RENUNGAN SEPANYA 3: 9-15, MANGEAHI HALUAON DI BAGASAN TUHAN I (MENCARI PERLINDUNGAN PADA NAMA TUHAN)

 MANGEAHI HALUAON DI BAGASAN TUHAN I (MENCARI PERLINDUNGAN PADA NAMA TUHAN)

             Sepanya 3: 9-15


Horas ma di hita. Selamat Ari Minggu XXI dung Trinitatis (25 0ktober 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Diisoarahon hata ni Debata do tu hita sadarion, i ma na dienet sian buku panurirang Sepanya 3: 9-15,  laho mangeahi haluaon di bagasan Tuhan i.  Sosososo ni Debata do on marhite panurirang Sepanya tu bangso-Na, asa mangarade nasida laho mangeahi haluaon na pinàrade ni Debata di bangso-Na. Diuhum Debata do bangso i, ala ndang satia nasida marsomba jala marhaporseaon tu Debata Jahowa. Ala kepentingan politis ni angka raja nasida, disomba nasida do nang angka debata sileban ni angka harajaon na humaliang, asa boi nasida didok roha nasida merasa aman sian gangguan ni angka harajaon na humaliang i na sai manosak nasida. Domu tusi ndang diradoti nasida be angka patik dohot uhum na pinasahat ni Debata tu nasida, gabe sega ma parrohaon ni bangso i, jotjot ma masa na so uhum angka hageduhon dohot hajahaton.  Alai tong do dibagabagahon Debata nang mangalehon haluaon, molo olo nasida paubahon rohana. Laho manomunomu haluaon i, laos dijouhon do tu bangso i asa mariaria jala marolopolop. Ala ni ndang manigor sahat boti haluaon i tu nasida, ingkon rade do nasida marhamubaon, jala manjanghon haluaon i di bagasan las ni roha.
1. Dohot do saluhut bangso paimbaruon ni Debata Jahowa asa gabe pangoloi di Ibana. Domu tusi patomutomuon ni Debata do tu nasida dila na pita, asa saluhut angka bangso i manjou goar ni Jahowa, jala marroha sisangunjur, manang marroha na tigor. Jadi ndang holan halak Israel dihalomohon Debata naeng paluaonna, alai sude bangso do, ai sude do bangso dihaholongi Debata, asa gabe bangso na malua sian gomgoman ni dosa dohot roha naung niramunan ni angka pingkiran na hodar. On porlu do botoon ni halak Israel, unang sai adong anggapan nasida, na holan nasida dapotan haluaon i, ala  pinasurung ni Debata nasida didok rohana laho manjalo harajaon ni Debata. Bangso Israel pe, molo so olo nasida paubahon rohana ingkon hona uhum ni Debata do, jala dipabali sian harajaon ni Debata.  Jadi di ari na sasada i, i ma ari naung binuhul ni Tuhan i, sude do angka bangso naung marserak di sandok tanoon, ingkon marsomba tu Debata Jahowa, ai nasida pe huria ni Debata do  naung marserak di sandok portibion. On dihatahon Debata marhite panurirang Sepanya tu halak Israel, asa adong hamubaon ni roha di nasida, unang be sai mangalo Jahowa,  unang sai mangasahon haginjangon, jala unang sai adong be di nasida teal dohot na patimbohon diri di dolok habadiaon ni Jahowa. Alai ganup ma marhaserepon patutoruhon dirina di adopan ni Tuhan i.
2. Molo adong hamubaon ni roha agohonon ni  Debata do uhuman naung sinangkapan-Na hian. On marlangku do tu sude angka bangso na rade paubahon rohana. Di son disuriranghon panurirang Sepanya do,   di ari na sasada i manang di ari ni Tuhan i,  dohot do nang angka bangso na asing marsomba jala mamboan peleanna tu Jahowa. Lapatanna ndada holan bangso Israel be na marsomba tu Jahowa. On digonopi di bagasan Jesus, ai marhite Jesus nunga dipaimbaru Debata padan-Na, ndada mangonai holan tu halak Israel be alai nunga mangonai tu sude bangso, na rade porsea jala manjanghon Jesus gabe Sipaluana. Baliksa tahe mago do halak Israel i, asing ni ebaeba manang pasipasi ni halak Israel i. Digombarhon do i di turpuk on, songon banso na dangol jala na parir, na sai marhaposan tu goar ni Jahowa. I ma na so mangulahi be marhageduhon, dohot manghatahon gabus. Ndang jumpang be di pamangan nasida dila sipaotooto, ai nunga mangolu nasida di bagasan parmahanion ni parmahan na denggan. Angka ebaeba manang pasipasi ni halak Israel i ma na rade manjanghon haroro ni Jesus gabe parmahan dohot sipaluanasida.  Sian tongatonga nasida muse dipillit Jesus gabe angka siseanna, mambaritahon Jesus i tu saluhut bangso.
3. Marlas ni roha manjanghon Sipalua dohot Raja na sinuru ni Debata. Sosososo asa  mariaia jala marolopolop nasida ganup laho manjanghon Sipalua sian uhum, na sinuru ni Debata Jahowa. Sosososo on  ditujuhon do dimulana i tu tu boru Sion, halak Israel dohot boru Jerusalem. Alai  martudu do i tu sude hajolmaon, sude angka bangso naung didondoni uhum ala dosa i, asa marlas ni roha mangeahi haluaon na binoan ni Tuhan i. Jala sosososo i laos tu hita na ma nuaeng, naung dapotan kesempatan mandapot haluaon na binoan ni Tuhanta. Ndang tagamon so mariaia jala marolopolop hita, ala di bagasan Jesus, nunga diunsat  Jahowa uhum na tu hita hia. Nunga ro Ibana gabe Raja, na mambahen ngolunta marhasonangan, ndang tagamon be marnida hinamago. Jadi i do songon puncak ni las ni rohanta,  di na ro Tuhan i gabe Raja di tongatonganta, na manggomgomi saluhut bangso di bagasan hadameon dohot hasonangan. Molo nunga Tuhanta i na gabe Raja di tonganta, ndang tagamon be adong na mangasahon gogo, dohot angka hageduhon, ro di angka na papeol uhum, hombar tu hagiotna be.  Jadi aha na sinuriranghon ni si Sepanya on, nunga digohi di bagasan Jesus. I bana do Raja ni angka raja jala Tuhan ni angka tuan siboan haluaon dohot hadameon ni portibi on.***

_____________________________
Evangelium: Sepania 3:9-15
9 Ai disi do patongononHu tu angka bangso dila na pita, asa saluhut nasida manjou goar ni Jahowa, asa dioloi nasida Ibana marroha sisangunjur.
10 Sian bariba ni angka batang aek Kus, togihonon ni halak na marsomba Ahu, huriangKu angka na marserahi bahen pelean sipanganon tu Ahu.
11 Di ari na sasada i ndang be tarurak ho ala ni sude pambahenanmu, angka na binahenmi mangalo Ahu; ai unsatonHu do disi sian tongatongami angka na teal mangasahon haginjangonmu, gabe ndang be datdatanmu patimbotimbo dirim di dolok habadiaonHu.
12 Jala tebahononHu do di tongatongami sada bangso na dangol jala na parir, angka na marhaposan tu goar ni Jahowa.
13 Ia ebaeba ni Israel, ndang be ulahononna hageduhon, jala ndang be hatahononna gabus; jala ndang be jumpang di bagasan pamangannasida dila sipaotooto, ai torang do nasida marparmahan jala marpangulonan, jala ndang adong na manonggoti.
14 Mariaia ma ho, ale boru Sion! Marolopolop ma ho ale Israel! Marlas ni roha ma ho jala marolopolop sian nasa roham, ale boru Jerusalem!
15 Nunga diunsat Jahowa uhumNa tu ho, nunga disiaphon musum: Ai Jahowa raja ni Israel do di tongatongami, ndang be idaonmu hinamago.

________________________________
Epistel:  1 Johannes 2:18-27
18 Hamu angka anaha, tingki parpudi do nuaeng; jala songon naung binegemuna, na naeng ro Antikristus i; nunga lan gabe Antikristus; sian i do taboto, nuaeng ma tingki parpudi.
19 Sian tongatonganta do nian haroroannasida, alai ndang donganta nasida; ai aut donganta nasida, udur ma nasida dohot hita; alai naeng patar ma nasida, na so donganta saluhutna i.
20 Naung miniahan ni na badia i do hamu, jala saluhut hamu umbotosa.
21 Hubahen pe surat tu hamu, ndada ala so diboto hamu hasintongan i, ala naung diboto hamu i tahe, jala ndang sian hasintongan nasa gabus.
22 Ise do sipargabus i, ia so na mansoadahon, na mandok: Ndang Kristus i Jesus? I ma Antikristus, na mansoadahon Ama i dohot Anak i.
23 Ganup na mansoadahon Anak i, ndang di ibana nang Ama i. Halak na marhatopothon Anak i, di ibana do nang Ama i.
24 Mian ma di bagasan hamu na binegemuna sian mulana i! Molo mian di bagasan hamu na binegemuna sian mulana i, mian ma nang hamu di bagasan Anak i dohot di bagasan Ama i.
25  Jala anggo bagabaga na pinarbagabaga na i tu hita, i ma ngolu na salelenglelengna i.
26 Angka i do husurat tu hamu taringot tu angka na mangaliluhon hamu.
27 Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu!