RENUNGAN LUKAS 2: 1-7, HATUTUBU NI TUHAN JESUS (KELAHIRAN YESUS)

 HATUTUBU NI TUHAN JESUS (KELAHIRAN YESUS)

Lukas 2: 1-7

Horas ma di hita. Selamat Ari Pesta hatutubu ni Tuhan Jesus ma di hita. Sada ari na balga do arion di ngolu ni hita halak Kristen, laho manghalashon dohot manghamauliatehon hatutubu ni Jesus tu portibion paluahon hita jolma sian dosa. Las ma rohanta ala rade Ibana ro tu tongatonga ni hita jolma. Dipatutoru dirina, jala olo Ibana tumaon na porsuk, tubu di bagasan hapogoson dohot haleaon, asa malua hita jolma sian hapogoson dohot haleaon ni ngolu partondion ala ni gomgoman ni dosa i. Ala ni las ma roha marsomba tu Tuhanta, mamuji pasangaphon goarna, huhut tumangihon hata-Na sihangoluhononta. Disoarahon hata ni Debata, na gabe barita na uli di hita, i ma taringot tu hatutubu ni Jesus na gabe Sipalua di hità. Màrhite turpuk na dienet sian Evangelium Lukas 2: 1-7, ditogutogu do hita mamereng balga ni holong ni roha ni Debata, na rade manuru Anak-Na na sasada i tubu gabe jolma, di bagasan hapogoson dohot haleaon, asa malua hita sian hapogoson dohot haleaon ni ngolu partondion ala ni dosa naung manggomgomi hita. Ala ni taauhon ma barita hatutubu ni Jesus i làho patoguhon haporseàonta tu Ibana.

1. Tubu do Jesus i di bagasan pardalan ni sejarah ni portibi on. Tangkas do disurathon si Lukas barita hatubu ni Jesus, i ma di tinggki panggomgomion ni kesar Agustus di harajaon Rom na bolon i, dohot si Kerenius gubernus ni propinsi Syria, na gabe bagian ni harajaon Rom hatiha i. Masuk tu propinsi Syria do huta Nasaret na di luat Galilea dohot huta Betlehem na di luat Judea. Mangihuthon catatan sejarah, Kesar Agustus manggomgomi harajaon Rom sian taon 30 seb. M sahat tu taon 14 ses. M, jala si Kerenius manggomgomgomi propinsi Syria hirahira taon 12 seb. M sahat tu taon 16 ses. M. Ndang adong tangkas tarsurat sadihari ma ari hatutubu ni Jesus, alai di tingki nasida ma i masa, di tingki hamamasa ni panuratan (sensus) ni pangisi

ni harajaon Rom na pinatupa ni kesar Agustus, jala i ma panuratan na parjolo di tinggki panggomgomion ni di Kerenius propinsi Syria.

Panuratan i dipatupa tu ganup bona ni pinasa ni pangisi ni harajaon i. Ala ni parenta i ingkon borhat ma si Josep dohot di Maria sian huta Nasaret luat Galiea, tu huta Betelehem luat Judea, ai i do bonanipinasa nasida, songon pinompar ni si Daud nasida. Unduk do nasida tu parenta ni kesar i, atik pe borat do di nasida laho mangulahon i.Di tingki i nunga gabegabean si Maria, alai ingkon borhat do nasida mangoloi parenta ni kesar i, ai di tingki i ndang adong na barani mangalo parenta ni kesar i. Alai i ma dalanna, na mangula do Debata marhite sejarah ni portibion, jala dipangke do pangarajai ni portibion pasauthon sangkap-Na. Ndang di huta Nassaret tubu Jesus, Mesias na gabe Sipalua hajolmaon, alai di Betlehem do songon naung sinuriranghon ni panurirang

Mika (5: 1), na mandok: "Alai anggo ho, ale Betlehem Eprata, mametmethu do ho nian anggo tung pola jujuron tu angka huta marriburibu di Juda; hape sian ho do haroroan ni na gabe panggomgomi di Israel, jala angka haroroanna sian na nahinan, sian angka ari na robi salelenglelengna." Jadi barita hatutubu ni Jesus, barira na tutu masa do i di sejarah ni hajolmaon, na tarsurat di sejarah ni portibion, ndada barita dongeng manang na ditubutubui songon na pinandok ni angka na so porsea di Jesus.

Ala ni patut porsea hita di barita i, ndang jadi ganggu rohanta, na sintong do Jesus tubu di portibion, gabe jolma, laho manghophop hita jolma pardosa.

2. Sian mulai hatutu-Na nunga manaon na porsuk Jesus di portibion. Di na sahat di Josep dohot si Maria di huta Betelehem, ndang adong be dapot nasida inganan parbornginan. Ala ni i di bara ni pinahan na ma nasida marborngin, hape hatiha i nunga gok ari ni hangoluan ni si Maria, laho manubuhon Jesus. Jadi laos di bara ni pinahan i ma Jesus tubu, diborhos laos dipeakhon tu inganan panggagan ni pinahan i. Jadi songon i ma porsukna hatutubu ni Jesus i, jala ndang adong halak na asing na mangurupi si Josep dohot si Maria, holan nasida na dua do disi. Alai Debata do marhite tondi-Na mandongani dohot mangurupi nasida. Jadi songon i ma dalan na dipillit Debata, ndada di istana manang di inganan na mewah tubu Jesus i. Marhite hatutubu ni Jesus di bara ni pinahan i, Debata patuduhon haradeon-Na patutoruhon diri-Na, mangarumari diri-Na, manadinghon hasangapon-Na, laho humophop hita jolma pardosa. Gabe sunggulsungul ma i di hita jolma, naung nigomgoman ni dosa i, na sai jotjot madabu tu pangalaho na sai patimbohon diri, mangalului hasangapon portibi, jala madabu tu ginjang ni roha. Hatutu ni Jesus i di na rade manaon na porsuk, mangajarhon tu hita asa rade hita manaon na porsuk ala ni haporseaon tu Jesus, rade patutoruhon diri di bagasan haserepon, jala rade laho maneahon diri ( berkoban)laho manghophop angka dongan na dibagasan hasusaan. Songon i do torus parrohaon ni Kristus saleleng di portibion na patut sitiruon ni hita na mangihuthon Ibana.

3. Taparade ma rohanta bahen inganan hatubuan ni Jesus. Molo tapestahon pe hatutubu ni Jesus di ganup ari Natal, naeng ma unang holan hasomalan sambing non i. Jala unang ma holan sidalian sambing i laho marpesta, marlas ni roha rap dohot angka dongan. Mansai godang do nuaeng pesta natal na dipatupa mansai ribur, meriah, marendei, manang manortori, asa marhite i boi ninna rohana marlas ni roha. Sidung acara ibadah, mansam ma dipatupa angka riburribur, mambahen las roha ni na mandohoti pesta i. Tutu do sada makna ni pesta natal, i ma boi rap marlas ni roha dohot angka dongan. Alaiporlu do tapahusorhusor di bagasan rohanta, las ni roha na songon dia do na dihirim sian hita. Tontu ndada las ni roha portibion, manang las ni roha parsatongkinan sambing, alai ingkon las ni roha partondion do, las ni roha na manongtong, na boi patamba gogo dohot hiras ni roha di hita laho mandalani ngoluon na godang siparungkilhonon. Ingkon boi dihangoluhon aha hata ni Debata na dihatahon di pesta natal i. Songon hata ni Debata na disoarahon di pestanta sadarion, asa lam tubu di hita haserepon ni roha, songon Debata na rade patutoruhon diri di bagasan hatutubu ni Jesus. Dipaingothon barita hatutubu ni Jesus i do hita, asa tapasiding pangalaho ginjang ni roha, kesombongan, na girgir patimbohon diri jala patutoruhon donganna jolma. Angkup ni dijouhon turpuk on do tu hita asa adong rasa peduli tu dongan jolma, adong holong dohot roha dame tu saluhut dongan jolma, nang pe ma rasingasing suku dohot haporseaonna. I ma tandana naung tubu Jesus i di bagasan rohanta. ***

________________________

Evangelium: Lukas 2:1-7

1 Dung i ro ma uju i parenta sian Kesar Augustus, ingkon suratan nasa jolma di gomgomanna.

2 Pamilangon parjolo ma i, uju digomgomi si Kirenius tano Siria.

3 Jadi borhat ma sasude, asa disurati, ganup tu bona ni pinasana.

4 Borhat ma nang si Josep, na sian Galilea, sian Nasaret, nangkok tu luat Judea, tu huta ni si Daud, na margoar Betlehem, ala sian pomparan jala marga ni si Daud ibana,

5 pasurathon dirina rap dohot si Maria, oroanna i, naung gabegabean.

6 Jadi di na disini nasida, gok ma ari ni hangoluanna.

7 Ditubuhon ma anak buhabajuna, diborhos ma, dipeakkon ma tu bagasan panggagatan, ala so adong inganan na asing di parmianan nasida.

_______________

Epistel: Sakaria 9: 9-10

9 Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina.

10 Jala ahu maniaphon angka hureta sian Epraim dohot angka hoda sian Jerusalem, siap dohot sior tu hamusuon. Dung i baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Euprat sahat ro di angka ujung ni tano on.

Facebook

Facebook

Facebook

Facebook

Facebook

Facebook

Facebook

Facebook

Facebook

Facebook

Facebook

RENUNGAN LUKAS 1: 67-79, DITOPOT DEBATA DO BANGSONA (ALLAH MELAWAT UMAT-NYA).

 DITOPOT DEBATA DO BANGSONA (ALLAH MELAWAT UMAT-NYA).

Lukas 1: 67-79

Horas ma di hita. Selamat Ari Minggu Advent IV ( 21 Desember 2025). On ma minggu Advent na parpudi di hita, di pangaradeonta, managam haroro ni Jesus, Mesias na gabe Sipalua hajolmaon sian gomgoman ni dosa. Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, paboa marhite Jesus, Mesias, jala Anak ni Debata na pajongjong harajaon-Na di portibion, Debata ro manopot bangso-Na. Manopot lapatanna ro mandapothon manang mangebati bangso-Na, dohot sude hita jolma pardosa, asa dipalua hita jala asa tangkas tatanda hadirion ni Debata na manghaholongi hita. Na ro do Ibana paluahon hita sian gomgoman ni dosa i, asa partohap hita di harajaon ni Debata. Ala ni dipangido do asa di bagasan las ni roha hita mamuji Debata laho manomunomu haroro-Na i.

1. Tapuji ma Ibana sian nasa ngolunta, ala ditopot hita jala dipatindang di hita tanduk haluaon. Turpuk on, i ma ende pujipujian ni malim Sakarias, di hatutubu ni anak-Na, na dibahen goarna si Johannes. Somal do muse didok huria na parjolo i ende Pamudjian ni si Sakarias on "Benedictus", ala hata pamujionna i di hata Latin dimulai dohot hata "Benedictus". "Benedictus Dominus Deus Israel ", lapatanna " Pinuji ma Tuhan i Debata ni Israel." Mansai las roha ni si Sakarias mamuji Debata, ala dipasoranghon Debata anakna on di ibana, di hatutuana. Dongan saripena pe nunga matua, na so mungkin be anggo didok roha ni halak boi tumubuhon anak. Alai songon i ma pambahenan ni Debata, ai ndang adong na so tarpatupa Debata. Sanga do ndang porsea si Sakarias di hata ni Debata na mandok ingkon tumubuhon anak dongan saripena si Elisabet. Alai gabe mangungu ma si Sakarias ala ni i, sahat ro di ari paualuhon dung tubu anakna i. Di na laho tarsunat anakna i laos mambahen goarna, di si ma mungkap pamanganna laos dipuji ma Debata, i ma turpukta on. Marhite ende pamujionna i, laos manurirangi do ibana taringot anakna i. Dibereng ibana do diri ni anakna i songon sahalak panurirang, na naeng paturehon dalan di Tuhan i. Angka halak Jahudi na daulat roha manghirim do di haroro ni Mesias, Raja na miniahan ni Debata. Laos porsea do nasida, andorang so ro Mesias i, adong do patujolona, na pabotohon haroro-Na jala paturehon dalan sidalanan-Na. Di haporseaon ni halak Jahudi si Elia do suruon ni Debata na naeng mangulahon i ( Mal. 3: 23/ 4: 5). Di bereng si Sakarias, di diri ni anakna i do panurirang na naeng patujolo ni haroro ni Mesias i. Ala ni i do gok las ni rohana mamuji Debata, ai laos marlapatan do i nunga jonok haroro ni Mesias na naeng paluahon bangsona, na laos paluahon sude bangso. Ala ni i ingkon dohot hita mamuji Debata, pasangaphon goar-Na, laho manomunomu Jesus, naung ro na jolo jala na naeng ro do pe muse di ari parpudi. Harorona na jolo, tahalashon i marhite na marningot dohot mamestahon ari hatutubu ni Jesus i tu portibi on. Jala haroro-Na paduahaluhon, tapaima do i marhite na hobas hita mangarade diri mangulahon angka ulaon na denggan na hinalomohon ni Debata.

2. Naeng hita marhabadiaon jala marhatigoran di adopan-Na i, saleleng hita mangolu. Di bagasan ende pamujion ni Sakarias i, dipataridahon do songon dia dipangido roha ni Debata parange sihangoluhononta asa tarpuji goar ni Tuhan i marhite hita, i ma naeng hita "marhadiaon jala marhatigoran" di adopan-Na saleleng hita mangolu. Marhabadiaon lapatanna, mangolu di bagasan hadaulaton, ndang dirajai hagiot dohot hagogoon ni portibion, alai tongtong unduk tu pangarajaion ni Debata. Marhatigoran lapatanna marroha na sintong, marparange na denggan, bulus, ndang adong hageduhon, hombar tu patik dohot uhum ni Debata. Ngolu na songon i do sihangoluhononta di bagasan harajaon ni Debata. Jadi harajaon ni Debata ndang dos dohot harajaon portibion na mangasahon gogo laho manggulut huaso portibion. Ala ni di harajaon pirtibion, jotjot masa angka hageduhon, pangalaho na so uhum ro di ragam ni hajahaton laho manggulut paruntungan tu dirina be. Jadi anggo na mangolu di bagasan harajaon ni Debata, i ma na mangolu di bagasan habadiaon dohot hatigoran, na sai tongtong mangaradoti hubungan na denggan tu Debata dohot tu dongan jolma, nang tu sude na humaliang hita. Marhite i tongtong ma tarpuji jala marsangap Debata di ngolunta.

3. Na mangasahon asi ni roha ni Debata do hita ndada mangasahon gogonta. Si Johannes Pandidi disuru Debata songon patujolo ni Sipalua i, i ma Mesias na gabe Raja ni harajaon ni Debata. Si Johannes manungguli roha ni jolma asa ditanda dirina na gok dosa, jala ditanda Debata na sasintongna. Marhite Jesus boi ma tatanda Debata na sasintongna, i ma Debata parholong manang parasi ni roha. Haroro ni Jesus naeng manjanghon jolma naung dirajai dosa, asa dapotan haluaon. Jesus patuduhon haradeon ni Debata laho manjanghon jolma pardosa, marhite na rade manesa dosana. Alai domu tuson ringkot haradeon ni ganup jolma laho paubahon rohana (bertobat). Ala ni i do si Johannes manjamitahon hamubaon ni roha, jala mandidihon halak tanda ni hamubaon ni roha i. Di turpukta on, di ende pamujion ni si Sakarias on, di bereng ibana do ulaon ni si Johannes laho patandahon tu bangso-Na haluaon marhite sian hasesaan ni dosa. Di bagasan Jesus, rade do Debata manesa dosanta, asal ma rade hita paubahon rohanta. Jala di bagasan Jesus binsar sinondang sian ginjang manopot hita, sumondangi angka na hundul di bagasan haholomon, angka na linggoman ni hamatean, asa mardalan mandompakhon hangoluan. Hombar do on muse tu pangajarion ni Jesus, na jotjot patudoshon diri-Na tu Panondang ni portibion. Di Johannes 8:12, didok: "Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan." ***

__________________________

Evangelium:Lukas 1:67-79

67 Gok Tondi Parbadia ma si Sakarias, amana i, gabe manurirangi ma:

68 Pinuji ma Tuhan i, Debata ni Israel, ala ditopot bangsona jala dipatupa haluaonna. 69 Dipatindang do di hita tanduk haluaon, di bagas ni si Daud naposona i, 70 hombar tu na hinatahonna marhite sian soara ni angka panurirangna na badia i sian na robi: 71 Haluaon sian angka musunta dohot sian tangan ni angka na mangkosomi hita, 72 laho mangasii angka amanta marningot padanna na badia i,

73 i ma uarina na niuarihonna di si Abraham amanta i,

74 paboa lehononna tu hita, asa hita marhalado di adopanna i, so pola marhabiaran be, dung malua hita sian tangan ni angka musu,

75 marhabadiaon jala marhatigoran di adopanna i, saleleng hita mangolu.

76 Ia ho, anaha, targoar ma panurirang ni Natumimbul, ai patujolo ni Bohi ni Tuhan i do ho, paturehon angka dalanna,

77 laho patandahon tu bangsona haluaon marhite sian hasesaan ni dosanasida,

78 hinorhon ni pangasii ni Debatanta; ai binahen ni i do ro na binsar sian ginjang i manopot hita,

79 laho sumondangi angka na hundul di bagasan haholomon, angka na nilinggoman ni hamatean, patongonhon langkanta tu dalan hadameon.

_____________________

EpistelJesaya 65:1-5

1 Angka na so usouso di Ahu na sai laon i do mangalului Ahu nuaeng, jala halak na so mangalului Ahu na sai laon nunga jumpangsa Ahu. NingKu do tu bangso, na so pajoujou goarHu na sai laon: Dison do ahu, dison do Ahu.

2 Sai hupaherbang do tanganHu duansa manipat ari tu bangso na jungking, angka na mandalani dalan na so denggan, mangihuthon pingkiran lomo ni rohanasida sandiri.

3 Tu bangso na tongtong pahehe rimasHu di adopanHu, angka na mamele di bagasan angka porlak, jala manutung daupa di atas ni angka batu na minasak.

4 Angka na hundul di angka parbandaan, jala marmalam di angka liang; angka na manganhon juhut babi, jala marisi huahua habiason angka saoannasida i.

5 Lam didok nasida dope: Disi ma Ho, unang jumonok Ho tu ahu, ai na badia do ahu martimbanghon Ho. Ingkon gabe timus di bagasan igungHu do angka nasida, jala gabe api na marsigorgor manipat ari.

DITOPOT DEBATA DO BANGSONA (ALLAH MELAWAT UMAT-NYA).

Lukas 1: 67-79

Horas ma di hita. Selamat Ari Minggu Advent IV ( 21 Desember 2025). On ma minggu Advent na parpudi di hita, di pangaradeonta, managam haroro ni Jesus, Mesias na gabe Sipalua hajolmaon sian gomgoman ni dosa. Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, paboa marhite Jesus, Mesias, jala Anak ni Debata na pajongjong harajaon-Na di portibion, Debata ro manopot bangso-Na. Manopot lapatanna ro mandapothon manang mangebati bangso-Na, dohot sude hita jolma pardosa, asa dipalua hita jala asa tangkas tatanda hadirion ni Debata na manghaholongi hita. Na ro do Ibana paluahon hita sian gomgoman ni dosa i, asa partohap hita di harajaon ni Debata. Ala ni dipangido do asa di bagasan las ni roha hita mamuji Debata laho manomunomu haroro-Na i.

1. Tapuji ma Ibana sian nasa ngolunta, ala ditopot hita jala dipatindang di hita tanduk haluaon. Turpuk on, i ma ende pujipujian ni malim Sakarias, di hatutubu ni anak-Na, na dibahen goarna si Johannes. Somal do muse didok huria na parjolo i ende Pamudjian ni si Sakarias on "Benedictus", ala hata pamujionna i di hata Latin dimulai dohot hata "Benedictus". "Benedictus Dominus Deus Israel ", lapatanna " Pinuji ma Tuhan i Debata ni Israel." Mansai las roha ni si Sakarias mamuji Debata, ala dipasoranghon Debata anakna on di ibana, di hatutuana. Dongan saripena pe nunga matua, na so mungkin be anggo didok roha ni halak boi tumubuhon anak. Alai songon i ma pambahenan ni Debata, ai ndang adong na so tarpatupa Debata. Sanga do ndang porsea si Sakarias di hata ni Debata na mandok ingkon tumubuhon anak dongan saripena si Elisabet. Alai gabe mangungu ma si Sakarias ala ni i, sahat ro di ari paualuhon dung tubu anakna i. Di na laho tarsunat anakna i laos mambahen goarna, di si ma mungkap pamanganna laos dipuji ma Debata, i ma turpukta on. Marhite ende pamujionna i, laos manurirangi do ibana taringot anakna i. Dibereng ibana do diri ni anakna i songon sahalak panurirang, na naeng paturehon dalan di Tuhan i. Angka halak Jahudi na daulat roha manghirim do di haroro ni Mesias, Raja na miniahan ni Debata. Laos porsea do nasida, andorang so ro Mesias i, adong do patujolona, na pabotohon haroro-Na jala paturehon dalan sidalanan-Na. Di haporseaon ni halak Jahudi si Elia do suruon ni Debata na naeng mangulahon i ( Mal. 3: 23/ 4: 5). Di bereng si Sakarias, di diri ni anakna i do panurirang na naeng patujolo ni haroro ni Mesias i. Ala ni i do gok las ni rohana mamuji Debata, ai laos marlapatan do i nunga jonok haroro ni Mesias na naeng paluahon bangsona, na laos paluahon sude bangso. Ala ni i ingkon dohot hita mamuji Debata, pasangaphon goar-Na, laho manomunomu Jesus, naung ro na jolo jala na naeng ro do pe muse di ari parpudi. Harorona na jolo, tahalashon i marhite na marningot dohot mamestahon ari hatutubu ni Jesus i tu portibi on. Jala haroro-Na paduahaluhon, tapaima do i marhite na hobas hita mangarade diri mangulahon angka ulaon na denggan na hinalomohon ni Debata.

2. Naeng hita marhabadiaon jala marhatigoran di adopan-Na i, saleleng hita mangolu. Di bagasan ende pamujion ni Sakarias i, dipataridahon do songon dia dipangido roha ni Debata parange sihangoluhononta asa tarpuji goar ni Tuhan i marhite hita, i ma naeng hita "marhadiaon jala marhatigoran" di adopan-Na saleleng hita mangolu. Marhabadiaon lapatanna, mangolu di bagasan hadaulaton, ndang dirajai hagiot dohot hagogoon ni portibion, alai tongtong unduk tu pangarajaion ni Debata. Marhatigoran lapatanna marroha na sintong, marparange na denggan, bulus, ndang adong hageduhon, hombar tu patik dohot uhum ni Debata. Ngolu na songon i do sihangoluhononta di bagasan harajaon ni Debata. Jadi harajaon ni Debata ndang dos dohot harajaon portibion na mangasahon gogo laho manggulut huaso portibion. Ala ni di harajaon pirtibion, jotjot masa angka hageduhon, pangalaho na so uhum ro di ragam ni hajahaton laho manggulut paruntungan tu dirina be. Jadi anggo na mangolu di bagasan harajaon ni Debata, i ma na mangolu di bagasan habadiaon dohot hatigoran, na sai tongtong mangaradoti hubungan na denggan tu Debata dohot tu dongan jolma, nang tu sude na humaliang hita. Marhite i tongtong ma tarpuji jala marsangap Debata di ngolunta.

3. Na mangasahon asi ni roha ni Debata do hita ndada mangasahon gogonta. Si Johannes Pandidi disuru Debata songon patujolo ni Sipalua i, i ma Mesias na gabe Raja ni harajaon ni Debata. Si Johannes manungguli roha ni jolma asa ditanda dirina na gok dosa, jala ditanda Debata na sasintongna. Marhite Jesus boi ma tatanda Debata na sasintongna, i ma Debata parholong manang parasi ni roha. Haroro ni Jesus naeng manjanghon jolma naung dirajai dosa, asa dapotan haluaon. Jesus patuduhon haradeon ni Debata laho manjanghon jolma pardosa, marhite na rade manesa dosana. Alai domu tuson ringkot haradeon ni ganup jolma laho paubahon rohana (bertobat). Ala ni i do si Johannes manjamitahon hamubaon ni roha, jala mandidihon halak tanda ni hamubaon ni roha i. Di turpukta on, di ende pamujion ni si Sakarias on, di bereng ibana do ulaon ni si Johannes laho patandahon tu bangso-Na haluaon marhite sian hasesaan ni dosa. Di bagasan Jesus, rade do Debata manesa dosanta, asal ma rade hita paubahon rohanta. Jala di bagasan Jesus binsar sinondang sian ginjang manopot hita, sumondangi angka na hundul di bagasan haholomon, angka na linggoman ni hamatean, asa mardalan mandompakhon hangoluan. Hombar do on muse tu pangajarion ni Jesus, na jotjot patudoshon diri-Na tu Panondang ni portibion. Di Johannes 8:12, didok: "Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan." ***

__________________________

Evangelium:Lukas 1:67-79

67 Gok Tondi Parbadia ma si Sakarias, amana i, gabe manurirangi ma:

68 Pinuji ma Tuhan i, Debata ni Israel, ala ditopot bangsona jala dipatupa haluaonna. 69 Dipatindang do di hita tanduk haluaon, di bagas ni si Daud naposona i, 70 hombar tu na hinatahonna marhite sian soara ni angka panurirangna na badia i sian na robi: 71 Haluaon sian angka musunta dohot sian tangan ni angka na mangkosomi hita, 72 laho mangasii angka amanta marningot padanna na badia i,

73 i ma uarina na niuarihonna di si Abraham amanta i,

74 paboa lehononna tu hita, asa hita marhalado di adopanna i, so pola marhabiaran be, dung malua hita sian tangan ni angka musu,

75 marhabadiaon jala marhatigoran di adopanna i, saleleng hita mangolu.

76 Ia ho, anaha, targoar ma panurirang ni Natumimbul, ai patujolo ni Bohi ni Tuhan i do ho, paturehon angka dalanna,

77 laho patandahon tu bangsona haluaon marhite sian hasesaan ni dosanasida,

78 hinorhon ni pangasii ni Debatanta; ai binahen ni i do ro na binsar sian ginjang i manopot hita,

79 laho sumondangi angka na hundul di bagasan haholomon, angka na nilinggoman ni hamatean, patongonhon langkanta tu dalan hadameon.

_____________________

EpistelJesaya 65:1-5

1 Angka na so usouso di Ahu na sai laon i do mangalului Ahu nuaeng, jala halak na so mangalului Ahu na sai laon nunga jumpangsa Ahu. NingKu do tu bangso, na so pajoujou goarHu na sai laon: Dison do ahu, dison do Ahu.

2 Sai hupaherbang do tanganHu duansa manipat ari tu bangso na jungking, angka na mandalani dalan na so denggan, mangihuthon pingkiran lomo ni rohanasida sandiri.

3 Tu bangso na tongtong pahehe rimasHu di adopanHu, angka na mamele di bagasan angka porlak, jala manutung daupa di atas ni angka batu na minasak.

4 Angka na hundul di angka parbandaan, jala marmalam di angka liang; angka na manganhon juhut babi, jala marisi huahua habiason angka saoannasida i.

5 Lam didok nasida dope: Disi ma Ho, unang jumonok Ho tu ahu, ai na badia do ahu martimbanghon Ho. Ingkon gabe timus di bagasan igungHu do angka nasida, jala gabe api na marsigorgor manipat ari.

RENUNGAN MIKA 7: 7-13, MANGHALUNGUNHON DEBATA, HATUAON NI ANGKA NA PORSEA (BERHARAP KEPADA ALLAH YANG MENYELAMATKAN).

 MANGHALUNGUNHON DEBATA, HATUAON NI ANGKA NA PORSEA (BERHARAP KEPADA ALLAH YANG MENYELAMATKAN).

Mika 7: 7-13

Horas ma di hita sude. Selamat Ari Minggu Advent III ( 14 Desember 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Mika 7: 7-13, asa sai tongtong manghalungunhon Debata, hatuaon ni angka na porsea. Na marlapatan do i:

1. Tongong marpanghirimon tu Debata na paluahon. Ditogutogu turpuk on do hita marhite panindangion ni panurirang Mika asa tongtong marpanghirimon tu Debata nang pe di tongatonga ni situasi na maol situtu na taadopi. Di jolo ni turpuk on dialualuhon panurirang i do parrohaon ni bangso i , naung sude marroha mago. Ndang adong be parroha na daulat dohot parroha na tigor. Parroha na daulat na nidokna, i ma parroha na tongtong marsihohot unduk sumomba Debata Jahowa hombar naung dipadanhon ompunasida na jolo. Parroha na tigor i ma halak na sai tongtong marparange na denggan hombar tu patik dohot uhum naung jinalo nasida sian Debata. Alai mangihuthon panurirang Mika ndang adong be sian tongatonga ni bangso i parroha na daulat dohot parroha na tigor Ndang parduli be nasida di Debata Jahowa, nunga angka na so uhum, hageduhon ro di angka ragam ni hajahaton diulahon nasida. Angka pangarajai pe, angka panguhum, angka halak na bolon nunga masiulahon lomo ni rohana sambing marguru tu hagiotna. Angka pangarajai mangigil silehonlehon sian na nirajaanna, panguhum manjalo sisip.laho mandabu uhum, songon i halak na bolon mambahen lomolomona sambing mangasahon gogo dohot huaso na adong di nasida be. Jadi nunga tung lumlam parrohaon ni bangso i, ala na so paduli be di Debata Jahowa. Di tongatonga ni parrohaon na songon i ma panurirang Mika manurirangi. Molo songon i pe magona parrohaon ni bangso i, alai anggo ibana, tongtong do manatap tu Jahowa, jala manghalungonhon Jahowa. Pos do rohana, molo pe masialoan i dohot parrohaon ni bangso i, alai songon panurirang ibana na sinuru ni Debata patolhashon hata-Na, ingkon barani do ibana manghatahon i, anggiat adong na paubahon rohana, jala mulak tu dalan ni Debata. Jadi ndang olo ibana sumurut, jala talu mamereng parrohaon naung lumlam i, alai ingkon soarahononna jala hatindanghononna do haporseaonna. Jala pos do rohana, tangihonon ni Debata silehon haluaon i do hoihoi dohot alualuna i. Jadi haporseaon do ojahan ni panghirimon, jala pangirimon i do nang na patoguhon haporseaonta. Panindangion ni panurirang i, laos manogunogu hita do asa tongtong marpanghirimon tu Debata. Di situasi ni parngoluon na gok tantangan, ingkon tongtong do hita manatap jala manghalungunhon Tuhan, ndada tu jolma manang na gogo ni portibion hita mangalualu. Alai tu Tuhan i do hita tongtong marhaporusan, ai Ibana do na tuk paluahon hita.

2. Tuhan i do na gabe panondang di hita. Ibana do na manondangi pardalanan ni ngolunta, asa tiur dalan sidalananta. Ibana do manondangi rohanta, asa boi tong tiur rohanta nang pe mangadopi godang parungkilonta. Ibana do na manondangi pingkiranta, asa boi mamingkiri angka denggan siulahinonta. Songon jolma na so lias sian dosa, diangkui panurirang Mika do, ibana pe boi do adong hagaleonna. Boi do ibana tinggang di pardalananna, alai ala ni pandonganion ni Tuhan i, ditogu do ibana. Boi do ibana hundul di bagasan haholomon, alai porsea do ibana, na Debata do paluahon ibana, jala mangalehon hatiuron asa malua ibana sian haholomon i. Boi do angka parroha na so daulat i marlas ni roha namereng parroha na na daulat, ala dibereng hira na manaon na porsuk dohot ragam ni hasusaan portibion angka halak na daulat roha. Alai didok panurirang Mika do tu nasida: "Unang ho marlas ni roha, ale musungku, mida ahu! Ai tinggang pe ahu sai hehe do ahu muse; ai hundul pe ahu nuaeng di bagasan haholomon, Jahowa do panondang di ahu." Jadi angka na marhaposan tu Jahowa tongtong do marposniroha, sai paheheon ni Jahowa do ibana molo pe tinggang di portibion, molo pe di bagasan haholomon sai Jahowa do mangalehon sinondang hatiuron asa unang marmara ibana.

3. Debata do haluaon ni angka bangso. Aha na binahen ni Debara tu bangso Israel, marhahonaan do i tu sude bangso, ai songon na nisoarahon ni turpuk di opat minggu na salpu ( 16 Nopember 2025), dihaholongi Debata do sude bangso. Pamilliton ni Debata gabe bangso-Na ndada holan na mardomu tu haluaon ni bangso Israel sandiri non i, alai na mardomu tu haluaon ni sude bangso do. Ingkon boi sude bangso marnida hamuliaon ni Debata, na di papapatar di Jerusalem, gabe sude ma manghalungunhon Debata, gabe ro marsomba tu Debata. Alai ala so diulahon bangso Israel aha na sinangkapan ni Debata marhite nasisa, gabe dipasaut Debata do i marhite Jesus Kristus. Jesus Kristus ma na gabe Sipalua di sude bangso, ndada holan tu halak Israel alai tu sude bangso do. Halak Israel pe molo so manjangkon Jesus Kristus na gabe Sipalua di nasida, ndang dohot nasida malua. Tu hita pe songon i do. Ingkon sai tongtong do hita manghalungonhon Debata, naung ro tu portibion marhite Jesus Kristus, asa dohot hita malua sian huaso ni dosa dohot sian huaso ni sibolis i naung mangihoti rohanta marroha portibi on Jadi minggu Advent na tapestahon, i ma manungguli rohanra asa tongtong hita manghalungunhon Jesus Kristus naung ro paluahon hita, jala na naeng ro muse di ari parpudi laho manguhumi saluhut jolma.***

_____________________________

Evangelium:

Nalom ni Roha Martangiang tu Jahowa

Mika 7:7-13

7 Alai anggo ahu manatap tu Jahowa do, jala dihalungunhon rohangku do Debata ni hatuaonhu, sai tangihonon ni Debatangku do ahu.

8 Unang ho marlas ni roha, ale musungku, mida ahu! Ai tinggang pe ahu sai hehe do ahu muse; ai hundul pe ahu nuaeng di bagasan haholomon, Jahowa do panondang di ahu.

9 Usungonhu do rimas ni Jahowa, ai dompak Ibana do ahu mardosa, paima dibadahon Ibana badangku, jala maruli uhum ahu dibahen. Sai toguonNa do ahu sogot tu hatiuron, idaonhu do hatigoranNa. 10 Alai idaon ni musungku ma i sogot, jadi huphupan ni haurahon bohina, ibana naung mandok tu ahu: Didia do Jahowa Debatam? Marsombusombu ma matangku marnida nasida, dung hona luntak songon gambo di alaman. Marpangulahi Roha ni Debata taringot tu BangsoNa

11 Nunga ro ari parpaulion di parikmu, ari parholangan ni patik do i.

12 Ari haroroan ni halak do i tumopot ho sian Assur, dohot sian angka huta ni Misir; jala sian Misir sahat ro di batang aek jala sian laut tu laut jala sian tor tu tor.

13 Alai gabe halongonan ma tano i ala ni pangisina, binahen ni parbue ni pambahenannasida. _______________________

Epistel: Markus 1:1-8

1 On ma mula ni barita na uli ni Jesus Kristus.

2 Hombar tu na tarsurat di panurirang Jesaya: "Husuru ma suruanHi, patujolo ni bohiM, sipature sidalananMi.

3 Soara ni na manjoujou di halongonan: Pature hamu ma dalan di Tuhan i; pahornop hamu ma sidalananNa i."

4 Di halongonan do si Johannes mandidihon jala manjamitahon pandidion hamubaon ni roha, laho pasesahon dosa.

5 Jadi ruar ma sude pangisi ni tano Judea ro di sude halak Jerusalem manopot ibana jala dipandidihon do nasida di batang aek Jordan, dung ditopoti be dosana.

6 Ianggo si Johannes i, imbulu ni unto do ulosna jala hulingkuling do hohosna, angka sihapor dohot situak ni loba do sipanganonna.

7 On do jamitana: "Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuNa.

8 Aek do hudidihon tu hamu; alai Tondi Parbadia do didihononNa tu hamu."

RENUNGn MATIUS 3: 1-12, PAUBA HAMU MA ROHAMUNA, AI NUNGA SONGGOP HARAJAON BANUA GINJANG I (BERTOBATLAH! KERAJAAN SORGA SUDAH DEKAT).

PAUBA HAMU MA ROHAMUNA, AI NUNGA SONGGOP HARAJAON BANUA GINJANG I (BERTOBATLAH! KERAJAAN SORGA SUDAH DEKAT).

Mateus 3: 1-12.

Horas mà di hità. Selamat Ari Minggu Advent II (7 Desember 2025). Las ma rohanta marsomba tu Tuhanta mamuji pasangaphon goar-Na, tumamgihon hata-Na sihangoluhononta. Disoarahon hata ni Debata do tu hita saarion i ma na dienet sian Evangelium Mateus 3: 1-12, asa tapauba rohanta, ai nunga songgop harajaon ni Debata.

1 Manjanghon Jesus marhite hamubaon ni roha. Andorang so mangula Jesus Kristus laho pajongjonghon Harajaon ni Debata, disuru Debata do si Johannes Pandidi songon patujolo-Na. Ibana ma na paradehon dalan di haroro ni Jesus Kristus i, hombar tu na sinuriranghon ni Panurirang Jesaya di na nidokna: "Soara ni na manjoujou di halongonan: Pature hamu ma dalan di Tuhan i; pahornop hamu ma sidalananNa i!" (Jesaya 40: 3). Jadi nunga disuriranghon Panurirang Jesaya haroro ni si Johannes Pandidi songon patujolo ni Tuhan i na manoarahon asa sude halak paturehon dalan ni Tuhan i, laho pahornophon. Laos i do nang na sinuriranghon ni panurirang Maleaki, songon tarsurat di buku Maleski 3: 1a, na mandok: "Ida ma, suruanku ma suruanku, asa dipadiri dalan di jolongku." Adong dalan na marbuntulbuntul, manang na marnangkok tuat, dohot dalan na bengkuk sipatureon ni na manjanghon haroro ni Raja i. Paturehon dalan ni Tuhan i, manggombarhon hamubaon ni roha di hita, ai rohanta i do dalan ni Tuhan i laho manopot hita. Ingkon tigor do rohanta, ndang jadi adong hageduhon, dohot ginjang roha, sandok ingkon bulus jala ias do rohanta laho manjanghon Jesus. Torop do na ro mandapothpon si Jahannes pandidi sian luat Judea dohot Jerusalem, jala mangalehon dirina dipandidihon si Johannes. Alai pandidion ni si Johannes i songon tanda do i di angka naung rade paubahon rohana, dung ditopoti be angka dosana. Asing do i sian pandidion ni Jesus, na ro sian pudi ni si Johannes, i ma pandiion ni Tondi Parbadia. Manopoti dosa ndada ulaon na mura non i, ai ndada holan hata mandok hamubaon ni roha. Ingkon muba do pingkiran dohot parrohaon, muba pangalaho, muba parulaon sian parulaon na jahat tu parulaon na dengggan. Alai na boi do i ulahononhonta, molo mangula Tuhan i marhite Tondina di bagasan rohanta.

2. Mamparbuehon na tama tanda ni hamubaon ni roha. Mambege jamita ni Johannes Pandidi i marroan do torop halak Jahudi sian luat Judea dohot sian Jerusalem laho mandapothon si Johannes di halongonan manopoti dosana asa dodot tardidi. Alai tu angka Parise dohot Saduse na dohot ro, didok si Johannes do mandok nasida: "Hamu anak ni ulok! Ise do na mangajari hamu, pasidingkon rimas na ro sogot?" Digoari do nasida angka anak ni ulok, lapatanna angka anak ni sibolis. Dibereng si Johannes do holan sipaula sambing do haroro nasida i, naeng pasidinghon rimas ni Debata. Ala ni i ndang adong gunana anggo holan pasidinghon rimas ni Debata do nasida. Ingkon sian nasa roha dohot ngolu do paubahon rohana jala tanda ni hamubaon ni roha i i ma mamparbuehon na tama songon parbue ni hamubaon ni roha. Jadi ndang boi holan hata mandok hamubaon ni roha, alai ingkon tarida do di ngolu siganup ari. Di evanelium na sinurat ni si Lukas, ro do sungkunsungkun tu si Johannes taringot tu aha ma sibahenonnasida. Tu na torop i didok, na mardua bajubaju dilehon ma tu na so adong bajuna, jala na umpeop sipanganon songon i ma dibahen. Lapatanna, ingkon adong roha na masiurupan. Angkup ni i asa ganup mangula ulaonna be dohot denggan, di bagasan tanggung jawab sian sandok roha. Ndang mangulahon hageduhon. Jadi ndada pola ingkon manadinghon ulaonna, molo pe adong anggapan na so denggan tu sadasada ulaon, isara ni sijalo beo dohot soldadu. Jadi tu sijalo beo didok, jadi ma angka sijalibeo na denggan, unang dibuat lobi sian na diaturhon tu nasida. Lapatanna unang korupsi. Songon i tu angka soldadu, jadi ma gabe angka soldadu na denggan, unang mansusai manang mandobo halak. Hasabamhon hamu ma gajimuna. Jadi sian i boi berengon, manang dia pe ulaon na pinasahat ni Tuhan i tu ganup halak, ingkon rajumanna do ulaonna i na manghobasi Debata. Jadi ingkon martanggung jawab tu Debata do hita di nasa ulaon na sahat tu hita be. Angkup ni ndang boi pangasahononta hadirionta, status sosial manang parugamaonta, songon halak Jahudi na jojot mangasahon status nasida songon pinompar ni si Abraham. I do umbahen didok si Johannes tu halak Jahudi: "So tung didok hamu di bagasan rohamuna, si Abraham do amangnami, ai tarjadihon Debata do angka anak ni si Abraham sian batu on."

3 Sitabaon do nasa hau na so marparbue. Dipatudos si Johannes do nang hita jolma tu hau. Molo hau na diharaphon ingkon marparbue, hape ndang hea marparbue na denggan, sitabaon do i jala sidabuhonon tu api. I ma uhuman tu hau na songon i. Jadi haroro ni Jesus i, ndada holan mamboan haluaon, alai laos dohot do pe mambosn paruhuman tu angka halak na so olo paubahon rohana, na so rade manjanghon Jesus, jala na so mamparbuehon parpue na tama. Alai paruhuman i dipatupa Jesus di haroro-Na parpudi manang paduahon. Ala ni haroro ni si Johannes i laos dohot do paingothon ganup, asa mangarade diri tu haroro ni Jesus paduahalihon. Laos i do nang na pinaingithon ni minggu Advent II hon on, asa rade hita managam parhumunan sogot di haroro ni Jesus padua halihon i. Disi ma masa songon na nidok ni si Johannes di turpuk on: "Di tanganNa do purpuran; paiasonNa ma pardegeanNa; papunguonna do emeNa tu sopoNa; alai tutungonNa do anggo hurangkam i tu api na so ra mintop." Ala ni i taparade ma dirinta managam haroro ni Jesus i, marhite na rade tongtong hita paubahon roha, sian roha portibion, tu roha banuaginjang, sian hajahaton tu na angka pangalaho na mamparbuehon na denggan, asa tama hita panean di harajaon banua ginjang i.***

____________________________

Evangelium: Mateus 3:1-12

1 Dung i di laonlaon ni ari hehe ma si Johannes pandidi marjamita di halongonan Judea,

2 ninna ma: Pauba hamu ma rohamuna, ai nunga songgop harajaon banua ginjang i! 3 Ibana do na pinaboa ni panurirang Jesaya, uju na nidokna: "Soara ni na manjoujou di halongonan: Pature hamu ma dalan di Tuhan i; pahornop hamu ma sidalananNa i! "

4 Imbulu ni unto do ulos ni si Johannes, hulingkuling do hohosna: Angka sihapor dohot situak ni loba do sipanganonna.

5 Dung i laho ma pangisi ni Jerusalem manopot ibana, songon i dohot sude halak Judea ro di saluhut angka na maringanan di lambung ni Jordan i.

6 Jadi dipandidihon si Johannes ma nasida di aek Jordan i, dung ditopoti be dosanasida.

7 Alai di na niidana torop Parise dohot Saduse manopot pandidionna i, ninna ma mandok nasida: Hamu anak ni ulok! Ise do na mangajari hamu, pasidingkon rimas na ro sogot?

8 Parbuehon hamu ma na tama, paboa naung muba rohamuna!

9 Jala so tung didok hamu di bagasan rohamuna: Si Abraham do amanami! Ai hudok ma tu hamu: Tarjadihon Debata do anak di si Abraham sian angka batu on!

10 Ai nunga pola ampe tangke tu daling ni angka hau! Onpe, sitabaon ma nasa hau na so marparbuehon na denggan jala sidabuhononhon tu api!

11 Ia ahu, aek do hudidihon tu hamu mandokkon paubahon roha; alai andul gumogo do na ro sian pudingku, gari mamboan sipatuna hurang tama dope ahu. Didihonon ni I do tu hamu Tondi Parbadia dohot api!

12 Di tanganNa do purpuran; paiasonNa ma pardegeanNa; papunguonna do emeNa tu sopoNa; alai tutungonNa do anggo hurangkam i tu api na so ra mintop.

__________________________

Epistel: Psalmen 72:1-19

Sian si Salomo.

1 Ale Debata, sai pasahat ma angka panguhumMu tu rajai, jala hatigoranMu tu anak ni rajai.

2 Asa diuhum bangsoM marhitehite hatigoran, jala maruli uhum angka na dangolMu.

3 Asa marparbuehon hadameon angka dolok di bangso i, jala maruli hatigoran angka robean.

4 Sai patingkosonna do uhum tu angka na dangol ni bangso i, tumpahanna do angka anak ni na pogos, jala ropuhanna do sibahen gogo.

5 Sai Ho ma dihabiari halak saleleng adong mata ni ari, jala saleleng tarida bulan marsundutsundut.

6 Sai tuat ma Ibana songon pangonai ni udan tu padang na sinabi, songon udan nene na mamornohi tano.

7 Martunasi ma di angka arina i partigor i, jala manimbukbuk hadameon ro di na so adong be bulan.

8 Jadi Ibana ma mangarajai sian laut sahat tu laut, jala sian batang aek i sahat ro di angka ujung ni tano on.

9 Ingkon marsomba di jolona angka pangisi ni halongonan, jala dilatan ni angka musuna orbuk.

10 Boanon ni angka raja sian Tarsis dohot angka pulo ma sombasomba, angka raja sian Seba dohot Etiopia manaruhon silehonlehon.

11 Jala sombaon ni sude raja Ibana, luhut do angka parbegu mangoloi Ibana.

12 Ai paluaonna ma na pogos na joujou dohot na dangol na so marpangalualuan. 13 Olananna do na metmet dohot na pogos, jala paluaonna do angka tondi ni angka na pogos.

14 Paluaonna do tondinasida sian pangarupaon dohot sian parhilangon, jala na arga situtu do mudarnasida di rohana. Harajaon Hadameon

15 Sai mangolu do ibana jala lehononna tu ibana sere sian Seba; jala tangiangkononna do ibana tongtong, pasupasuonna do ibana ganup ari.

16 Jadi gabe situtu ma eme di tano on ro di punsu ni angka dolok, humaras ma parbuena, songon Libanon, jala martumburi nasida jolma i sian huta, songon duhut ni tano on.

17 Sai hot ma goarna i ro di salelenglelengna, sai muap ma baritana saleleng adong mata ni ari, asa maruli pasupasu nasida di bagasan ibana, luhut angka parbegu martuahon ibana.

18 Pinuji ma Debata Jahowa, Debata ni Israel, sasadasa do mambahen angka halongangan.

19 Pinuji ma dohot goar ni hamuliaonNa i ro di salelenglelengna, jala gok hasangaponNa ma liat portibi on! Amen! Amen!