SAI TONG DO MANGARANAP MATANGKU TU JAHOWA (MATAKU TETAP TERARAH KEPADA TUHAN),
Psalmem 25: 15-22
Horas ma di hita. Selamat Ari Minggu XVII dung Trinitatis (27 September 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata tu tu hita sadarion, na dienet sian buku Psalmen 25: 15-22, asa sai tong mangaranap matanta tu Jahowa. Mangaranap lapatanna, màmereng dompak tu na dao. Jadi molo dipangido hata ni Debata na di turpuk on asa sai mangaranap matanta tu Jahowa marlapatan do i asa sai tadompakhon ngolunta hibul mamereng tu Jahowa. Tangiang ni sahalak na porsea do turpuk on, i ma si David, na manghilala sitaonon na bernit situtu, hira na tarpungjung ngoluna dihilala ndang adong dongan, dohot ala ni na marparungkilhon dokdok ni dosa na pasorathon rohana, alai tongtong ibana mandompakhon pamerengan dohot panghirimonna tu Jahowa. Ala ni adong manang piga na boi gabe jamita sihangoluhononta sian turpuk on, i ma:
1. Tadompakhon ma tongtong pamerenganta tu Debata. Songon di David na patudoshon dirina, songon pat na hona jorat ni jorgong siala angka sitaonon na niadopanna, songon i do nang ngolunta, na tarjorat tu jorgong ni sibolis i. Ala ni jorgong ni sibolis i, godang ma hita manaon na bernit di ngolunta di portibion. Ndang adong be dapot hasonangan di ngolunta. Godang ma angka masalah dohot hamaolon na taadopi. Ndang tarbahen hita be malua sian jorgong ni sibolis sian dirinta. Dalan haluaon i ma ingkon sai mangaranap ma matanta tu Jahowa mardongan panghirimon, ai holan Ibana do na tuk paluahon patta sian jorgong ni dibolis i. On taulahon tontu marhite na pasahat sandok ngolunta tu Debata di bagasan tangiang. Marhite tangiang do hita pasahathon sandok na masa di ngolunta tu Debata. Di tongatonga ni portibi on, jotjot do ngolunta mangadopi ragam ni persoalan, hamaolon, ragam ni angka na bernit, pangarupaon, na mambahen hita hira na tarhapit, manang tarjorgong. Angkup ni i, sipata boi hita manghilala hira na tarpunjung di ngoluon, ndang adong na mangantoi ngolunta, ala ganup halak nunga holan mamingkirhon dirina sandiri. Alai di situasi na songon i ma hita ndang jadi mandao sian Tuhan i. Ingkon sai tapajonok ma dirinta tu Ibana, na rade tongtong paluahon hita sian hagogotanta. Marhite tangiang tapangido pangurupion, laho mangondihon hita. Laos domu tusi, tapando hasesaan ni dosanta, ai ala ni dosa i do umbahen jotjot humasusa hita di ngolunta on.
2. Tapaunduk tongtong dirinta di bagasan haserepon diadopan ni Tuhanni. Dipapatar si David do saluhut na bernit ba niaena tu Tuhan i. Ndang adong na ditabunihon ibana, ai diboto ibana patar do i saluhutna di adopan ni Tuhan i. Panghilalaanna na punjung, na hona tindas, na marungkil, dipasahat ibana tu Tuhan i di bagasan haserepon dohot unduk ni roha. Diokuhon ibana do nang hagaleonna, songon i dohot angka dosa na niulahonna, na so adong manang aha sipangasahononna di adopan ni Debata. Ala ni sandok ngoluna dipasahat ibana ma tu Debata, na dihaporseai jala dihirim rohana tuk paluahon ibana. On manogunogu hita asa ungkap rohanta mangokuhon hagaleon dohot hahuranganta tu Debata. Ndang adong manang aha na denggan na taulahon na boi pangasahononta tu Tuhan i. Ingkon tongtong do hita di bagasan unduk dohot serep ni roha mangido asi ni roha ni Debata. Bulus dohot ias ni rohanta pasahathon sude na pasorathon rohanta di ngolu on, ido na boi pahothon rohanta di bagasan habengeton laho managam pangurupion ni Tuhan i. Halak na di bagasan haporseaon dohot pos ni roha pasahathon ngoluna tu Tuhan i, ndang hea dipaila Tuhan i, luangan sambing so dapotan manang aha sian Tuhan i.
3. Tongtong manghaporseai Tuhan i nang pe di na masa hamaolon. Turpuk on tong do manogunogu hita asa tongtong manghaporsea i Tuhan i nang pe di na masa hamaolon na taadopi. Di na tarjou si David gabe raja gumomgom Israel, godang hamaolon diadopi sian angka na manghasogohon ibana. Dihasogohon raja Saul do ibana, di pangaradeon ni dirina gabe raja, ala dibereng raja Saul, ibana songon saingan na naeng mandabuhon ibana. Di sogo ni roha ni raja Saul i, pola manang piga hali disangkapi raja Saul naeng mamunu ibana, alai sai disundati Debata do sangkapna na jahat i. Songon i dung raja pe ibana, torop do halak na marsogo ni roha marnida ibana. Alai di situasi na songon i ma ibana tongtong pasahathon sude ngoluna laho mangulahon harajaon i tu Debata Jahowa. Ndang ditabunihon ibana angka na borat na niadopanna tu Debata. Diangkui ibana do na mansai godang musu na manghasogohon ibana. On patuduhon tu hita, ngolu na sintong di adopan ni Debata, ndang malua sian godang tantangan dohot paraloan ni portibion. Ala ni i do asa songon si David hita, tongtong mangido pangarupion ni Tuhan i laho mangondihon hita. Jala si David sandiri, ndada holan dirina dipangido ondihonon ni Debata, alai dohot do bangsona, i ma bangso Israel na ni rajaanna hatiha i. I ma patuduhon tanggung jawabna, tu bangso i, na tu si ibana dipabangkit Debata gabe raja. Sian bulus ni roha dohot ibana mangido tu Debata asa dipalua Debata bangso-Na i sian hagogota. On ma tanggung jawab na mansai balga di ibana, songon raja, na so holan mamingkirhon dirina, alai tongtong do mamingkirhon bangso na nirajaanna i, asa dipalua Debata sian hagogotanna sudena. Ala ni molo dipangido ibana pe asa dipalua Debata dirina sian hagogotan rodi ragam ni na manosak ngoluna, ndada holan na ringkot di dirina na pinangudona i, alai na ringkot di haluaon ni bangso i do, ala dihilala ibana nunga menyatu dirina dohot bangso i. ***
_______________________________
Evangelium: Psalmen 25:15-22
15 Sai tong do mangaranap matangku tu Jahowa, ai Ibana do mangenet tothu sian jorgong.
16 Sai dompakhon ma ahu, jala asi rohaM di ahu, ai punjung jala na dangol do ahu.
17 Lam ganda do hagogotan ni rohangku, sai palua ma ahu sian angka hasosahanhu.
18 Sai tatap ma dangolhon dohot ngaluthon, jala marpamuati ma rohaM di angka dosangku sudena.
19 Ida ma angka musungku, ai lan do nasida, jala hosomhosom pangarupaon dibahen nasida manghosom ahu.
20 Sai ramoti ma tondingki jala palua ahu, unang tung paurak ahu, ai marhaposan tu Ho do ahu.
21 Halidangon dohot hatigoran ma mangaramoti ahu, ai marhaporusan tu Ho do ahu.
22 Ale Debata, sai palua ma Israel sian angka hagogotanna sudena.
_________________________
Epistel: Johannes 9:1-11
1 Dung i di na mamolus i Ibana, diida ma sada halak na mapitung tubu.
2 Gabe ninna angka siseanNa ma manungkun Ibana: "Ale Guru, ise do na mardosa, halak on do manang natorasna, umbahen na mapitung ibana tubu?"
3 Jadi dialusi Jesus ma: "Ndada ala ni dosana manang ala ni dosa ni natorasna; alai naeng gabe patar angka ulaon ni Debata di ibana.
4 Ingkon ulaonHu do ulaon ni na marsuru Ahu, saleleng arian; ai dung ro borngin, ndang tarbahen mangula disi manang ise.
5 Panondang ni portibi on do Ahu, tagan di portibi on Ahu."
6 Jadi dung didok songon i, ditijuri ma tano i mambahen gambo marhite sian ijurNa i, didalohon ma gambo i tu matana.
7 Dung i didok ma tu ibana: "Laho ma ho marsuap tu dano Siloa (na mandok: Na sinuru)" Jadi laho ma ibana marsuap, gabe marnida ma ibana mulak.
8 Dung i didok hombar bagasna ma ro di angka na marnida ibana najolo mangidoido: "Nda on do na somal hundul mangidoido?"
9Jadi adong ma deba na mandok: "Ibana do i."
Alai na deba mandok: :Ndangana, suman do ibana tusi." Didok ibana do: "Ahu do i."
10 Dung i ninna nasida ma: "Beha do hamumungkap ni matami?"
11 Jadi didok ma mangalusi: "Halak i na margoar Jesus, i do pauli gambo, didalohon ma i tu matangku, jadi disuru ahu marsuap tu dano Siloa; dung i laho ahu tusi marsuap, jadi marnida ma."
Tidak ada komentar:
Posting Komentar