RENUNGAN ROMA 8: 26-30, PANUMPAK NI DEBAGA DI ANGKA NA PINILLITNA (KARYA ALLAH BAGI ORANG PILIHANNYA)(

 PANUMPAK NI DEBATA DI ANGKA NA PINILLITNA (KARYA ALLAH BAGI ORANG PILIHANNYA)

             Rom: 8: 26-30


Horas ma di hita. Selamat Ari.Minggu VIII dung Trinitatis (26 Juli 2026). Las ma rohanta marsomba tu Tuhanta, mamuji pasangap goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion,  na dienet sian Surat ni apostel Paulus tu huria Rom 8: 26-30,  i ma taringot tu panumpak ni Debata di angka na pinillit-Na. Marlapatan do i, diurupi jala dipargogoi do saluhut àngka na pinillitna. Diboto Debata do, jolma na gale do angka jolma na pinillit-Na i, di pardagingon nang partondion, ala ni dosa i.. Asa boi hot jongjong, jala tarbahensa mangulahon dohot mangihuthon lomo ni roha-Na, ingkon Debata do marhite Tondi-Na na  margogoihonsa. Di bagasan turpukta, panumpahion i dipatupa di angka hagaleon ni jolma i.

1. Diurupi Tondi Parbadia do hita di hagaleonta.
Didok si Paulus, ala ni hagaleonta, ndang taboto songon dia sasintongna martangiang. Ala ni angka tangiang na ingkon sipasahatonta tu Tuhan i, nunga dipasahat Tondi i di hita. Adong dua alasan boasa ndang tarbahen hita be martangiang dohot sintong. Parjolo,  ala ndang tarbahen hita mamereng aha nanaeng masa tu jolo. Ndang tarbahen hita mamereng aha nanaeng masa tu sataon na naeng ro,  manang sajom na naeng ro pe tahe, na ringkot nian sitangianghononta, mangido asa boi sumisi sian hita angka na roa na so taboto. Paduahon, ndang tarbahen hita martangiang dohot sintong, ala di ganup situasi ndang taboto aha na dumenggan di hita. Jotjot do hita songon dakdanak  na mangido  sian na natorasna, na mambahen marmara tu dirina, jala Debata di posisi songon natoras na so mangoloi pangidoan ni anakna i ala boi marmara tu dirina na pinangidona i. Songon i do Debata naradophon pangidoanta, umbotoan do Debata aha na dumenggan silehononna tu hita. Anggo hita jotjot do tapangido sian Debata na hombar tu hagiotta sandiri, hape di na so taboto boi do marmara tu dirinta sandiri aha na tapangido i
Dibereng si Paulus do, ia tangiang i, suang songon angka na asing di ngolunta on, marharoroan sian Debata do. Diboto ibana anggo marhite usahanta sandiri, ndang tarbahen hita mandapot pamintori ni dirinta sandiri. Diboto ibana do  marhite hapistaran ni jolma pe,
ndang adong na umboto martangiang tu Debata. Ujungna mangihuthon di Paulus,  tangiang na singkop i ma na pasahathon sandok ngolunta dohot tondinta tu Debats, asa lomo ni roha ni Debata na saut di ngolunta, ndada lomo ni rohanta manang hagiotta sandiri. Di si ma ulaon ni Tondi Parbadia di bagasan dirinta. Di hagaleonta i Tondi Parbadia i ma mangula di bagasan tondinta.  Ibana ma martangiang di hita  marhite hata na tahoihon na so tangkas boi tahatahon. Tondi Parbadia do na pasingkophon tangiangta i tu Debata.  I ma pataridahon hagaleonta. Alai ndada dosa hagaleonta i. I do pataridahon batas ni hajolmaonta. Jadi Tondi Parbadia i na na patoranghon sude na taparungkilhon manang tahoihon tu Debata asa hombar tu lomo ni roha ni Debata tangiangta.

2. Na dohot do Debata mangula parohon na denggan di ngolunta. Didok di ayat 28 ni turpukta on, saluhut do manumpak tu na denggan di angka na marholong ni roha di Debata, angka na jinouna sian tahina hian. Jadi ndada holan manatap sian na dao Debata, alai dohot do mangula jala aktif di sude na masa di ngolunta. Dihamham i do nang di tingki masa arsak ni roha, di tingki keberhasilan, manang kegagalan, songon i nang di sitaonon dohot di angka hamaolon na taadopi. Alai on sude mangonai tu angka na manghaholongi Ibana, jala na tarjou hombar tu na sinangkapan ni Debata.  Halak na manghaholongi, manghaporseai jala na marpos ni roha di Debata  na sun habisuhon i, jala manjalo hadirion ni Debata songon Ama, parholong ni roha, boi do tarjalo ibana sude na nilehon manang na binahen ni Debata tu dirina. Dos do i tu sahalak na laho marubat tu dokter,  olo do pangubation na pinatupa ni dokter i, ndang tabo tu panghilalaanna, olo do mambahen hansit tu panghilalaanna, alai molo dihaporseai ibana do tindakan ni dokter i mambahen hamalumon ni sahitna,  jaloonna do aha na binahen ni dokter i tu ibana. Songon i do nang hita taringot tu na binahen ni Debata di ngolunta, molo na porsea jala holong do rohanta di Debata, boi do tarjalo hita na binahen ni Debata tu hita.  Alai molo na so holong do roha ni sadasada halak di Debata, jala ndang porsea di Ibana,  olo do ndang tarjalo rohana aha na binahen ni Debata tu dirina, jala mangalo lomo ni roha ni Debata. Holan di halak na manghaholongi jala manghaporseai  Debata do, boi manjalo sude na binahen ni Debata  sai manumpak tu na dumenggan do i di ngoluna. Pangantusion ni na denggan mangihuthon Debata, ndang sai hombar i tu hagiot ni jolma, alai na padengganhon pangalaho ni hita jolma do asa dos dohot Kristus.

3. Sandok haluaonta di bagasan tangan ni Debata do. Ibana do na mamungka haluaonta, jala Ibana do na paujunghon sahat tu na mangalehon hamuliaon. Di turpukta on, sangkap haluaon ni Debata, mulai sian panandaon-Na di jolma. Sian i do mangihut tu panodoon  manang pamilliton ni Debata na gabe bangso-Na.  Angka na tinodona i ma  dijou gabe ulaula-Na pasauthon sangkap haluaon ni Debata tu sandok jolma. Dungi angka na jinou-Na ma dipintori hombar tu asi ni roha ni Debata. Saluhut angka na manjalo pamintorion i marhite asi ni roha ni Debata di bagasan Jesus, i ma na sahat tu haluaon manjalo tohap hamuliaon di banuaginjang. Jadi sudena proses haluaon i na na niula ni Debata do, ndang adong sian diri ni jolma i.
Sian mulana nunga ditanda Debata jolma i, ai Ibana do na manompa. Diboto Ibana do jolma naung madabu tu dosa, jala ala ni i, ingkon mate do hona uhum ala ni dosa i. Panandaon ni Debata di jolma, i ma patuduhon holong ni roha ni Debata di jolma na tinompa-Na, tudos tu rupa-Na dohot pangalaho-Na. Ala ni dung madabu jolma tu dosa, manigor disangakapi do haluaon ni jolma i, asa unang mago ala ni dosana. Dipillit do bangso-Na, na patandahon diri Debata na sasada i tu angka bangso. Ditogutogu do bangso-Na laho manghirim tu haluaon na singkop marhite haroro ni Debata tuat tu portibion marhite Anak sasadasa, i ma Jesus Kristus. Di bagasan Jesus ma dipintori angka na dipillit jala dijou-Na asa gabe panean di harajaon ni Debata dohot dihangoluan na saleleng ni lelengna. I ma sihirimon ni angka na porsea. Ndang dapot hita i anggo sian usaha dohot gogonta sandiri, holan marhite panghophopon ni Jesus Kristus do i dapot hita.***


__________________________
Evangelium:  Rom 8:26-30
26 Alai nang Tondi i, diurupi do hita di hagaleonta i; ai ndang taboto, manang aha na tama sipangidoonta, gabe diondihon Tondi i do hita marhitehite hata na hinoihon na so tangkas hinatahon.
27 Alai diboto sitanda roha i do na pinarrohahon ni Tondi i, ai marguru tu lomo ni roha ni Debata do pangondihonNa di angka na badia i.
28 Alai taboto do, saluhutNa do manumpak tu na denggan di angka na marholong ni roha di Debata, angka na jinouNa sian tahiNa hian.
29 Ai angka na tinandaNa hian, i do ditodo, asa gabe tudos nasida tu pangalaho ni AnakNa i, asa Ibana na parjolo tubu sian torop anggiNa.
30 Jala angka naung tinodoNa, i do dijou; jala na jinouNa, i do dipintori; jala angka naung pinintoranNa, i do dipasangap.

_______________________
Epistel:  2 Musa 19:1-6 
1 Patolubulanhon dung ruar halak Israel sian tano Misir, di ari na sasada i sahat ma nasida tu halongonan Sinai.
2 Ai borhat do nasida sian Rapidim, gabe sahat nasida tu halongonan Sinai, laos marsaro nasida di halongonan i; disi do marsaro Israel tondong ni dolok i.
3 Dung i nangkok ma si Musa tumopot Debata. Jadi dijouhon Jahowa ma tu ibana sian dolok i, ninna ma: "Songon on ma dohononmu tu pinompar ni si Jakkob, paboaonmu tu halak Israel.
4 Nunga diida hamu, na Hubahen i tu halak Misir, na Huboan i hamu hira di atas ni habong ni pidong raja wali pasahat hamu tu Ahu.
5 On pe molo ditangihon hamu soarangKu, jala diradoti hamu padan na Hubahen i, jadi hasianHu ma hamu sian nasa bangso, ai gok di Ahu do liat portibi on.
6 Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel."