RENUNGAN zAKHARIA 9: 9-10, MANOMUNOMU RAJA SIPARTIGOR JALA SIPARMONANG (MENYAMBUT RAJA YANG ADIL DAN JAYA)

 MANOMUNOMU RAJA SIPARTIGOR JALA SIPARMONANG (MENYAMBUT RAJA YANG ADIL DAN JAYA)

Horas ma di hita. Selamat Ari Minggu Advent II (10 Desember 2023). Lasa rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Buku Panurirang Sakaria 9: 9-10, asa tatomutomu Raja Sipartigor jala Siparmonang, ima Jesus Kristus na ro manopot hita mamboan haluaon di hita di bagasan las ni roha dohot olopolop.

1. Panghirimon di haroro ni Raja (Mesias) siboan haluaon ni sandok bangso. Disoarahon panurirang Sakaria do turpuk on tu tongatonga ni halak Juda na baru mulak do pe sian habuangan Babel, hirahira di taon 520 -518 s.M. Di tingki i ndang adong be raja ni halak Juda i, ai ndang be harajaon na mardeka nasida. Sian mulai digomgomi harajaon Babel nasida taon 586 s.M, ndang adong be raja di nasida. Marrajahon raja ni harajaon Babel i na ma nasida. Nang pe dipalua raja Kores nasida, i ma raja ni harajaon Persia naung patundukhon harajaon Babel, jala disuru mulak tu huta nasida di Jerusalem dohot tano Judea, ndang na gabe sada harajaon na berdiri sendiri be nasida. Bagian ni harajaon Persia na ma huta nasida i, na marrajahon raja ni Persia i. Di situasi na songon i ma nasida manghirim di raja Mesias na pinabangkit ni Debata. Ala ni i marhite panurirang Sakaria, dibagabagahon Debata ma tu nasida haroro ni sada Raja na so holan manggomgomi halak Juda manang Israel be, alai manggomgomi sandok bangso na na di portibi on, ai ingkon tunduk tu Debata Jahowa do muse saluhut bangso na di portibion, songon na hinatahon ni panurirang i di jolo ni turpuk on.

2. Raja Sipartigor jala Siparmonang do Raja i. Ia Raja na binagabagahon ni Debata marhite panurirang Sakaria i, i ma Raja Sipartigor jala Siparmonang. Raja Sipartigor na nidokna i ma Raja na mandalanhon panggomgomionna marojahan di uhum dohot hasintongan ni Debata. Ndang adong hageduhon diulahon.Ndang adong diskriminasi. Sarupa do jolma dohot angka bangso di adopanna. Ndada songon angka raja ni portibion, na olo papeol uhum dohot hasintongan laho pasauthon sangkapsangkap ni rohana.

Di sejarah ni halak Israel, di tingki mardalan do pe nasida songon harajaon, nang pe di harajaon Israel Utara dohot harajaon Israel Selatan na gabe digoari harajaon

Juda jotjot do pangalaho dohot parulaon ni angka raja nasida songon pangalaho ni angka raja ni portibi na humaliang nasida na so mananda Debata Jahowa. Jotjot nasida mangasahon gogo dohot huaso na adong di nasida laho pasauthon sangkapsangkap ni roha nasida. Di si ma masa angka penindasan, pangarupaon, na mambahen mangae na hansit angka na ginomgomanna i. Panghorhonna nang rayat ni harajaon i pe tong ma masibaen lomona, ai masa ma nang ketidak adilan sosial. Jotjot disuru Debata angka panurirang tu tongatonga ni bangsoi i holan laho maminsang angka raja na so mangulahon hatigoran, na papeol uhum dohot angka na martindak sewenangwenang, angka na so parduli di rayat na ginomgomanna. Alai ndang ditangihon angka raja i i hata ni angka panurirang i. Ndang adong hamubaon ni roha di nasida. Ala ni i do umbahen ingkon diuhum Debata nasida gabe marrajahon raja na so tumanda Debata Jahowa, songon naung nialaman nasida uju tarbuang nasida tu harajaon Babel. Alai dung malua nasida sian habuangan i gabe dipaimbaru Debata ma sangkap-Na, di bagabagahon ma haroro ni Raja(Mesias) ni Debata na so holan manghaporluhon haluaon ni bangso Israel be, alai manghaporluhon haluaon ni sandok bangso na ma. Disi do hataridaan ni Raja na dibagabahon i songon Raja Sipartigor, ai dos do arga ni sandok angka bangso na tinompa-Na i diadopan ni Debata.

Angkup ni i didok do Ibana Raja Siparmonang, na boi patundukhon sandok bangso tu toru ni huaso-Na. Ndang adong na boi mangatasi huaso-Na i. Jala ndang dos i dohot huaso portibion, na mangasahon hagogoon ro di ragam ni angka sinjata portibion. Disiaphon Ibana do sude na marrumang sinjata manang ulaula porang na tinanda ni halak hatiha i, isara ni hureta, hoda, dohot sior.

Ala ni ndada Raja parporang Ibana songon angka raja ni portibi on, alai Raja ni hadameon do. Dipatuduhon Ibana ma diri-Na songon Raja na serep roha, ai nang pe adong di Ibana huaso ndada dipatimbo diri-Na marhite huaso-Na i. Dipatutoru do diri-Na dos dohot angka na ginomgoman i. Haserepon ni roha-Na i dipatuduhon marhite na marsihundul di halode do Ibana, ndada marsihundul hoda, songon somalna angka raja hatiha i. Sandok usaha-Na, i ma boha asa sude angka bangso mangolu di bagasan hadameon. Hata Ibrani na dipangke di son i ma hata "shalom", na marlapatan dame, sejahtera, singkop saluhut di angka na ringkot di parngoluon, ndang adong pargulutan manang porang, marsonangsonang saluhut-Na . I do hadameon na sintong.

3. Jesus Kristus do Raja Hadameon i, ala ni tatomutomu ma Ibana di bagasan las ni roha dohot olopolop.

Dihatindanghon evangelium Matius do songon na disurat di Mateus 21: 1-5, na martudutudu tu Jesus do na sinuriranghon ni panurirang Sakaria di turpukta on. Di na bongot Jesus tu huta Jerusalem mandonokhon hamamate-Na i, disuru do angka sisean-Na manogu sada halode dohot anakna naung ditambathon nampunasa hian di sosor Betpage, na jonok tu huta Jerusalem. Nunga diparade nampuna halode i hian i bahen hundulan ni Jesus. Marhite na manghunduli halode i, naeng patuduhonon ni Jesus na Ibana do Raja (Mesias) na sinuriranghon ni si Sakaria songon na tarsurat di Sakaria 9: 9 i. Alani i Ibana do Jesus na tubu di huta Betlehem na pinestahon ni halak Kristen hatutubu-Na ganup ari Natal. Ibana do na tinagam ni halak Kristen haroro-Na tumopot sude hajolmaon tubu di roha ni angka na na manjanghon Ibana. Ibana do na manaon na porsuk humophop jolma pardosa sahat ro di mate tarsilang dibahen halak Jahudi ala so dojanghon Ibana songon Mesias. Alai mulak mangolu do Ibana di ari patoluhon. Dungi mulak Ibana muse tu banua ginjang haroroan-Na hian. Alai sitagamon ni angka na porsea do Ibana ro muse tu portibion di ari parpudi manguhumi na mangolu dohot na mate songon jamita na di minggu na salpu. Turpukta sadarion manosohon hita manomunomu Ibana songon Raja Sipartigor dohot Siparmonang di bagasan las ni roha dohot olopolop. Molo didok mariaia situ hita laho manomunomu Ibana i ma las ni roha na so hapalang, las ni roha na lumobi sian las ni roha portibion, ai las ni roha i ndada holan las ni roha pardagingon, alai dohot do las ni roha partondion. Molo holan holan di pardagingon do las ni roha i, na mura salpu do i, songon parsalpu ni angka tingki. Alai molo dohot do partondion marlas ni roha, i ma las ni roha na manongtong, na boi tongtong marlas ni roha nang pe mangadopi ragam ni haporsuhon dohot sitaonon na di portibi on.Laos las ni roha i do na mangonjar hita marolopolop , i ma las ni roha hamonangan maralohon musu. Marhite las ni roha i tubu di hita gogo dohot hiras ni roha laho mangalo musu ni Tuhanta na laos gabe musu di hita, i ma dosa dohot sibolis i. Las ni roha i do nang mangalehon gogo di hita manghangoluhon songon parrohaon ni Raja i, na pahothon hatigoran, uhum dohot hasintongan, mangalo angka hageduhon, na boi manghorhon hasesega ni parsaoran di tongatonga ni masyarakat, huria nang bangsonta. Songon i dohot mamparangehon haserepon ni roha, na olo patutoruhon dohot mamparangehon lambok ni roha. Didok hata ni Tuhanta do: "Dialo Debata do angka na ginjang roha, alai dilehon do asi ni roha tu angka na serep marroha". (Jak. 4: 6). Jala dijamita ni Tuhan Jesus didok do: "Martua ma na lambok roha ai teanon nasida do tano on". (Mat. 5: 5). I ma panomunomuonta di haroro ni Jesus Sipartigor jala Siparmonang i.

________________

Ev. Sakaria 9:9-10

9 Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina.

10 Jala ahu maniaphon angka hureta sian Epraim dohot angka hoda sian Jerusalem, siap dohot sior tu hamusuon. Dung i baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Euprat sahat ro di angka ujung ni tano on.

Ep. Pangungkapon 19: 6-10

6 Dung i hubege ma songon soara ni natorop situtu, songon soara ni aek godang, songon soara ni angka ronggur na gogo, na mandok: Halleluya! Ai nunga mangarajai Tuhan Debatanta, Sigomgom saluhutna!

7 Marlas ni roha ma hita jala mariaia, jala talehon ma tu Ibana hasangapon, ai nunga jumpang hasampuran raya ni Birubiru i; nunga hobas soripadana.

8 Nunga dilehon tu ibana abit na saksak jala na ias sialithononna. Ia abit na saksak i, i ma hapintoron ni angka na badia.

9 Laos didok ma tu ahu: Surathon ma: Martua do angka na jinou tu panganon ujuan ni Birubiru i! Jala didok do tu ahu: On do angka hata na sintong na sian Debata!

10 Jadi manungkap ma ahu tujolo ni patna, sumomba ibana, gabe didok ma tu ahu: Unang ma songon i! Donganmu naposo do ahu jala dongan ni angka hahaanggim, angka naung manjalo panindangion sian Jesus. Debata do sisombaonmu! Ai panindangion taringot tu Jesus i do tondi panurirangon.

Semua tanggapan:

7Rosse Siahaan, Jaeman Simangunsong dan 5 lainnya