RENUNGAN 1 KRONIKA 22: 14-19, PADIRI ROHA DOHOT HOSA MANGALULUI JAHOWA (MENGARAHKAN HATI DAN JIWA UNTUK MENCARI TUHAN).

 PADIRI ROHA DOHOT HOSA MANGALULUI JAHOWA (MENGARAHKAN HATI DAN JIWA UNTUK MENCARI TUHAN).

1 Kronika 22: 14-19

Horas ma di hita. Selamat ari Minggu Okuli (8 Maret 2026). Okuli lapatanna: "Sai tong do mangaranap matangku dompak Jahowa", na marojahan di Psalmen 25: 15a. Mangaranap marlapatan: mamereng, manatap tartuju dompak Jahowa. Sada panindangion do on di pos ni roha dohot panghirimon ni parpsalmen i paimahon pangurupion ni Debata laho paluahon ibana sian jorgong ni portibion. Las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion laho padirihon roha dohot hosa mangalului Jahowa. Marlapatan do i asa sai taparade sandok ngolunta laho mangalului Jahowa na gabe silehon pasupasu dohot sude na tahaporluhon di ngolunta. Jadi mangalului Jahowa, dos do i dohot manghasiholi Jahowa laho pasahathon ngolunta tu Ibana.

1. Mangharingkothon paulihon bagas ni Debata. Dung marhasonangan ràja David dibahen JAHOWA maradophon nasa musuna, marsangkap ma Ibana paulihon bagas joro ni Debata. Sangkapna i dipasahat tu Debata marhite

panurirang Natan mandok: ia ahu maringan di bagasan jabu sian hau ares, hape ia poti Debata maringan di tongatonga ni rimberimbe. Lapatanna, ibana marjabu di istana na mansai uli, hape bagas ni Debata di undungundung. Didukung panurirang Natan do sangkap ni raja David i, jala didok: "nasa na sinangkapan ni roham di bagasan patupa ma i ai Jahowa do donganmu." Alai ro do muse hata ni Jahowa tu si Natan, na so tarbahen si David paulihon bagas di Jahowa. Didok Jahowa, sian mulai dipatandahon Debata diri-Na tu halak Israel, nunga somal Ibana maringanan di bagasan undungundung. Dungi tu si David didok Jahowa: ingkon anakna na mangganti ibana ma muse paulihon bagas ni Debata. ( 2 Sam. 7: 1 du). Jala sian angka anak ni raja David i na dipersiaphon laho mangganti ibana, i ma si Salomo tubu ni si Bàtseba hombar tu bagabaga Debata tu si Dàvid. Ndang boha roha ni si David di nà so ditolopi Debata ibana paulihon bagas ni Debata, jala anakna si Salomo ma muse diparbaga Debata laho paulihon bàgas di Ibana (1 Raja 1: . Las do roha ni si David disi, ai mangihuthon ibana, na porlu saut bagas i dipauli. Nunga diharingkothon ibana paulihon bagas ni Debata, alai ndang ditolopi Debata si David na paulihon bagas di Ibana. Boasa so ditolopi Debata si David pauli bagas di Ibana, di dok di 1 Kronika 22: 8, ndang talup ibana pauli bagas ni Debata àla nunga mansai godang mudar didurushon si David, jala dihasuhuthon hamusuon angka na bolon, na mambahen godang mudar durus tu tano. Alai nang pe songon i diharingkothon ibana do ingkon saut hona pauli bagas ni Debata nang pe so ibana na paulihon. Ala diboto ibana bajar do pe anakna si Salomo nà naeng mangganti ibana, dipàrade ibana do angka haporluan laho paulihon bagas joro ni Debata, songon na didok di turpukta sadarion. Jala ingkon balga situtu do bagas joro ni Jahowa i bahenonna asa timbul goar dohot hamuliaon ni Jahowa, ala ni mansai godang situtu diparade ibana haporluan tusi.

2. Nang jadi sundat paradehon haporluan paulihon bagas ni Debata nang pe di bagasan hasusaan. Di hata sosososo ni si David laho manjujui si Salomo anakna i na gabe gantina gabe raja di Israel, didok ibana: Nang pe di bagasan hasusaan ahu na sai laon nunga huparade hian bahen haporluan paulihon bagas joro ni Jahowa ima: saratus ribu talenta sere, sajuta talenta perak. Ianggo tombaga dohot bosi ndang dapot timbangon dibahen godangna. Songon i dohot parhau dohot batu na porlu tusi nunga tong diparade si David. Songon i dohot tukang hau dohot tukang batu ro di saluhut halak na pande di sadasada ulaon nunga diparade si David. Jadi nunga hira rade sude haporluan laho paulihon bagas joro i. Na mangulahon na ma si Salomo, ala ndang diloas Debata ibana mangulahon. Ala ni do didok si David tu si Salomo: "Tole hehe ma ho, jala ulahon, sai donganan ni Jahowa do ho". Lapatanna, di na laho paulihon bagas ni Debata ndang jadi pangasahononna gogo, huaso dohot hamaloonna. Ingkon tongtong do mangasahon pandonganion ni Tuhan i. Domu tuson, ala bagas ni Jahowa do na naeng paulion nasida, naung mandongani bangso i manginganhon tano na nanilehon-Na bahen inganan nasida di bagasan hadameon dohot hasonangan, ingkon porlu bangso i, lumobi angka induk laho manolongi si Salomo. Jadi porlu adong roha na masiurupan. Nang di tingkion pe di na laho paulihob bagas ni Debata, na gabe inganan pajumpang dohot Debata, inganan laho marsomba tu Debata, marsaor tu Debata rap dohot dongan sahaporseaon, porlu do na masiurupan manang masitolongan. Ndang tarbahen sahalak dua halak paulihon bagas ni Debata. Marhite i do boi saluhut rap mangargahon dohot manjagahon bagas ni Debata i. Adong do di sadasada inganan holan sahalak sian luat na asing na pulihon bagas gareja di inganan i, ala paradongan ibana, jala godang hepengna. Alai gabe hurang do pangargahonon ni ruas ni huria di bagas ni Debata i, ala ndang manghilala nasida na dohot paulihon gareja i. Ala ni i, dengganna ingkon sude do ruas ni huria masiurupan laho paulihon bagas ni Debata, hombar tu kemampuan na adong di ibana be.

3. Padirihon roha dohot hosa mangalului Jahowa. Molo didok mangalului Jahowa sian nasa roha dohot hosa na marlapatan do i manghasiholi Jahowa sian nasa ngolu, asa Ibana na mangarajai ngolunta. Mangolu hita di bagasan harajaon ni Debata, na mangaradoti uhum hasintongan dohot hatigoran ni Debata. Marhite na songon i do dapotan pasupasu hita sian Tuhan i. Didok Tuhan Jesus di pangajarionna tu angka sisean-Na: "Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! (Mat. 6: 33). Jadi mangalului Jahowa dos do i dohot mangalului harajaon ni Debata. Alai torop do halak na pasuharhon on, i ma jumolo mangalulu i angka ondeng na di portibion, i pe asa mangalului harajaon ni Debata, i pe asa diharingkothon ro ru gareja, patuduhon dirina tu angka donganna. Alai Tuhanta mangidohon ingkon jumolo do hita mangalului harajaon ni Debata, i ma marhite na martangiang, marhite na marsomba tu Tuhan i di bagas-Na, marhite na mamuji pasangap goar-Na, marhite na mangihuthon dalan ni Tuhan i, dungi tambahinon-Na ma angka ondeng, manang angka na tahaporluhon di ngolunta. Dipasupasu Debata ma angka ulaonta manjadi, na gabe hangoluanta.***

_________________________________

Evangelium: 1 Kronika 22:14-19

14 Jala ida ma, di bagasan hasusaan pe ahu na sai laon, nunga huparade hian di joro ni Jahowa saratus ribu talenta sere, jala sajuta talenta perak; ianggo tombaga dohot bosi ndang dapot timbangon dibahen hinagodangna; tole angka parhau dohot batu nunga huparade, ingkon tambaonmu dope tusi.

15 Angkup ni mansai torop angka tungkang di ho, angka pandakdak batu, angka tungkang batu dohot tungkang hau dohot torop halak na pande di ulaon marragamragam.

16 Taringot tu sere, perak, tombaga dohot bosi ndang habilangan godangna. Tole, hehe ma ho jala ulahon, sai donganan ni Jahowa do ho."

Diapoi Angka Induk Manolongi

Ibana

17 Dung i didokkon si David ma saluhut induk ni Israel, asa ditolongi nasida si Salomo anakna i, ninna ma:

18 "Nda Jahowa, Debatamuna mandongani hamu, jala mardame hamu humaliang dibahen? Ai nunga pola dipasahat Ibana angka isi ni tano i tu bagasan tanganhu, jala nunga patu tano i di adopan ni Jahowa dohot di adopan ni bangsoNa.

19 Antong padiri hamu ma rohamuna dohot hosamuna mangalului Jahowa, Debatamuna i! Jala hehe ma hamu laho paulihon inganan na badia di Jahowa, Debatamuna i, asa masuk binoan poti parpadanan ni Jahowa, dohot ulaula ni Debata, angka na badia i tu bagasan joro sipaulion di Goar ni Jahowa."

________________________

Epistel: Heber 10:19-25

Siparangehonon do

PanghophopNa i

19 Antong, ale angka dongan, adong do di hita hiras ni roha, laho bongot tu bagasan na badia i, di bagasan mudar ni Jesus;

20 ai dibungka do di hita dalan na imbaru jala na mangolu, sian rimberimbe i, i ma dagingNa i;

21 jala adong do di hita Malim na Bolon, sigomgom bagas ni Debata.

22 Dibahen i, tadapothon ma, marroha na sintong, di bagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi dagingta dohot aek na ias!

23 Momos ma tatiop pangkirimon na taparhatopot i, ai haposan do na marbagabagahonsa!

24 Masiantoan ma hita, masipajujuan tu haholongon dohot tu angka ulaon na denggan!

25 Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i.