MANGOLU HOMBAR TU LOMO NI ROHA NI DEBATA (HIDUP MENURUT KEHENDAK ALLAH).
1 Tessalonika 2: 8-12
Horas ma di hita. Selamat Ari Minggul XXII dung Trinitatis ( 1 Nopember 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat parjolo ni apostel Paulus tu huria Tessalonika (1 Tessalonika) 2: 8-12, asa mangolu hita hombar tu lomo ni roha ni Debata. Dipatuduhon apostel Paulus do tiruan ni lomo ni roha ni Debata, i ma marhite na mangalehon ngoluma bahen tiruan di huria i, na rade mamelehon sandok ngoluna mamaritahon barita na uli dohot panghobasion di huria i. Songon i dohot marhite na mangula sian nasa gogo, dohot ngolu na di bagasan hadaulaton, na tigor jala so hasurahan, jala patuduhon holong ni rohana tu huria i, songon holong ni amaama maradohon anakna. Adong manang piga hal sihangoluhononta disosohon turpuk on tu hita.
1. Mangolu di bagasan holong ni roha na polin. Si Paulus dohot donganna saulaon, mangolu hombar tu lomo ni roha ni Debata, marhite mangulahon ulaonna sian roha holong na polin. Ndada holan marhite hata nasida mangajari huria i, alai tung sandok do ngoluna diseahon tu huria i. Olo do nasida loja jala humasusa sahat tu na manaon godang na porsuk ala ni huria i. Mulaulaon do nasida arian dohot borngin, asa unang gabe boban ibana dohot angka donganna di huria i. I ma ala holong ni rohana di huria i. Angka na mangula di bagasan holong na polin, ingkon rade do loja mangula ulaonna. Ndang dihasiati gogona. Diboto do tanggung jawabna, manang aha pe ulaon na pinasahat ni Debata tu ibana. Ndang olo mangalului paruntungan tu dirina sandiri, marhite na marsidalianhon barita na uli. Songon i do si Paulus laho manogunogu angka na porsea i, asa diboto muse mangargahon barita ba uli na binoan nasida. Marhite cara nasida i, ndada na naeng mangajari angka na porsea i paluahon diri sian tanggung jawabna tu angka parbarita na uli na mamboan hata ni Debata tu nasida. Alai na mambahen tiruan do apostel i, asa diboto huria i mangargahon ulaon ni parbarira na uli. Marhite i boi lam tubu jala magodang di nasida holong ni roha, songon holong ni roha naung pinatuduhon ni apostel Paulus tu nadida. I do sada ngolu na dihalomohon ni Tuhan i sian angka na porsea, olo loja jala managihon ngoluna tu donganna, laho mangula angka na denggan tu donggan. Mangula angka na denggan tu dongan ndang sae ingkon na manuntut upa ni halojaon. Alai sudena i, i ma tanggung jawab tu dongan ala naung jumolo manjalo angka na denggan sian Tuhan i.
2. Marpangalo na daulat roha jala na so hasurahan. I do pangalo na dipatuduhon si Paulus tu huria i dohot tu sude angka na porsea. Parroha na daulat, i ma parroha na badia, na tongtong pangoloi jala sisomba Debata. Ala ni hadaulaton i, gabe haposan ma di Debata, tigor rohana, bulus, ndang adong hageduhon, jala ndang diboto mangangkalangkali manang ise pe. Halak na daulat roha, laos haposan do i di donganna jolma. Ndang masialoan hatana dohot pangulaonna. Halak na songon on ma na laos somal digoari halak na berintegriras. Hombar hatana tu naniulana. Manang aha pe ulaon ni angka na porsea, ingkon halak na daulat jala na tigor roha do ibana, tanda ni na mangolu ibana di bagasan Tuhan.i. Laos domu tuson do halak na so hasurahan pangalahona. I ma halak parroha na denggan, na so adong tihas ni pangalahona, sihagigihonon ni angka dongan. Lapatanna hombar do pangalahona tu ruhutruhut na denggan di parugamoon dohot di haporseaon. Ndang adong siinsahan pangalahona, na gabe sihasogohon ni halak. Ala so hasurahan pangalahona, gabe halomoan ni Debata ma ibana, jala halomoan ni donganna jolma.
Jadi angka i ma deba pangalaho na hombar tu lomo ni roha ni Tuhan i, sihangoluhonon ni angka na porsea di Tuhan i.
3 Marparange songon na tama maradophon Tuhan i. Hira dos do on songon naung dipatorang di ginjang. Si Paulus marpangalo na daulat roha, na tigor jala na so hasurahan. I do parange na tama maradophon Tuhan i, naung manjou angka na porsea, gabe partohap di harajaon ni Debata. Jadi molo dung gabe warga ni harajaon ni Debata, ingkon unduk ma tu angka aturan dohot ruhutruhut ni harajaon ni Debata. Alai molo pe naung warga ni harajaon ni Debata hita, ingkon tong do hita gabe warga ni harajaon ni pirtibion, isara ni di dia hita songon warga negara. Unduk tu harajaon ni Debata, ndang boi i masialoan dohot haunduhonta di hawarganegaraonta di portibi on. Ai songon warga ni sadasada negara hita, ingkon tarjou do hita disi marparange songon warga ni harajaon ni Debata, i ma marparange songon na tama maradohon Tuhan i, marhite haunduhon tu panggomgomi na marsahala, na manjalo sahalana sian Tuhan i. Jadi ingkon sai tapahombar do parangenta, songon warga ni sada negara, tu panjouon na tu hita sian Tuhan i, jala hombar tu hamuliaon ni Debata. Jadi manang didia pe angka naporsea mangolu, ingkon boi do gabe tiruan di keluarga, di ulaon siganup ari dohot di tongatonga ni masyarakat. Jadi marhite i do hita secara tidak langsung mangalo angka parange dohot sikap na so hombar tu lomo ni roha ni Tuhan i. Jala marhite i do hita gabe pasupasu dohot siboan sondang hatiuron di tongatonga ni bangsonta dohot masyarakat. Jadi di tongatonga ni masyarakat, bangso dohot negara na di portibion ingkon tongtong patuduhononta dirinta songon warga harajaon ni Debata, marparange na denggan songon na tama di Tuhan i, jala na ingkon oloan di Debata sian angka na marhuaso di portibion.***
________________________________
Evangelium: 1 Tesalonik 2:8-12
8 Songon i do sian sihol ni rohanami di hamu huhalashon hami do mangalehon tu hamu barita na uli na sian Debata; lobi tahe, dohot ma antong dirinami, ala naung huhaholongi hami hamu.
9 Ai diingot hamu do, ale angka dongan, halojaon dohot hasusaannami, ai arian dohot borngin hami mulaulaon, unang marhaboratan hamu; songon i do hubaritahon hami tu hamu barita na uli na sian Debata.
10 Hamu do sitindangi angkup ni Debata, paboa na daulat, na tigor jala na so hasurahan hami maradophon hamu angka na porsea.
11 Suang songon i diboto hamu: Huapoi hami do hamu sadasada, songon pangapoi ni amaama di anakhonna, jala huapuli hami;
12 jala hubulani hami do hamu, asa marparange hamu songon na tama maradophon Debata, na manjou hamu tu harajaonna dohot tu hasangaponna i.
________________________
Epistel: Psalmen 43:1-5
1 Luluhon ahu, ale Debata, jala badahon badangku dompak bangso na so daulat, sai palua ma ahu sian baoa siulahon sipaotooto dohot hajengkelon.
2 Ai Ho do Debata ni hagogoonhu, boasa tung ambolonghononmu ahu? Boasa ingkon sai martujungtujung ahu mardalan binahen ni pangarsahi ni musu?
3 Tongoshon ma hatoranganMu dohot hatigoranMu, angka na manogu ahu, pataruhon ahu tu dolok ni habadiaonMu dohot tu ingananMu.
4 Asa tung masuk ahu tu langgatan ni Debata, tu Debata silas ni rohangku, asa hupuji Ho mardongan parhinaloan, ale Debata, Debatangku tongon.
5 Boasa sai tungki ho, ale tondingku, jala sai rusak di bagasan ahu? Haposi ma Debata, ai sai na pujionhu dope Ibana, hatuaon ni bohingku jala Debatangku.
Tidak ada komentar:
Posting Komentar