RENUNGAN LUKAS 2: 15-20, SALUHUT BANGSO PASANGAP HUHUT MAMUJI DEBATA ( SEGALA BANGSA MEMUJI DAN MEMULIAKAN ALLAH)

 SALUHUT BANGSO PASANGAP HUHUT MAMUJI DEBATA ( SEGALA BANGSA MEMUJI DAN MEMULIAKAN ALLAH)

Horas ma di hita. Selamat patupahon parningotan di hatutubu ni Jesus manang Natal ( 25 Desember 2023) ma di hita. Las ma rohanta mamestahon hatutubu ni Jesus i di portibion dohot di ngolunta marsadasada. Di na mamestahon Natal hita, ndada ari hatutubu ni Jesus na tapestahon, alai hatutubu-Na i do. Boi do ndang taboto be ari hatutubu ni Jesus na sasintongna. Alai nunga ditotophon huria na parjolo i ganup ari 25 Desember ma huria i dohot sude na porsea patupahon parningotan di hatutubu ni Jesus. Tutu ndang apala ari hatutubu-Na i na rumingkot di hita, sintong ni hatutubu-Na i do. Sintong do Ibana tubu tu portibion, Debata gabe jolma, saor ditongatonganta, gabe Sipalua hajolmaon. Ala ni i molo tapestahon pe hatutubu ni Jesus ndang dos i dohot na mamestahon ari ulang tahun ni hita jolma. Molo adong manganggap na marnatal i dos dohot na mestahon ari ulang tahun ni Jesus, songon na hea binege adong masa na songon i, tung sala bolon do i. Ai Jesus i nang pe hea tubu tu portibion, ndang torus Ibana marrumang jolma di portibion, mulak do Ibana tu ampuan ni Ama i di banuaginjang. Alai ala hea Ibana tubu tu portibion marrumang jolma laho paluahon hita jolma sian gomgoman ni dosa, jadi hatutubu-Na i do na taingot jala tapestahon asa marhite i lam tangkas taauhon holong ni roha ni Debata di hita pardosa. Jadi las ma rohanta di Pesta Parningotan Hatutubu ni Jesus on marsomba tu Ibana, huhut tatangihon barita hatutubu ni Jesus i na dienet sian Lukas 2: 15-20, asa dohot hita manghangoluhon huhut mamaritahon barita hatutubu-Na i tu angka donganta. Disoarahon barita na uli taringot tu hatutubu-Na i do tu hita sadarion, asa dohot hita tongtong pasangaphon huhut mamujimuji Ibana di ngolunta on. Domu tu si adong tolu hal na mansai ringkot hangoluhononta sian barita na uli sadarion.

1. Tahaporseai ma barita nauli hatutubu ni Jesus i. Barita hatutubu ni Jesus ndada tu istana ni raja manang tu angka pimpinan agama ni Jahudi parjolo dipatolhas, alai tu angka parmahan na di padang Efrata do. Angka parmahan tardok di pamerengan ni masyarskat ortodoks Jahudi tarmasuk golongan masyarakat na lea do jala pardosa do, ala ndang adong pangantusion nasida taringot tu ruhutruhut parugamoon Jahudi. Ala ni ni ndang boi dipabangkit nasida gabe sitindangi di paruhuman, ala dirajumi do ndang sihaporseaan hatana. Alai tu halak na songon i do ro Debata marhite suruanna mamaritahon barita na uli taringot tu hatutubu ni Jesus, na langsung didapothon surusuruan ni Debata tu padang Efrata, asa nasida gabe sitindangi parjolo di hatutubu ni Jesus i. Mabiar situtu angka parmahan i marnida haroro ni surusuruan i na marsinondang sangapna humaliang nasida. Alai didok surusuruan i do asa unang mabiar nasida, ai barita halalas ni roha godang do na binoan ni surusuruan i, jala parsaulian ni sandok bangso. I ma naung tubu di nasida saborngin i, di huta ni si Daud, i ma di huta Betlehem, Sipalua, i ma Kristus Tuhan i. Jala torang do dipaboa surusuruan i, na di bara ni pinahan do hatutubu ni Jesus, ai peak di panggagatan do posoposo i diborhos. Udut tusi ro ma parangan parbanuaginjang marende mamuji psangap Debata, mandok: "Hasangapon ma di Debata di ginjang dame ma di tanoon di angka jolma halomoan i". Jadi di na laho i angka surusuruan i sian nasida, dompak ginjang manigor masipandohan do angka parmahan i asa laho nasida tu Betlehem , marnida na masa i, naung pinabotohon ni Tuhan i tu nasida. Porsea do nasida, di barita na uli i, ndang ganggu roha nasida. Ala ni do nasida manigor borhat laho marnidasa, so pola jolo marpingkir manimbangi hata ni surusuruan i. Jadi saut ma nasida borhat, gabe jumpangsa ma posoposo i songon na binaritahon ni surursuruan i. Nasida ma, na dianggap halak Jahudi ndang boi gabe sitindangi di paruhuman, alai dipangke Debata ma nasida gabe sitindangi parjolo hatutubu ni Jesus i. Molo hita nuaeng, barita na ma na tabege, jala nunga tapestahon hatutubuna i dohot ragam ni angka acara na ribur, jala na deba bermewahmewah. Alai suraon porsea do hita di barita i, jala boi do hita pajumpang dohot Jesus marhite angka acara pesta natal na tapatupa? Manang holan kesan hariburon, manang kesan angka na asing ni pesta i do na lohot di rohanta. Molo tapestahon hatutubu ni Jesus dohot ragam ni angka acara na manait roha, naeng ma boi marhite i lam tangkas haporseaonta tu Jesus i.

2. Tabaritahon ma barita na uli hatutu ni Jesus i. Di na sahat angka parmahan i tu bara ni pinahan di Betlehem, jala dibereng nasida posoposo i peak di panggagatan di lambung ni si Maria dohot si Josef, dibaritahon nasida ma aha naung binege nasida sian sururuan i taringot tu dakdanak i. Tontu na dibaritahon i ma taringot hadirion ni dakdanak i sandiri, na Ibana do Kristus ( Mesias) naung dibagabagahon ni Debata tu bangso Israel, jala Tuhan na gabe Sipalua hajolmaon. Tu ise nasida mambaritahon? Tontu parjolo ma tu si Maria dohot si Josep, jala dunghon i tu angka halak na dirurar ni bara ni pinahan i, dohot tu angka na asing na pajumpang dohot nasida muse. Jadi hita pe molo naung porsea di Jesus, ingkon dohot do hita gabe parbarita na uli manang sitindangi taringot tu Jesus. Parbarira na uli ndada holan marhite hata manang jamita, alai lumobi do marhite panindangionta di ngolunta. Tahatindanghon di ngolunta Jesus i do Sipalua hita sian dosa. Ala ni molo taargahon naung dipalua hita sian dosanta, ndang sai dandatanta be mangulahon dosa. Tahatindanghon na Ibana do Mesias (Raja) na manggomgomi sandok jolma, tontu hita pe ingkon sai olo ma unduk tu panggomgomion ni Jesus, jala Ibana do Tuhan, sisombaon jala sioloan ni sandok jolma. Jadi marhite ngolunta i do hita manghatindanghon Jesus i, marhite na mamarangehon aha naung niajarhon ni Jesus i tu hita.

3. Tapasangap jala tapapujipuji ma Debata ala ni hatutubu ni Jesus i. Mulak do angka parmahan i tu inganan nasida, mandapothon birubiru na pinarmahan nasida. Sude nasida di bagasan las ni roha, songon las ni roha ni angka naung mamestahon hatutubu ni Jesus i, jala naung tangkas mangantusi lapatan ni hatutubu ni Jesus i. Songon angka na marlas ni roha, dipasangap jala dipapujipuji nasida do Debata, ala ni sude angka na binege jala na binereng nasida. Tontu ndada holan di na laho mulak i nasida pasangap jala mamujimuji Debata, alai torus do saleleng ni ngoluna. Sude na niula nasida gabe hasangapon dohot pujipujian di Debata. Songon i do nang dipangido sian hita, ndada holan di na mamestahon natal i hita mamuji pasangaphon Debata. Ndada holan di tingki marende hita pasangaphon dohot mamuji Debata. Ai boi do mansai uli ende na taendehon di natal i, jala manorusi tu roha ni na mambege. Hape ndang songon uli ni ende na taendehon i, roha dohot parulaonta siganup ari. Ala ni na rumingkot di pangido sian hita, pasangap jala papujipuji Debata do marhite parange dohot parulaonta.

Unang gabe marlea Tuhani ala ni parange dohot parulaonta. Angkup ni i na mansai ringkot sadaranta di ngolunta on, nampuna ni Debata do hasangapon i, ndang sigulutonta i sian Ibana. Apalagi di ngolunta on godang do tabereng na sai berusaha manggulut hasangapon i tu dirina, pola laho pasauthon i dikorbanhon manang disusai donganna. Molo so songon i ingkon masa do hagaoron, jala boi sahat tu parbadaan manang porang. Taparsinta do asa hadameon na masa di ngolunta on manang di tongatonga ni hita jolma. Alai asa dapot i ingkon tahangoluhon do songon ende ni angka parangan parbanuaginjang, di tingki ro surusuruan mambaritahon barita natal i tu angka parmahan na mandok: "Hasangapon ma di Debata di ginjang, dame ma di tanoon, di angka jolma halomoan i". Ende on ma tongtong tahangoluhon, asa marsangap Debata tongtong di ngolunta on, jala asa gabe sibahen dame hita di tongatonga ni hajolmaon.

_________________________

Evanelium: Lukas 2:15-20

15 Jala di na laho i angka surusuruan i sian nasida dompak ginjang, masipandohan ma angka parmahan i: "Beta ma hita tu Betlehem, taida ma na masa on, na pinabotohon ni Tuhan i tu hita!"

16 Jadi hatop ma nasida laho tusi, gabe jumpangsa si Maria dohot si Josep dohot Posoposo i, na peak di panggagatan i.

17 Asa dung diida, dibaritahon nasida ma boaboa, naung dihatahon tu nasida taringot tu Dakdanak i.

18 Jadi sude na umbegesa, longang be do siala na hinatahon ni angka parmahan i tu nasida.

19 Ia si Maria, dipeop do hata i sudena jala dipahusorhusor di bagasan rohana.

20 Mulak do angka parmahan i, dipasangap jala dipapujipuji do Debata ala ni sasude na binege jala na niidanasida, songon naung dihatahon i tu nasida.

Epistel: Psalmen 148:1-14

1 Halleluya! Puji ma Jahowa, hamu ale angka sian banua ginjang, puji hamu Ibana di angka banua ginjang!

2 Puji Ibana, sude hamu ale angka surusuruanNa, puji Ibana, sude hamu ale angka paranganNa!

3 Puji Ibana, ho ale mata ni ari dohot bulan, puji Ibana, sude hamu ale bintang angka na marsinondang i!

4 Puji Ibana, hamu ale angka langit ni langitan dohot hamu ale aek angka na di atas ni langit!

5 Ingkon pujionnasida ma goar ni Jahowa, ai mandokkon Ibana, jadi tartompa ma nasida.

6 Jala Ibana pahot angka nasida ro di salelenglelengna, dibahen do sada aturan jala ndang halaosansa.

7 Puji ma Jahowa, hamu ale angka sian tano on, angka binatang ni laut ro di sude angka lung!

8 Ho ale api dohot ambolas ro di timus, habahaba, na pasauthon hataNa i.

9 Hamu ale angka dolok dohot sude angka robean, hamu ale hau angka na marparbue ro di sude hau Ares.

10 Ho ale binatang dohot sude pahanpahanan, angka gulomit ro di angka pidong na marhabong.

11 Hamu ale angka raja ni tano on dohot sude angka bangso, hamu ale angka pangarajai ro di sude angka panguhum ni tano on.

12 Hamu ale angka dolidoli dohot namarbaju pe, hamu ale angka natuatua rap dohot angka na bajar.

13 Ingkon pujionnasida ma goar ni Jahowa, ai sasada goarNa i do na timbul, diatasi hamuliaonNa i do tano on dohot angka langit!

14 Jala Ibana patimbul sada tanduk di bangsoNa i, bahen pujipujian di sude angka na niasianNa, di angka anak ni Israel, bangso hasolhotonNa i. Halleluya!

Semua tanggapan:

2Sinta Uli Panjaitan dan Eben Simanungkalit