RENUNGAN PODA (AMSAL) 3: 9-10, PASANGAP MA JAHOWA MARHITE HAMORAON DOHOT DAGINGMU.

 PASANGAP MA JAHOWA MARHITE HAMORAON DOHOT DAGINGMU.

Horas ma di hita. Selamat Ari Minggu XXII dung Trinitatis (5 November 2023). Las ma rohanta marsomba tu Tuhanta sadarion, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Buku Poda Sipaingot sian Raja Salomo bindu 3: 9-10, asa tapasangap Debata Jahowa marhite sude na adong di hita i ma arta dohot daging manang pamatangta.

1. Nampuna ni Debata do arta nang dagingta pe. Diparade Debata do siulaon jala siradotan ni jolma na tinompana i, jala marhite gogo ni naniulana i do Debata manarihon ngolu ni jolma. Di mulana i tarbatas do pangulaon ni jolma, i ma songon siula tano jala ihut ma tusi mamiaro dorbia manang ragam ni angka pinahan. Alai hombar tu perkembangan ni jolma marhite hapistaran na dilehon tu jolma i, lam marragam ma siulaon ni jolma na gabe mual ni hangoluanna na pinarade ni Debata. Lam maju ma nang budaya ni jolma, lam maju parngoluon siganup ari. Sian angka gogo ni na niulana i lam tamba ma artana, manang hamoraonna. Alai manigor ditogutogu do jolma asa unang manghalupahon Debata na gabe haroroan ni sude na adong di ibana, molo tung pe nunga godang artana. Unang ala ni arta manang hamoraonnai gabe lupa di Debata, manang gabe marhaposan ibana tu artana i. Unang gabe artana i dipardebata na gabe jaminan ni ngoluna. I do umbahen dipllit Debata sada bangso hasahatan ni hata ni Debata, sitogutoguon ni Debata gabe tiruan di haporseaon, dohit di sude pangalaho maradophon Debata, maradophon dongan jolma nang maradophon angka silehonlehon ni Debata di ngoluna, tarmasuk ma i maradophon arta manang hamoraon na nilehon ni Debata tu jolma. Panogunoguon i dipasahat marhite angka panurirang, malim, raja nang angka guruguru habisuhon, na mangalehon angka poda habisuhon. Adong manang piga buku di Buku Na Badia i na manurathon angka poda habisuhon sihangoluhonon ni angka na porsea di Debata. Sada sian i i ma buku Poda na sian Raja Salomo songon na tarida di turpukta sadarion, i ma Poda 3: 9-10. Di turpukta on dipodahon do tu angka na porsea di Debata asa ganup pasangaphon Debata Jahowa marhite artana dohot sian patumonaan ni sandok pangomoanna manang pandaramanna.

2. Songon dia do pasangaphon Debata marhite arta. Ndang apala dipatorang i tangkas di turpuk on. Alai anggo angka na porsea di Debata naung manjalo poda habisuhon sian Debata, manigor boi do i di antusi i. Lapatan ni na pasangaphon Debata marhite arta, marlapatan do i:

Parjolo, mambahen arta i tongtong ditoru ni huaso ni Debata. Unang dibahen arta i tumimbo sian Debata. Ala ni ingkon tangkas do angka na porsea laho manjalahi arta di portibi on tongtong mangasahon Debata, ndang mangasahon gogo dohot pingkiranna sandiri. Ndang jadi jalahan arta marhite angka dalan hajahaton ni portibion, isara ni marhite penindasan, pangotootoion, korupsi, pandoboon manang marhite na manangko na so nampunana. Ndang na pasangaphon Debata be dalan na songon i, alai nunga paleahon Debata. Adong muse do na marpingkir, sian dalan dia pe boi do luluan arta manang pangomoan, alai deba sian arta na dapot i dipasahat tu Debata marhite nisumbanghon tu ulaon huria manang angka ulaon sosial. Seolah-gabe ias arta na dapot sian angka dalan na so ture i, marhite na dipasahat deba tu angka ulaon huria manang ulaon sosial. Ndang siulaon ni angka na porsea ulaon na songon i. Seolaholah taanggap Debata hurangan gabe tapasahat deba sian nataomohon i tu Debata. Di istilah hukum parulaon na songon i targoar do i "pencucian uang", jala targoar do i ulaon hajahaton. Ndang na pasangaphon Debatanon i, alai na paleahon Debata do.

Paduahon, marhite pamangkeon di arta na tajalo sian Debata, i ma sian angka dalan na hinalomohon ni Debata, tu angka na hombar tu lomo ni roha ni Debata, ai arta ni Debata do i na dipalumehon tu hita. Ndada pangkeonta artanta i hombar tu hagiotta sandiri, manang pasauthon sangkapsangkap ni rohanta sandiri. Godang do na marpingkir, artangku do arta, lomongku manang tudia pe hupangke. Molo songon i ndang sadar hita na arta ni Debata do i na dipalumehon tu hita, jala ingkon partanggung-jawabhononta do pamangkeon ni i tu Debata. Molo takembanghon pe arta na pinasahat ni Debata tu hita ingkon tongtong do ulahononta i hombar tu ruhutruhut naung niaturhon ni Debata. Sandok ndang jadi bahenonta arta na tajalo sian Debata laho pabalgahon dirinta manang pasangaphon dirinta, alai ingkon tongtong do pasangaphon Debata.

Patoluhon, angkup ni marhite pamangkeonta di artanta i, tapasangap do Debata marhite artanta i, molo tapelehon i artanta i tu Debata. Sansintongna, molo tapangke artanta i tu angka haporluan na denggan na hombar tu lomo ni roha ni Debata di ngolunta, nunga masuk i tu na mamelehon artanta i non i tu Debata. Alai angkup ni i, sian mulana nunga diaturhon Debata i tu jolma na tinompa-Na, jala secara khusus muse tu bangso na pinillit-Na i. Isarana songon na dibaritahon di Buku Na Badia, si Abel, anak ni si Adam dohot si Hawa jolma na parjolo i, nunga manigor mamelehon sian buhabaju ni birubiruna tu Debata ( 1 Musa 4: 4), jala lomo ma roha ni Jahowa di si Abel dohot na pinelehonna i. Marhite pamelehonon ni si Abel di birubiruna i, dipasangap si Abel do Jahowa marhite arta na adong di ibana. Domu tuson di pudian ni ari muse dipatikhon Debata do tu bangso-Na laho mamelehon sian patumonaan ni gogo ni na niulana tu Jahowa, songon dalan ni bangso i laho pasangaphon Debata marhite arta na nilehon ni Debata tu nasida (2 Musa 23: 19). Godang do pe angka rumang pamelehonon sian artana tu Debata na niaturhon ni Debata tu bangso i, sipangkeon ni angka naposo ni Debata mangaradoti ulaon parsombaon tu Debata di bagas joro ni Debata. Isarana marhite angka panurirang pe sai disungguli Debata do bangso-Na i laho pasahathon pelean. Isarana di Maleaki 3: 10, didok: "Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi".

Pamelehononta di artanta i tu Debata i ma patuduhon ndang hita nampuna arta i ala i Debata do.

Paopathon, asing ni marhite arta, dipangido do sian hita pasangaphon Debata marhite daging manang pamatangta. Hombar do i tu soara ni Epistel sadari on na sian Rom 12; 1-2 i. Di si diapoi apostel Paulus do huria i dohot sude angka na porsea di Jesus asa mamelehon dagingna bahen pelean na mangolu, na badia na hinalomohon ni Debata. Nunga diparbadiai Debata pamatangta i gabe bagas ni Debata, na niinganan ni Tondi ni Debata ima Tondi Parbadia. Jadi tapasangap ma Debata marhite daging i. Pasangap Debata marhite dagingta boi do i marlapatan, mangaramoti dagingta i asa tongtong badia dao sian haramunon ni portibion. Unang tapangke dagingta tu ulaon hajahaton dohot hisaphisap ni portibion. Tarmasuk do i manjagahon haiason dohot hahipason ni pamatang. Angkup ni didok apostel Paulus, unang sarombang hamu dohot portibion di pangalaho dohot parulaon. Ala naung gabe bagas ni Tondi ni Debatadagingta i, taloas ma dagingta i diuras jala dipaimbaru Tondi Pardia i asa tongtong boi marparangehon angka na na uli jala na denggan na hombar tu lomo ni roha ni Debata.

3. Dipasupasu Debata do halak na pasangaphon Debata marhite arta dohot dagingna. Di ay. 10 ni turpukta on dibagabagahon do tu angka na rade pasangaphon Debata marhite artana, dohot marhite patumonaan ni pangomoanna, marsipinjot manang gok angka sopo inganan ni gogo ni na niulana jala sirnip angka tuak anggur pangilanganna. Lapatanna manjadi angka na niulana, sejahtera ngoluna, ndang hurangan di haporluan parngoluan siganup ari. Jadi aha na dipasahat tu Debata marhite pelean, ndang marisuang i. Ndang hea gabe hurangan manang marpogos angka na pasahat peleanna tu Debata. Dipasupasu Debata do ulaonna, sinur na pinahanna, gabe na niulana. Alai ndada i tujuanta molo tapelehon artanta i tu Debata, ndada asa martambatamba artana, manang asa lam tamba hamoraonta, na boi gabe kebanggaanta. Panghorhonna do i di ngolunta molo tapasangap Debata marhite arta dohot dagingta ingkon sai pasupasuon ni Debata angka na taula. Alai molo ditambahon Debata pe pasupasuna tu hita lobi sian na tahaporluhon, ndada asa pangkeonta i tu hagiothagiot ni rohanta, alai na dihirim Debata do hita boi managihon i tu haporluan ni harajaon ni Debata, manumpahi angka ulaon parasinirohaon dohot manumpahi ragam ni angka ulaon ni Debata di huria-Na. Jadi ganup tamba silehonlehon ni Debata di hita, marlapatan do i martamba nang tanggung-jawabta di pamangkeon ni pasupasu na pinasahat ni Debata tu hita. Ala ni tapasangap ma Debata marhite arta nang dagingta.

______________

Evangelium: Poda 3:9-10

9 Pasangap ma Jahowa marhite sian hamoraonmu dohot marhite sian patumonaan ni sandok pangomoanmu.

10 Jadi marsipinjot ma angka sopom, jala sirnip tuak anggur angka pangilanganmu.

Epistel: Rom 12:1-2

1 Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.

2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.

RENUNGAN 1 TESALONIKA 2: 1-8, MARHIRAS NI ROHA MANGHATAHON BARITA NA ULI MANGASAHON DEBATA.

 MARHIRAS NI ROHA MANGHATAHON BARITA NA ULI MANGASAHON DEBATA.

Horas ma di hita. Selamat Ari Minggu XXI dung Trinitatis (29 Oktober 2023). Las ma rohanta marsomba tu Tuhanta sadarion huhut tumangihon hata-Na sihangoluhononta. Disoarahon hata Debata do tu hita sadarion na dienet sian Surat ni apostel Paulus na parjolo tu huria Tessalonika, 1 Tessalonika 2: 1-8, asa ganup angka na porsea di Jesus marhiras ni roha manghatahon barita na uli i mangasahon Debata. Laho mangulahon on dilehon apostel Paulus do tiruan di hita, songon na dibaritahon di turpukta on. Borat do tantangan na niadopan ni apostel Paulus laho mamaritahon barita na uli i di huta Tessalonik. Godang do paraloan diadopi lumobi sian halak Jahudi na marsogo ni roha di si Paulus dohot di barita nauli na hinatahonna di huta i. Dialuhon halak Jahudi i marsogo ni roha do apostel Paulus dohot angka donganna tu panggomgomi ni luat i, songon siboan poda sipaotooto na mangaliluhon gabe tubu hagaoron di tongatonga ni na torop. Alai ala ni na mangasahon Debata do ibana mangulahon i, ndada mangasahon gogo dohot hamaloonna sambing, ndang sumurut hiras ni rohana na marbarita na uli i. Dipasupasupasu Debata do ulaonna i, gabe ndang magopo halojaonna mamaritahon barita na uli i di huta Tessalonika, gabe jongjong do disi sada huria. Torop do angka na porsea di Jesus dohot di barita na uli na hinatahonna i. Turpuk on i ma patoguhon roha ni angka halak Kristen di huria i, asa lam togu roha dohot haporseaon nasida mangihuthon barita na uli naung pinasahat ni apostel Paulus i tu nasida. Pangulaonna mamaritahon barita na uli i di huta Tessalonik gabe tiruan .ma i di sude angka parbarita na uli nang di sude halak Kristen laho manghangoluhon barita na uli i.

1. Marhiras ni roha mamaritahon barita na uli mangasahon Debata. Di na taripar si Paulus rap dohot si Silas sian luat Asia tu Makedonia di Eropa hombar tu pangidoan ni sahalak Makedonia na niida ni si Paulus di bagasan tondina (Ulaon 16: 9), parjolo ma diebati nasida huta Filipi, i ma huta sabungan ni provinsi Makedonia i. Alai di huta Filipi manaon na porsuk situtu do nasida sahat ro di na dihurunghon, ala adong pangisi ni huta i na marsogo ni roha mida nasida. Dialuhon do nasida tu panguhum, songon siboan hagunturon tu huta i. Alai dipamasa Debata do halongangan paluahon nasida sian hurungan i marhite lalo na gogo na mambahen tarbungka pintu ni hurungan i. Alai nang pe naung ungkap pintu ni hurungan ndang olo nasida haruar songon i, ingkon panguhum i do na paluahon nasida huhut mandok na so sintong na tinuduhon ni halak tu nasida. Dung dipalua panguhum ni huta Pilipi i nasida gabe tamba ma hiras ni roha nasida mamaritahon barita na uli i. Ditadinghon nasida ma huta Pilipi i gabe borhat ma nasida tu huta na asing di luat Makedonia i, i ma huta Tessalonik. Hiras ni roha nasida i ndada marharoroan sian diri ni si Paulus dohot angka donganna hatiha i, alai marharoroan sian Tuhan na marsuru nasida laho mamaritahon barita na uli i do. Pos do roha nasida, mangasahon Debata, tung pe adong tantangan, manang ragam ni haporsuhon na boi mangambati barita na uli i, ndang sumurut hiras ni roha nasida, ai marharoroan sian Debata do barita na uli i. Ala Debata do na marsuru ibana mamaritahon barita na uli i, pos do rohana, sai parrohaan jala pargogoan ni Debata do ibana laho mangulahon i. Jala on do tongtong tiruan di sude angka na porsea, na so jadi mabiar manghatindanhon haporseaon dohot hasintongan ni hata ni Debata di parngoluonna siganup ari.

2. Ndang songon na mambuat roha ni jolma alai ingkon mambahen halomoan ni roha ni Debata do. Ndang adong sangkap ni apostel Paulus laho mangalului pangomoan manang hasangapon tu dirina di na laho mamaritahon barita na uli. Hibul do rohana mamelehon dirina, sahat tu na rade manaon na porsuk asa sahat barita na uli i, i ma barita haluaon na pinatupa ni Jesus tu sandok jolma. Molo adong na na mangarujumi ibana songon angka guruguru filsafat hatiha i na maniganigahon parbinotoanna tu angka natorop laho mangalului pangomoan manang papunguhon arta asa mamora ibana, ndang songon i anggo si Paulus. Gariada hatiha i ndang olo ibana mansusai na mambege pangajarionna i marhite na mamungut hepeng, alai ibana sandiri do na mangalului haporluaanna siganup ari marhite hapandean na adong di ibana hatiha i ma na manonun abit ni tenda (kemah). Diboto ibana do songon apostel ibana patut do nian boi ibana mangan sian angka na hinobasanna marhite barita na uli i. Alai ndang diulahon ibana songon i, alai panogunoguon do pe diulahon ibana paima lam matoras haporseaon ni angka naung gabe siihuthon Kristus i. Sandok dia na mambahen halomoan ni roha ni Debata i do diulahon. Ndang adong sangkapna mangaliluhon halak na umbege pangajarionna, manang mambahen angkalangkal sipaotooto. Alai hibul do ibana rap dohot angka donganna parbarita na uli mambahen halomoan ni roha ni Debata, ndada halomoan ni roha ni jolma. On do na patut sijagahonon ni angka parbarita na uli, nang angka parjamita pe, na so jadi marhata lemeslemes, na mabuat roha ni jolma manang mangalap pujipujian tu dirina. Molo songon i nunga dikorbanhon barita na uli i, laho mangalului sangap tu diri manang pangomoan tu diri.

3. Basar songon inaina na paturehon gellengna. Dipatuduhon si Paulus do panghobasionna mamaritahon barita na uli i di huta Tessalonik, songon inaina na tongtong basar laho patureturehon anakhonna. Dihaholongi do huria i sian sandok rohana, sahat ro di na maneahon ngoluna, marhite na manaon godang haporsuhon asal ma sahat barita na uli i tu pangisi ni huta i. Manaon halojaon dohot hasusaan do ibana, marhite na loja mulaulaon arian dohot borngin asa unang gabe boban na pasorathon ibana rap dohot angka dongganna di huria i. Tangkas do pangulaon ni apostel i dibereng huria i, umbahen torop na olo manjalo barita na uli i jala porsea di Jesus. Disaksihon nasida do parsitutuon ni apostel i, disaksihon nang halojaonna, ias ni rohana, habadiaonna, dohot holong ni rohana di huria. Songon holong ni sada ina patureture gellengnna, songon i do holong ni roha ni parbarita uli di huria i. Diparmudumudu, diajari, ditogu jala dihophop do huria i sian holong ni roha na polin. Holong ni roha i do mangonjar haradeon ni angka parbarita na uli laho mamelehon sandok ngoluna. Aha na niulahon ni apostel Paulus dohot angka donganna mamaritahon barita na uli gabe tiruan ma di sude parbarita na uli ro di sude halak Kristen laho mambaritahon dohot manghangoluhon barita na uli i sahat tu tingkion ro di salelenglelengna. Ai sude angka halak Kristen tarjou do gabe parbarita na uli, ndada ingkon sai marhite hata, alai lumobi do marhite parange dohot pangulaon. Gabe parbarita na uli do halak Kristen, molo dihangoluhon barita na uli naung sahat tu ibana, gabe tontong tiruan di parange na denggan dohot haporseaon.

_________________

1 Tesalonik 2:1-8

1 Ai nang hamu, ale angka dongan, marbinoto do: Ndada na magopo haroronami tu hamu.

2 Ai dung jolo huta on hami na marporsuk dohot na marsipal di huta Pilippi (songon na binotomuna), dapotan hiras ni roha do hami mangasahon Debatanami laho mangkatahon tu hamu barita na uli na sian Debata, nang pe godang paraloan.

3 Ai ndada na lilu manang mangansi manang marangkal hami laho mamodai hamu.

4 Alai songon halak angka naung tau di roha ni Debata do hami, gabe hasahatan ni Barita na Uli i, songon i do huhatahon hami; ndada songon angka na mambuat roha ni jolma, naeng hami tahe halomoan ni roha ni Debata na manigati rohanami.

5 Ai diboto hamu do: Ndang dung hami marhata lemeslemes, ndang dung hami marbisukbisuk mambuat arta; Debata do sitindangi disi.

6 Ndang manjalahi sangap hami sian jolma, manang sian hamu, manang sian angka na asing pe, atik pe tarbahen hami do nian marhatongamon, ala apostel ni Kristus hami.

7 Alai basar do hami di tongatongamuna songon inaina na pauliuli gellengna.

8 Songon i do sian sihol ni rohanami di hamu huhalashon hami do mangalehon tu hamu Barita na Uli na sian Debata; lobi tahe, dohot ma antong dirinami, ala naung huhaholongi hami hamu.

RENUNGAN YESYA 45: 1-7, JAHOWA DO MUAL NI HALUAON ( TUHAN SUMBER KESELAMATAN)

 JAHOWA DO MUAL NI HALUAON ( TUHAN SUMBER KESELAMATAN)

Horas ma di hita. Selamat Ari Minggu XX dung Trinitatis ( 22 Oktober 2023). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku panuirang Jesaya bindu 45: 1-7, na Debata Jahowa do mual ni haluaon di hita angka na porsea di Ibana.

1. Jahowa paluahon bangso-Na sian habuangan.

Tarbuang do halak Juda ( Israel Selatan ) tu harajaon Babel ala ni na so hot nasida marhaporseaon tu Debata Jahowa, songon naung dipadanhon nasida tu Debata, jala ndang unduk

nasida di patik dohot uhum ni Debata. Nunga marsomba nasida tu angka debata baal, jala nunga jotjot masa angka pangalaho na so uhum di tongatonga ni bangso i, na so hombar be tu pangalaho ni bangso ni Debata. Songon na didok di turpuk dua minggu na salpu (Jesaya 5: 7), sai dipaima Debata uhum parangehonon nasida hape pangarupaon do na diulahon, sai dipaima Debata hatigoran, hape angka anggukangguk manang partangisan do na masa di tongatonga ni bangso i, ala na jotjot masa angka pangalaho na so uhum di tongatonga ni bangso i. Ala ni i do umbahen diuhum Debata nasida, jala dipangke Debata raja Nebukadnesar, i ma raja ni harajaon Babel laho mangaleksehon huta nasida, huhut mamboan nasida tarbuang tu huta Babel. Uhuman ni Debata na sarupa nunga jumolo dihonahon tu harajaon Israel Utara ( 10 marga Israel) na maribukota di Samaria, naung dibuanghon tu harajaon Assur taon 722 seb.M. Mulai sian tingki i nunga marujung harajaon i, jala bangso i pe gabe marserak ma jala mago. Harajaon Israel Selatan ( dua marga, i ma marga Juda dohot Benjamin), na laos digoari harajaon Juda, dibuang tu huta Babel di bagasan tolu tahap. Tahap parjolo i ma taon 605, seb.M, sude angka na pistar ni bangso i, tarmasuk si Daniel diangkut tu huta Babel songon tawanan. Tahap paduahon i ma taon 597 seb. M, jala tahap patoluhon ima taon 586 seb. M, laos mangaleksehon huta Jerusalem dohot Bagasjoro na di huta i. Mulai sian i marujung ma harajaon i di bidang pemerintahan (politik), ai gabe angka harajaon na asing na ma na mangarajai bangso i marsorinsorin. Disangkapi Debata do tingki ni habuangan i lobi hurang 70 taon. Tujuan ni Debata umbahen na diloas nasida tarbuang, asa diboto nasida do naung mardosa nasida tu Debata Jahowa, naung nilaosi nasida parjanjian nasida tu Jahowa,

huhut asa marhite nasida dipapatar Debata Jahowa huaso-Na tu angka bangso na asing. Dung adong lobi hurang 70 taon nasida naung tarbuang i, dipalua Debata ma nasida mulak muse tu hutanasida di Jerusalem,alai ndang songon sada harajaon na merdeka be, hot do di bagasan gomgoman ni harajaon na asing, alai bebas do nasida laho mangaradoti parugamoon nasida.

2.Dipangke Debata Jahowa Raja Kores, i ma raja ni harajaon Persia paluahon bangsoNa sian gomgoman ni harajaon Babel. Harajaon Persia niuluhon ni raja Kores gabe sada harajaon na balga jala na gogo ma na tuk manaluhon harajaon Babel. Hatop dung dipatunduk raja Kores harajaon Babel, dohot angka harajaon na asing na humaliang, manigor diparentahon ibana ma asa mulak halak Juda naung leleng digomgomi harajaon Babel tu hutanasida di Jerusalem, jala diloas laho pajongjong bagas joro inganan panombaon nasida tu Debata Jahowa, naung dileksehon raja Nebukadnesar, huhut mangaradoti parugamoon nasida. Ala ditoru ni huaso ni Debata do sude nang angka raja na di portibion, dipangke Debata do raja Kores i laho paluahon halak Juda manang halak Israel i. Laho pasauthon ulaon i dimiahi Debata do Raja Kores i. Jadi targoar do ibana raja na miniahan

(meshiakh). Sian hata on do muse gelar mesias, na di hata Junani Kristos, na dipangke tu Jesus. Alai hamesiason ni raja Kores khusus do laho paluahon halak Israel sian gomgoman ni halak Babel, alai ha Mesiason ni Jesus i ma paluahon sude jolma sian gomgoman ni dosa. Jadi nang pe so sisomba Debata Jahowa raja Kores i, boi do ibana dimiahi Debata laho pasauthon sangkapna. Huaso na pinasahat ni Debata tu ibana i ma papatuhon angka bangso parbegu di jolona, mananggali hohos panggantungan ni sinjata sian gonting ni angka raja na asing, mangungkap di jolona angka pintu dohot bahal unang hinsu di dapot. Laho mandalahon huaso i, Jahowa mardalan di jolona, pahornophon angka buntulbuntul, mangaropuhi angka pintu tombaga, manegai angka sordak ni pintu. Alai ndada holan pasahat huaso i Debata tu si Kores, alai dohot do pasahat angka arta na buni, arta na so tarida do pe, alai na ingkon sahat do i tu ibana di na mangulahon tugas na pinasahat ni Jahowa tu ibana. Tujuan ni Debata na mamiahi si Kores i songon na dihatahon di turpukta on, i ma:

Parjolo "Ala ni

Jakob naposongKi dohot ala ni Israel na Hupillit i". Lapatanna bahen haluaon ni bangso-Na i.

Paduahon, dipalua Debata bangso-Na i, ndada holan ala ni kepentingan nasida, alai asa diboto saluhut halak manang saluhut bangso do sian habinsaran sahat ro di hasundutan, na so adong debata dunghon ni Debata Jahowa. Laos asa diboto si Kores, Jahowa do Debata ni Israel. Sian na jolo pe di sude pambahen ni Debata, na pajongjong halak Israel gabe bangsona, paluahon dohot manobus bangso i sian tangan ni raja Parao, ndada holan ala ni bangso i, alai asa diboto saluhut bangso do marhite pambahenan-Na tu bangso i na sasada Debata Jahowa do Debata na marhuaso di sandok portibi on, marhuaso di tongatonga ni angka bangso, marhuaso di sejarah di pirtibion dohot sude hajolma on.

3. Haluaon na pinatupa ni Debata tu bangso Jehuda marhite si Kores na miniahan ni Jahowa i ma patujolo ni haluaon ni sude hajolmaon marhite Jesus, Mesias na miniahan ni Debata. Songon naung pinatorang di jolo, Debata paluahon bangsoNa sian gomgoman ni parhuaso di portibion, ndada holan na ringkot di bangso i, alai patujolo ni ulaon ni Debata na umbalga sian i do pe, i ma haluaon ni hajolmaon dohot sude angka bangso sian gomgoman ni dosa i. On do tong na ringkot sadaran ni halak Isrsel nian,molo dipillit Debata pe nasida gabe bangso-Na, ndada holan ala ni kepentingan nasida i, alai naeng pangkeon ni Debata do nasida pasahathon missi ni Debata na umbalga do pe i ma sangkap haluaon ni sandok hajolmaon. Sude pambahenan ni Debata tu nasida, sian mulai panjouon ni Debata tu ompu nasida si Abraham, panotophonon ni Debata di nasida gabe bangso-Na marhite padan, dohot panogunoguon ni Debata di nasida, asa marhite nasida tandaon jala haporseaan ni angka bangso na di portibion Debata Jahowa na marhuaso di portibion dohot di sude angka bangso. Alai ndang boi diulahon bangso i non i dohot singkop, gariada nasida do na gabe jotjot manimbil sian haporseaon di Debata Jahowa. Ala ni i do umbahen na diuhum Debata nasida. Alai panguhumon ni Debata di nasida tong do domu tu sangkap hatuaon ni Debata na balga i, i ma papatarhon diri ni Debata Jahowa tu angka bangso, jala patuduhon na ditoru ni huaso ni Debata Jahowa do sude angka raja dohot bangso na di portibi on. Alai nang pe gagal do bangso Israel laho mandalanhon missi ni Debata, ndang sundat Debata pasauthon sangkap-Na paluahon hajolmaon sian gomgoman ni dosa. Ala ni i do Ibana sandiri tuat tu portibion marhite Anak-Na Jesus Kristus. Ibana ma dimiahi Debata gabe Mesias na paluahon sandok hajolmaon, na manghophop jolma pardosa i marhite na rade maneahon hosa-Na mate di silang i. Di bagasan Jesus dipaimbaru Debata ma padan-Na. Molo di padan na robi i, Israel ma dipabangkit Debata gabe bangso-Na, alai ala ndang tarulahon nasida i, gabe di padan na pinaimbaru ni Debata, gabe sude ma angka na porsea di Jesus Kristus gabe bangso ni Debata. Aha missi ni Debata na pinasahat-Na tu bangso Israel dung dipabangkit nasida gabe bangso-Na di dolok Sinai gabe tu angka na porsea di Jesus manang huria i ma hasahatan ni i. Di dolok Sinai didok Debata do tu halak Israel songon na tarsueat di 2 Musa 19:6: "Manjadi harajaon malimmalim ma hamu di Ahu, jala bangso na badia". Hata on do muse na sahat tu halak Kristen manang huria i, songon na nidok ni apostel Petrus di 1 Petrus 2: 9, "Alai marga na pinillit do hamu, hamalimon na raja, bangso na badia, houm na ginomgoman-Na, asa tung dibaritahon hamu denggan ni harohaon ni Ibana, naung manjou hamu sian na holom tu hatiuron-Na halongangan i". Jadi on do hadirion ni huria i, i ma naung pinillit ni Debata gabe bangso-Na, gabe harajaon hamalimon, bangso na badia, laho mambaritahon ( manghatindanghon) denggan ni naung binahen ni Debata tu hita naung paluahon hita sian gomgoman ni dosa( haholomon) tu hatiuron. Sada tugas panjouon ni Debata tu angka na porsea manang huria i, i ma mambarirahon barita na uli i, i ma barita taringot tu denggan ni naung binahen ni Debata tu hita naung paluahon hita sian gomgoman ni dosa tu hatiuron. Tugas on ndada holan tugas ni angka apostel, manang angka evangelis, manang angka pandita ro di sude angka parhalado do, alai tugas ni sude angka na porsea do di Jesus Kristus, marhite na manghatindanghon manang manghangoluhon barita na uli i di ngoluna siganup ari sahat ro di na dohot mandukung manang manangianghon ulaon ni parbarita na uli na khusus tarjou tu ulaon i.

________________

Jesaya 45:1-7

1 Songon on do hata ni Jahowa tu na miniahanNa tu si Kores, na Hutiop di tanganna siamun papatuhon angka bangso parbegu di jolona, jala mangkarhari sinjata sian gonting ni angka raja, mangungkap di jolona angka pintu dohot bahal, unang hinsu di dapot.

2 Ahu mardalan di jolom jala pahornophon angka buntulbuntul; ropuhanHu ma angka pintu tombaga jala segaanHu angka sordak bosi.

3 Jala lehononHu ma di ho arta angka na di haholomon dohot homitan angka na tinabunihon, asa ditanda ho ahu do Jahowa, Debata ni Israel na manjou goarmu.

4 Ala ni Jakob naposongHi dohot ala ni Israel na Hupilliti umbahen na Hujou ho di goarmu, pola marsahala goarmu Hubahen tagan so ditanda ho dope Ahu.

5 Ahu do Jahowa, jala ndang adong be Debata dungkon ni ahu; Huhohosi do ho tagan so ditanda ho dope Ahu.

6 Asa ditanda halak angka na sian habinsaran dohot sian hasundutan na soadong Debata dungkon ni Ahu; Ahu do Jahowa, jala dungkon ni Ahu ndang adong.

7 Ahu Sijadi hatiuron dohot sitompa haholomon; sibahen hadameon dohot sitompa hamagoan. Ahu do Jahowa, sibahen saluhutna i.

RENUNGAN MATIUS 22: 1-14 , LAN DO NA JINOU ALAI OTIK DO NA TARPILLIT ( BANYAK YANG TERPANGGIL TETAPI SEDIKIT YANF TERPILIH)

 LAN DO NA JINOU ALAI OTIK DO NA TARPILLIT ( BANYAK YANG TERPANGGIL TETAPI SEDIKIT YANF TERPILIH)

Horas ma di hita. Selamat Ari Minggu XIX dung Trinitatis ( 15 Oktober 2023). Las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Evangelium Mateus bindu 22: 1-14, paboa lan do na nijou tu harajaon ni Denata do alai otik do na tarpillit. Dihatahon Jesus do i di jolo ni angka pangituai ni agama Jahudi, i ma angka sintua ni malim, angka parise ro di angka sintua ni bangso i di bagas joro na di huta Jerusalem marhite sada parumpamaan. Di parumpamaan i di patudos Jesus do Harajaon ni Debata tu sada pesta parunjuhan, i ma pesta ni sada raja na pangolihon anakna. Songon sahalak raja na marpesta, torop do hapak dijou do tu pestana i, i ma angka donganna saulaon, angka alealena ro di angka pangisi ni harajaonna i, na dihirim ro tu pestana i. Marhite pesta i naeng patuduhononna las ni rohana, huhut mangarahon angka halak na jinouna ro tu pesta i saluhutna dohot marlas ni roha, marhite sipanganon pesta na pinaradena tu si. Ala ni pola do di potong raja i manang piga horbo, lombu dohot angka pinahan na asing bahen haporluan tu pesta i.

1. Manjua do angka na jinou parjolo i. Songon somalna uju i, molo adong halak na patupahon sada pesta parunjuhan, ndang sae sahali pasahathon joujou laho mandohoti pesta i. Manang sadia leleng andorang so mata ni pesta i nunga adong joujou parjolo, na laos pabotohon tingki ni pesta i asa mangarade angka na jinou i ro tu pesta i. Dungi mandapothon mata ni pesta i adong ma muse joujou na paduahon. Songon i ma nang pesta na pinatupa ni raja i na di baritahon di turpukta on. Sude angka joujou i dipasahat marhite angka na poso ni raja i. Di joujou na parjolo ndang adong na manjua ro pesta i. Alai dijoujou na paduahon angka na jinou parjolo i manjua be do sian tois ni rohana be, jala laho masiboan dalanna be. Adong na laho tu haumana, na deba tu partigatigaanna. Sudena i mardomu tu angka urusan di parngoluon portibi on. Adong muse do na muruk tu angka na poso ni raja i, gabe dipasipal nasida jala di bunu. Sian panulahon ni angka nanijou i dohot tindakan ni na deba laho pasipal dohot mamunu angka na poso ni raja i tarida do adong pangalaho na mambahen longang roha. Somalna molo raja do na manjou ndang tagamon adong na barani manjua i. Ai manjua joujou ni raja i nunga marlapatan i mangalo manang berontak tu raja i. Paduahon marhite hata na lambok do raja i manjou angka tamuena, laho mangarahon asa ro pestana i. Alai angka na jinou i patuduhon sikap na kasar na so manghormati raja i. Sian i tarida nunga adong panghilalaan na so tabo di angka na jinou i maradophon raja i. Ala ni i tarrimas situtu ma raja i, disuru ma soldaduna mangaleksehon angka na mamunu naposo na i jala manurbu huta i. Alai ndang sundat pesta ni raja i. Dusuru do muse angka naposona na asing laho tu angka dalan balobung, mangarahon sandok jolma na jumpang nasida disi, ndang mardia imbar angka na jahat nang angka na denggan, gabe gok ma tamue papestaan i. Sude nasida na dijou i ndang marojahan be tu aturan panjouon hian, alai marojahan tu asi ni roha ni raja i nama. Songon somalna ganup na masuk tu paparpestaan i ingkon jolo dipahei do dohot pahean pesta, songon tanda parsidohot mamasuhi pesta i. Tontu adong do na khusus manghobasi i, tu angka na naeng bongot tu parpestaan i. Alai di na binereng ni raja i angka tamue i, adong do na masuk sian na so dalanna, na so marpahean pesta. Dung dibereng raja i non i, disungkun ma beha parmasukna tu pesta i, alai ndang taralusisa.Hohom sambing do ibana. Dungi disuru raja i ma angka naposona manangkup ibana asa dipabali sian papestaan i jala dipamasuk tu hurungan, i ma tu inganan na holom marimpotimpot.

2. Debata do Raja na marpesta i jala halak Jahudi do angka na jinou parjolo

i. Parumpamaan do na binaritahon ni Jesus on, alai martudutudu do i tu rumang ni harajaon ni Debata. Nang pe so dipatorang Jesus hahonaanna, alai ala tu halak Jahudi do parumpamaan i ditujuhon nunga diantusi nasida lapatanna ni i. Molo dibege halak Jahudi adong parumpamaan taringot tu raja dohot anakna, boi do i manigor diantusi nasida songon kiasan tu Debata (Psalmen 97: 1) dohot tu Mesias ni Debata (Psalmen 2:7) do i. Molo dibege nasida parumpamaan taringot pesta parunjuhan manigor boi do i diantusi nasida martudutudu tu zaman ni Mesias do i, ro di sude angka las ni roha dohot hasonangan na masa disi. Molo dibege nasida taringot tu halak na jinou tu pesta i, manigor boi do i diantusi, na halak Israel sandiri do na jinouna i. Jadi tingki ni haroro ni Mesias i, i ma haroro ni Jesus Kristus tu portibion. Di na ro Jesus tu tongatonga ni halak Jahudi, dijou Debata do nasida marhite si Johannes Pandidi asa dohot nasida manghalashon dohot manjanghon naung ro Mesias pajongjong harajaon ni Debata, marhite na paubahon roha. Alai ndang ditangihon nasida si Johannes Pandidi. Langsung muse Jesus manjou nasida asa dijanghon nasida haroro ni Mesias marhite na mangarahon nasida paubahon roha, alai dipasipal jala dibunu nasida do Jesus. Tarimas do Debata siala na so dijanghon halak Jahudi Jesus i, gabe disuru Debata ma tentara ni halak Romawi na manggomgomi halak Jahudi uju i laho mangaleksehon nasida, huhut manurbu huta Jerusalem dohot bagas joro na adong di huta i. I ma na masa di taon 70 Masehi.

3. Ala ni panulahon ni halak Jahudi gabe taripar ma joujou i tu angka bangso na so Jahudi, tarmasuk tu hita on.

Nang pe ditulak halak Jahudi joujou ni Debata, ndang sundat sangkap hatuaon ni Debata na balga i. Nunga dipadiri Debata hian angka naposo-Na marhite pangajarion ni Jesus tu angka sisean-Na dohot tu angka na mangihuthon Ibana. Nasida ma disuru Jesus Kristus muse mamaritahon barita na uli i tu angka bangso na di portibion, asa dohot nasida panean di haroan bolon na dinarade di harajaon-Na i. Alai dalan asa boi bongot tu si i ma marhite hamubaon ni roha dohot haporseaon di Jesus Kristus huhut padidihon dirina di bagasan goar ni Debata Sitolusada. Ido pahean laho bongot tu haroan bolon naung pinarade ni Debata nampuna harajaon i. Angka na so porsea tudos ma tu na so marpahean pesta na niusir ni raja i sian parpestaan na pinatupana i. Jadi angka na so marpahean pesta, i ma angka na so olo paubahon rohana jala na so porsea di Jesus Kristus. Ndang dohot angka halak na songon i tu haroan bolon naung pinarade ni Debata, alai dipabali Jesus Kristus do i di ari uhum sogot tu api na so ra mintop ro di salelengnilelengna. Ala ni ndang sude na dijou ni Debata marhite Jesus, tarpillit bongot tu haroan bolon naung pinarade ni Debata, holan angka na porsea di Jesus Kristus i do. I do nang na tinonahon ni Jesus tu angka sisean-Na di na sinuru-Na mamaritahon barita na uli i tu nasa na tinompa. Didok Jesus: "Na porsea jala tardidi, dapotan haluaon; alai na so porsea i, hona uhum do!" ( Markus 16: 16). Jadi haporseaon i do pahean pesta laho bongot tu haroan na pinarade ni Jesus. Jadi ndang sungkup holan tardidi jala tardaftar gabe ruas ni huria. Jala tanda ni na porsea ndang sungkup holan mangihuthon angka kegiatan-kegiatan ritual na pinatupa ni huria i. Alai ingkon tarida do di pangulaon siganup ari i ma manghangoluhon songon na niajarhon dohot na hinangoluhon ni Jesus Kristus. Haporseaon i sadalan do i dohot holong ni roha dohot roha panghophopon tu dongan jolma. Jadi unang ma hita holan na dohot tarjou, alai ingkon dohot ma na tarpillit bongot tu harajaon ni Debata. Molo didok Jesus di ujung ni turpukta on " lan do na tarjou alai otik do na tarpillit", molo adong do di hita haporseaon na sintong dohot haradeon tongtong mangihuthon Tuhan i sian nasa rohanta, boi ma pos rohanta dohot do hita masuk tu na tarpillit i.

________________

Mateus 22:1-14

1 Dung i diulahi Jesus ma marumpama tu nasida songon on:

2 Tarpatudos do harajaon banua ginjang i tu sada raja na mamestahon anakna na mangoli.

3Jadi disuru ma angka naposona, manjou angka na ginonghonna hian tu pestana i, hape ndang olo nasida ro.

4 Dung i diulahi ma, disuru ma naposo na asing, ninna ma: Paboa hamu ma tu angka naung ginonghon: Nunga huparade panganon pesta i, nunga hupotong angka horbo dohot lombu; nunga rade saluhutna. Ipe, ro ma hamu tu pesta i!

5 Alai na laho be do nasida di tois ni rohanasida: Na sada tu haumana, na sada tu partigatigaonna.

6 Alai ditangkup na deba angka naposona, dipasipalsipal jala dipusa.

7 Jadi tarrimas ma raja i, disuru ma soldaduna mangalengsehon angka pamunu i jala manurbu hutanasida.

8 Dung i ninna ma mandok angka naposona: Nunga rade nian na hasea tu pesta i, alai ndang tau angka na pinio i.

9 On pe, laho ma hamu tu angka dalan balobung, arahon hamu ma tu haroan on nasa na dapot hamu!

10 Jadi saut ma laho angka naposo i tu angka dalan, ditogihon ma saluhut na jumpang nasida, angka na jahat dohot na denggan, gabe gok tamue ma parpestaan i.

11 Alai laho bongot raja i mamereng angka tamuena, dapot matana ma disi sada halak na so marpahean pesta.

12 Jadi didok ma tu ibana: Na beha do parmasukmu tuson, amang, ai ndang marpahean pesta ho? Gabe manghohom ma ibana.

13 Dung i didok raja i ma tu angka naposona: Tali hamu ma patna dohot tanganna, laos pabali hamu ma ibana tu na holom marimpotimpot; disi ma masa angguhangguk dohot na patungoripon.

14 Ai lan do na jinou; alai otik do na tarpillit.

SELAMAT ULANG TAHUN KE 162 HURIA KRISTEN BATAK PROTESTAN.

 SELAMAT ULANG TAHUN KE 162 HURIA KRISTEN BATAK PROTESTAN.

7 Oktober 1861, itulah yang ditetapkan oleh HKBP sebagai hari lahirnya, berdasarkan saat rapat yang dilakukan oleh empat orang missionar yang diutus oleh RMG pada waktu itu untuk melakukan penginjilan di Tanah Batak, yakni Heine, Klammer, Betz dan Van Asselt. Sebenarnya cara yang dipakai oleh HKBP ini unik dibanding dengan cara yang dipakai oleh gereja-gereja yang lain. Karena lazimnya ada tiga cara yang dipakai gereja-gereja di Indonesia untuk menetapkan hari kelahirannya, yakni pertama hari tibanya missionar yang pertama bekerja di suatu daerah penginjilan. Kedua baptisan yang pertama dilakukan kepada orang yang diinjili, ketiga hari kemandirian dari gereja itu lepas dari kepemimpinan zending. Secara teologis cara yang paling tepat adalah baptisan yang pertama, karena baptisan itulah yang menandakan lahirnya gereja, seperti halnya gereja mulamula hari kelahirannya adalah hari Pentakosta, dimana oleh hasil pemberitaan para rasul pada saat itu ada tiga ribu orang yang memberi dirinya dibaptis oleh para rasul. HKBP tidak memilih cara itu, karena kalau hari baptisan yang pertama dipilih, maka hari lahir HKBP adalah 31 Maret 1861, karena pada waktu itu Van Asselt missionar dari Belanda telah membaptis dua orang putra Batak yang pertama yakni Simon Siregar dan Yakobus Tampubolon. Tetapi yang ditetapkan adalah hari permulaan RMG bekerja di Tanah Batak yang ditandai dengan rapat kerja dari empat orang missionarnya yang pertama yang tersebut di atas. Hal itu memang bisa dimaklumi karena missi RMGlah yang berhasil mengkristenkan orang Batak dan menghasilkan HKBP bahkan memimpin HKBP sampai tahun 1940. Sejak 11 Juli 1940 HKBP menjadi gereja na "manjujung baringinna" ( mandiri) dalam kepemimpinan ( self goverment). Pada waktu itulah dalam sinode godang istimewa terpilih ephorus ( istilah yang dipakai pada waktu itu "voorzitter") pertama dari pendeta Batak yakni Pdt K.Sirait menggantikan pendeta Jerman yang sudah ditangkap dan dipenjarakan oleh pemerintah kolonial Belanda di Indonesia, akibat dari Perang Dunia II. Diharapkan juga HKBP menjadi gereja yang "self supporting dan self ropagation"- yakni kemampuan mendukung atau membiayai dirinya sendiri dan kemampuan untuk mengembangkan dirinya di dunia ini. Sekarang ini diperkirakan jumlah anggota jemaat HKBP sebanyak lebih kurang empat juta orang, yang terhimpun dalam 3363 Jemaat, 799 Ressort dan 33 Distrik, termasuk di dalamnya empat Jemaat di Luar negri dan 9 daerah zending. Dari dirinya telah memisah sejumlah gereja, sebagian karena perpecahan, seperti Huria Kristen Indonesia di Pematangsiantar (1927), Gereja Mission Batak di Medan (1927), Gereja Punguan Kristen Batak di Jakarta (1927), Gereja Kristen Protestan Indonesia di Pematangsiantar (1964), Gereja Kristen Luther Indonesia di Tarutung (1965), Gereja Protestan Persekutuan di Medan (1975). Tetapi ada juga yang memisah karena dimandirikan (dipajae) HKBP seperti Gereja Kristen Protestan Simalungun di Pematangsiantar (1962), Gereja Kristen Protestan Angkola di Sipirok ( 1975), Gereja Kristen Protestan Mentawai di Mentawai (1976) dan Gereja Kristen Protestan Pakpak Dairi di Sidikalang ( 1996). Selain itu banyak juga anggota jemaat HKBP yang beralih ke aliran kristen yang lain seperti ke Gerja Roma Katolik, Gereja Adventis, Gereja Pentakosta yang sudah masuk ke Tanah Batak menjalankan missinya tahun 1930 an, dan belakangan ini banyak juga anggo jemaat HkBP yang beralih ke gereja-gereja yang bersifat kharismatis terutama yang di kota-kota. Namun dalam memperingati ulang tahunnya ke 162 ini, kita harapkan ke depan HKBP semakin maju dalam menjalankan tugas panggilannya dan tetap dapat menjadi berkat bagi dunia. Karena itu kita ucapkan Selamat ulang tahun bagi HKBP yang ke 162. Tuhan Raja Gereja senantiasa memberkati gereja-Nya.

Semua tanggapan:

6Robert Silitonga, Jones Simamora dan 4 lainnya

1

Suka

Komentari

Bagikan