SERMON ( JAMITA ) TU LANSIA ( TITUS: 3: 1-11)

SERMON (JAMITA ) TU LANSIA ( TITUS 3: 1-11)

BE  No. 114: 1, ALE JAHOWA DEBATA

      Ale Jahowa Debata  Sai tatap hami on

      Ai masiboan dosana be Do hami tu joloM

      Asi rohaM di hami Sai sesa dosa i sude

      Marhite Jesus AnakMi Na mate di hau  silang i

      Di Golgata Di dolok Golgata.

TURPUK  : TITUS 3: 1-11

1 Paingot ma nasida, asa marroha na unduk mangoloi panggomgomi na mangarajai, huhut ringgas tu nasa ulaon na denggan.

2 Unang ma siinsahi dongan, manang na tongkar; naeng ma parroha na lambok, parroha panganju di saluhut halak.

3 Ai dohot do hita najolo angka na oto, na tois, na lilu, pinarhatoban ni ragam ni hisaphisap dohot sangkapsangkap, taulahon do hajahaton dohot latelate; angka hagigian do hita jala masihosoman.

4 Alai disi ma tarida habasaon dohot habasaron ni Debata, Sipalua hita:

5 Ndada ala ni ulaonta hatigoran, umbahen na dipalua Ibana hita; tung sian asi ni rohana do, marhitehite pandidion pangulahion tubu dohot marhitehite Tondi Parbadia na paimbaruhon i,

6 naung niusehonna i tu hita buas marhitehite Jesus Kristus, Sipalua hita,

7 asa gabe tigor hita, binahen ni asi ni rohana, jala sitean hangoluan salelenglelengna, mangihuthon pangkirimon i.

8 Haposan do hata i, jala naeng ma gomos hatindangkononmu i dipangido rohangku, asa nasida, naung gabe porsea di Debata, mangkapadothon angka ulaon na denggan. I ma na uli jala hasea di jolma.

9 Alai pasiding ma angka sualsual haotoon i dohot hata sundutsundut ro di parsalisian dohot parbadaon siala Patik i, ai ndang marniula i jala magopo.

10 Pasiding ma halak parpoda haliluon, dung jolo dipaingot ho ibana sahali manang dua hali;

11 ai diboto ho do, naung marbalik situtu sisongon i jala diulahon dosa, atik pe naung ditorui rohana ibana.

JAMITA: Turpuk on disurathon apostel Paulus tu siseanna si Titus. Marhite panogunoguon ni si Paulus do gabe porsea si Titus di Jesus. Ala dibereng si Paulus do haburjuon ni si Titus on, gabe dohot ma ibana ditogihon mangurupi si Pualus laho marbarita na uli i. Nunga dirajumi si Paulus ibana anak na situtu di haporseaon tu Jesus ( Titus 1: 4). Ibana ma muse disuru si Paulus manogunogu huria na di pulo Kreta, laho manghangoluhon ngolu hakristenon na denggan. Tarlumobi mangalehon tiruan  songon dia do halak kristen marparange na denggan di tongatonga ni masyarakat . Sada ulaon na balga do on, alai pos do roha ni si Paulus  tarulahon si Titus do i. Hatiha i tarbarita do pangalaho ni halak Kreta  Kreta na lumlam, muramura marbada, jala ndang diargahon nasida uhum na niaturhon ni pangggomgomi. Ala ni jotjot do masa di tongatonga ni halak Kreta i na masiporangan jala na masibunuan, hira na mangasahon gogona be. Ala ni disosohon si Paulus do asa ditogutogu si Titus nasida, songon warga negara na unduk tu uhum na adong, jala na masiapasangapan huhut masihaholongan di tongatonga ni masyarakat. Adong onom pangalaho na denggan siparangehon ni halak Kristen songon warga ni harajaon ni Debata, disosohon si Paulus paingothonon  ni si Titus tu halak Kristen na di luat i, ima:

1.      Unduk tu panggomgomi. Haunduhon i tontu marhite na mangaradoti uhum na niaturhon ni panggomgomi i. Halak Kristen ndang mangolu holan di dirina, jala ndang mamunjung, alai na ingkon rap do dohot angka donganna jolma di tongatonga ni masyarakat. Asa dapot hademahon di tongatonga ni masyarakat i ingkon ganup do mangoloi aturan dohot uhum na marlaku ditongatonga ni masyarakat i.

2.      Ingkon ringgas di nasa ulaon na denggan. Prinsip ni ulaon na denggan ima bersifat pelayanan, na mangurupi dongan jolma, ndada holan mamingkirhon kepentingan ni dirina sandiri. Jadi roha diri ingkon sipasidingon ni halak Kristen songon warga negara na denggan.

3.      Ingkon manat di nasa panghataion. Unang siinsahi dongan manang tongkar, manang mamaksahon  hagiotna sandiri. alai naeng ma parroha na lambok, parroha panganju di saluhut halak.

4.      Parroha na lambok.  Ima halak na sai boi mangendalihon mohop ni ateatena. Diboto sadihari tingkina muruk, sadihari ndang. Ingkon benget do manaon, maradophon halak na mambahen na sala maradophon hita. 

5.      Tongtong bersikap toleran maradophon angka donganna. Unang masiuhuman, nang pe paasing-asing  di haporseaon. Ndang boi mamaksahon pingkiranna sandiri tu donganna, alai ingkon boi tongtong masiargaan jala masipasangapan.

6.      Tongtong di bagasan haserepon. Unang leas roha maradophon halak na so porsea do pe di Jesus, jala unang dirajumi dirina naung dumenggan sian angka donganna na so porsea i do pe. Hadengganon na niulana ndang jadi sihaginjnghononna maradophon angka na donganna na  so paubahon rohana do pe. Ingkon tongtong do mandok mauliate tu Tuhan i, na parsidohot hita  gabe parjambar di asi ni roha ni  Debata di bagasan Kristus. Jadi kunci ni ngolu ni halak Kristen ima na sai tongtong mandok mauliate tu Tuhan, ai ngolu ni halak Kristen tongtong do marojahan tu asi ni roha dohot holong ni roha ni Debata tu ganup jolma so mardia imbar.

Sipahusorhusoron:

Parjolo, Boasa hita angka siihuthon Jesus, ingkon sai marunduk ni roha tu panggomgomi?

Paduahon, aha do  sibahenonnta songon tanda ni haunduhonta tu panggogommi di tingkinta ssaonari on.

Patoluhon, songon dia do hita halak Kristen  mangolu di tongatonga ni masyarakat na plural ( majemuk) asa unang masa hagaoron manang parsalisian?

( Horas ma di hita, Pdt MSM Panjaitan ).