RENUNGAN 2 KORINTUS 4: 5-12, DEBATA DO NAMPUNA HAGOGOON (KEKUATAN BERASAL DARI ALLAH).

 DEBATA DO NAMPUNA HAGOGOON (KEKUATAN BERASAL DARI ALLAH).

2 Korint 4: 5-12

Horas ma di hita. Selamat Ari Minggu I dung Trinitatis ( 2 Juni 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus na paduahon tu huria Korint ( 2 Korint 4: 5-12), Debata do nampuna hagogoon. Mangasahon hagooon ni Debata do hita boi mangulahon angka na denggan, manghangoluhon barita na uli na sahat tu hita. Ndang adong tarpangasahon hita gogonta, laho mardalan salangka na ture anggo so mardonganhon Tuhan i. I do na ni alaman ni apostel Paulus, songon na dihatindanghon di suratna na diturpukhon tu hita sadarion.

Mangasahon hagogoon ni Tuhan i do ibana boi hibul mambaritahon barita na uli i, nang pe ingkon godang do ibana manaon haporsuhon sian halak na so olo porsea di barita na uli i, i ma halak na digomgomi hagogoon ni sibolis i do pe.

1. Kristus i do sijamitahonon, ndada dirinta.

Di na marbarita na uli si Paulus tu huta Korint, tubu do godang pangaleaion tu ibana lumobi sian angka na manggoari dirina apostel. Alai ndada apostel situtu nasida, angka apostel pargapgap (palsu) do. Nasida sandiri do manggoari dirina apostel, ndada na sinuru ni Kristus i nasida. Diri nasida do dijamitahon, ndada Kristus i. Na mangalului pengikut do nasida satorop toropna, jala marhite i mangalului pangomoan manang hasangapon tu dirina sandiri. Marhite ulaon nasida, goar nasida do na naeng tarbarita, ndada goar ni Kristus i. Alai ndang songon i anggo apostel Paulus. Tongtong do ibana mangargahon tohonan haapostelon na pinasahat ni Kristus i tu ibana, jala rade do ibana manaon angka sitaonon dohot haporsuhon songon na tinaon ni Kristus. Anggo angka apostel pargapgap i ndang rade marsitaonon ala ni jamitanasida. Ala ni holan angka na mambahen las roha ni na umbegesa i do dijamitahon. Ndada songon i anggo apostel Paulus, ndada mangalului popularitas ni goarna ibana. Ndada patimbohon dirina, laho mangalului paruntungan manang hasangapon tu dirina ibana. Marhite jamitana i ndada asa dipuji halak dirina. Gariada laho mangulahon ulaonna i dirajumi ibana do dirina songon naposo ( hatoban) ni huria hasahatan ni barita na uli i, jala laos naposo ni Kristus. Di son ma tarida haserepon ni roha ni si Paulus, na sai padaohon usaha laho patimbohon diri. Di sude angka na niulana, ndada asa dipuji halak dirina, alai Jesus Kristus do tongtong na naeng tarpuji marhite ulaonna. Tongtong do sai dipatuduhon ibana dirina songon "naposo" parhobas ndada songon tuan sipasangapon. On ma sada sitiruon di ganup hita halak Kristen, manang aha pe na tabahen di ngolunta siganup ari dohot di huria i, ndada asa dipuji halak hita, alai Kristus i do tongtong na naeng tarpuji jala marsangap. Alai molo tarbahen si Paulus pe mangulahon songon i, ndada ala ni hahogoonna i. Kristus do na mangula di bagasan ibana. Debata do na mandokhon marsinondang hatiuron sian haholomon. Ibana do patiurhon roha ni angka apostel ni Kristus na sintong, pabinsar parbinotoan di sangap ni Debata na di bagasan bohi ni Kristus i. Laos on do sitiruon ni sude angka parjamita sahat tu tingkion. Jotjot do angka parjamita tarunjun manjamitahon dirina, manjamitahon pengalamanna, boha asa dipuji halak ibana. Boi do las roha ni torop halak mambege jamita na songon i, alai ndang taruli nasida di jamita taringot Kristus. Manjamitahon Kristus ndang sae holan mambahen las roha ni na torop na umbege jamita i, alai lumobi do ingkon las roha ni Debata.

2. Arta di inganan na mura matapor. Ndada di inganan na togu arta na arga jala na uli na marharoroan sian Debata i dipeop, alai di inganan na mura matapor do. Dipatudos do i songon hudon na pinauli sian tano. Molo hita jolma sai di inganan na togu, isara ni lamari hau manang lamari bosi do arta na arga dipeop, asa unang boi dibuat parjahat. Alai ndang songon i anggo Debata. Dipapeophon Debata do arta na arga jala na uli situtu i di bagasan inganan na mura matapor, i ma angka na porsea dohot naposo ni Kristus. I do dihatindanghon apostel Paulus hombar tu naung tangkas dialami jala dihangoluhon. Dipatudos apostel Paulus do dirina tu hudon tano na mura matapor. Ai sian tano na mura matapor do sude joma ditompa. Alai boi margogo jala mangolu ala hosa hangoluan na diullushon tu ruang ni igungna. Na marlapatan do i ndang adong gogo sipangasahonon ni jolma i sian dirina. Sian Debata do haroroan ni gogona umbahen mangolu ibana. Laos di pangalaho na songon i do angka na porsea dohot naposo ni Debata dipercayahon Debata gabe inganan pameopan ni arta na sian Debata ima barita na uli na gabe haluaon ni jolma na manjanghon.

Alai laos di pangalahona na mura matapor i do Debata nampuna hagogoon i mangalehon hagooon tu angka naposona i. Tarida do i sian naung nialaman ni apostel Paulus. Nang pe mansai godang angka haporsuhon na nialaman ni si Paulus, alai ndang diloas Tuhan i ibana hapusohan. Godang do angka na manosak ibana, alai ndang hea ibana gabe tarhapit. Hona lele do ibana, jala sipata tarancam hosana, alai ndang dipasombu Tuhan i bana. Dipatingganghon do ibana, alai ndang ambolong, ai ndang hea dipasombu Debata ibana. Laos songon i do hita di ngolunta songon halak Kristen. Sipata do tarsosak panghilaanta, alai molo tapasahat tu Tuhan i sai na paluaon ni Debata do hita. Sai patuduhonon ni Debata do dalan haluaon di hita. Jadi songon i do ditompa Debata hadirionta, di bagasan godang hahurangan, dohot hagaleon, asa unang tapangasahon dirinta dohot gogonta, unang tapangasahon sinadongan dohot hapistaranta, unang adong kesombongan di hita, alai asa tongtong hita di babasan haserepon mangasahon Tuhan i.

Boi sajo do hita di sada tingki didondoni godang angka parungkilon, dohot angka parsoalan ni ngolu siganup ari, alai ala marpos ni roha tu Tuhan i, ndang diloas hita mandele manang putus asa. Sipata do songon na tarpungkul panghilalanta sahat ro di na tinggang, alai ditogu Tuhan i do hita.

3. Pausungusung hamamate dohot hangongolu ni Jesus. Laos dihatindanghon si Paulus do umbahen songoni boi tongtong margogo ibana laho mangadopi sude angka sitaonon dohot haporsuhon na jotjot masa tu dirina songon naposo dohot siihuthon Kristus, di ayat 10 ni turpuk on didok ibana, ala: "Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus." Pausungudung hamamate ni Kristus marlapatan do i, ingkon rade manaon songon na tinaonon ni Kristus. Molo naeng mangolu rap dohot Kristus, ingkon rade do mate raphon Kristus. Adong do semboyan ni halak Kristen na mandok: "Molo ndang adong silang, jadi ndang adong tumpal". Angkup ni i, ingkon sai taadopi ma nasa parsoalan na masa di ngolunta ala ni panggihuthononta di Kristus i, marhite na torus marningot huaso ni Debata na pangoluhon Tuhan Jesus Kristus sian tongatonga ni angka na mate. Porsea do si Paulus, nang pe ro hamatean mangonai tu dirina, tarbahen Debata do pahehehon ibana. Porsea do ibana gumogo do hagogoon ni Debata sian huaso ni hamatean i. Diporsan ibana pe godang angka haporsuhon i, alai pos do rohana marhite sude sitaonon dohot pangunjunan na ampe tu ibana, torop halak tarboan masuk tu hatiuron dohot holong ni roha ni Debata. Apostel Paulus boi mangulahon sudena i, ala diboto ibana do saluhut na binahenna i ndang magopo, alai na mamboan halak do i torop tu Kristus. Molo porsea do hita aha na tongon masa tu dirinta ala ni Kristus do i, ingkon sai patauon ni Tuhan i do hita laho mangadopi saluhutna i. Alai ingkon sai taboto do sude na taula, ingkon sai hombar do tu lomo ni roha ni Tuhan i.***

_____________________________

Evangelium: 2 Korintus 4:5-12

5. Ai ndada dirinami hujamitahon hami, Kristus Jesus i do, paboa Ibana Tuhan; alai naposomuna do hami ala ni Jesus.

6. Ai Debata, na mandokhon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i.

7. Alai di bagasan inganan na mura matapor do artanami on, asa Debata nampuna hagogoon na sumurung i, unang hami.

8. Di na saluhut do hami marhaporsuhon, alai ndang hapusohan; tarsosak, alai ndada tarhapit.

9. Na tarlele do hami, alai nda tung pinasombu; pinantingganghon, alai nda tung anggo bolong.

10. Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus.

11. Ai tongtong do hami, angka na mangolu dope, dipasahat tu hamatean, ala ni Jesus i, asa gabe patar nang hangongolu ni Jesus di dagingnami na olo mate i.

12. Asa na manghorhon do hamatean di bagasan hami, alai hangoluan do anggo di bagasan hamu.

Epistel: Psalmen 139:1-6, 13-18

1. Ende sian si Daud. Ale Jahowa, disulingkit jala ditanda Ho do ahu!

2. Sai diboto Ho do manang na hundul manang na jongjong ahu, gari sian na dao diantusi Ho do pingkiranhu.

3. Manang mardalandalan manang modom ahu, disege Ho do ahu, jala tangkas do diboto Ho angka dalanhu sudena.

4. Ai ndang adong nanggo sada hata di atas dilangku, tongon do ale Jahowa, diboto Ho do sudena i.

5. Tole sian pudi tole sian jolo dihaliangi Ho do ahu, jala dilinggom tanganMu do ahu.

6. Tung masurunghu do parbinotoan sisongon i di ahu, matimbohu do, ndang hadongdongan ahu.

13. Ai Ho do na manompa angka piangku, ditonun Ho do ahu di bagasan bortian ni dainang.

14. Mandok mauliate ma ahu tu Ho ala ni surung ni pambahenMu di ahu, na sumurung do angka jadijadianMu, jala tangkas situtu do i ditanda rohangku.

15. Nda tung buni holiholingku di jolom, uju na tarjadi ahu di sihabunian, uju na tarsirat ahu di dalom laut.

16. Di hurungan manuk ahu, nunga diida angka mataM, jala nunga tarsurat tu pustahaM sasudena i, nunga binuhul hian angka ariaringku, uju so adong dope nanggo sada.

17. Dibahen i mansai arga situtu do angka pingkiranMu di ahu, ale Debata, jala mansai torop do bilanganna.

18. Tung sura naeng rajumanhu, tumorop do nasida sian horsik; molo ngot ahu, tong dope ahu di lambungMi.

Semua tanggapan:

9Eben Simanungkalit, Pinantun Simatupang II dan 7 lainnya

2

Suka

Komentari

Bagikan

RENUNGAN YESAYA 6: 1-8, NA BADIA, NA BADIA, NA BADIA DO JAHOWA ZEBAOT (KUDUS, KUDUS, KUDUSLAH TUHAN).

 

NA BADIA,  NA BADIA,  NA BADIA DO JAHOWA ZEBAOT (KUDUS, KUDUS, KUDUSLAH TUHAN).

Jesaya 6: 1-8

Horas ma i hita. Selamat Ari Minggu Trinitatis ( 26 Mei 2024 ). Trinitatis lapatanna, hasitolusadaon ni Debata.

Di goari do minggu on Trinitatis, ala nunga singkop dipapatar Debata Sitolusada diri-Na tu hita jolma, i ma songon Ama Pargogo na so hatudosan, na manompa langit dohot tanoon ro di na asa isina. Dipapatar do nang diri-Na marhite Jesus Kristus, i ma Hata ni Debata na gabe jolma. Parpudi dipapatar diri-Na marhite Tondi Parbadia,, i ma Tondi ni Debata na saor tu angka na porsea di Jesus Kristus, laho pasadahon angka na porsea i di bagasan sada huria, huhut patauhon angka na porsea i gabe sitindangi ni Jesus Kristus di portibion. Las ma rohanta laho marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Jesaya 6: 1-8, na dipapatar Debata diri-Na, na badia, na badia, na badia, di na laho marsuru naposona si Jesaya gabe panurirang tu tongatonga ni bangso-Na, i ma bangso na tangkang jala na ramun.

1. Debata papatarhon hadirion-Na: Na badia, Na badia Na badia. Diida si Jesaya do di tondina, i ma di taon hamamate ni raja Usia ( 742 seb.M), Debata hundul di habangsa-Na na timbo jala na marmulia jala rambu ni pahean-Na manggohi bagas joro. Lapatanna, di parnidaanna i digohi hamuliaon ni Jahowa do Bagas Joro i, mamahe pahean na ganjang situtu songon pahean ni sada raja. Ujung ni pahean-Na i manggohi bagas joro na gabe songon ojahan ni simanjojak-Na. Angkup ni i diparnidaanna i diida dohot angka serapim manghaliangi Tuhan i di bagasan hamuliaon-Na. Masuk tu horong ni surusuruan ni Debata do serapim. Ganup serapim i marhabong onom be, dua manghuphupi bohina, dua manghuphupi patna, jala dua nari manghabanghon nasida.. Laos dibege si Jesaya do angka serapim i masijouan masialusalusan hira na na marende mandok: Na badia, Na badia, Na badia do Jahowa Zebaot, i ma Tuhan na manggomgomi nasa na adong. Ala ni di gomgomi habadiaon ni Debata do banuaginjang, digomgomi hasiangan on nang tanoon pe. Molo didok na badia do Debata, na marlapatan do i parjolo,: Ibana mangalobii nasa na adong di banuaginjang nang na di hasiangan on. Ndang adong tudos ni Ibana. Paduahon, ndang adong dosa nang haramunon di Ibana. Jadi habadiaon i do hadirion ni Debata na marpardomuan dohot hamuliaonNa. Hamuliaon, i do hataridaan ni habadiaon ni Debata i. Ndang apala jotjot dihatahon parjamita hadirion ni Debata na badia. Na jotjot di hatahon i ma pangalaho ni Debata songon parasiroha, parholong, pardenggan basa, na mangalehon aha na tapangido, isara ni arta, sinadongan manang hamoraon pe. Alai di turpukta on dipatuduhon do hadirion ni Debata na badia. Na marlapatan, Ibana manghalomohon bangso-Na marpangalaho na badia, songon pangalaho ni Debata. Na badia lapatanna, asing sian pangalaho portibion. Molo didok na badia do Tuhan i, marlapatan, ndang adong tudos-Na, ndang adong dosa, na holom, hajahaton dohot hageduhon, di bagasan Tuhan i. Angkup ni ndang adong hamubaon di bagasan diri-Na. Hot do Ibana ro di saleleng ni lelengna. Songon dia do Debata papatarhon habadiaon-Na na marmulia i?

Parjolo, dipapatar do i marhite panompaon-Na i. Adorang so mardosa jolma patar do habadiaon ni Debata. Dipapatar jadijadian-Na i do hamuliaon ni Debata (Psalmen 19: 1).

Paduahon, marhite patik dohot hata ni Debata. Na badia do patik dohot hata ni Debata. Hata ni Debata do na gabe daging, i ma Jesus Kristus. Jadi Na badia do Jesus Kristus, ai tubu Ibana sian Tondi Parbadia do.

Patoluhon, marhite Tondi ni Debata. Na badia do Tondi ni Debata, ala ni i do Ibana digoari Tondi Parbadia.

2. Diadopan ni Debata patar do dirinta songon halak pardosa.

Di na niida ni si Jesaya habadiaon dohot hamuliaon ni Debata, gabe tarjolma ma ibana mareng dirina dohot bangsona na gok dosa dohot haramunon. Tubu ma biar di bagasan rohana . Diingot ibana ma aha akibat na naeng mangonai tu dirina, ala nunga dibereng ibana Tuhan i dohot hamuliaon-Na. Ala ni mangangguhi ma ibana mandok: "Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot." Ndang tarbahen ibana dohot bangsona marende rap dohot angka serapim i ai jolma parbibir na ramun do nasida. Di tingki i ma si Jesaya sadar huhut mangokuhon dosa dohot haramunonna diadopan ni Tuhan i, na tubu ibana jala maringan di tongatonga ni bangso na ramun. Dung adong panandaon ni dirina dohot pangokuon ni dosana, gabe diparentahon Debata ma sada serafim i laho paiashon bibir ni si Jesaya. Dibuat ma sada batu arang sian langgatan ni joro i dohot gansip, jala dijamahon ma i tu pamangan ni si Jesaya huhut didok: "Ida ma, on do na manjama bibir ni pamanganmu, paboa naung niunsat utangmu, jala naung hinungkupan dosam." Lapatan ni na binahen ni susrusruan serapim i i.ma: nunga diampuni Debata si Jesaya, nunga disalpuhon angka hasalaanna jala nunga disesa dosana. Dosa i do na mambahen ramun jolma i lumobi mangaramuni bibir manang pamanganna. Panjamaon ni surusruan serapim marhite gara ni api na di tanganna tu bibir ni si Jesaya, domu do i tu ulaon na naeng sipasahaton ni Debata tu si Jesaya, i ma patolhashon hata ni Debata tu tongatonga ni bangso na ramun i. Ndang ramun be bibir ni si Jesaya, gabe boi ma ibana barani manghatahon hata ni Debata na badia, na mangarahon bangso i paubahon rohana. Sude angka na porsea nunga diuras Debata marhite mudar ni Jesus Kristus, asa sude angka na porsea boi manghatindanghon dohot manghangoluhon habadiaon ni Debata. Ingkon badia do ngolu ni saluhut na porsea, songon Debata na badia i.

3. Rade ma hita suruon ni Debata pasauthon sangkap-Na. Dung diparbadiai Debata si Jesaya, gabe tinggil ma parbinegeanna tu soara ni Debata na manjou Ibana. Molo so diparbadiai Debata roha ni hita jolma marhapal do roha dohot parbinegean ni hita jolma pardosa tartutup tu hata ni Debata. Sian habangsa-Na ro ma soara ni Tuhan i manungkuhon: "Ise do suruhonon-Hu, jala ise pardalannami?" Ndang marrumang parenta hata ni Debata, alai marrumang penawaran do na boi alusan ni ganup halak na manghilala tarjou ibana tu parsuruon ni Debata mamboan hata-Na tu bangso-Na. Ala naung diparbadiai Debata ibana, manigor ro do alus ni si Jesaya sian roha na bulus mandok: "Dison do ahu, suru ma ahu!". On ma alus na spontan sian roha na bulus na so pola adong tawar menawar tu Tuhan i. Ndang pola adong be alusna mandok na so tau ibana mangulahon parsuruon ni Debata, songon alus ni si Musa, manang songon alus ni si Jeremia na mandok poso do pe au ndang huboto manghatai. Sandok alusna i nunga patuduhon paneahonon ni dirina hibul manghobasi ulaon ni Tuhan i. Laos on ma sada tiruan di sude angka na porsea, naung sinesaan ni Debata dosana, jala naung diburi haramunonna, mangalusi parsuruon ni Debata laho mangulahon ragam ni angka ulaon panghobasion di harajaon ni Debata dohot di huria-Na. Sude halak kristen do tarjou suruon ni Debata mambaritahon barita na uli i marhitehite ragam ni silehonlehon ni Tuhan i di angka na porsea di Tuhan i. Ndang adong sidalian ni halak Kristen manulak parsuruon ni Debata ai nunga jumolo ganup na porsea i diparbadiai Tuhan i jala diparbohali asa tau mangulahon parsuruon i ima manghatindanghon barita na uli i di portibi on. ***

________________________

Evanelium: Jesaya 6:1-8

1. Di taon hamamate ni raja Usia, huida Tuhan i hundul di atas habangsa na timbo, jala na marmulia, jala angka rambu ni paheanNa manggohi bagas joro.

2. Jongjong di atasna surusuruan Serapim, angka na marhabong onom be, dua manghungkupi bohinasida, dua manghuphupi patnasida, dua manghabanghon nasida.

3. Jala marsijouan ma nasida songon on: "Na badia, na badia, na badia do Jahowa Zebaot, gok hamuliaonna liat portibi on."

4. Jadi humuntal ma angka ojahan ni tiang sian soara ni na manjou, jala gok timus joro i.

5. Dung i hudok ma: "Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot."

6. Dung i habang ma sada sian angka surusuruan Serapim mandapothon ahu, jala di tanganna sada batu arang na gara, na binuatna sian langgatan dohot gansip.

7. Jadi dijama ma pamanganhu, jala didok: "Ida ma, on do na manjama bibir ni pamanganmu, paboa naung niunsat utangmu, jala naung hinungkupan dosam."

8. Dung i hubege ma soara ni Tuhan i, na mandok: "Ise do suruhononHu, jala ise pardalannami?" Jadi ningku ma: "Dison do ahu, suru ma ahu!"

__________________________

Epistel: 1 Johannes 5: 9-13

9. Ia panindangion sian jolma tajalo do; alai sumurung do panindangion na sian Debata, ai panindangion na sian Debata do on, na hinatindanghonNa taringot tu AnakNa i.

10. Na porsea di Anak ni Debata, ditiop do panindangion i. Na so porsea di Debata, i ma mambahen Ibana pargabus, ala so porsea ibana di na hinatindanghon ni Debata taringot tu AnakNa i.

11. Jala on do panindangion i: Naung dibasabasahon Debata do tu hita hangoluan salelenglelengna, jala di bagasan Anakna do hangoluan i.

12. Ia di ibana Anak i, di ibana do hangoluan i; ia so di ibana Anak ni Debata, ndang di ibana hangoluan i.

13.Umbahen na husurat angka i tu hamu, angka na porsea di Goar ni Anak ni Debata: Naeng botoonmuna, naung di hamu do hangoluan na salelenglelengna!

 

 

RENUNGAN ULAON (KISSAH PARA RASUL) 2: 1-13, HUASO NI TONDI PARBADIA NA PASADAHON ( KUASA ROH KUDUS YANG MEMPERSATUKAN)

 HUASO NI TONDI PARBADIA NA PASADAHON ( KUASA ROH KUDUS YANG MEMPERSATUKAN)

Ulaon 2: 1-13

Horas ma di hita. Selamat Ari Raya Pentakosta ma di hita ( Minggu, 19 Mei 2024). Ari Raya Pentakosta, i ma Pesta Parningotan di hasasaor ni Tondi Parbadia. Las ma rohanta marsomba tu Tuhanta, mamuji pasangaphon goar-Na, huhuhut tumangihon hata-Na. Disoarahon hata ni Debata do tu hita sadarion, nienet sian Buku Ulaon ni Apostel 2: 1-13, taringot tu huaso ni Tondi Parbadia na pasadahon. Tondi Parbadia ma hapataran ni Debata na patoluhon, hombar tu panindangion ni buku na badia i, na laos udut tusi hajongjongan ni huria ni Tuhanta di portibion marhite huaso ni Tondi Parbadia na pasadahon angka na porsea di Jesus.

1. Mamestahon Ari Raya Pentakosta. Sadarion Ari Raya Pentakosta do di hurianta. Ari Raya Pentakosta na tapestahon sadarion, ido sada ari na balga di huria dohot di hakristenonta asing ni Ari Raya Natal, Ari Raya Paskah dohot Ari Raya hananaek ni Tuhan Jesus. Alai laos ari pesta parningotan di hasasaor ni Tondi Porbadia tu angka sisean ni Tuhan Jesus do ari sadarion, di na pungu nasida di sada inganan di huta Jerusalem, saor do tu angka sisean i Tondi ni Debata. Hombar do i tu na tinonahon ni Tuhan Jesus tu angka sisean-Na andorang so manaek Ibana tu banuaginjang songon na dibaritahon di Ulaon ni Apostel 1: 4.8. Dibahen goar ni ari hasasaor ni Tondi Parbadia i, ari Pentakosta, na marlapatan ari palimapuluhon, ala tongon do na masa i di Ari Raya Pentakosta ni halak Jahudi. Nunga dipatikhon Debata i marhite si Musa, ulahonon ni halak Israel, ima pitu minggu ( lima pulu ari ) dung ari raya Paskah ( 3 Musa 23: 15-16). Sipata do digoari ari raya i di halak Israel “ari raya minggu minggu” ( 5 Musa 16: 9-10): “Ingkon pitu minggu bilangonmu di ho; olat ni dung mamungka madabu sasabi tu eme, pungkaonmu ma mamilangi na pitu minggu i. Dung i marari raya minggu ma ho di Jahowa, Debatam, marguru tu pangalehon ni tanganmu di pelean sian lomo ni roha silehononmu, hombar tu pamasumasu ni Jahowa, Debatam di ho”. Sipata do digoari ari raya i, ari raya goliton, manang ari raya patumonaan ni gotilon, ala dipatupa do ari raya i di tingki pamuhai ni gotilon, jala boanon nasida ma pelean nasida tu Jahowa sian patumonaan ni gogo ni na niula nasida. Ingkon marlas ni roha do sude halak Israel di ari i, sian dakdanak sahat ro di na magodang, nang angka naposo nasida baoa nang naposo nasida parompuan, nang angka halak dagang na adong di huta i.

Dung habuangan Babel, dibahen halak Yahudi ma Bagas Joro na di Jerusalem, gabe pusat parugamoon ni Jahudi, jala dipatikhon ma nasa baoa naung magodang ingkon marpungu ma sian ganup luat dohot parserahan, ganup ari raya ni halak Jahudi di Jerusalem pasahathon pelean dohot guguan nasida tu Bagas Joro i. Tongon ma di ari raya Pentakosta ni Jahudi i, di na torop halak Jahudi marpungu di Jerusalem, ro sian 16 luat ni angka bangso na adong di portibion ( Partia, Media, Elamit, Mesopotamia, Kappadosia, Pontus, Asia, Prigia, Pampilia, Misir, Libia, Kirene, Rom, Kreta, dohot Arab: Ulaon 2: 9-) songgop Tondi Porbadia tu angka sisean ni Tuhan Jesus di na pungu nasida di sada inganan bagas na somal parpunguan nasida, songon naung ni bagabagahon ni Tuhan Jesus tu angka sisean i andorang so manaek Ibana tu banua ginjang. Arion do na nijanjihon ni Tuhan Jesus tu angka siseanan di na laho manaek Ibana tu banuaginjang songon na nidokNa di Ulaon ni Apostel 1: 8,: “Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on”. Dipasaut do i dung lima puluh ari sian haheheon ni Jesus, manang dung sampulu ari dung hananaek ni Tuhan Jesus tu banuginjang. Di buku Ulaon ni Apostel 2: 1-4, didok: “Jadi dung jumpang ari palimapuluhon i (Pentakoste), pungu ma nasida saluhutna di sada inganan. Ndang apala dipatorang inganan paprpunguan ni angka sisean dohot siihuthon Jesus i. Alai torop do na mandok, ia inganan i i ma naung somal do parpunguan ni angka sisean i di huta Jerusalem. Atik pe kemungkinan na asing boi do inganan parpunguan nasida i di sada bilut ni bagas joro na di Jerusalem. Alai manang di dia pe i na pasti marpungu do angka sisean i di sada inganan songon naung tinonahon ni Jesus, martangiang laho mangarade diri manjalo haroro haroro ni Tondi Parbadia saor tu ganup nasida songon na tinonahon ni Jesus.

2. Tondi Parbadia patauhon angka na porsea manghatindanghon taringot tu Jesus. Jadi na pungu i nasida masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i. Udut tusi tarida ma di nasida suman tu dila ni api na marjillamjillam, disonggopi ma ganup nasida. Gabe gok Tondi Parbadia ma nasida saluhutna. Haroro ni Tondi Parbadia i songon parngongos ni alogo, manggombarhon sada hagogoon, na boi songgop di sude inganan. Jala Tondi Parbadia i songon dila ni api na boi mangalehon semangat dohot hatiuron huhut mamosohi angka na hodar sian roha ni na sinongopanna i asa ias jala badia. Laos Tondi Parbadia i patauhon dila ni ganup na sisononggopanNa, manghatindanghon taringot tu Jesus gabe boi diantusi ganup na umbegesa. Songon na tarida di angka sisean i, dung disonggopi Tondi Parbadia i nasida gabe mamungka marpangkuling na asing ma nasida, marguru tu pangalehon ni Tondi i tu nasida mangkatahonsa”. Hatauonnasida marpangkuling na asing, di hata Junani didok “lalein heterais glossais”, jala di hata Indonesia “berkata-kata dalam bahasa-bahasa lain”. Na nidokna “marpangkuling na asing”, manghatai angka sisean i di hata nasida do, alai boi diantusi angka na umbegesa na ro sian 16 bangso dohot luat i di hata nasida be. Alai adong do muse aliran kristen tertentu na asing mangantusi lapatan ni “na marpangkuling na asing on’, ima na gabe didok “marhata na leban” na diterjemahon dohot hata Indonesia “ berbahasa roh” (glosse na margeser gabe “ glossolalia”), i ma na masipandok hata be, ndang adong manang ise na boi mangantusi ia so holan Tondi i ninna. Sahat tu saonari gabe perdebatan teologis do on, dohot na maniop pangantusion na sasintongna songon na dihatahon di Ulaon ni Apostel on. Ndang adong didok di Ulaon ni Apostel on, angka sisean i gabe manghatai di bagasan tondi (berbahasa roh ), alai gabe marpangkuling na asing do dung disonggopi tondi i nasida. Jala ndang "bahasa lidah" na hinatahon nasida i, ai songon na somal do nasida manghatai, alai boi diantusi angka halak na asing na umbegesa di hatana be. Ido umbahen longang angka na torop na marasingasing hata nasida, boi mangantusi na hinatahon ni angka sisean i di hata nasida be. Tontu na hinatahon ni angka sisean i, taringot tu Jesus do, i ma taringot tu ulaon-Na di portibion, sitaonon-Na, hamamate-Na, haheheon-Na, sahat tu hananaek-Na muse mulak tu banuaginjang. Pinargogoan ni Tondi Parbadia boi dihatindanghon nasida i dohot torang, jala boi diantusi sude angka na umbegesa.

3. Tondi Parbadia pasadahon angka na porsea dohot huria i. Songon naung pinatorang di jolo, sada sintuhu ni ari raya Pentakosta ni Jahudi i ma pesta patumonaan ni gotilon.

Haroro ni Tondi Porbadia i pe, gabe ari patumonaan gotilon ni huria i do, ala di na sadari i dipatupa ma pandidion parjolo tu angka na porsea di Jesus Kristus, ima angka Jahudi na marpungu hatiha i sian ganup luat na marragam. Torop ni na tardidi di ari na sadari i marhite jamita di si Petrus dohot angka donganna tolu ribu halak. “Asa tardidi ma angka na manjangkon hatana i, gabe arga toluribu ma torop ni halak na manamba di na sadari i”.( Ulaon 2: 41). Ima hatutubu ni huria na parjolo. Jadi di na marningot ari raya Pentakosta manang ari haroro ni Tondi Porbadia, laos na marningot do hita di ari hatutubu ni huria ni Tuhanta di portibion. Sian mulai i molo taetong, lobi hurang ma umur ni huria i hampir dua ribu taon sahat tu tingki on. Patut do i sihamauliatehononta tu Tuhan i. Alai Tondi Porbadia i i ndada holan manubuhon huria i, alai laos dohot do pasadahon, mangaramoti, manogunogu huhut mampargogoi laho pararathon Barita Na uli na binoan ni Jesus i tu sandok bangso. Ala ni

Barita na Uli na pinararat ni huria i marhite angka apostel dohot angka parbarita na uli na pinabangkit ni Debata, nunga marjongjongan angka huria di tongatong ni angka bangso na di portibion, tarmasuk di tongatonga ni bangsonta Indonesia, khususna di tongatonga ni bangso Batak. Nunga sahat tu hita barita na uli marhite angka parbarita na uli sian luat na dao i ma sian Eropa, jala nunga porsea hita di Jesus Kristus, tardidi tu bagasan Goar ni Debata Sitolusada, gabe angka sisean jala siihuthon Jesus Kristus ma hita nuaeng. Ala ni i dohot do tu hita hasahatan ni hata ni Jesus andorang so manaek Ibana tu banuaginjang, na mandok asa gabe sintindangi ni Jesus Kristus hita di portibion, di tongatonga ni luatta dohot bangsonta. Molo dipangido hita gabe sitindangi (saksi), ndada gabe sitindangi pargapgap (palsu), manang sipaulaula na marpangansi, alai sitindangi na tutu do, na rade manaon mamelehon dirina ala ni barita na uli i.

Di hata haporseaon ni halak Kristen ponggol patoluhon dipadomu do hata haporseaon tu Tondi Parbadia dohot hata haporseaon tu huria i. Di hata haporseaon i didok do: "Ahu porsea di Tondi Parbadia, jala adong sada huria na badia, huria hatopan ni halak Kristen angka na na badia." Jadi di bagasan haporseaonta Tondi Parbadia do marhite huasona na pasadahon angka na porsea di Jesus gabe sada huria. Marhite i tahaporseai do sada (esa) do sude huria na adong di portibion, atik pe siala perkembangan ni huria naung marasingasing latar belakang inganan dohot budaya, gabe tubu ma ragam organisasi ni huria. Alai di ojahanna sada do huria i, na maruluhon tu Jesus Kristus. Ala ni i molo adong na marusaha mamolai huria i manang patubuhon huria na imbaru sian lomolomona sandiri, na mangalo ulaon ni Tondi Parbadia i do ibana disi.***

___________________________________

Evangelium: Ulaon ni Apostel 2:1-13

1. Jadi dung jumpang ari palimapuluhon i (Pentakoste), pungu ma nasida saluhutna di sada inganan.

2. Jadi masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i.

3. Jadi tarida ma di nasida suman tu dila ni api na marjillamjillam, disonggopi ma ganup nasida.

4. Gabe gok Tondi Parbadia ma nasida saluhutna, jadi mamungka marpangkuling na asing ma nasida, marguru tu pangalehon ni Tondi i tu nasida mangkatahonsa.

5. Alai adong ma angka Jahudi na maringan di Jerusalem, halak na daulat sian saluhutna bangso na ditoru ni langit.

6. Alai di na masa soara i, marpungu ma natorop i; jadi tarhalomong ma nasida, ai ganup umbege nasida mangkatahon di hatana be.

7. Jadi tarmali ma nasida saluhutna jala longang, angka ninna ma: Nda halak Galilea saluhut nasida na mangkatai i?

8. Boasa ganup hita umbege di hata hasomalanta be?

9. Halak Partia dohot Media dohot Elamit dohot angka na maringanan di Mesopotamia, di Judea dohot di Kappadosia, di Pontus dohot di Asia.

10. Di Prigia dohot di Pampilia, di tano Misir dohot di angka luat Libia na tungkan Kirene dohot halak Rom na maringanan dison, angka halak Jahudi ro di angka parguru,

11. angka halak Kreta dohot halak Arab; di hatanta be do itabege dihatahon nasida angka ulaon habalgaon ni Debata!

12. Jadi tarhalomong ma nasida saluhutna, jut be ma rohana, angka ninna ma sama nasida: Na marhua do i ulaning?

13. Alai manginsahi do na deba, angka ninna ma: Gok anggur na tonggi do nasida.

Epistel: 1 Musa 41:37-42

37. Denggan ma hata i di roha ni raja Parao dohot di roha ni angka naposona sudena.

38. Jadi ninna raja Parao ma mandok angka naposona i: Tung tagamon ma jumpang hita jolma songon ibana, na niinganan ni Tondi ni Debata?

39. Dung i didok raja Parao ma tu si Josep: Dung dipabotohon Debata tu ho sudena i, ndang adong jolma na umpantas marroha jala na umpistar sian ho.

40. Sahat tu ho ma bagashu, guru dokmu ma sandok bangsongki; holan habangsa harajaon i ma hasurunganhu sian ho.

41. Angkup ni ninna raja Parao mandok si Josep: Ida ma, nunga hupasahat tu ho sandok tano Misir on.

42. Dung i diumpat raja Parao ma tintinna sian tanganna, jala disolukhon tu tangan ni si Josep, dilehon dohot surta na bontar bahen abitna dohot sampesampena, dibahen dohot horungkorung sere tu rungkungna.

Semua tanggapan:

6Jones Simamora, Drs Banuasi Simamora dan 4 lainnya

1

Suka

Komentari

Bagikan