SERMON ( JAMITA ) TU LANSIA ( ULAON 16: 30-31)

SERMON ( JAMITA ) TU LANSIA ( Ulaon 16: 30-31 )

BE 115: 1-2, TUHAN DEBATA

♫     Tuhan Debata sai ramoti ma daging dohot tondinami

ido pangidoannami. Sai pahipas be Hami on sude

♫    Jesus Ho tutu Raja na burju sai palua tondinami

            sian pardosaonnami. Pasupasu be Hami on sude.

                                   

TURPUK ( 7 Juni 2020 ):  Ulaon 16: 30-31

30 Ditogihon ma nasida haruar, ninna ma: Hamu angka tuan, aha ma bahenonku, asa malua ahu?

31 Jadi didok nasida ma: Haporseai ma Tuhan Jesus, asa malua ho dohot isi ni bagasmi!

(30 Ia mengantar mereka ke luar, sambil berkata: "Tuan-tuan, apakah yang harus aku perbuat, supaya aku selamat?" 31 Jawab mereka: "Percayalah kepada Tuhan Yesus Kristus dan engkau akan selamat, engkau dan seisi rumahmu.")

JAMITA:    HAPORSEAI MA TUHAN JESUS, ASA MALUA HO DOHOT ISI NI BAGASMI!

                Dung sian luat Asia na metmet, taripar do si Paulus rap dohot si Silas tu luat Makenonia di Eropa laho mambaritahon barita na uli i diarahon Debata marhite Tondi Porbadia. Dungi sahat ma nasida tu huta Pilippi, sabungan ni luat Makedonia.  Dibaritahon ma Barita na uli di huta i, jadi jongjong ma huria disi, na marharoroan sian sipelebegu dohot deba sian halak Jahudi. Alai borat do hambatan diadopi ibana rap dohot angka donganna di huta i, pola sahat tu na tarhurung ibana. ala di sada tingki dipalua sada halak boruboru pangarunding sian tondi na jahat na mangihoti  boruboru i. Na dipiaro tuanna do boruboru pangarunding i, ala boi mangalehon paruntungan tu tuanna i, marhite sian upa ni pangarundingonna i. Mangasahon Jesus Kristus dipalua si Paulus ma boruboru i sian tondi na jahat i, gabe ndang boi be ibana mangulahon pangarundingon i. Marnida i, mansai sogo ma roha ni tuanna i di si Paulus dohot si Silas, ala nunga gabe mago be pangomoanna sian niula ni boruboru i. Dung i diarahon ma angka na natorop manangkup si Paulus dohot si Silas, disarattu jolo ni angka pangarajai, dungi diboan tu jolo ni pangumum mandok: “ Na manggunturi hutantaon do angka halak on, Jahudi do nasida. Dibaritahon do adat na so jadi jaloon manang ihuthononnami, ai halak Rom do hami”.

Mambege pangaduan i, so pola dipareso tangkas, manigor didokhon angka panguhum i do nasida linsingan ni natorop i, jala didabu tu hurungan parbagason, ala dirajumi ma nasida parjahat situtu. Dijaga ma nasida di hurungan i, jala dibeanghon pat nasida, asa unang boi lintun sian hururangan i. Alai nang pe songon i ndada gabe sumurut hiras ni roha ni si Paulus dohot si Silas di hurungan i . Martangiang do nasida huhut marende dipatangitangi  angka dongannasida  na tarhurung i mamuji Debata . Di tonga borngin tompu ma masa lalo na bolon, humuntal ma hurungan i, mungkap ma saluhut pintuna, tanggal ma nang rante nasida saluhutna. Nian  jotjot do masa lalo na bolon di luat Makedonia, alai dipatongon Tuhan i ma masa lalo i ditingki na tarhurung i si Paulus dohot  si Silas, asa patar huaso ni Debata. Ndang haambatan huaso ni portibi on pardalan ni barita na uli i. Mansai mabiar ma sijaga hurungan i, dung dibereng naung talak saluhut pintu nihurungan, jala harhar angka rante ni na tarhurung i. Ala dirimpu naung lintun saluhut na tarhurung i,  disintak ma podangna naeng maningkot, ala mangihuthon uhum na masa di harajaon Romawi ujui, mansai borat do tanggung-jawab ni sijaga hurungan. Molo malua sahalak na tarhurung, ingkon diuhum do sijaga hurungan i hombar tu uhuman ni na tarhurung i. Ala ni i tumagon ma ibana didok rohana mamunu dirina sandiri, sian na ingkon mansai maila ibana hona uhum, ala lemba ibana di ulaonna.    Alai tabereng ma songon dia pambaehan ni si Paulus di hurungan na boi mambahen gabe muba roha ni si jaga hurungan i jala porsea di Tuhan Jesus.

1.        Nang pe songon i bernitna panghilalaan nasida  di  hurungan i,  na mansai holom situtu, tonga borngin i mampu do pe si Paulus dohot si Silas marende huhut martangiang mamuji Debata, jala ditangihon Debata do pamujion nasida.  Hagogoon na manongtong di angka halak kristen,  ima di haporseaon na ro do tongtong Debata mangalehon gogo dohot haluaon nang pe di bagasan hurungan ni portibi on.

2.       Di pangalaho na songon dia pe na masa tu si Paulus dohot si Silas, boi do i dipangke manghatindangkon holong ni roha ni Kristus, mangungkap pintu haluaon tu sijaga hurungan na manutup pintu hurungan i di nasida. Ndang adong roha dendam di ibana, alai mampu do pe ibana marjamita marhite holong ni  roha tu halak naung mangarante ibana.

3.       Boi do dibereng ibana hakna songon warga ni harajaon Rom. Sasintongna songon warga ni harajaon Rom  boi do si Paulus  menuntut perlindungan secara hukum, paboa kesewenangwenangan do na binahen ni panguhum ni huta Filipi i tu ibana, na mansai hatop manigor diuhum nasida so jolo ditangkasi salana. Alai tongtong do ibana sai patujolohon holong ni roha na so olo mambabaloshon na jat alo ni na jat.

Manghorhon situtu do sikap ni si Palus i tu sijaga hurungan i, ai gabe hatop do muba rohana, dungi didok ma tu si Paulus: hamu angka tuan aha bahenonku asa malua ahu? Mungkin ndang apala haluaon na sian Kristus do pe na ro tu rohana hatiha i , alai haluaonna sian uhum na ingkon jaloonna sian indukna do pe, ala ni kelalaianna mangulahon tugasna. Alai gabe diboan si Paulus ma ibana tu pangantusion di haluaon na sasintongna na sian Kristus, mandok: “Haporseai ma Tuhan Jesus asa malua ho dohot isi ni bagasmi”. Jempek do alus ni si Paulus dohot si Silas on, alai gabe barita na uli na manghorhon situtu do i di sijaga hurungan i. Boi do Tondi Porbadia i mangungkap roha ni jolma di bagasan tingki na hatop, songon perjahat na tarsilang di siamun ni Jesus i laho porsea di Tuhan Jesus. Hata ni si Paulus dohot si Silas i, ndada holan tu sijaga hurungan i manghorhon, alai dot do tu nasida na saripe. Suraon nunga ro nang pangisi ni bagas ni sijaga hurungan i marpungu hatiha i dung dibege lalo na bolon i, gabe  nunga dohot nasida mambege jamita  ni si Paulus dohot si Silas . Hatop do mangula Tondi Porbadia i, gabe porsea ma sijaga hurungan i  di Tuhan Jesus. Alai andorang so tardidi ibana hatop do ibana tarjolma, ai dibereng na marsapu mudar do pe daging i si Paulus dohot si Silas ala ni pangalinsingan ni na torop arianna i. Dungi diburi ma jolo bogas ni angka linsinglingsing, dibaluti bugang nasida i. Tardidi ma ibana dibahen si Paulus dohot si Silas. Pandidion, i ma songon sahap ni panindangionna naung porsea ibana di Jesus.  Alai ndada holan ibana tardidi , dohot do nasida na saripe . Di son ma tarida huaso ni haporseaon i. Boi do dihangkung haporseaon ni sijaga hurungan ni nang haporseaon ni nasida  na saripe. Na marlapatan ibana ma muse na martanggung jawab manogunogu pangisi ni bagasna i,  asa torus muse marhaporseaon tu Jesus. Jadi sude do angka na porsea martanggung jawab mamboan angka na dibagasan tanggung-jawabna di keluarga  asa dohot marhaporseaon tu Tuhan Jesus. Tutu anggo na maralus tu Tuhan i, ingkon ganup halak do, ndada boi mangondihon halak na asing tu Tuhan i. Alai tu ganup halak do tungguon ni Tuhan i, ganup halak na dibagasan tanggung-jawabna saleleng di ngoluna, manang na ditogutogu do asa marhaporseaon tu Tuhan i manang ndang. Tarmasuk do i natoras tu angka anakhonna. Saleleng so boi do pe anakhonna sian dirina manghatindanghon haporseaonna tu Tuhan i, natoras i do na martanggung jawab manghangkun  haporseaon ni anakhonna. I do umbahen na boi posoposo tardidi, ala na natorasna do na manghangkung haporseaon ni dakdanakna i, paima boi muse anakhonna sian dirina manghatindangkon haporseaonna tu Tuhan i.

                Sipahusorhusoron:

·         Taparhatutu do, haporseaon i, ndang na tubu sian dirinta, alai silehonlehon ni Tuhan i do i marhite hataNa na manorusi rohanta. Ala ni i sian haporseaon, aha do na boi tahilala di ngolunta on,  paboa naung dapotan haluaon hita sian Tuhanta i.

·         Songon dia lapatan ni haporseaon tu Jesus, di situasi covid 19 na tadopi di tingki on?

·         Aha do panghorhon ni haporseaon tu Jesus  di hita laho mangadopi sahit virus korona na jorbut on.

(Tauji ma jo mangalehon alus sian haporseaonta tu Tuhan i). Pdt MSM Panjaitan