TOGU DI BAGASAN TUHAN I
(KUAT DI DALAM TUHAN)
Efesus 6: 10-20
Horas ma di hita. Selamat Ari Minggu XIII dung Trinitatis (25 Agustus 2024). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhonta. Disoarahon hata ni Debata do hita sadarion na dienet sian Surat ni Apostel Paulus tu huria Epesus (6: 10-20), asa tongtong togu hita di bagasan Tuhan i. Togu lapatanna, margogo, ndang galegale, ndang muramura sumurut sian haporseaonna. Alai aha do na pinangidona togu manang margogo. Ndang apala daging manang pamatangta on, atik pe pamatangta on pe ringkot do tongtong margogo. Alai na lumobi do pe sian i, i ma rohanta manang partondionta. Molo togu rohanta, pamatangta i pe gabe dohot do togu. Ala ni i diajarhon turpuk sadarion do tu hita.
1. Doshon na marporang do ngolunta di portibion. Boasa disosohon apostel Paulus roha manang partondionta ingkon tongtong togu, ala ngolunta on doshon na marporang do. Alai ndang na marporang hita mangalo mudar dohot sibuk, manang dongan jolma. Alai na marporang do hita mangalo harajaon dohot huaso ni sigomgomi haholomon i, i ma huaso ni sibolis na manghorhon godang tubu hajahaton, hageduhon, halumlamon, gabus, roha diri dohot ragam ni na so uhum di portibion. Sudena i na mardomu tu parrohaon manang partondion ni jolma i do naung nigomgoman ni sibolis. Ala ni i na marporang partondion do hita. I do umbahen ingkon tongtong togu rohanta manang partondionta.
2. Mamangke sinjata na sian Debata. Ala ulaula ni Debsta do hita laho mangalo angka tondi hajahaton i, diparade Debata do di hita angka sinjata rodi angka pahean porang sipangkeonta laho manaluhon musu i. Apostel Paulus mandok: "Solukhon hamu ma pahean sinjata na sian Debata, asa taralo hamu utiutian ni sibolis i". Isara ni angka soridadu na dipaborhat tu parporangan ingkon diperlengkapi do dohot pahean porang. Alai hita na porsea di Debata ndada sinjata dohot pahean porang portibion na tapangke, alai pahean sinjata na sian Debata do, i ma mamahe hohos hasintongan, manolukhon bajubaju partahanan i ma hatigoran, mamahe sipatu na togu ima haringgason mambaritahon dohot manghangoluhon barita na uli i, na patubu roha dame. Angkup ni i mamahe lombulombu haporseaon na tuk mangintopi sumbia ni sibolis i, mamahe tahuluk haluaon dohot podang ni tondi, i ma hata ni Debata. Podang i ma sinjata na mansai ringkot di ganup sordadu laho marporang. Ingkon adong do podang laho mamusa musu. Podang ni angka na porsea laho manaluhon huaso ni sibolis i ima parsihohoton di hata ni Debata. Ala ni i ingkon ringgas do angka na porsea i tumangihon, manjaha dohot mangguruhon hata ni Debata. Angka na tongtong marsihohot di hata ni Debata, ndang tartaluhon sibolis i non i, alai sibolis i do na ditaluhon.
3. Manongtong martangiang tu Debata. Tangiang do parhitean ni Debata mangalehon gogo tu angka na porsea di Ibana. Sude angka pahean sinjata diparade Debata do di hita laho manuluhon harajaon haholomon ni sibolis i, alai ingkon tongtong tapangke do i saluhutna mardongan tangiang. Ndang holan mangasahon gogonta, manang hapadeanta sandiri hita, alai ingkon tongtong do mangasahon gogo na sian Debata, na tajalo marhite tangiang. Ala ni i ingkon manongtong do hita martangiang, ndada marsanggasangga. Jala sitangianghononta pe ndada holan dirinta manang haporluan ni ngolu pardagingonta, alai lumobi do manangianghon tanggung jawab na pinasahat ni Debata tu hita songon angka sordadu ni Debata laho manaluhon harajaon haholomon ni sibolis i, jala manghamonanghon harajaon ni Debata. Ala ni mansai ringkot nang manangianghon parbarita uli na godang mangadopi paraloan sian portibion asa unang sahat barita na uli i tu tongatonga ni angka bangso. I do umbahen gomos dipangidohon apostel Paulus asa dungo jala jugul tongtong tumangianghon angka na badia, dohot manangianghon dirina sandiri, asa dibuha pamanganna laho mandok sidohononna, laho pabotohon hahomion ni Barita na Uli, mardongan hiras ni roha. Asa torus rarat Barita na Uli i, unang tarambat dibahen huaso ni portibi on, nang pe jotjot do dirina dihurunghon parhuaso ni portibion, ala ni barita na uli i. Molo tongtong dungo jala jugul hita di bagasan ndang tagamon margogo sibolis i laho manaluhon hita. Ido nang dipodahon Jesus tu angka sisean-Na songon na disurathon di Mateus 26: 41: "Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!" ***
_____________________________
Evangelium: Epesus 6:10-20
10 Dungkon ni i, gabe togu ma rohamuna di bagasan Tuhan i dohot di bagasan hagogoonNa na togu i!
11 Solukhon hamu ma pahean sinjata na sian Debata, asa taralo hamu utiutian ni sibolis i.
12 Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i.
13 Dibahen i, jalo hamu ma pahean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude.
14 Antong, jongjong ma hamu, marhohoshon hasintongan di gontingmuna, angka naung manolukhon bajubaju partahanan, i ma hatigoran i.
15 Marsipatu ma patmuna, laho mangharinggashon barita na uli, pardamean i.
16 Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i.
17 Jangkon hamu ma nang tahuluk haluaon dohot podang ni tondi, i ma hata ni Debata.
18 Martangiang ma hamu, mardongan sandok pangidoan dohot elehelek di bagasan Tondi, manang sadihari pe, huhut dungo jala jugul tongtong, tumangianghon saluhut angka na badia,
19 nang ahu pe, asa dibuha pamanganhu, mandok sidohononhu, laho pabotohon hahomion ni barita na uli, mardongan hiras ni roha.
20 Ai tusi do disuru ahu na tarrante on, asa marhiras ni roha ahu disi, manghatahonsa songon na tama.
Epistel: Psalmen 34:16-22
16 Sai manatap do mata ni Jahowa tu angka partigor, jala pinggolNa tu angguknasida.
17 Matua alo ni angka sibahen na jat do bohi ni Jahowa, asa disiaphon sian tano on baritanasida i.
18 Mangangguhi do angka partigor, gabe ditangihon Jahowa do, jala dipalua nasida sian hagogotannasida sudena.
19 Donok do Jahowa di angka na bojok marroha, jala ditumpahi do angka na pogos tondi.
20 Lan pe parniahapan ni partigor, alai dipalua Jahowa do ibana sian sudena i.
21 Ibana mangaramoti holiholina sudena, ndang maponggol nanggo sada.
22 Sai hamatehonon ni parjahat do hajahaton, jala sai marutang do sogot angka na manghosom partigor.
23 Ditobus Jahowa do hosa ni angka naposoNa, jala ndang marutang sogot sude na marhaposan tu Ibana.
Tidak ada komentar:
Posting Komentar