RENUNGAN LUKAS 1: 46 b - 55, DIPATIMBUL ROHANGKU DO TUHAN I ( JIWAKU MEMULIAKAN TUHAN )

 DIPATIMBUL ROHANGKU DO TUHAN I ( JIWAKU MEMULIAKAN TUHAN )

Horas ma di hita. Selamat Ari Minggu Advent III (17 Desember 2023). Las ma rohanta masomba tu Tuhanga, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evanelium Lukas 1: 46b-55, asa dohot hita patimbulhon Debata, marhite na manghangoluhon ende pamujion ni si Maria di Debata. Patimbulhon Debata marlapatan pasangaphon Debata, mambahen Debata di ngolunta di ginjang ni saluhut. Ro do surusuruan Gabariel pabotohon tu si Maria na pangkeon ni Debata ibana laho manubuhon Jesus na gabe Sipalua jolma sian hadosaonna. Tontu bingung jala marungkil do jolo si Maria laho manjalo i, lumobi ala so mardongan saripe do pe ibana. Alai dung dipapos surusuruan i rohana mandok, ndang adong na so tarpatupa Debata, ujungna diundukhon si Maria ma hata ni surusuruan i mandok: "Naposo ni Debata do ahu. Sai saut ma tu au songon na nidokmi". Hatop dunghon i ditopot si Maria ma si Elisabet, dongan saripe ni malim Sakarias, di hutana di dolok Juda. Nunga dipabotohon surusuruan i hian tu si Maria naung gabegabean nang si Elisabet, sada ina naung didok halak hol, na so tagamon be boi tubutubuan, paonom bulanhon ma hatiha i. Marsisolhot do pe si Maria dohot si Elisabet. Tontu na naeng manghatai ma si Maria dohot di Elisabet taringot tu na masa tu nasida na dua.Dung pajumpang si Maria dohot si Elisabet jala manghatai taringot na masa tu nasida na dua, i ma na rap di pangke Debata nasida na dua pasauthon sangkap haluaon na pinatupa ni Debata tu hajolmaon, gabe lam tamba ma pos ni roha ni si Maria manjalo pambahenan ni Debata na balga i di ngoluna. Tamba ma muse las ni rohana ala didok si Elisabet do tu ibana: "Martua ma ho, ala dihaporseai ho, ingkon tulus na tinonahon ni Tuhan i tu ho!". Dungi sian las ni rohana, dipasahat ibana ma pujipujian tu Debata. Dipatimbulhon rohana ma Debata na mamangke ibana, sada halak na metmet di portibion laho pasauthon ulaon ni Debata na mansai balga. Di pardalanan ni huria i muse di pudian ni ari digoari do ende pujipujjian ni si Maria on Ende "Magnificat", ala di terjemahan hata Latin dimulai do hata ni ende i dohot pandohan "magnificat" (magnificat anima mea Dominum, na diterjemahan Bibel Toba didok: dipatimbul rohangku do Tuhan i) Magnificat marlapatan patimbulhon manang pabalgahon. Diterjemahan bahasa Indonesia didok memuliakan. Di hata Inggris didok "magnify". Dihatindanghon si Maria do marhite endena i pambahenan ni Debata na balga situtu, na mambahen hamubaon di parngoluon ni jolma, hamubaon di parrohaaon, hamubaon di ngolu sosial dohot ekonomi. Sian isi ni endena i tarida do boasa songon i las ni roha ni si Maria patimbulhon Debata, i ma ala:

1. Ditatap Debata angka jolma na metmet songon si Maria. Sadar do si Maria halak na metmet do ibana di tongatonga ni hajolmaon. Di tongatonga ni jolma naung digomgomi dosa, ndang apala diparetonghon halak anggo halak na metmet, manang halak na pogos. Lea do halak na metmet di pamerengan ni jolma. Hape anggo di adopan ni Debata arga do nang halak na metmet i, jala boi do i dipangke gabe ulaula-Na. Dipangke Debata si Maria gabe naposo ni Debata pasauthon haluaon ni sandok jolma, gabe diparhatua angka naung manjalo hatuaon i ma ibana muse di pudian ni ari marsundutdundut. Tontu ndada holan tu si Maria pambahenan ni Debata na songon i. Alai sude jolma na manghaporseai Debata, na marhabiaran tu Debata jala na mangolu di bagasan habadiaon boi do pangkeon ni Debata gabe ulaula-Na laho pasauthon sangkap-Na, mamboan haluaon tu sandok jolma. Hita pe boi do pangkeon ni Debata gabe ulaula-Na laho pasauthon sangkap-Na, asal ma rade rohanta pangkeon ni Debata. Laos sada jamita do i tu hita, asa ndang jadi lea rohanta mida halak na metmet, manang halak na pogos. Ndang jadi hita mangukur halak marhite status sosialna di portibion, manang marhite jabatan manang kedudukanna di parngoluon na di portibi on. Alai taargahon ma halak marhite haporseaonna na rade mamelehon dirina dohot na adong di ibana pangkeon ni Debata gabe ulaula-Na mangaradoti ulaon ni Debata, mangalo ragam ni hajahaton dohot pahothon hatigoran dohot hasintongan.

2. Debata paserakhon angka na ginjang marroha, alai patimbohon halak serep marroha. Ndang lomo na roha ni Debata mida halak na ginjang roha, i ma halak na sai patimbohon dirina, halak na manengahon angka silehonlehon na adong di ibana, isarana sinadongan, na mangasahon gogo, hapistaran, ro di status sosialna na dianggap tumimbo sian angka donganna. Mula ni hadadabu ni jolma tu dosa, ala ni kesombongan ni jolma i do i, naeng dos dohot Debata gabe dioloi hata ni sibolis. Di Buku Na Badia i godang do sipaingot, asa angka anak ni Debata unang madabu tu ginjang ni roha, alai asa tongtong mangolu di bagasan haserepon. Isarana di Poda ni Raja Salomo 29: 23, didok: "Roha haginjangon ni jolma pajimput ibana, alai anggo partondi na serep dapotan hamuliaon." Tuhan Jesus sandiri pe sai diajarhon do tu angka siseanna, asa unang olo nasida patimbo dirina, alai naeng ma tongtong patutoruhon diri. Di Mateus 23: 12, didok do: "Ai sipaoruon do ganup na patimbo dirina; alai sipatimboon do na paoru dirina." Songon i pangajarion ni Jesus tu angka sisean-Na i, ala memang ngolu ni Jesus ro tu portibion ngolu na patotoru diri do. Songon na sinosohon ni apostel Paulus, parrohaon ni Jesus i do sitiruonta, na rade patutoruhon dirina tuat tu portibion gabe jolma, sahat tu na maneahon hosaNa gabe tobus ni hita jolma. Alai siala haradeon ni Jesus patutoruhon diriNa i, gabe dipatimbo Debata do Ibana, gabe Tuhan ni nasa tuan, jala sude marsomba tu Ibana nasa ulut ni tot na di banua ginjang nang na di tanoon (Pil. 2: 5-11). Songon i do nang angka apostel na asing sai diajarhon do tu huria na parjolo i asa sude halak Kristen paholanghon diri sian ginjang ni roha, alai naeng tongtong di bagasan haserepon, ai dialo Debata do angka na ginjang roha alai dilehon do asiasina tu angka na serep marroha.

( 1Petrus 5: 5). Jadi hatutubu ni Jesus tu portibi on marhite si Maria, na gabe Sipalua jolma pardosa, mambahen tiruan di hita pardosa, asa rade patutoruhon diri, asa dipatimbo hita muse di tingkina.

3. Debata manatap angka na dangol di portibion, i ma angka na male ala ni hapogoson. Didok di ayat 53 ni turpuk on: Na denggan dipasuksuk Ibana tu angka na male, jala angka na lobian hian rumar do dipalaho". Angka na male na nidokna, i ma angka na pogos, angka na dangol di portibion, na jotjot hurangan di sipanganon. Angka na lobian i ma angka na mora, alai ndang olo managihon hamoraonna i mangurupi angka na susah manang angka na pogos. Di Buku na Badia i sai dipatuduhon do surung ni asi ni roha ni Debata tu angka na manaon na porsuk di portibion, ala ni panggosagosa ni angka na gogo manang angka na marhuaso di portibion. Boi do masa ala so parduli angka panggomgomi ni portibion di nasida, gabe masa angka hageduhon, ketidak adilan sosial. Jotjot do disuru Debata angka panurirang laho maminsang pangalaho ni angka panggomgomi ni bangso i na so parduli di hasusaan ni parngoluon ni bangso i. Ala ni haroro ni Debata marhite Jesus, i ma laho paluahon jolma sian ragam ni pardangolan na niae ni jolma ala ni dosa i. Panginona ni dosa patubuhon godang angka penindasan sian angka na gogo, manang sian angka na marhuaso di portibion tu angka na pogos, angka na gale. Nunga gabe bangko ni jolma naung nigomgoman ni dosa i na holan mamingkirhon dirina, jala na so adong kepedulianna tu angka donganna na susa. Alai marhite hatutubu ni Jesus dipatuduhon Debata do rasa solidaritas dohot kepedulian tu angka na pogos dohot angka na lea, marhite na tubu Jesus di bagasan hapogoson dohot haleaon. Di pangajarion ni Jesus tu angka sisean-Na, sai ditogutogu do angka na mangihuthon Ibana asa mangurupi angka na pogos jala mangalehon mangan angka na male. Didok Jesus do nasa nabinahen ni angka na porsea mangurupi angka na pogos dohot mangalehon mangan angka na male, na mambahen tu Jesus do i. Angka halak na songon i na dohot manean harajaon ni Kristus i. ( Mat. 25: 23, d.u.). I do nang diajarhon tu angka ssisean-Na, asa gabe parasi roha angka na mangihuthon Jesus songon Debata Amanta parasi roha i (Luk. 6: 36).

____________________________

Evangelium: Lukas 1:46b.-55

46b Dipatimbul rohangku do Tuhan i.

47 Mariaia do tondingku mida Debata, Sipalua ahu.

48 Ai ditatap do haetehon ni naposoNa on. Parhatuaon ma ahu olat ni on marsundutsundut.

49 Ai habalgaon do dibahen Pargogo i tu ahu. Na badia do goarNa i.

50 Ai marsundutsundut do asi ni rohaNa mida angka na mangkabiari Ibana.

51 Hagogoon do diula tanganNa i, dipanserakhon do angka na ginjang marroha.

52 Angka na gogo i dipaijur do sian habangsanasida, dipabangkit do angka na metmet.

53 Na denggan dipasuksuk Ibana tu angka na male, jala angka na lobian hian rumar do dipalaho.

54 Dipainuinu do Israel naposoNa i, marningot asi ni rohaNa i,

55 mangihuthon bagabagaNa na tu angka ompunta, tu si Abraham dohot tu pomparanNa salelenglelengna.

Epistel: 1 Samuel 2:1-10

1 Dung i martangiang ma si Hanna, ninna ma: Marolopolop ma rohangku mida Jahowa, timbul do tandukhu di bagasan Jahowa, na hirtap situtu do pamanganhu dompak angka musungku, umbahen na las rohangku di pangurupionMi.

2 Ndang adong na badia, tudoshon Jahowa, ai ndang adong dungkon ni Ho, jala ndang adong partanobatoan, dungkon ni Debatangku.

3 Unang sai datdati hamu manenganengahon haginjangon, unang ruar hata jungkat sian pamanganmuna, ai Jahowa do, Debata nampuna angka parbinotoan, jala Ibana dumasing angka pambahenan.

4 Marponggolan do sior ni ulubalang, jala marhohos hatogaron do angka naung mandate.

5 Angka na lobian na sai laon laho do mansari sipanganon, jala angka na rapar hian marlanggelangge; pola tubuan anak pitu na hol hian, jala merus boti sitorop anak hian.

6 Jahowa do na mamunu dohot na pangoluhon; Ibana patuathon tu banua toru dohot panangkokhon muse.

7 Jahowa do na mambahen pogos dohot mambahen mamora; Ibana do paijurhon, laos Ibana patimbulhon muse.

8 Ibana pahehehon sian orbuk halak na tarjepol hian, jala dipatimbul na pogos i sian gambo laho pahundulhon tu lambung ni angka na sangap, jala diturpukhon habangsa hamuliaon tu nasida, ai Jahowa do nampuna angka ojahan ni tano on, jala dipaojak di atasna hasiangan on.

9 Sai na ramotanNa do pat ni angka na niasianNa, alai sai parendeponNa do di bagasan haholomon ianggo angka parjahat i, ai ndada binahen ni hagogoon sandiri marhuaso baoa.

10 Sai na tunduk do bahenon ni Jahowa halak angka na mangalo Ibana; mangkuling ronggurna di banua ginjang di atas nasida; Jahowa manguhum angka ujung ni tano on sogot, jala lehononNa hamuliaon tu rajaNa, jala patimbulonNa sogot tanduk ni MessiasNa.

Semua tanggapan:

7Rosse Siahaan, Pinantun Simatupang II dan 5 lainnya