe tamba ma biar di roha nasida. Ala ni didok Debata tu angka naposona, pargogoi hamu ma angka tangan na daukdauk dohot angka pat na telluktelluk. Tontu on diulahon marhite na paposhon roha ni bangso i, paboa ro do Tuhan laho paluahon nasida. Debata do nampuna huaso di nasa na adong, tarmasuk angka na gogo ni portibion..Manang songon dia pe huaso ni angka na gogo ni portibi on, ingkon tunduk do i tu huaso ni Debata. Ala ni molo taloas tongtong Debata mandongani hita ndang adong sihabiaranta. Songon na nidok ni apostel Paulus tu huria Rom ( 8: 31), molo Debata dongantan ise ma alonta? Jadi haroro ni Debata mandapothon hita marhite Jesus asa gabe Debata do donganta, jala ala ni umbahen dibahen deba goar ni Jesus i "Immanuel" na marlapatan donganta ma Debata. Alai haroro ni Tuhanta ndada holan paluahon hita sian angka na pasorathon jala mangihoti hita di parngoluon portibion. Na umbalga sian i ima paluahon hita sian dosa. Dosa i do na patubuhon biar di hita, ai ala ni dosa i gabe tubu ma panghilalaan na mandao sian Tuhan i. Alai molo mandao do hita sian Tuhan i, ingkon sai tubu do biar dohot lomos ni rohanta di ngolunta on. Alai molo sai jonok do Tuhan i di lambungta jala Tuhan i tabahen na gabe donganta, dao do biar dohot ganggu ni roha sian ngolunta.

__________________________

Evangelium: Jesaya 35:1-4

1 Marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur.

2 Marbunga situtu ma i jala marolopolop, masa ma tutu parolopolopon dohot pariaiaon. Hamuliaon ni Libanon dibasabasahon tusi rap dohot hinauli ni Karmel dohot Saron. Idaonnasida ma hamuliaon ni Jahowa, hatongamon ni Debatanta.

3 Pargogoi hamu ma tangan angka na dauk jala pahot hamu angka pat na telluktelluk.

4 Dok hamu ma tu angka parroha na tahuton: Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ro do Ibana tongon paluahon hamu.

Epistel: Heber 10:5-10

5 Ala ni i, ninna do di habobongotNa i tu portibi on: "Ndang diparhagiot rohaM pelean manang silehonlehon; daging i do dipauli Ho di Ahu! "

6 Ndang lomo rohaM di pelean situtungon manang di pelean pardosaon.

7 Jadi ningku ma: Na ro ma Ahu mangulahon lomo ni rohaM, ale Debata; di pustaha i do tarsurat taringot tu Ahu.

8 Didok jolo: "Ndang diparhagiot Ho pelean dohot silehonlehon, nang pelean situtungon manang pelean pardosaon, jala ndang lomo rohaM di na pinelehon mangihuthon patik. "

9 Dung i didok ma: "Na ro ma Ahu, mangulahon lomo ni rohaM! " Disi ma dipasohot na parjolo i, asa dipajongjong na paduahon.

10 Di bagasan lomo ni rohaNa i gabe angka na badia hita, binahen ni daging ni Jesus Kristus, naung pinelehonNa, na sahali i.

Semua tanggapan:

17Ricky Sitopan II, Drs Banuasi Simamora dan 15 lainnya

5

Suka

Komentari

Bagikan

RENUNGAN LUKAS 2: 15-20, SALUHUT BANGSO PASANGAP HUHUT MAMUJI DEBATA ( SEGALA BANGSA MEMUJI DAN MEMULIAKAN ALLAH)

 SALUHUT BANGSO PASANGAP HUHUT MAMUJI DEBATA ( SEGALA BANGSA MEMUJI DAN MEMULIAKAN ALLAH)

Horas ma di hita. Selamat patupahon parningotan di hatutubu ni Jesus manang Natal ( 25 Desember 2023) ma di hita. Las ma rohanta mamestahon hatutubu ni Jesus i di portibion dohot di ngolunta marsadasada. Di na mamestahon Natal hita, ndada ari hatutubu ni Jesus na tapestahon, alai hatutubu-Na i do. Boi do ndang taboto be ari hatutubu ni Jesus na sasintongna. Alai nunga ditotophon huria na parjolo i ganup ari 25 Desember ma huria i dohot sude na porsea patupahon parningotan di hatutubu ni Jesus. Tutu ndang apala ari hatutubu-Na i na rumingkot di hita, sintong ni hatutubu-Na i do. Sintong do Ibana tubu tu portibion, Debata gabe jolma, saor ditongatonganta, gabe Sipalua hajolmaon. Ala ni i molo tapestahon pe hatutubu ni Jesus ndang dos i dohot na mamestahon ari ulang tahun ni hita jolma. Molo adong manganggap na marnatal i dos dohot na mestahon ari ulang tahun ni Jesus, songon na hea binege adong masa na songon i, tung sala bolon do i. Ai Jesus i nang pe hea tubu tu portibion, ndang torus Ibana marrumang jolma di portibion, mulak do Ibana tu ampuan ni Ama i di banuaginjang. Alai ala hea Ibana tubu tu portibion marrumang jolma laho paluahon hita jolma sian gomgoman ni dosa, jadi hatutubu-Na i do na taingot jala tapestahon asa marhite i lam tangkas taauhon holong ni roha ni Debata di hita pardosa. Jadi las ma rohanta di Pesta Parningotan Hatutubu ni Jesus on marsomba tu Ibana, huhut tatangihon barita hatutubu ni Jesus i na dienet sian Lukas 2: 15-20, asa dohot hita manghangoluhon huhut mamaritahon barita hatutubu-Na i tu angka donganta. Disoarahon barita na uli taringot tu hatutubu-Na i do tu hita sadarion, asa dohot hita tongtong pasangaphon huhut mamujimuji Ibana di ngolunta on. Domu tu si adong tolu hal na mansai ringkot hangoluhononta sian barita na uli sadarion.

1. Tahaporseai ma barita nauli hatutubu ni Jesus i. Barita hatutubu ni Jesus ndada tu istana ni raja manang tu angka pimpinan agama ni Jahudi parjolo dipatolhas, alai tu angka parmahan na di padang Efrata do. Angka parmahan tardok di pamerengan ni masyarskat ortodoks Jahudi tarmasuk golongan masyarakat na lea do jala pardosa do, ala ndang adong pangantusion nasida taringot tu ruhutruhut parugamoon Jahudi. Ala ni ni ndang boi dipabangkit nasida gabe sitindangi di paruhuman, ala dirajumi do ndang sihaporseaan hatana. Alai tu halak na songon i do ro Debata marhite suruanna mamaritahon barita na uli taringot tu hatutubu ni Jesus, na langsung didapothon surusuruan ni Debata tu padang Efrata, asa nasida gabe sitindangi parjolo di hatutubu ni Jesus i. Mabiar situtu angka parmahan i marnida haroro ni surusuruan i na marsinondang sangapna humaliang nasida. Alai didok surusuruan i do asa unang mabiar nasida, ai barita halalas ni roha godang do na binoan ni surusuruan i, jala parsaulian ni sandok bangso. I ma naung tubu di nasida saborngin i, di huta ni si Daud, i ma di huta Betlehem, Sipalua, i ma Kristus Tuhan i. Jala torang do dipaboa surusuruan i, na di bara ni pinahan do hatutubu ni Jesus, ai peak di panggagatan do posoposo i diborhos. Udut tusi ro ma parangan parbanuaginjang marende mamuji psangap Debata, mandok: "Hasangapon ma di Debata di ginjang dame ma di tanoon di angka jolma halomoan i". Jadi di na laho i angka surusuruan i sian nasida, dompak ginjang manigor masipandohan do angka parmahan i asa laho nasida tu Betlehem , marnida na masa i, naung pinabotohon ni Tuhan i tu nasida. Porsea do nasida, di barita na uli i, ndang ganggu roha nasida. Ala ni do nasida manigor borhat laho marnidasa, so pola jolo marpingkir manimbangi hata ni surusuruan i. Jadi saut ma nasida borhat, gabe jumpangsa ma posoposo i songon na binaritahon ni surursuruan i. Nasida ma, na dianggap halak Jahudi ndang boi gabe sitindangi di paruhuman, alai dipangke Debata ma nasida gabe sitindangi parjolo hatutubu ni Jesus i. Molo hita nuaeng, barita na ma na tabege, jala nunga tapestahon hatutubuna i dohot ragam ni angka acara na ribur, jala na deba bermewahmewah. Alai suraon porsea do hita di barita i, jala boi do hita pajumpang dohot Jesus marhite angka acara pesta natal na tapatupa? Manang holan kesan hariburon, manang kesan angka na asing ni pesta i do na lohot di rohanta. Molo tapestahon hatutubu ni Jesus dohot ragam ni angka acara na manait roha, naeng ma boi marhite i lam tangkas haporseaonta tu Jesus i.

2. Tabaritahon ma barita na uli hatutu ni Jesus i. Di na sahat angka parmahan i tu bara ni pinahan di Betlehem, jala dibereng nasida posoposo i peak di panggagatan di lambung ni si Maria dohot si Josef, dibaritahon nasida ma aha naung binege nasida sian sururuan i taringot tu dakdanak i. Tontu na dibaritahon i ma taringot hadirion ni dakdanak i sandiri, na Ibana do Kristus ( Mesias) naung dibagabagahon ni Debata tu bangso Israel, jala Tuhan na gabe Sipalua hajolmaon. Tu ise nasida mambaritahon? Tontu parjolo ma tu si Maria dohot si Josep, jala dunghon i tu angka halak na dirurar ni bara ni pinahan i, dohot tu angka na asing na pajumpang dohot nasida muse. Jadi hita pe molo naung porsea di Jesus, ingkon dohot do hita gabe parbarita na uli manang sitindangi taringot tu Jesus. Parbarira na uli ndada holan marhite hata manang jamita, alai lumobi do marhite panindangionta di ngolunta. Tahatindanghon di ngolunta Jesus i do Sipalua hita sian dosa. Ala ni molo taargahon naung dipalua hita sian dosanta, ndang sai dandatanta be mangulahon dosa. Tahatindanghon na Ibana do Mesias (Raja) na manggomgomi sandok jolma, tontu hita pe ingkon sai olo ma unduk tu panggomgomion ni Jesus, jala Ibana do Tuhan, sisombaon jala sioloan ni sandok jolma. Jadi marhite ngolunta i do hita manghatindanghon Jesus i, marhite na mamarangehon aha naung niajarhon ni Jesus i tu hita.

3. Tapasangap jala tapapujipuji ma Debata ala ni hatutubu ni Jesus i. Mulak do angka parmahan i tu inganan nasida, mandapothon birubiru na pinarmahan nasida. Sude nasida di bagasan las ni roha, songon las ni roha ni angka naung mamestahon hatutubu ni Jesus i, jala naung tangkas mangantusi lapatan ni hatutubu ni Jesus i. Songon angka na marlas ni roha, dipasangap jala dipapujipuji nasida do Debata, ala ni sude angka na binege jala na binereng nasida. Tontu ndada holan di na laho mulak i nasida pasangap jala mamujimuji Debata, alai torus do saleleng ni ngoluna. Sude na niula nasida gabe hasangapon dohot pujipujian di Debata. Songon i do nang dipangido sian hita, ndada holan di na mamestahon natal i hita mamuji pasangaphon Debata. Ndada holan di tingki marende hita pasangaphon dohot mamuji Debata. Ai boi do mansai uli ende na taendehon di natal i, jala manorusi tu roha ni na mambege. Hape ndang songon uli ni ende na taendehon i, roha dohot parulaonta siganup ari. Ala ni na rumingkot di pangido sian hita, pasangap jala papujipuji Debata do marhite parange dohot parulaonta.

Unang gabe marlea Tuhani ala ni parange dohot parulaonta. Angkup ni i na mansai ringkot sadaranta di ngolunta on, nampuna ni Debata do hasangapon i, ndang sigulutonta i sian Ibana. Apalagi di ngolunta on godang do tabereng na sai berusaha manggulut hasangapon i tu dirina, pola laho pasauthon i dikorbanhon manang disusai donganna. Molo so songon i ingkon masa do hagaoron, jala boi sahat tu parbadaan manang porang. Taparsinta do asa hadameon na masa di ngolunta on manang di tongatonga ni hita jolma. Alai asa dapot i ingkon tahangoluhon do songon ende ni angka parangan parbanuaginjang, di tingki ro surusuruan mambaritahon barita natal i tu angka parmahan na mandok: "Hasangapon ma di Debata di ginjang, dame ma di tanoon, di angka jolma halomoan i". Ende on ma tongtong tahangoluhon, asa marsangap Debata tongtong di ngolunta on, jala asa gabe sibahen dame hita di tongatonga ni hajolmaon.

_________________________

Evanelium: Lukas 2:15-20

15 Jala di na laho i angka surusuruan i sian nasida dompak ginjang, masipandohan ma angka parmahan i: "Beta ma hita tu Betlehem, taida ma na masa on, na pinabotohon ni Tuhan i tu hita!"

16 Jadi hatop ma nasida laho tusi, gabe jumpangsa si Maria dohot si Josep dohot Posoposo i, na peak di panggagatan i.

17 Asa dung diida, dibaritahon nasida ma boaboa, naung dihatahon tu nasida taringot tu Dakdanak i.

18 Jadi sude na umbegesa, longang be do siala na hinatahon ni angka parmahan i tu nasida.

19 Ia si Maria, dipeop do hata i sudena jala dipahusorhusor di bagasan rohana.

20 Mulak do angka parmahan i, dipasangap jala dipapujipuji do Debata ala ni sasude na binege jala na niidanasida, songon naung dihatahon i tu nasida.

Epistel: Psalmen 148:1-14

1 Halleluya! Puji ma Jahowa, hamu ale angka sian banua ginjang, puji hamu Ibana di angka banua ginjang!

2 Puji Ibana, sude hamu ale angka surusuruanNa, puji Ibana, sude hamu ale angka paranganNa!

3 Puji Ibana, ho ale mata ni ari dohot bulan, puji Ibana, sude hamu ale bintang angka na marsinondang i!

4 Puji Ibana, hamu ale angka langit ni langitan dohot hamu ale aek angka na di atas ni langit!

5 Ingkon pujionnasida ma goar ni Jahowa, ai mandokkon Ibana, jadi tartompa ma nasida.

6 Jala Ibana pahot angka nasida ro di salelenglelengna, dibahen do sada aturan jala ndang halaosansa.

7 Puji ma Jahowa, hamu ale angka sian tano on, angka binatang ni laut ro di sude angka lung!

8 Ho ale api dohot ambolas ro di timus, habahaba, na pasauthon hataNa i.

9 Hamu ale angka dolok dohot sude angka robean, hamu ale hau angka na marparbue ro di sude hau Ares.

10 Ho ale binatang dohot sude pahanpahanan, angka gulomit ro di angka pidong na marhabong.

11 Hamu ale angka raja ni tano on dohot sude angka bangso, hamu ale angka pangarajai ro di sude angka panguhum ni tano on.

12 Hamu ale angka dolidoli dohot namarbaju pe, hamu ale angka natuatua rap dohot angka na bajar.

13 Ingkon pujionnasida ma goar ni Jahowa, ai sasada goarNa i do na timbul, diatasi hamuliaonNa i do tano on dohot angka langit!

14 Jala Ibana patimbul sada tanduk di bangsoNa i, bahen pujipujian di sude angka na niasianNa, di angka anak ni Israel, bangso hasolhotonNa i. Halleluya!

Semua tanggapan:

2Sinta Uli Panjaitan dan Eben Simanungkalit

RENUNGAN LUKAS 1: 46 b - 55, DIPATIMBUL ROHANGKU DO TUHAN I ( JIWAKU MEMULIAKAN TUHAN )

 DIPATIMBUL ROHANGKU DO TUHAN I ( JIWAKU MEMULIAKAN TUHAN )

Horas ma di hita. Selamat Ari Minggu Advent III (17 Desember 2023). Las ma rohanta masomba tu Tuhanga, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evanelium Lukas 1: 46b-55, asa dohot hita patimbulhon Debata, marhite na manghangoluhon ende pamujion ni si Maria di Debata. Patimbulhon Debata marlapatan pasangaphon Debata, mambahen Debata di ngolunta di ginjang ni saluhut. Ro do surusuruan Gabariel pabotohon tu si Maria na pangkeon ni Debata ibana laho manubuhon Jesus na gabe Sipalua jolma sian hadosaonna. Tontu bingung jala marungkil do jolo si Maria laho manjalo i, lumobi ala so mardongan saripe do pe ibana. Alai dung dipapos surusuruan i rohana mandok, ndang adong na so tarpatupa Debata, ujungna diundukhon si Maria ma hata ni surusuruan i mandok: "Naposo ni Debata do ahu. Sai saut ma tu au songon na nidokmi". Hatop dunghon i ditopot si Maria ma si Elisabet, dongan saripe ni malim Sakarias, di hutana di dolok Juda. Nunga dipabotohon surusuruan i hian tu si Maria naung gabegabean nang si Elisabet, sada ina naung didok halak hol, na so tagamon be boi tubutubuan, paonom bulanhon ma hatiha i. Marsisolhot do pe si Maria dohot si Elisabet. Tontu na naeng manghatai ma si Maria dohot di Elisabet taringot tu na masa tu nasida na dua.Dung pajumpang si Maria dohot si Elisabet jala manghatai taringot na masa tu nasida na dua, i ma na rap di pangke Debata nasida na dua pasauthon sangkap haluaon na pinatupa ni Debata tu hajolmaon, gabe lam tamba ma pos ni roha ni si Maria manjalo pambahenan ni Debata na balga i di ngoluna. Tamba ma muse las ni rohana ala didok si Elisabet do tu ibana: "Martua ma ho, ala dihaporseai ho, ingkon tulus na tinonahon ni Tuhan i tu ho!". Dungi sian las ni rohana, dipasahat ibana ma pujipujian tu Debata. Dipatimbulhon rohana ma Debata na mamangke ibana, sada halak na metmet di portibion laho pasauthon ulaon ni Debata na mansai balga. Di pardalanan ni huria i muse di pudian ni ari digoari do ende pujipujjian ni si Maria on Ende "Magnificat", ala di terjemahan hata Latin dimulai do hata ni ende i dohot pandohan "magnificat" (magnificat anima mea Dominum, na diterjemahan Bibel Toba didok: dipatimbul rohangku do Tuhan i) Magnificat marlapatan patimbulhon manang pabalgahon. Diterjemahan bahasa Indonesia didok memuliakan. Di hata Inggris didok "magnify". Dihatindanghon si Maria do marhite endena i pambahenan ni Debata na balga situtu, na mambahen hamubaon di parngoluon ni jolma, hamubaon di parrohaaon, hamubaon di ngolu sosial dohot ekonomi. Sian isi ni endena i tarida do boasa songon i las ni roha ni si Maria patimbulhon Debata, i ma ala:

1. Ditatap Debata angka jolma na metmet songon si Maria. Sadar do si Maria halak na metmet do ibana di tongatonga ni hajolmaon. Di tongatonga ni jolma naung digomgomi dosa, ndang apala diparetonghon halak anggo halak na metmet, manang halak na pogos. Lea do halak na metmet di pamerengan ni jolma. Hape anggo di adopan ni Debata arga do nang halak na metmet i, jala boi do i dipangke gabe ulaula-Na. Dipangke Debata si Maria gabe naposo ni Debata pasauthon haluaon ni sandok jolma, gabe diparhatua angka naung manjalo hatuaon i ma ibana muse di pudian ni ari marsundutdundut. Tontu ndada holan tu si Maria pambahenan ni Debata na songon i. Alai sude jolma na manghaporseai Debata, na marhabiaran tu Debata jala na mangolu di bagasan habadiaon boi do pangkeon ni Debata gabe ulaula-Na laho pasauthon sangkap-Na, mamboan haluaon tu sandok jolma. Hita pe boi do pangkeon ni Debata gabe ulaula-Na laho pasauthon sangkap-Na, asal ma rade rohanta pangkeon ni Debata. Laos sada jamita do i tu hita, asa ndang jadi lea rohanta mida halak na metmet, manang halak na pogos. Ndang jadi hita mangukur halak marhite status sosialna di portibion, manang marhite jabatan manang kedudukanna di parngoluon na di portibi on. Alai taargahon ma halak marhite haporseaonna na rade mamelehon dirina dohot na adong di ibana pangkeon ni Debata gabe ulaula-Na mangaradoti ulaon ni Debata, mangalo ragam ni hajahaton dohot pahothon hatigoran dohot hasintongan.

2. Debata paserakhon angka na ginjang marroha, alai patimbohon halak serep marroha. Ndang lomo na roha ni Debata mida halak na ginjang roha, i ma halak na sai patimbohon dirina, halak na manengahon angka silehonlehon na adong di ibana, isarana sinadongan, na mangasahon gogo, hapistaran, ro di status sosialna na dianggap tumimbo sian angka donganna. Mula ni hadadabu ni jolma tu dosa, ala ni kesombongan ni jolma i do i, naeng dos dohot Debata gabe dioloi hata ni sibolis. Di Buku Na Badia i godang do sipaingot, asa angka anak ni Debata unang madabu tu ginjang ni roha, alai asa tongtong mangolu di bagasan haserepon. Isarana di Poda ni Raja Salomo 29: 23, didok: "Roha haginjangon ni jolma pajimput ibana, alai anggo partondi na serep dapotan hamuliaon." Tuhan Jesus sandiri pe sai diajarhon do tu angka siseanna, asa unang olo nasida patimbo dirina, alai naeng ma tongtong patutoruhon diri. Di Mateus 23: 12, didok do: "Ai sipaoruon do ganup na patimbo dirina; alai sipatimboon do na paoru dirina." Songon i pangajarion ni Jesus tu angka sisean-Na i, ala memang ngolu ni Jesus ro tu portibion ngolu na patotoru diri do. Songon na sinosohon ni apostel Paulus, parrohaon ni Jesus i do sitiruonta, na rade patutoruhon dirina tuat tu portibion gabe jolma, sahat tu na maneahon hosaNa gabe tobus ni hita jolma. Alai siala haradeon ni Jesus patutoruhon diriNa i, gabe dipatimbo Debata do Ibana, gabe Tuhan ni nasa tuan, jala sude marsomba tu Ibana nasa ulut ni tot na di banua ginjang nang na di tanoon (Pil. 2: 5-11). Songon i do nang angka apostel na asing sai diajarhon do tu huria na parjolo i asa sude halak Kristen paholanghon diri sian ginjang ni roha, alai naeng tongtong di bagasan haserepon, ai dialo Debata do angka na ginjang roha alai dilehon do asiasina tu angka na serep marroha.

( 1Petrus 5: 5). Jadi hatutubu ni Jesus tu portibi on marhite si Maria, na gabe Sipalua jolma pardosa, mambahen tiruan di hita pardosa, asa rade patutoruhon diri, asa dipatimbo hita muse di tingkina.

3. Debata manatap angka na dangol di portibion, i ma angka na male ala ni hapogoson. Didok di ayat 53 ni turpuk on: Na denggan dipasuksuk Ibana tu angka na male, jala angka na lobian hian rumar do dipalaho". Angka na male na nidokna, i ma angka na pogos, angka na dangol di portibion, na jotjot hurangan di sipanganon. Angka na lobian i ma angka na mora, alai ndang olo managihon hamoraonna i mangurupi angka na susah manang angka na pogos. Di Buku na Badia i sai dipatuduhon do surung ni asi ni roha ni Debata tu angka na manaon na porsuk di portibion, ala ni panggosagosa ni angka na gogo manang angka na marhuaso di portibion. Boi do masa ala so parduli angka panggomgomi ni portibion di nasida, gabe masa angka hageduhon, ketidak adilan sosial. Jotjot do disuru Debata angka panurirang laho maminsang pangalaho ni angka panggomgomi ni bangso i na so parduli di hasusaan ni parngoluon ni bangso i. Ala ni haroro ni Debata marhite Jesus, i ma laho paluahon jolma sian ragam ni pardangolan na niae ni jolma ala ni dosa i. Panginona ni dosa patubuhon godang angka penindasan sian angka na gogo, manang sian angka na marhuaso di portibion tu angka na pogos, angka na gale. Nunga gabe bangko ni jolma naung nigomgoman ni dosa i na holan mamingkirhon dirina, jala na so adong kepedulianna tu angka donganna na susa. Alai marhite hatutubu ni Jesus dipatuduhon Debata do rasa solidaritas dohot kepedulian tu angka na pogos dohot angka na lea, marhite na tubu Jesus di bagasan hapogoson dohot haleaon. Di pangajarion ni Jesus tu angka sisean-Na, sai ditogutogu do angka na mangihuthon Ibana asa mangurupi angka na pogos jala mangalehon mangan angka na male. Didok Jesus do nasa nabinahen ni angka na porsea mangurupi angka na pogos dohot mangalehon mangan angka na male, na mambahen tu Jesus do i. Angka halak na songon i na dohot manean harajaon ni Kristus i. ( Mat. 25: 23, d.u.). I do nang diajarhon tu angka ssisean-Na, asa gabe parasi roha angka na mangihuthon Jesus songon Debata Amanta parasi roha i (Luk. 6: 36).

____________________________

Evangelium: Lukas 1:46b.-55

46b Dipatimbul rohangku do Tuhan i.

47 Mariaia do tondingku mida Debata, Sipalua ahu.

48 Ai ditatap do haetehon ni naposoNa on. Parhatuaon ma ahu olat ni on marsundutsundut.

49 Ai habalgaon do dibahen Pargogo i tu ahu. Na badia do goarNa i.

50 Ai marsundutsundut do asi ni rohaNa mida angka na mangkabiari Ibana.

51 Hagogoon do diula tanganNa i, dipanserakhon do angka na ginjang marroha.

52 Angka na gogo i dipaijur do sian habangsanasida, dipabangkit do angka na metmet.

53 Na denggan dipasuksuk Ibana tu angka na male, jala angka na lobian hian rumar do dipalaho.

54 Dipainuinu do Israel naposoNa i, marningot asi ni rohaNa i,

55 mangihuthon bagabagaNa na tu angka ompunta, tu si Abraham dohot tu pomparanNa salelenglelengna.

Epistel: 1 Samuel 2:1-10

1 Dung i martangiang ma si Hanna, ninna ma: Marolopolop ma rohangku mida Jahowa, timbul do tandukhu di bagasan Jahowa, na hirtap situtu do pamanganhu dompak angka musungku, umbahen na las rohangku di pangurupionMi.

2 Ndang adong na badia, tudoshon Jahowa, ai ndang adong dungkon ni Ho, jala ndang adong partanobatoan, dungkon ni Debatangku.

3 Unang sai datdati hamu manenganengahon haginjangon, unang ruar hata jungkat sian pamanganmuna, ai Jahowa do, Debata nampuna angka parbinotoan, jala Ibana dumasing angka pambahenan.

4 Marponggolan do sior ni ulubalang, jala marhohos hatogaron do angka naung mandate.

5 Angka na lobian na sai laon laho do mansari sipanganon, jala angka na rapar hian marlanggelangge; pola tubuan anak pitu na hol hian, jala merus boti sitorop anak hian.

6 Jahowa do na mamunu dohot na pangoluhon; Ibana patuathon tu banua toru dohot panangkokhon muse.

7 Jahowa do na mambahen pogos dohot mambahen mamora; Ibana do paijurhon, laos Ibana patimbulhon muse.

8 Ibana pahehehon sian orbuk halak na tarjepol hian, jala dipatimbul na pogos i sian gambo laho pahundulhon tu lambung ni angka na sangap, jala diturpukhon habangsa hamuliaon tu nasida, ai Jahowa do nampuna angka ojahan ni tano on, jala dipaojak di atasna hasiangan on.

9 Sai na ramotanNa do pat ni angka na niasianNa, alai sai parendeponNa do di bagasan haholomon ianggo angka parjahat i, ai ndada binahen ni hagogoon sandiri marhuaso baoa.

10 Sai na tunduk do bahenon ni Jahowa halak angka na mangalo Ibana; mangkuling ronggurna di banua ginjang di atas nasida; Jahowa manguhum angka ujung ni tano on sogot, jala lehononNa hamuliaon tu rajaNa, jala patimbulonNa sogot tanduk ni MessiasNa.

Semua tanggapan:

7Rosse Siahaan, Pinantun Simatupang II dan 5 lainnya