HALUAON NI SALUHUT BANGSO (KESELAMATAN BAGI BANGSA-BANGSA)
Sakaria 8: 20-23
Horas ma di hita. Selamat Ari.Mimnggu V dung Trinitatis (5 Juli 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panutirang Sakaria 8: 20-23, i ma taringot tu haluaon ni saluhut bangso. Panurirngon do on sian panurirang Sakaria, tàringot tu na ro ma tingkina, àngka bangso sian ganup parhataan dohot pangisi ni angka huta di portibion, na so Jahudi ro marrongoman mangalului Debata. Jahowa. Tartait do rohanasida ro masibetabetaan laho marsomba tu Tuhan i, ala marnida parngoluon ni angka na porsea di Debata Jahowa na mansorminhon holong ni roha dohot angka pambahenan ni Debata.
1. Sihol ni roha mangalului Debata.
Disurirangkon panurirang Sakaria do tu halak Juda, na masa do di ari sogot haimbaruon ni ngolu partondion ni angka bangso na adong di liat portibion. Marroan do angka bangso i mangalului Debata Jahowa. Panurirangon on manggombarhon na sahat ma haluaon i tu angka bangso. Ndada holan halak Israel be na dapotan kesempatan laho mananda jala marsomba tu Debata Jahowa, alai dohot ma angka bangso na di liat pirtibion songon na sinangkapan ni Debata hian sian mulana. Ai di bagasan sangkap ni Debata ingkon sude do bangso dapotan haluaon i. Jala laho pasauthon sangkap i do dipillit Debata bangso Israel gabe bangso-Na laho patandahon Debata na sasada i, i ma Debata Jahowa, tu angka bangso asa dohot nasida porsea jala marsomba tu Debata Jahowa. Marhite na porsea jala marsomba tu Debata Jahowa do dapot haluaon i, i ma haluaon sian gomgoman ni dosa dohot sibolis i.. I do sada sangkap ni Debata di pamilliton-Na di bangso Israel gabe bangso-Na. Dipabangkit nasida ndada gabe harajaon politis songon angka harajaon ni portibion, alai asa gabe harajaon hamalimon do jala bangso na badia. (2 Musa 19: 6). Dipapulik nasida gabe harajaon hamalimon dohot bangso na badia, i ma harajaon na langsung di bagasan gomgoman ni Debata, marhite angka malim angka naposo ni Debata na manguluhon parsombaon tu Debata Jahowa. Songon bangso ni Debata, ingkon naeng ma nasida gabe tiruan di haporseaon dohot parngoluon siganup ari tu angka bangso na humaliang, asa dohot nasida porsea jala marsomba tu Debata Jahowa. Alai ndang dapot songon i di bahen bangso Israel ai gabe tarela do nasida asa dos songon angka harajaon portibion na so mananda Debata Jahowa, na marsomba tu angka debata sileban na jinadihon ni jolma. Ndada holan tarela gabe dos dohot harajaon portibion na sifatna harajaon politis, laos dohot do nasida tarela marsomba tu angka debata sileban na sinomba ni angka harajaon portibion, jala parange nasida pe ndang songon parange ni bangso ni Debata be. Nunga dohot nasida marparange na so uhum, dohot ragam ni hajahaton dohot hageduhon songon na niulahon angka bangso na so mananda Debata Jahowa. Ala ni i jotjot ma harajaon Israel, songon i muse harajaon Juda dung mabola dua nasida hona uhum ni Debata. Gabe mago ma sàmpulu marga harajaon Israel i taon 722, jala harajaon Juda pe tarbuang do tu harajaon Babel taon 586. Nang pe dipalua raja Kores nasida dung pitupulu taon, tongtong do nasida dibagasan uhuman ni Debata, ai ndang hea be nasida sian mulai i gabe bangso na merdeka. Mago ma harajaon Juda i, ai nunga masorinsorin angka harajaon manggomgomi nasid. Alai muba ma nasida gabe ndang be sada harajaon na merdeka , alai gabe sada kelompok agama na ma, i ma agama Jahudi. Alai di situasi na songon i disurirangkon panurirang Sàkaria ma haluaon ni angka bangso. Marhite na dohot nasida masihol mangalului Debata Jahowa gabe Debata sisombaon jala sihaporseaanna. I ma na dipasaut Debata marhite haroro ni Jesus tu portibion, gabe Sipalua ni saluhut angka bangso, termasuk gabe Sipalua ni bangso Israel. Marhite barita na uli taringot tu haluaon na binoan ni Jesus, na pinasahat ni angka na porsea di Jesus tu angka bangso, gabe ro ma angka bangso parbegu hian ro di angka parhuaso marsomba tu Debata jala marsigantung tu suhisuhi ni ulos ni Jesus. Martubuan ma angka huria, i ma punguan ni angka na porsea di Jesus.
2. Tartait ala ni parngoluon ni angka na porsea.
Hararat ni barita haluaon na binoan ni Jesus, ndada holan ala ni barira na uli na pinasahat ni parbarira na uli, alai dohot do ala na tartait roha ni natorop di parngoluon ni angka na porsea i. Parngoluon ni angka na porsea na gabe sitiruon, gok holong ni roha, berintegritas, jala manghabiari Tuhan i, gabe torop ma nang angka bangso parbegu hian ( na so Jahudi) tartait rohana dohot marsomba tu Debata Jahowa. Songon i do pararat ni barita na uli i di mula ni hakristenon i. Ndada holan marhite angka parbarita na uli na khusus, alai dohot do marhite parngoluon ni halak Kristen, masibetabetaan laho marsomba tu Debata marhite na mangihuthon Jesus. Songon nanidok ni turpukta on di ayat 2 na mandok: "Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi." Jadi ndang holan ala ni parbarira na uli i, hatop rarat barita na uli i, alai dohot do marhite panindangion ni angka Kristen awam di ngoluna, dohot dukungan marhite tangiang dohot pambahenan. Jadi hita pe songon angka naung porsea di Jesus, dohot do hita marbarita na uli, marhite parange dohot parulaon na denggan, na hinalomohon ni Tuhanta i.
3. Tanggung jawab ni huria dohot angka na porsea mambaritahon barita na uli. Di tingki on nunga hira tu sude bangso na di portibion sahat barita haluaon na binoan ni Jesus. Nunga martubuan angka huria di tongatonga ni angka bangso. Alai ndang jadi mansohot ulaon marbarira na uli. Angka na porsea tarjou do gabe
"ulos" (jubah) na gabe parsigaungan ni paling saotik sampulu halak na so porsea do pe. Songon nanidokna di turpuk on, na ro ma tingkina : " I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna." ( ay. 23). Sada umpama do i, na manggombarhon tanggung jawab ni huria dohot angka na porsea do mangarahon angka na so porsea do pe di Tuhan i asa dohot gabe porsea. Disuru Tuhanta i do huria i dohot sude angka na porsea, asa gabe sitindangi na mangolu di Kristus i, asa angka na humaliang hita boi marnida holong ni Debata marhite hata nang pambahenanta. Pandonganion ni Debata di ngolunta, di tongatonga ni keluarga, nang di parsaoran ni huria i, boi tangkas dibereng portibion, gabe marhite i dohot nasida marsomba jala porsea di Debata. Jadi secara tidak langsung, boi do hita marbarira taringot tu Tuhanta i, marhite ngolunta siganup ari.***
_____________________________
Evangelium: Sakaria 8:20-23
20 Songon on do hata ni Jahowa Zebaot: "Ro dope anggo sogot angka bangso dohot pangisi ni angka huta bolon.
21 Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi.
22 Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa."
23 Songon on do hata ni Jahowa Zebaot: "I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna."
______________________________
Epistel: Pangungkapon 7:9-17
9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.
10 Gogo ma soaranasida manjoujou, angka ninna ma: "Tua ma di Debatanta, na mangkunduli habangsa i, dohot di Birubiru i."
11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata.
12 Ninna nasida ma: "Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen."
13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?
14 Jadi hudok ma mandok ibana: "Ale tuanku, ho do umbotosa." Gabe didok ma tu ahu: "I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.
15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan joroNa i, jala Ibana, na mangkunduli habangsa i, ma paulihon inganan di atasnasida.
16 Ndang be male nasida, ndang be mauas, ndang be ditinggang las ni ari nasida, manang dia na mohop pe.
17 Ai parmahanon ni Birubiru na di parsitongaan ni habangsa i do nasida jadi togihononNa ma nasida tu angka mual aek hangoluan, jadi apusan ni Debata nasa iluilu sian matanasida."
Tidak ada komentar:
Posting Komentar