SERMON ( JAMITA ) TU LANSIA ( MATEUS 6: 25-34 ):

SERMON ( JAMITA ) TU LANSIA ( MATEUS 6: 25-34 )

B.E. No.294: 1-2;    UNANG SAI HOLSOAN HO   ( BL 70 A)               

1         Unang  sai holsoan ho, Debata mangolu do

        Dirajai do sasudena , arsak mi naeng buatonna ;

        Asal ma porsea  ho, holsomi maporus do

1.       Sai haposi Debatam, jala alo ma dosam

        Unang habiari talu, hamonangan do tohapmu

        Dipasaut Debatami na pinarbagaNai

TURPUK ( MINGGU 21 JUNI 2020) :  MATEUS 6 : 25 – 34

25 Ala ni i do umbahen na hudok tu hamuna: Unang holsohon hamu hosamuna sumarihon sipanganon, manang dagingmuna pasarisari parabiton! Nda ummarga hosa sian sipanganon? Nda ummangat daging sian parabiton?

26 Bereng hamu ma pidong angka na martongatonga langit, angka na so manabur, na so manggotil, na so papunguhon tu sopo; tong do diparmudumudu Amamuna na di banua ginjang i nasida! Nda godang dope hasurunganmuna sian i!

27 Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana?

28 Boasa antong holsohononmuna parabiton! Patangkas hamu ma partubu ni bungabunga na di ladang i, angka na so mangula jala na so mangganti!

29 Ahu mandok tu hamuna: Gari si Salomo, uju di bungaran ni hasangaponna i ibana, gari so mamangke songon bungabunga sada.

6:30 Asa molo songon i diparulosi Debata duhutduhut na di ladang i, na jongjong songon sadari on, na tupa dipuruni marsogotna i, lam hamu ma, lam so parulosanna! Oe hamu siotik haporseaon!

31 Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami?

32 Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu.

33 Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!

34 Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.

JAMITA:   UNANG HOLSOAN

        Di jolo ni turpuk on nunga dipaingot Jesus angka sisean-Na dohot sude na mangihuthon Ibana asa unang arta na manggohi rohanasida. Di turpuk on dipaingot muse asa nang holsoan di ngolu on, ai holso i ma hataridaan ni na so porsea di Debata. Diboto Jesus do pangalaho ni jolma na jotjot holsoan na manghorhon lomos taringot tu ngoluna. Asing do na manarihon sian na holsoan. Ulaonta do manarihon pangapudian,  ima marhite na mangula, manuan dibagasan panghirimon asa adong hasilna i gotilonta muse. Alai anggo roha na holsoan, i ma na nabiar, gamang dohot lomos mamingkirhon tingki na ro. Sahit ni tondi do hlso i, ima na boi paponjot roha, na pagalehon pingkiran dohot pamatang, gabe so margellok laho mangula siulaon. Adong do na patudoshon holso tu burbur, samacam gulomit na mansai metmet na sai mangaruangi hau ,manang eme. Songon pangaruangi ni burbur i di hau manang eme, songon i do roha na sai holosan tu hadirion ni jolma. Diago holso i do roha ni jolma, ai sai dirharati do isi manang impola partondion na di bagasan roha ni jolma, gabe torop ma jolma i songon hau manang eme na burburon. Dengan do pe idaon sian duru hape di bagasan nunga ruangon, ndang marisi be.

         Na somal na sai hinolsohon ni jolma, ima taringot tu nasa na so tarpatupa gogona sandiri. Jadi, ala sai dipangasahon gogona sandiri, hape ndang tuk gogona i, gabe tubu holso ni roha i. Marhite jamita ni Jesus on, diarahon do hita laho manaluhon holso i sian rohanta. Boasa songon i korasna Jesus mangalo tondi  holso i. Ala todi holso na dos dohot tondi biar, i ma  tondi na ro sian harajaon haholomon. Angka anak hajahaton do nasida, na sai ro paototohon dohot mangalihon hita.

Jadi songon dia do dalan na niajarhon ni Tuhan Jesus tu angka na mangihuthon Ibana, laho pasidingkon holsoholso ni roha na mansegai haporseaon i, i ma:

Parjolo, hibul roha  holan martuhanhon Debata na mangolu i. Lapatanna, unang ma holan di hata mandok porsea di Tuhan i, hape  dipardebata do angka hagogoon ni portibion, songon i dohot na mardebatahon arta. Dipaotooto holso i do  jolma, mandok  ndang adong Debata. Tu na deba  didok, ndang dipardulihon Debata ho, gabe ala ni tubu ma ganggu ni roha ni jolma i di huaso dohot hagogoon ni Debata, na manghorhon holsosholso ni roha, mandok aha ma sipanganonnami, aha ma parabitonnami, dohot angka haporluan na asing di ngolu on? Di tingkion lam godang do holso ni joma, asing ni na mangholsohon sipanganon dohot parabiton, diholoshon ma muse, aha jabunami, aha ma kenderaannami, songon dia ma parsingkolaan ni angka dakdanak on, songon dia ma pangapudianna muse? Dohot angka na asing.  Ala ni do didok Tuhan Jesus, sipebelebegu  do na sai holsoan di ngoluna,  ima angka na so porsea di Debata na mangolu. Diboto Debata Ama i do angka na ringkot di nasa na tinompa-Na i. Ai gari angka pidong na martongatonga langit, na so manabur, na so manggotil, na so papunguhon tu sopo disarihon Debata. Songon i dohot bungabunga na di ladang i, mansai jengkar tubu dibahen, jala mansai uli berengon, gabe las roha ni halak mamereng.        

Paduahon, Pos roha dipanarihon ni Debata dia angka na tinompa-Na. Tahaporseai do Debata songon Ama, asing ni na manompa saluhut hasiangan on ro di nasa isina, Ibana do nang manarihon dohot marmududuhon na tinompa-Na i.  Tarmasuk manarihon angka binatang, angka pidong na martongatonga langit ro di angka bunga na di ladang. Isara ni angka pidong, ganup ari do  ngoluna terancam marhite parmaraan, dohot na so mangan. Nang pe songon i tongtong do nasida marlas ni roha, marende do nasida nang di haleon songon i dohot di hadumaon. Nang  mamirong langit, mardorom ronggur, na boi manegai asar nasida, alai tong do nasida marende. Diparmudumudu Debata amanta na di banuaginjang i do nasida. Songon i dohot partubu ni angka bungabunga na mansai uli parabitonna marhite bungana  na tinompa ni Debata, na dao ummuli pahean ni angka jolma na sangap di portibi on. Dao do pe sumurung angka jolma na tinompana i sian saluhutna i.  Molo angka i saluhutna disarihon jala diparmudumudu Debata, lam beha ma jolma na dao sumurung ditompa Debata sian saluhutna i.

Patoluhon, i ma marhite sai jumolo mangalului harajaon ni Debata dohot hatigorn_Na. Dipangido Tuhan i do hita mangolu songon angka anak ni harajaon ni Debata na mangolu di bagasan hatigoran ni Debata. Di sude persoalan ni ngolunta, dohot ragam ni angka ulaon na dipasahat Tuhan i tu hita  tapahibul rohanta mangolu di bagasan angka ruhut-ruhut dohot uhum ni harajaon ni Debata ima uhum hatigoran dohot hasintongan. Debata tongtong na gabe raja di ngolunta, ala ni ingkon sai mangihut jala marguru tu Ibana hita, ndada mangasahon dirinta. Angkup ni na sai marunduk ni roha tu Debata, angka anak harajaon ni Debata,  ima angka na ringgas mulaulaon, hombar tu angka hatauon na nilehon ni Debata tu ibana. Dipangke angka talenta dohot silehonlehon ni Debata na adong di ibana, parhitean ni Debata mamasumasu ngoluna. Ndang dihalomohon Debata angka na losok mulaulaon, ai marhite gogo ni na taula i do Debata manarihon ngolunta. Alai tutu di nasa pangulaonta ndang mangasahon gogonta sambing hita, ingkon mangasahon huaso ni Debata do. Angka na sai pajolohon harajaon ni Debata  di ngoluna, ima na sai pasangaphon Debata, jala na sai marunduk ni roha tu  Debata, ala pos do rohaNa di panarihon ni Debata di ngoluna ganup ari. I do umbahen didok Tuhan Jesus, unang ma holsohon hamu ari marsogot, ai sarihonon ni ari marsogot do ari marsogot. Didok hata ni endenta No. 373: 1, Mangula hita jolma manabur boni i, alai anggo jadina di Debata do i. Dilehon las ni ari nang nambur udan pe. Tongtong di panumpak-Na marguru sasude. Nasa ulibasa ro sian Debata, i pe Ibana puji ma huhut haposi da.

Sipahusorhusoron:

1.       Aha do na mambahen mansai muramura halak holsoan di ngoluna di tingki on?.

2.       Angka aha ma na gumodang holso ni jolma di tingki on, lumobi angka holso ni hita angka naung lansia.

3.       Boha do pangantusionta taringot tu hata ni Jesus na mandok, unang holsohon hamu ari marsogot, ai sarihonon ni ari marsogot do ari marsogot?  Suraon maralo do i, tu sikap ni  halak naung  sai olo manabung deba sian penghasilanna di tingki  haposoonna, bahen bohalna di hatutuana muse?

Amen. Horas ma di hita  ( Pdt MSM Panjaitan