NAPOSO NA DENGGAN ROHA JALA HAPOSAN (HAMBA YANG BAIK DAN SETIA)
Lukas 19: 11-27
Horas ma di hita. Selamat Ari Minggu XXIV dung Trinintatis (15 Nopember 2026). Las ma rohanta marsomba tu Tuhanta mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion, na dienet sian buku Evangelium Lukas 19: 11-27, asa angka na porsea di Jesus, gabe angka naposo na denggan roha hita jala haposan songon angka sisean ni Tuhanta. Dihatahon Jesus do i tu angka sisean-Na, marhite sada umpama. Di umpama i di hatahon Jesus do taringot tu sàhàlak raja na naeng borhat tu.luat na dao laho manjalo harajaon i. Ndang dipaboa manang sadia leleng raja i di pardalananna i, ai dung pe dipasahat tu ibana harajaon i asa mulak ibana muse. Alai andorang so borhat ibana, dipasahat do tu sampulu halak naposona, uang "mina" sada be asa pagandaon nasida uang i saleleng di nà laho raja i. Molo tàpatudos tu umpama ni Jesus di Matius 25: 14-30, ndang uang mina na pinasahat ni indukna tu angka naposona i, alai talenta do, na sada manjalo lima talenta, na paduahon dua talenta, dungi na patoluhon sada talenta, hombar tu hatauon ni angka naposo i laho padalanhonsa. Sian sudut nilai ni mata uang, dao ummarga do talenta sian mina. Molo samina i ma asam ni upa ni sahalak parkarejo hatiha i leleng ni saratus ari. Molo talenta marasam na sa arga ni onom pulu mina Jadi dao ummarga do talehta sian mina. Ndang apala mina manang talenta i na tapersoalhon. Alai uang mina manang talenta pe i, hadosanna na tabereng, adong arta na pinalumehon ni tuanna i tu angka naposona, sipagandaon ni naposona i, saleleng na borhat tuanna i tu luat na dao. Jala ganup naposo i ingkon martanggung jawab tu ulaon na pinasahat ni tuanna i, situngguon ni tuanna i muse, ia dung mulak ibana. Umpama on dihatahon Jesus tu angka sisean-Na di laho bongot Ibana tu huta Jerusalem, pasunhon ulaon-Na na parpudi di portibi on, paima so mulak Ibana muse tu banuginjang, laho manjalo tohap harajaon-Na sian Ama i. Pada umumna angka na natorop na mangihuthon Jesus hatiha i, songon i nang angka sisean-Na manghirim, dihabobongotna tu huta Jerusalem, disi ma Jesus papatarhon diri-Na songon raja. Alai laos torop do na manghasogohon Ibana dipabangkit gabe raja. Gabe marhite umpama on ma ibana patuduhon, na so songon raja ni portibi on harajaon-Na, sipasahaton ni Ama i tu Ibana, ia dung sun diulahon ulaonna di portibion, jala mulak Ibana tu Ama i, laho manjalo tohap harajaon ni Debata. Ibana ma Raja ni angka raja na manggomgomi nasa bangso na di portibi on. Di kesempatan parpudi laho borhat tu Jerusalem, disi ma dipasahat Jesus umpama na di turpuk on, na pasunggulhon tu angka sisean i dohot tu sude na mangihuthon ibana, taringot tu arta na arga naung dipasahat tu nasida, i ma marhite pangajarion dohot barita na uli naung pinasahat ni Jesus. Sipartanggungjawabhonon ni sude angka na porsea i do i muse tu Jesus, ia dung ro Ibana songon Raja jala Panguhum ni sandok jolma.
1. Dipasahat Jesus do tu angka na porsea tugas dohot tanggung-jawab pahembanghon arta ni harajaon ni Debata. Andorang so manaek Jesus tu banua ginjang, nunga dipasahat ulaon na mansai arga, i ma pahembanghon barita na uli naung jinalo nasida. I do arta na mansai arga di harajaon ni Debata, ndada huaso manang arta portibion. Ndada holan tu angka sisean na parjolo i non i dipasahat Tuhanta alai tu sude angka na porsea do na mangihuthon Ibana. Ingkon si pahembangon ni angka na porsea i do i, marhite na na manghangoluhon barita na uli jala mambaritahonsa tu angka na humaliang, hombar tu potensi na adong di ganup na porsea i. Mambaritahon barita na uli i, ndada holan marhite hata sambing, alai lumobi do marhite na manghangoluhonsa, asa patar harajaon ni Debata marhite hita. Harajaon ni Debata ndada songon harajaon portibion, na marojahan di huaso politis, alai marhite pangulaon do di pangalaho harajaon ni Debata, i ma hatigoran hasintongan dohot holong ni roha tu saluhut halak so mardiaimbar. Marhite na manghangoluhon barita na uli gabe dao ma angka pangalaho na so uhum, ro di ragam di angka hageduhon dohot hajahaton.
2. Sipartanggung-jawabhononta do tugas dohot ulaon na pinasahat ni Tuhan i tu ganup na porsea i. Molo dipasahat induk i pe tugas tu angka naposona i marhite na mandalanhon hepeng mina na dipasahat tu nasida, sada ujian do i tu angka na poso i, olat ni dia haburjuon dohot hasetiaon nasida maradophon indukna i. Dihirim tuanna i do i gabe angka na poso na denggan roha jala haposan nasida, haposan di angka siulaon na metmet dungi marhite i ma pasahatonna tu nasida siulaon dohot tanggung jawab na umbalga. Dung dijou tuanna i angka na poso i, didok naposo parjalo ma: Tuan sampulu bagian do diomo si sabagian na sian ho i. Dungi dipasahat ma i hibul tu tuan i. Mansai las ni tuanna i laho manjalo partanggung-jawan ni naposo parjolo i, gabe didok tuanna i ma tu ibana: "Taho ma i, ale naposo na denggan roha, Ala haposan ho di na otik situtu sampulu huta ma gomgomanmu." Songon i tu na poso na paduahon, dipasahat ibana ma na dapot jala na boi diulahon i ma, i ma lima bagian. Las do nang roha ni tuanna i disi, ala diulahon naposo na paduahon i tugas na pinasahat ni tuanna i, hombar tu kemampuanna be. Gabe dipasahat ma tu ibana lima huta laho gomgomanna. Alai ro ma na patoluhon, ndang adong diulahon manang aha na sinuru ni tuanna i. Ditungkus do mina sisadasada i, ai ndang denggan rohana maradophon tuanna. Ala ni tardok na ibana ma naposo na so haposan, jala na jahat roha. Gabe dibuat ma bagianna i, jala dipasahat
ma tu parbagian ba sampulu i. I ma gombaran ni pertanggungjawabanta sogot di paruhuman parpudi dung mulak Jesus naung manjalo tohap harajaon i sian Amana.
3. Naeng ma hita gabe angka naposo na denggan roha hala haposan di adopan ni Debata. Di na paimahon haroro ni Jesus di ari parpudi i, dilehon do di hita ragam ni silehonlehon na arga, dohot potensi, hombar tu kemampuanta be. Ala ni i ndang boi hita passif sambing di ngolunta on. Dipangido do hita aktif mulaulaon, pahembanghon harajaon ni Debata. Ingkon tongtong do hita gabe pasupasu marhite silehonlehon ni Debata tu hita. Molo so sambing do hita songon naposo na patoluhon i, na marlapatan do i, na so mangargahon silehonlehon ni Debata do hita disi . Ingkon pagandaonta do silehonlehon ni Debata na tu hita, asa marhite na aktif hita laho mangulahon angka naung pinasahat ni Tuhan i tu hita, lam tu hembangna harajaoon ni Debata. Taingot ma, di haroro ni Tuhan i di ari parpudi, dipangido Tuhan i pertanggung-jawaban ni aha naung taulahon hombar tu tugas panggilan na dipasahat tu hita be.***
____________________________
Evangelium: Lukas 19:11-27
11 Jadi dibege nasida ma i, gabe didatdati Ibana marumpama, ala naung donok tu huta Jerusalem; jala dirimpu nasida, manigor sipapataron ma harajaon ni Debata.
12 Asa didok ma: "Naeng borhat ma sahalak na raja tu luat na dao, manjalo harajaon; dung pe i, asa mulak muse.
13 Jadi dijou ma naposona sampulu halak, dilehon ma tu nasida sampulu bagian, laos ninna ma mandok nasida: Tigatigahon hamu ma i, paima ro ahu muse!
14 Alai hosom do roha ni angka na nirajaanna mida ibana, disuru nasida ma suruannasida sian pudina, paboahon: Ndang olo hami rajaan ni i!
15 Asa dung dijalo harajaon i, ro ma ibana mulak, jala disuru ma na manjou angka naposona, naung manjalo hepeng i, asa diboto na niomohonna be.
16 Jadi ro ma na parjolo i, ninna ma: Tuan, sampulu bagian do diomo bagian na sian ho i.
17 Gabe ninna ma mandok ibana: Taho ma i, ale naposo na denggan roha, Ala haposan ho di na otik situtu sampulu huta ma gomgomanmu.
18 Dung i ro ma na paduahon i, ninna ma: Ia bagian na sian ho, tuan, lima bagian do diomo.
19 Jala ninna ma nang tu ibana: Ia ho, lima huta ma gomgomanmu.
20 Jala ro ma na asing mandok: Na, bagianmon, tuan; hutungkus do i di saputanganku.
21 Ai biar do rohangku mida Ho, ala na horas ho; dibuat ho do na so pineakhonmu, jala digotil ho do na so sinuanmu.
22 Gabe didok ma tu ibana: Mangihuthon pandokmi do uhumonku ho, naposo na jahat roha! Diboto ho do hape, ahu halak na horas, sibuat na so hupeakhon, sigotil na so husuan.
23 Boasa so dilehon ho antong hepenghi
tu sianahi hepeng, asa hutunggui rap dohot bungana di harorongkon?
24 Laos didok ma tu angka donganna: Buat hamu ma sian ibana bagianna i; lehon hamu ma i tu parbagian na sampulu i!
25 Jadi ninna nasida ma mandok ibana: Alai nunga sampulu bagian di ibana, Tuan!
26 Hudok ma di hamu: Di ganup paradongan lehonon do; alai sibuaton do sian na so paradongan na di ibana hian.
27 Alai ia musungki, na so olo rajaanhu, boan hamu ma tuson; seseati hamu ma nasida di jolongkon!"
________________________
Epistel: Daniel 6:1-6
1 Dung i sahat ma harajaon i tu si Darius, halak Madai, uju marumur ibana onompulu dua taon.
2 Dung i dihalomohon roha ni si Darius ma pabangkithon saratus duapulu induk parentahon harajaon i, angka na sinagihonna di sandok harajaon i.
3 Dipabangkit huhut tolu halak sintuanasida, si Daniel ma sada; asa mardabudabu angka induk i tu nasida, asa unang rajai marharugian.
4 Alai ditindi si Daniel ma angka sintua dohot angka induk i marroha, ai tondi na sumurung do di bagasan ibana. Jadi disangkap roha ni rajai ma pabangkithon ibana bahen palumean ni sandok harajaonna i.
5 Jadi mangalului sindir ma angka sintua dohot angka induk i dompak si Daniel taringot tu panggomgomina; alai ndang adong sindir jumpang nasida manang hajahaton nanggo sada, ai haposan do ibana, ndang adong jumpang sala manang hajahaton nanggo sada di ibana.
6 Dung i ninna angka baoa i ma: Ndang tagamon adong dapot hita sindir nanggo sada dompak si Daniel on, molo so jumpang hita marhite sian patik ni Debatana padapot ibana.
Tidak ada komentar:
Posting Komentar