MANGONTANG PANJAITAN

Minggu, 19 Oktober 2025

NUNGA TANGKAS HUIDA BOHI NI DEBATA (AKU TELAH MELIHAT ALLAH)

1 Musa 32: 22-32

Horas ma di hita. Selamat Ari Minggu XVIII dung Trinitatis ( 19 Oktober 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion, i ma na dienet sian buku 1 Musa 32: 22-32, dibereng anka na porsea i do bohi ni Debata molo dijugulhon mangarangguthon Debata di bagasan tangiang. Jala sai na pasupaauon ni Debata do ganup halak na pasahathon sandok ngoluna tu Ibana, asa malua sian biar bi roha.

1. Digohi biar ala ni dosa na sailaon.

Dung adong dua pulu taon si Jakob di jolo ni tulangna si Laban di huta Padang-Aram disuru Debata ma ibana mulak tu huta hatubuanna di Tano Kanaan. Nunga dilean tulangna i boruna dua, i ma si Lea dohot si Rahel bahen dongan saripena. Dipasupasu Debata do di ibana sampulu dua anak dohot sada boru. Mamora do ibana disi, torop angka hambing, birubiru, lombu, unto dohot halodena, sian na niomona marmahan angka pinahan ni simatuana i. Dung songon i hamoraon ni si Jakob mangiburu ma angka anak ni si Laban na asing marnida ibana, songon i nang si Laban pe gabe lam hurang ma dengganna pardomuan nasida. Di situasi na songon i ma disuru Debata si Jakob manadinghon tulangna i mulak mandapothon tano hagodanganna. Didok Debata tu ibana: "Mulak ma ho tu tano ni angka ompum, tu tano hagodanganmu, Hudongani pe ho" ( 31: 3). Gabe mulak ma si Jakib rap dohot sude na adong di ibana.

Alai sai digohi biar do pe si Jakob marnida hahana si Esau, na ni angkalanna na jolo laho mandapot pasupasu sian amana. Mabiar situtu do ibana so tung dibunu hahana i ibana dohot sude dongan saripena nang angka anakhonna i. Diuji ibana do mardenggan dohot si Esau i marhite na marsuru angka na posona pabotohon harorona, dohot mamboan sileanlean tu hahana songon tanda ni pardengganan sian angka sinamot na adong di ibana. Alai di na ro naposona i mamboan alus ni hahana i, tamba ma biar ni roha ni Jakob, ai didok si Esau na ro ma ibana mandapothon si Jakob rap dohot opat ratus halak donganna. Dung songon i barita na jinalona tamba ma biar ni rohana. Alai di biar ni rohana i, martangiang ma ibana tu Jahowa mangido asi ni roha-Na asa didongani ibana, jala dipalua sian tangan ni hahana si Esau. ( ay.9-12). Di na naeng manaripari batang aek Jabok, dipataripar ibana ma sude dongan saripena, angka anakhonna, sude angka donganna ro di naposona, nang sude angka sinamotna i. Tading ma sasadasa ibana di bariba ni batang aek i borngina i.

2. Marsiranggut laho mandapot pasupasu ni Debata. Nang pe naung martangiang si Jakob, mangido asa dipalua Debata ibana nian sian rimas ni si Esau, tongtong dope digohi biar ibana. Di bagasan na ginohan ni biar i, ro ma sahalak baoa na dimulana ndang diboto ibana manang na ise i, marsiranggut dohot ibana sahat ro di na buha siang ari. Ndang olo si Jakob paluahon baoa i. Dung diida "alona" i ndang leak tarpatunduksa si Jakob, disoro ma soitna gabe ngendul ma soit ni si Jakob dibahen parsirangguton i. Dung i ninna "alona" i ma: "Palua ma Ahu ai nunga buha siang ari". Gabe ninna si Jakob ma, ndang hupalua Ho, nda jolo dipasu Ho ahu". Sian alus ni si Jakob on, nunga sadar si Jakob, ia donganna mardiranggut i, ndada jolma na somal, alai Debata do marhite suruan-Na. Alai andorang so dipasahat pasupasu i, disungkun surusuruan i ma goar ni si Jakob. Dung dipaboa si Jakob ise goarna, gabe didok surusuruan i ma: "ndang be si Jakob goarmu, alai si Israel na ma, ai dialo ho Debata dohot jolma jala monang do ho". Laho mangeahi ngolu na imbaru, pargantian ni goar i mansai ringkot, ai goar na leleng, i ma Jakob marlapatan do i panipu, parangkal. Tarida do i nang sian pangalahona, maradophon hahana si Esau nang maradophon tulangna. Diangkalangkali ibana do hahana si Esau, laho mandapot pasupasu sian amana. Laos songon i diangkali ibanana do tulangna naung gabe simatuana laho mandapot godang sinamot sian tulangna i. Alai songon jolma na ni persiaphon

Debata ibana gabe anak bagabaha parhitean ni pasupasu dohot haluaon tu sandok bangso ingkon dipauba do goarna gabe si Israel, ai marsiranggut ibana dohot Debata jala monang ibana. Israel ( ibrani: yisra-El) lapatanna halak na berjuang dohot Debata jala monang. Songon i do hita dipangido di ngolunta on. Molo taadopi ragam ni persoalan dohot hamaolon di ngolunta na jotjot mambahen lomos jala mabiar hita, ingkon rade do hita marsiranggut dohot Debata. Unang tapalua Debata, tongtong hita marsihohot di tangiang asa dipasupasu jala diurupi hita. Alai di saluhutna i ingkon rade paubaon rohanta, paubahon pangalahonta, asa boi hita pangkeon ni Debata gabe parangan-Na laho manaluhon ragam ni hajahaton dohot angka panipuon dohot pangangkalakalion di ngolunta dohot di portibion.

3 Mangasahon Tuhan i ma hita di ngolunta. Turpukta on

manungguli hita asa holan mangasahon Tuhan i hita di ngolunta on. Tutu torop do halak na mangasahon artana, mangasahon sinamot, gogo dohot hapistaranna. Marhite artana dianggap boi lobi tarjamin ngoluna. Marhite hapistaran dietong boi umpos rohana laho mandalani ngoluna, ala dietong marhite hapistaranna i sude persoalan ni ngoluna boi atasanna. Alai sadia

godang ma halak na mangasahon Tuhan i di ngoluna?

Aha na nialaman ni siJakob bornginna di topi ni aek Jabok laho mangadopi persoalanna dohot hahana si Esau boi gabe parsiajarann di hita. Di si ma Debata marhite parsirangguton manipat saborngin paubahon roha ni siJakob na so boi mangasahon sinamot na godang di ibana laho mangatasi persoalan dohot hahana i. Sampe tu na ngendul soit ni si Jako ala ndang mangaloas Debata lao manadinghon ibana andorang so mamasumasu ibana. Sian mulai i ma dipauba Debata parrohaon ni si Jakob marhite na paubahon goarna gabe Israel, ala numga marsiramggut ibana dohot Debata jala monang. Marhite parsirangguton i tarida songon dia parsitutuon ni si Jakob laho mandapot pasupasu ni Debata.

Digoari si Jakob ma inganan parsirangguton i Peniel, ala di si ma ibana mamereng bohi ni Debata, jala mangurupi ibana. Sian mulai dapotan pasupasu ni Debata ibana disi, marhamubaon si ma Jakob. Mulai ma ibana sai marsigantung tu Debata, ndang sai mangasahon pingkiran dohot hagogoonna be.

Ditompa Debata do hita tudos tu rupa ni Debata ( imago Dei). Marhite i ma hita gabe jadiajadian ni Debata na marpingkiran. Alai hatauonta marpingkir i jotjot mambahen hita jolma mangasahon pingkiranta sandiri. Didok rohanta boi hita mangatasi sude persoalan ni ngolunta so pola mangasahon Tuhan i. Ala ni i gabe di nomor duahon ma Tuhan i.

Hape songon dia pe hita, pingkiran ni hita jolma adong do batasna. I do umbahen jotjot hita sala langka molo mangasahon pingkiranta i do hita. Na masa tu si Jakob di sunge Jabok paingothon hita, na ingkon tongtong do hita di ngolunta marsigantung tuTuhan i. Ndang tarpangasahon hita gogo dohot pingkiran, ai tarbatas do i. Tuhan i do nampuna huaso di ngolunta. Ala ni tapangido ma tongtong gogo dohot pangajarion sian Tuhan i, asa ditogutogu hita mambahen na denggan diadopanna, unang mangasahon gogo dohot pingkiranta sandiri. ***

________________________________

Evangelium: 1 Musa 32:22-32

22 Dung i hehe ma ibana bornginna i, dipangarahon ma jolmana na dua i dohot naposona boruboru na dua i dohot anakna na sampulu sada i, laho manaripari hatariparan Jabok.

23 Jadi ditogihon ma nasida patariparhon di batang aek i, dipataripar ma nasa na di ibana i.

24 Tading ma holan si Jakob, jadi ro ma sada halak marsiranggut dohot ibana ro di buha siang ari.

25 Alai dung diida, ndang leak tunduksa si Jakkob, disoro ma soitna, jadi ngendul ma soit ni si Jakkob i dibahen parsiranggutonnasidai.

26 Dung i ninna Ibana ma: "Palua ma Ahu, ai nunga buha siang ari." Alai ninna si Jakob ma: "Ndang hupalua Ho, nda jolo dipasupasu Ho ahu."

27 Dung i ninna Baoa i mandok Ibana: "Ise do goarmu?" "Si Jakob do," ninna.

28 Jadi ninna Baoa i ma: "Ndang be si Jakob dohonon goarmu, si Israel na ma, ai dialo ho do Debata dohot jolma, jala monang do ho."

29 Dung i manungkun ma si Jakob, jala ninna: "Ua paboa ma goarMu?" Alai ninna Ibana ma: "Boasa ma tung sungkunsungkunanmu goarHu?" Dung i dipasupasu ibana disi.

30 Jadi dibahen si Jakob ma goar ni parsiranggutan i Peniel; ai nunga tangkas huida apala Bohi ni Debata, jala malua tondingki.

31 Dung i di na sinalpuanna i Peniel i, binsar ma mata ni ari di ibana, hape mengkatengkat ibana dibahen soitna.

32 Ala ni do umbahen so dipangan halak Israel urat doldol rasirasa nuaeng, ala disoro pardomuan ni soit ni si Jakkob i.

____________________

Epistel: Lukas 18:1-8

1 Dung i dihatahon ma tu nasida umpama sada, paboa ingkon tongtong nasida martangiang, na so tupa lemba.

2 On do hatana: "Adong ma di na sahuta panguhum sada; ndang dihabiari Debata jala ndang dipardulihon jolma.

3 Alai adong ma di huta i parompuan na mabalu, na ro manopot ibana mandok: Pintori ahu maralohon alongki!

4 Jadi leleng ndang ringkot rohana. Alai ninna ma muse di bagasan rohana: Tutu do, ndang huhabiari Debata jala ndang parduli ahu di jolma.

5 Alai hupintori nama na mabalu on, ala dinengnengi ahu, atik beha ro ibana maon muse manggariangi ahu."

6 Dung i didok Tuhan i ma: "Tangihon hamu ma pandok ni panguhum na geduk i!

7 Ia Debata, tung so pintoranna ma angka na pinillitna, angka na manjou Ibana arian dohot borngin? Tung pangerngeronna ma di nasida?

8 Hudok ma di hamu: Magira ma pintoranna nasida! Alai tagamon jumpang Anak ni jolma i ma haporseaon di tano on di harorona i?"

Sinta Uli Panjaitan

Amen.

1hari
Balas

Mangontang Panjaitan

dpronoSetsg02kal91oe6tha4i r 712 9g28kua0t841l1532b311c.Opu0

Dibagikan kepada Teman Anda

MANJAMITAHON BARITA NA ULI SIAN NASA ROHA (MEMBERITAKAN INJIL DENGAN SEGENAP HATI)

Rom 1: 8-15

Horas ma di hita. Selamat Ari Minggu XVII dung Trinitatis (12 Oktober 2025). Las ma rohanta marsomba tu Tuhanta mamuji pasangaphon goar-Na, huhut tumamgihon hata-Na sihangoluhononta. Disoarahon hata ni Debata do tu hita sadarion, na dienet sian Surat Rom 1:8-15, asa manjamitahon barita na uli i sian nasa roha.

1. Sude d…

Lihat selengkapnya

Jumat, 17 Oktober 2025

RENUNGAN ROMA 1: 8-15, MANJAMITAHON BARITA NA ULI SIAN NASA ROHA (MEMBERITAKAN INJIL DENGAN SEGENAP HATI)

MANJAMITAHON BARITA NA ULI SIAN NASA ROHA (MEMBERITAKAN INJIL DENGAN SEGENAP HATI)

Rom 1: 8-15

1. Sude do halak Kristen tarjou manjamitahon barita na uli i. Ulaon manjamitahon barita na uli i tanggung jawab ni sude angka na porsea di Tuhanta i do i. Ndada holan ulaon ni partohonan manang parhalado i, isara ni pandita, guru, bibelvrow, diakones, evangelis, sintua, alai tanggung jawab ni sude angka na porsea di Tuhanta i do i hombar tu latar-belakang dohot silehonlehon na jinalona be sian Tuhanta i. Ai manjamitahon barita na uli i, ndada ingkon marhite na borhat isara ni tu angka luat na asing na so sahat do pe barita na uli i, alai boi do marhite panghataion, parsaoran, parulaon, dohot pangalaho di parngoluon siganup ari. Boi do i nang taulahon marhite na dohot manangianghon, dohot manumpahi ulaon na pinatupa ni huria dohot angka parbarita na uli na khusus dijou jala di padiri Tuhanta laho manjamitahon barita na uli i i. Molo marhasil pe ulaon ni angka parbarita na uli na parjolo i, dohot angka parbarita na uli na ro tu bangsonta, ndada holan ala ni gogo dohot hatauon nasida non i, alai dohot do ala ni dukungan ni angka na porsea marhite tangiang dohot panumpahion. Ia ulaon i, memang ndada ulaon ni jolma sambing ulaon i, alai ulaon ni Debata do i na mamangke angka na porsea dohot angka na tarjou secara khusus tu ulaon i pinargogoan ni Tondi Parbadia. Ala ni manjamitahon barita na uli memang ndada pola ingkon marhite podium parjamitaan, alai dohot do marhite ngolu siganup ari. Angka parjamita ni barita na uli i pe ndada holan marhite podium parjamitaan ibana marjamita, alai i ingkon sude do ngoluna siganup ari gabe jamita. Lapatanna ingkon dihangoluhon jamitana i, jalangoluna i gabe jamita. Manang beha pe malo ni halak marjamita sian podium parjamitaan, ndang margogo i anggo ndang dihangoluhon parjamita i na jinamitahonna. Ala ni manjamitahon barita na uli sian nasa roha boi do i marlapatan manjamitahon barita na uli sian sandok ngolunta.

2. Si Paulus tiruan di na manjamitahon barita na uli sian nasa roha. Ndang masuk si Paulus tu horong ni sisean ni Jesus na diajari secara langsung laho manguduti ulaon-Na di portibion. Halak Jahudi na masuk tu horong Parise do ibana, na dohot manghasogohon Jesus. Alai halak na timbo do parsingkolaanna marhite sahalak guru bolon ni hajahudion hatiha i di Jerusalem i ma si Gamaliel. Tangkas do diguruhon ibana pangajarion hajahudion dohot isi ni buku hajahudion na tapangke nuaeng di hakristenon i ma Padan Na Robi i. Songon halak naung timbo singkola manang pendidikanna, ndang tagamon so dipaihutihut ibana na niula dohot sude pangajarion ni Jesus,

atik pe masuk tu horong sihasogohon Jesus do ibana hatiha di ngolu-Na di portibi on. Dung mate peJesus dohot do ibana silelei angka sisean dohot siihuthon Kristus i. Alai marhite huaso ni Tondi Parbadia, laos ibana do muse dijou jala dipadiri Jesus gabe sada apostel-Na, na sinuru-Na khusus manjamitahon barita na uli taringot tu ulaon dohot pangajarion ni Jesus khusus tu angka bangso sipelebegu (na so Jahudi). Tunduk do ibana tu panjouon i, jala diulahon ibana do i sian nasa rohana. Sandok ngoluna nunga dipelehon ibana laho manjamitahon barita na uli i, ndada holan di luat Asia, alai taripar do luat Eropa, khususna daerah Makedonia. Marhite ulaonna manjamitahon barita na uli i, tubu ma torop angka huria, songon na dapot jahaonta di Buku Padan Na imbaru, isara ni huria Galatia, Filipi, Tessalonik, Korintus, Epesus, Berea ro di Antiokhia Siria. Angkup ni dipersiaphon ibana do siseanna, na boi mangurupi ibana mangula ulaon i dohot manguduti ulaonna i, isara ni si Barnabas, si Timoteus dohot si Titus. Tu angka huria na tubu songon parbue ni barita na uli na jinamitahonna ditongos ibana do susat panogunoguon dohot pabagashon haporseaon tu nasida, jala laos panogunoguon di hita di hporseaon dohot pangihuthononta di Jesus di nglunta di tingkion, ai angka suratna i torop do di pamasuk gabe buku kanonik di Padan Na imbaru. Angka Surat na dapot di buku Padan na Imbaru gumodang do na marharoroan sian si Paulus. Molo huria Roma, na gabe hasahatan ni Surat na tinongos ni apostel Paulus tu Huria Roma songon na dapot di turpukta sadarion, memang ndada parbue ni barita na uli na jinamitahon ni si Paulus. Alai tangkas do diboto ibana do barita ni huria i, dohot haporseaon ni halak Kristen na disi na mangonjar ibana mandok mauliate ru Tuhan i, jala masihol boi sanga ibana mangebati huria i songon na dipatuduhon di turpukta on. Jala angkup ni masihol do ibana manjamitahon barita na uli i do pe tu halak na disi, lomobi tu halak Rom, ai didok ibana na marutang do ibana di halak Gorik nang halak na leban, di halak parhapistaran na terpelajar nang na hurang roha na so terpelajar.

3. Mansai ringkot do masiebatan jala masitangiangan huria i. Nang pe so si Paulus na pajongjonghon huria Rom alai masihol do ibana mangebati huris i. I ma patuduhon sisada hasadaon do huria i, jala ringkot masiebatan jala masitangiangan. Marhite na masiebatan jala masitangiangan boi lam margogo huria i laho manjamitahon barita na uli di tongatongana nang tu na humaliangsa. Si Paulus masihol mangenati huria i, ala manghilala tarjou do ibana managihon pasupasu partondion na adong di ibana jala ibana pe boi lam tamba hiras ni rohana mamereng haporseaon ni halak Kristen na niidana di huria. Didok ibana, sihol ni rohana i ndang boi do pe dipasaut hatiha i ala tarsabat do pe ibana. Lapatanna godang na mangambati dangkapna i. Alai mangihuthon tradisi, saut do ibana mangebati huta dohot huria Roma jala mate di gantung do ibana disi di tingki ni Kesar Nero. ***

__________________________

Evangelium: Rom 1:8-15

8 Mandok mauliate ahu jumolo tu Debatangku marhitehite Jesus Kristus siala sude hamu, ala tu liat portibi on do tarbarita haporseaonmuna.

9 Ndang mansadi ahu marningot hamu. Ia sitindangingku Debata do, na huoloi di bagasan tondingku, di na hubaritahon Anakna i.

10 Tongtong do hupangido di angka tangiangku, anggiat tung manang andigan pe lomo ni roha ni Debata patiurhon dalanku manopot hamu.

11 Ai masihol do ahu marnida hamu, anggiat tung tarlehon ahu tu hamu deba silehonlehon partondion, patoguhon rohamuna.

12 On do tahe: Naeng dapotan hiras ni roha nang ahu sian hamu hinorhon ni haporseaonta be.

13 Alai naeng ma botoonmuna, angka dongan, naung jotjot ditahi rohangku manopot hamu, asa marparbue ahu nang di hamu songon na di angka bangso na leban i; alai tarsabat do ahu rasirasa nuaeng.

14 Na marutang do ahu di halak Gorik nang di bangso na leban, di angka parhapistaran nang di angka na hurang roha.

15 Dibahen i husangkap sian nasa rohangku manjamitahon barita na uli i nang di hamu di huta Rom.

_______________________

Epistel: Daniel 3:13-18

13 Dung i piripirion jala muruk situtu ma si Nebukadnesar mandokhon ingkon boanon si Sadrak, si Mesak dohot si Abednego tu jolona. Jadi tarboan ma na tolu halak i tu jolo ni raja i.

14 Dung i ninna si Nebukadnesar ma mandok nasida: Atehe, tongon do, ale Sadrak, Mesak dohot Abednego, ndang olo hamu mamele tu debatangku, jala ndang olo hamu marsomba tu ganaganaan sere naung hupajongjong i?

15 On pe molo olo hamu nuaeng, disi dibege hamu suara ni sarune, tulila, hasapi, arbab, sordam, gondang dohot sandok ragamragam ni parhinaloan, marsinggang jala marsomba tu ganaganaan naung hupauli i. Alai molo so olo hamu marsomba, ingkon tongkinna i hamu timpalhononhon tu liang pamurunan na marnalanala!

Dung i idaon ma manang debata dia na tuk paluahon hamu sian tanganhu!

16 Jadi ro ma alus ni si Sadrak, si Mesak dohot si Abednego mandok tu rajai: Ale Nebukadnesar, ndang pola alusannami ho, anggo taringot tu na nidokmi.

17 Molo lomo roha ni Debatanami, na huoloi hami, sai paluaonNa do hami sian liang pamurunan na marnalanala i dohot sian tanganmu, ale rajanami.

18 Alai nang so lomo rohaNa, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere, naung pinajongjongmi.

Sabtu, 04 Oktober 2025

RENUNGAN HABAKUK 1: 12-17, NA SUN BADIA DO DEBATA JALA PARBINOTO DI SALUHUTNA (TUHAN ALLAH MAHA KUDUS DAN MAHA TAHU).

NA SUN BADIA DO DEBATA JALA PARBINOTO DI SALUHUTNA (TUHAN ALLAH MAHA KUDUS DAN MAHA TAHU).

Habakuk 1: 12-17

Horas ma di hita. Selamat Ari Minggu XVI dung Trinitatis ( 5 Oktober 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Panurirang Habakuk 1: 12- 17, na sun badia do Debata jala parbinoto di saluhut. Ala ni disosohon do tu hita:

1. Ingkon taihuthon do dalan ni Tuhan i nang sipata maralo tu rohanta. Habakuk i ma sahalak panurirang na mangula di tingki parpudi ni harajaon Juda. On ma partingkian na mansai jorbut, ai ndang adong be hatigoran dohot pangalaho na denggan di tongatonga ni bangso i. Holan angka hageduhon, hajahaton, pandoboon, pangarupaon, parsalisian dohot angka na so uhum na ma na masa di tongatonga ni bangso i. Jala berengon nunga hira na dipasombu Debata na masa i.

Alai di bagasan situasi na songon i tubu ma sungkunsungkun di roha ni panurirang i. Sampe didok ibana: "Sadia leleng on, ale Jahowa, joujou ahu, matua so ditangihon Ho? Sai hualualuhon tu Ho hadoboon, matua so manumpak ho?

Boasa tung pataridahononmu tu ahu hageduhon, jala marsombusombu ho paidaida hangaluton? Pangarupaon dohot hadoboon di jolongku; masa parsalisian, jala tubu parbadaan." (1:2-3). Alai didok Jahowa, ala ni ido umbahen dipahehe halak Kasdim, sada bangso na garang jala na hijang, na maotaot dompak desa na opat i ditano on laho manoluk inganan angka na so ibana hian nampunasa. Lapatan na diloas Debata halak Kasdim ( Babel), laho manoluk harajaon Juda songon pangajarion ni Debata tu bangso i. Dipangke Debata bangso parbegu na so mananda Debata Jahowa, bangso na jahat gabe ulaula-Na laho mangalinsing bangso Juda naung manimbil dalanna sian dalan na sintong songon na niaturhon ni Debata. Tujuan ni Debata disi anggiat sadar nasida di naung manimbil sian dalan ni Jahowa, jala anggiat adong hamubaon ni roha di nasida. Jadi panogunoguon dohot pangajarion do i sian Debata tu nasida. Mungkin na dihirim bangso Juda sian Debata, lehonon ni Debata ma pangurupion tu nasida laho mangalo dohot manaluhon halak Kasdim i. Alai sabalikna do na masa, diloas Debata do halak Kasdim i manoluk harajaon Juda i. Tontu na maralo do i tu roha ni bangso i, nang tu roha ni panurirang Habakuk pe.

2. Tongtong porsea hita, Debata na sun

badia do Debata Jahowa. Panindangion ni panurirang Habakuk, Jahowa do Debata na sun badia. Lapatanna, Ibana Debata na songkal, na polin, Debata na ias, na magigi mida dosa dohot hajahaton, dao sian na hodar dohot angka na ramun. Ala ni habadiaon-Na i, ndang hea ditolopi Ibana angka dosa, ulaon hajahaton, hageduhon ro di angka na so uhum. Ala na badia do Ibana, dipajongjong Ibana do bangsona gabe bangso na badia, ai manang ise na mangolu di bagasan Ibana, manang saor dohot Ibana, gabe halak na badia do i pinarbadiaan ni Debata. Ido na hinirim ni Debata sian bangso Israel manang sian bangso Juda muse. Dihirim Debata do nasida gabe bangso na badia, na boi ulaula ni Debata mamorangi nasa halumlamon, hajahaton ro di ragam ni hageduhon dohot na so uhum di portibi on. Alai ndang diulahon bangso i songon i, gariada suharsuharna i do na diulahon, ai gabe madabu do nasida tu hajahaton dohot halumlamon ni portibion alani dosa. Ala ni i do ingkon diuhum Debata nasida marhite na mangaloas bangso na asing, i ma halak Kasdim (Babel) laho manoluk tano nasida. Dipangke Debata halak Kasdim, i ma sada bangso na garang situtu, bangso na hijang, na so adong be holong ni roha tu dongan jolma. Nunga dianggap nasida saluhut jolma i songon dengke dilaut dohot angka gulokgulok, na ripe manangkupi dohot hail manang jala, dungi dionjat tu bagasan hadanghadanganna. Nasida ma bangso na mangasahon gogona, marhite torop ni angka soridaduna. Ala ni do tong sungkunsungkun roha ni si Habakuk boasa dipangke Debata bangso na songon i laho manguhum bangso-Na, i ma bangso Juda. Alai nang pe songon i tongtong do porsea si Habakuk, Debata na hot do Jahowa ro di saleleng ni lelengna na tongtong mambahen angka na denggan. Lapatanna tongtong do na denggan na binahen ni Debata, ndang dung hea mambahen na roa manang na jahat. I do nang sitiruonta sian si Habakuk, sungkunsungkun ni rohana i tongtong dipasahst tu Debata, asa dilehon Debata alus-Na, songon dia do lapatan ni angka na binahen-a i.

3. Parbinoto di saluhutna do Debata. Ingkon tongtong do nang haporseaanta, parbinoto di saluhutna do Debata. Diboto do sude na masa di portibion, diboto do nang na taula dohot na tubu di bagasan rohanta. Ia na denggan taula manang na jahat diboto Debata do i nang pe taula i di na buni didok rohanta. Ala ni ndang boi hita martabuni maradophon Debata. Ala ni i do sude hajahaton na niula ni bangso i diboto Debata do, nang pe diuji nasida manabunihon angka hajahatonna i marhite pameleon tu Debata. Jadi songon i nang hita ndang boi tabunihononta angka hajahaton na taula siganup ari marhite na ringgas marminggu manang pasahat angka pelean tu huria i. Jadi angka na taula siganup ari, nang angka na tasangkapi di bagasan rohanta diboto Debata do i. Songon i do nang angka na masa di portibion, di tongatonga ni angka bangso diboto Debata do i saluhutna. Ala i Debata do na mangatur pardalan ni sejarah ni portibion. Mungkin marlas ni roha do jolma di tingki pahabishon dohot patundukhon halak na asing songon na binaen ni bangso Kasdim tu angka bangso na asing ala dianggap nasida nunga marhasil nasida. Alai dipaingothon panurirang Habakuk, Debata do na mangatur jala na marhuaso di saluhutna, na boi mamangke na masa i di portibion hombar tu sangkap-Na. Alai dipaingothon Debata do songon alus-Na tu sungkunsungkun ni si Habakuk, sude bangso do manang songon dia pe huaso dohot gogona di tanoon, ingkon maralus do di jolo ni paruhuman ni Debata. Ndang adong na lias sian paruhuman ni Debata.***

_____________________________

Evangelium: Habakuk 1:12-17

12 Nda Ho do ale Jahowa Debatangku sian na robi dope na sun badia di ahu? Ndang tagamon mate hami loasonMu. Ale Jahowa bahen uhum do ibana, umbahen dipatindang Ho jala bahen panjoraan do ibana, umbahen ojak ibana dibahen Ho, ale dolok batu.

13 Pita situtu do matam umbahen so tarpaidaida Ho na roa, jala ndang tarbahen Ho marsombusombu mida pangarupaon; boasa ma tung paidaonMu pamupusi? Tung siap Ho, molo dibondut halak parjahat na tumigor sian ibana.

14 Jala tudoshon angka dengke laut jolma i dibahen Ho, tudoshon gulokgulok tahe na so marraja.

15 Tung saluhut do disintak nasida tu ginjang marhitehite hail, jala dipapungu di bagasan jalana, jala dionjat tu bagasan hadangkadanganna. Alani marlas ni roha ibana, jala marolopolop.

16 Dibahen i umbahen mamele ibana tu jalana, jala manutung daupa tu hadangkadanganna, ai binahen ni do napu partalianna, jala talmis sipanganonna.

17 Alai dung songon i, tung parumaronna ma jalana, jala datdatanna mambunu i angka bangso parbegu, so marpansadian?

__________________________

Epistel: 1 Timoteus 6:11-16

11 Alai anggo ho halak ni Debata, maporus ma sian i; pareahi ma hatigoran, hadaulaton, haporseaon, holong ni roha, habengeton dohot lambok ni roha!

12 Haburjuhon ma paraloan haporseaon na denggan i; tangkup ma hangoluan salelenglelengna, ai tusi do ho dijou, jala diparhatopot ho do panindangion na denggan di jolo ni torop sitindangi.

13 Hupatik ma ho di jolo ni Debata, na pangoluhon saluhut, dohot di jolo ni Kristus Jesus, na mangkatindanghon na denggan di jolo ni Pontius Latus:

14 Radoti ma patik i, so marlindang, so hasurahan, paima tarida Tuhanta Jesus Kristus i.

15 Ai di hajujumpang ni tingkina patar ma Ibana, bahenon ni na Martua i, Pargogo sasadasa, Raja ni angka raja, Tuhan ni angka tuan.

16 Sasadasa do na so olo mate, Siingani hatiuron na so tartopot, na so dung diida jolma Ibana, jala ndang tarbereng. Hasangapon dohot hagogoon ma di Ibana ro di salelenglelengna! Amen.