RENUNGAN MARKUS 13: 24-37, DUNGO LAHO MANOMUNOMU HARORO NI KRISTUS (BERJAGAJAGA DALAM MENYAMBUT KEDATANGAN KRISTUS)

 DUNGO LAHO MANOMUNOMU HARORO NI KRISTUS (BERJAGAJAGA DALAM MENYAMBUT KEDATANGAN KRISTUS)

Horas ma di hita. Selamat Ari Minggu Advent I ( 3 Desember 2023). On ma taon baru huria di hita, dung tasalpuhon ujung taon huria di minggu na salpu. Alani las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do hita sadarion na nienet sian Evangelium Markus 23: 24-37, asa tongtong dungo hita di ngolunta on laho manomunomu haroro ni Kristus Tuhan i. Domu do i tu minggu Advent sadarion. Advent lapatanna haroro ni Tuhan i. Nunga diaturhon hurianta sian mulana adong opat minggu Advent andorang so Pesta Parningotan hatutubu ni Jesus tu portibion gabe sipalua hajolmaon. Digoari do Ari Pesta i, Natal, i ma ari 25 Desember, na mulai sian bodari ni ari 24 Desember. Alai umbahen na adong mingguminggu Advent ndada holan pangaradeonta tu pesta Natal i, alai pangaradeon ni rohanta do laho manomunomu haroro ni Tuhanta tu portbion mandapothon hita jolma. Adong dua tahap haroro-Na i na ingkon tatomutomu, i ma haroro-Na na parjolo marhite na tubu di huta Betlehem. I ma na tapestahon ganup ari 25 Desember. Dungi haroro-Na na paduahon, i ma harorona na padua halihon di ari parpudi ni sejarah ni portibion. Anggo haroro-Na parjolo i nunga naung masa i, na manghalashon haroroNa i na ma hita marhite pesta Natal na tapatupa songon tanda ni mauliate ni rohanta, huhut parade rohanta anggiat tongtong tubu Tuhan i marhite Tondi-Na di bagasan ngolunta siganup ari. Laos di si ma hita mangauhon holong ni roha ni Tuhanta i di hita jolma na tinompa-Na, na pola rade Ibana tuat tu portibion manaon na porsuk sahat ro di na mate laho manghophop hita jolma pardosa. Jadi pangaradeon ni rohanta laho manjalo dohot mangauhon holong ni roha-Na i di hita, i do deba lapatan ni minggu Advent i. Ala i ndada holan pangaradeon na songon i na dipangido sian hita di angka minggu Advent on, alai laos dohot pangaradeon laho manomunomu haroro ni Tuhanta na padua halihon i ma di ari parpudi laho manguhumi sandok jolma na tinompa i, na mangolu dohot naung mate hatiha haroro-Na i songon na sai tahatindanghon di haporseaonta. Turpukta sadarion i ma pangajarion ni Jesus domu haroro-Na paduahon di ari parpudi i do.

1.Haroro ni Jesus padua halihon dohot ajal ni hasiangan on. Dihatahon Jesus do taringot tu haro-Na padua halihon i, dung disuriranghon Ibana taringot halelekse ni huta Jerusalem dohot Bagas Joro ni Debata na di huta i. Di na sahali di na manadinghon Bagas Joro na di huta Jerusalem Jesus, didapothon sahalak sisean-Na do Ibana mandok asa dibereng Jesus hinauli dohot hinatongam ni Bagas Joro i. Ia Bagas Joro na nidok ni sisean ondeng, i ma Bagas Joro paduahon pinauli halak Jahudi dung mulak nasida sian habuangan Babel taon 535 s.M, alai dipadenggan Raja Herodes muse, ima raja na pinabangkit ni Kesar Rom laho manggomgomi luat Judea naung nigomgoman ni harajaon Rom hatiha i. Di halak Jahudi hatiha i mansai uli , tongam jala bolon situtu do bagas joro i. Ala ni i tung dihabanggahon nasida do bagas joro i. Alai didok Jesus do tu siseana i, songon i pe uli, tongam dohot bolon ni Bagas Joro i , na ro ma tingkina ndang pasombuon nanggo dua batu martinditindi na so gargaronna. Ndang tagamon so tarsonggot angka sisean-Na i umbege i, gabe disungkun angka sisean i ma Jesus manang na andigan i masa i. Didok Jesus ndang pola sadia leleng nari i masa, na so tupa salpu sundut on so jolo masa i ninna Tuhan Jesus. Jala tutu ma hirahira opat pulu taon nari dung manaek Jesus tu banuaginjang, i ma di taon 70 M dileksehon tentera Rom niuluhon ni Jenderal Titus ma huta Jerusalem dohot Bagas Joro i gabe rata dohot tano. Dipatupa tentera Rom songon i ala mamberontak halak Jahudi mamungka sian taon 66 M tu harajaon Rom. Laho mandopang pemberontakan dikerahhon kaisar Nero ma sian huta Roma lobi 60000 tentera na diperlengakapi dohot sejanjata.Jadi di tingki i masa ma haporsuhon bolon di tongatonga ni halak Jahudi, na so dung adong tudosanna sian mulai panompaon ni Debata rasirasa tingki i. Masa ma nang haraparon, ala so adong be sipanganon. Dirasiphon tentera Rom i ma halak Jahudi i, deba dibahen gabe hatoban, jala deba diboan tu huta Rom songon tawanan. Diparkirahon lobi sajuta halak Jahudi na mate hatiha i, ala tongon do hatiha parningotan Paskah Jahudi, jadi torop do halak Jahudi sian parserahan (diapora) ro tu hutaJerusalem. Jadi dohot ma nasida saluhutna mate hatiha i. Molo adong pe halak Jahudi na boi malua sian pembunuhan ni tentera Rom i gabe marserak ma nasida tu luat na asing. Torop do halak Jahudi na malua i naung Kristen, gabe i ma dalanna lam sar hakristenon i di wilayah harajaon Rom. Didok angka ahli sejarah ni Israel songon Martin Noth rupani, haleleksi ni huta Jerusalem i ma ujung ni sejarah ni Israel na leleng songon na niharaphon ni Debata di Padan na Robi, gabe mulai ma sejarah ni Israel na imbaru i ma hakristenon. Peristiwa taon 70 M i diloas Debata masa mangujungi sejarah ni Israel na leleng i, ala so diulahon nasida tugas panggilanna songon bangso ni Debata, na mamboan missi ni Debata di portibion, jala puncakna ndang porsea nasida di Jesus songon Mesias ni Debata, gabe hona uhum ni Debata ma nasida marhite na mangaloas tentera Rom mangaleksehon nasida.

Dung dihatahon Jesus pangeleksehonon ni huta Jerusalem rodi nasa pangisi ni luat Judea dihatahon Jesus ma muse taringot tu haroro-Na paduahalihon. Di haroro-Na i ma ujung ni sejarah ni portibion, dohot ajal ni hasiangan on, ai hatiha i mangholom ma mata ni ari dohot bulan jala mardabuan ma angka bintang na dilangit i, ai humuntal ma sude hagogoon ni parlangitan i. Lapatanna songon jamita na minggu na salpu na sian Pangungkapon 21: 1-4 i, malekse ma sude tano dohot langit na parjolo i ai tompaon ni Debata ma langit dohot tano na imbaru. Laos di hatiha i ma ro Anak ni Jolma i, i ma Jesus Kristus marhitehite ombun mantat hagogoon dohot hasangapon godang. Lapatanna ndada songon haroroNa parjolo i be,

na tubu di bagasan haleaon, haroro-Na paduahalihon i. Haroro-Na paduahalihon i, gabe las ni roha do i di angka na porsea di Ibana, ai disi ma disuru angka pardisurgo papunguhon saluhut angka na pinillit-Na i, sian desa na ualu, tu inganan naung pinaradeNa, i ma surgo hasonangan. Alai anggo di angka naso porsea, gabe hamagoan na saleleng ni lelengna do haroro ni Jesus marhite uhum sipasahaton ni Tuhanta i tu angka na so porsea di Ibana.

2. Ndang adong na umboto manang sadihari haroro ni Kristus paduahon i.

Didok Jesus di ayat 32 ni turpukta on: "Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i!" Na marlapatan holan Debata Ama i do nampuna huaso disi, jala ndang pola ringkot i botoonta. Na ringkot botooanta jala haporseaanta , i ma na tutu situtu do na ingkon ro do Ibana di tingki na binuhul ni Debata. Ala ni molo adong halak na sai manguji mangetongi andigan ma haroro ni Kristus padua halihon i, i ma angka naeng mangatasi huaso ni Debata manang na naeng mangarajumi dirina dos dohot Debata. Ala ni haliluon sambing do molo sai adong manguji mangetongi tingki ni haroro ni Tuhan i. Apalagi molo ditariashon na binotona i tu torop halak na naeng mangaliluhon halak do i. Sian mulana di pardalanan ni sejarah ni huria i nunga sai adong halak na barani mangetongi sadihari ma i masa jala manontuhon ari bulan dohot taonna. Dungi di ari na ditontuhon i disuru ma halak Kristen marpungu di sada inganan laho manomunomu Kristus i. Alai manang piga hali adong usaha na songon i tongtong do gagal usahana i, ai nunga didok Jesus sian mulana ndang adong na umboto i nda holan Debata Ama i.

3. Dungo ma hamu manomunomu haroro ni Tuhan i. Boasa so dipaboa tu hita tingki ni haroro ni Tuhan paduahalihon i? Ala na dipangido sian hita hadungoon do, haradeon tongtong managam haroro ni Tuhan i, unang sampe tarpodom. Aut sugari dipaboa tingkina, gabe olo ma hita marlembalemba di ngolu portibion, pasauthon hagiotgiot ni daging on. Tarunjun ma mangulahon ragam ni angka hajahaton, ala didok rohana, leleng nari do pe asa ro Tuhan i. Mareak di harorona i pe pinauba roha, niula angka na denggan na boi mambahen las roha ni Tuhan i di haroro-Na i. Ndang dihalomohon Tuhan i songon i roha dohot ngolunta. Alai dipangido do sian hita, dung tajalo asi ni roha ni Tuhan i na manghophop jala paluahon hita sian gomgoman ni dosa dohot sibolis i, parsitutonta tongtong mangihuthon Ibana dohot mangula angka ulaon na denggan na hombar tu lomo ni roha-Na. Hadungoonta, i ma di parsihohoton ni haporseaonta tu Jesus. Mangolu hita tongtong hombar tu hata-Na naung diajarhon tu hita. Ala ni taparbohali dirinta tongtong dohot hata-Na, jala marsaor hita tongtong di ngolunta doho Ibana. Ndada holan di tingki parmingguon manang partangiangan manang angka ibadah na asing sambing hita marsaor dohot Ibana. Di inganan pangulaonta siganup ari pe ingkon marsaor do hita dohot Ibana, ai manang tudia pe hita lao tongtong do diihuthon Tuhanta i hita jala diboto do manang angka aha na taula. Ndang boi hita marsibuni maradophon Debata. Domu tusi do ingkon sai tapangido tongtong panogunoguon ni Tuhan i di ngolunta marhite tangiang. I do umbahen didok Tuhan i sahali tu angka sisean-Na i: dungo ma hamu jala martangiang asa unang bongot hamu tu pangunjunan. Molo nunga Tuhan i na maringanan di bagasan hita marhite Tondi-Na dohot hata-Na, ndang tagamon adong be manang hagoon dia pe di portibion na boi mangaliluhon dohot mangalalapi hita di portibion. Hadungoonta dipatudos Jesus tu angka naposo na paimahon tuanna laho marhutasada. Tugas nasida manjaga pintu bagas ni tuanna i. Ndang dipaboa tuanna i manang sadihari ibana mulak manang na mareak borngin, di tonga borngin, di tahuak manuk manang di torang ni ari. Alai manang sadiharipe tuanna mulak ingkon dungo angka naposona i di dapot, ndang jadi tarpodom. Molo tarpodom didapot ingkon hona uhum ni tuanna i ma naposona i.

4. Haroro ni Jesus dohot ajal ni ngolunta. Molo didok ia haroro ni Jesus i domu do i tu ajal ni portibion, di na so taboto manang sadi hari i masa. Alai boi do andorang so masa do pe ajal ni portibion nunga ro ajal ni ngolunta. Alai taringot tu ajal ni ngolunta pe ndang adong manang ise na umboto i, nda holan Tuhan i. Sadi hari marujung ngolunta sian portibi on ndang taboto i, manang na songon dia pe parmondingta ndang adong na umboto i. Ai olo do sadasada halak hipas do berengon, togos do pamatangna, alai binege tompu barita nunga jumolo ibana borhat. Ala ni i domu tu ajal ni ngolunta pe dipangido do hita dungo, mangarade diri. Pangaradeon ni dirinta mangadopi ajal ni ngolunta dos do i dohot pangaradeonta managam haroro ni Tuhan i. Tongtong marsihohot di bagasan haporseaon tu Tuhan i, pasahathon sandok ngolunta tu Ibana ganup tingki. Tongtong mangula angka na denggan na tau lomo ni roha ni Tuhan, saleleng boi do pe taulahon.

______________________________

EVANGELIUM: Markus 13:24-37

24 Alai di angka ari i, dung salpu haporsuhon ondeng, mangkolom ma mata ni ari jala ndang marsinondang be bulan i.

25 Mardabuan ma angka bintang sian langit i jala humuntal ma angka hagogoon ni parlangitan.

26 Jadi idaonnasida ma Anak ni jolma i ro marhitehon ombun, mantat hagogoon dohot hasangapon godang.

27 Laos disi ma suruonna angka pardisurgo papunguhon angka na pinillitNa i sian desa na ualu i, sian suhi ni tano sahat ro di suhi ni langit.

28 Alai sian hau ara i ma guruhon hamu tudosanna. Ia dung martunasi punsuna jala rungkar bulungna, botoonmuna ma, naung jonok partaonan las.

29 Suang le songon i, jumpa diida hamu masa angka ondeng, botoonmuna ma, naung jonok hasosonggopna.

30 Situtu do hatangKon tu hamu: Na so tupa salpu bangso on, so jolo songgop sasudena i.

31 Salpu pe sogot langit dohot tano on; anggo angka hatangki, ndang na olo salpu!

32 Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i!

33 Tagam ma hamu; dungo ma hamu, ai ndang diboto hamu, manang sadihari tingkina i!

34 Umpamana: Songon halak na marhutasada na manadingkon jabuna, disagihon do huaso tu angka naposona, tu ganup siulaonna be, jala sijaga pintu i didokkon marjaga.

35 Antong, dungo ma hamu, ai ndang diboto hamu, manang sadihari ro tuan nampuna bagas i, manang di bot ni ari, manang di na tonga borngin, manang di na martahuak manuk, manang di torang ni ari i.

36 So tung jumpangsa hamu modom, di na ro Ibana tompu!

37 Ai tu saluhutna hamu do hatangKon: Dungo ma hamu!

_______________________

Epistel: Psalmen 80: 1-8

1 Ende sian si Asap.

2 Ale Siparmahan Israel, sai manangi ma Ho! Ai Ho do siadu Josep, songon birubiru; sai pataridahon ma Ho, ale na marhabangsahon kerubim.

3 Sai sungguli ma hagogoanMu di jolo ni Epraim dohot Benjamin dohot Manasse, jala sai ro ma Ho mangurupi hami.

4 Ale Debata, sai pasuang ma hami, jala pasihar bohiM, asa malua hami.

5 Ale Jahowa, Debata Zebaot, sadia leleng on marmusu tihus Ho mida tangiang ni bangsoM.

6 Dipapanganhon Ho do tu nasida roti iluilu, jala dipainumhon Ho do tu nasida iluilu martahutahu.

7 Dibahen Ho do hami ripe badaan ni hombar hundulnami, jala sai dielesi angka musunami do hami.

8 Ale Debata Zebaot, sai pasuang ma hami, jala pasihar ma bohiM asa malua hami.

Semua tanggapan:

6Johnson Simamora, Drs Banuasi Simamora dan 4 lainnya