LAN DO NA JINOU ALAI OTIK DO NA TARPILLIT ( BANYAK YANG TERPANGGIL TETAPI SEDIKIT YANF TERPILIH)
Horas ma di hita. Selamat Ari Minggu XIX dung Trinitatis ( 15 Oktober 2023). Las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Evangelium Mateus bindu 22: 1-14, paboa lan do na nijou tu harajaon ni Denata do alai otik do na tarpillit. Dihatahon Jesus do i di jolo ni angka pangituai ni agama Jahudi, i ma angka sintua ni malim, angka parise ro di angka sintua ni bangso i di bagas joro na di huta Jerusalem marhite sada parumpamaan. Di parumpamaan i di patudos Jesus do Harajaon ni Debata tu sada pesta parunjuhan, i ma pesta ni sada raja na pangolihon anakna. Songon sahalak raja na marpesta, torop do hapak dijou do tu pestana i, i ma angka donganna saulaon, angka alealena ro di angka pangisi ni harajaonna i, na dihirim ro tu pestana i. Marhite pesta i naeng patuduhononna las ni rohana, huhut mangarahon angka halak na jinouna ro tu pesta i saluhutna dohot marlas ni roha, marhite sipanganon pesta na pinaradena tu si. Ala ni pola do di potong raja i manang piga horbo, lombu dohot angka pinahan na asing bahen haporluan tu pesta i.
1. Manjua do angka na jinou parjolo i. Songon somalna uju i, molo adong halak na patupahon sada pesta parunjuhan, ndang sae sahali pasahathon joujou laho mandohoti pesta i. Manang sadia leleng andorang so mata ni pesta i nunga adong joujou parjolo, na laos pabotohon tingki ni pesta i asa mangarade angka na jinou i ro tu pesta i. Dungi mandapothon mata ni pesta i adong ma muse joujou na paduahon. Songon i ma nang pesta na pinatupa ni raja i na di baritahon di turpukta on. Sude angka joujou i dipasahat marhite angka na poso ni raja i. Di joujou na parjolo ndang adong na manjua ro pesta i. Alai dijoujou na paduahon angka na jinou parjolo i manjua be do sian tois ni rohana be, jala laho masiboan dalanna be. Adong na laho tu haumana, na deba tu partigatigaanna. Sudena i mardomu tu angka urusan di parngoluon portibi on. Adong muse do na muruk tu angka na poso ni raja i, gabe dipasipal nasida jala di bunu. Sian panulahon ni angka nanijou i dohot tindakan ni na deba laho pasipal dohot mamunu angka na poso ni raja i tarida do adong pangalaho na mambahen longang roha. Somalna molo raja do na manjou ndang tagamon adong na barani manjua i. Ai manjua joujou ni raja i nunga marlapatan i mangalo manang berontak tu raja i. Paduahon marhite hata na lambok do raja i manjou angka tamuena, laho mangarahon asa ro pestana i. Alai angka na jinou i patuduhon sikap na kasar na so manghormati raja i. Sian i tarida nunga adong panghilalaan na so tabo di angka na jinou i maradophon raja i. Ala ni i tarrimas situtu ma raja i, disuru ma soldaduna mangaleksehon angka na mamunu naposo na i jala manurbu huta i. Alai ndang sundat pesta ni raja i. Dusuru do muse angka naposona na asing laho tu angka dalan balobung, mangarahon sandok jolma na jumpang nasida disi, ndang mardia imbar angka na jahat nang angka na denggan, gabe gok ma tamue papestaan i. Sude nasida na dijou i ndang marojahan be tu aturan panjouon hian, alai marojahan tu asi ni roha ni raja i nama. Songon somalna ganup na masuk tu paparpestaan i ingkon jolo dipahei do dohot pahean pesta, songon tanda parsidohot mamasuhi pesta i. Tontu adong do na khusus manghobasi i, tu angka na naeng bongot tu parpestaan i. Alai di na binereng ni raja i angka tamue i, adong do na masuk sian na so dalanna, na so marpahean pesta. Dung dibereng raja i non i, disungkun ma beha parmasukna tu pesta i, alai ndang taralusisa.Hohom sambing do ibana. Dungi disuru raja i ma angka naposona manangkup ibana asa dipabali sian papestaan i jala dipamasuk tu hurungan, i ma tu inganan na holom marimpotimpot.
2. Debata do Raja na marpesta i jala halak Jahudi do angka na jinou parjolo
i. Parumpamaan do na binaritahon ni Jesus on, alai martudutudu do i tu rumang ni harajaon ni Debata. Nang pe so dipatorang Jesus hahonaanna, alai ala tu halak Jahudi do parumpamaan i ditujuhon nunga diantusi nasida lapatanna ni i. Molo dibege halak Jahudi adong parumpamaan taringot tu raja dohot anakna, boi do i manigor diantusi nasida songon kiasan tu Debata (Psalmen 97: 1) dohot tu Mesias ni Debata (Psalmen 2:7) do i. Molo dibege nasida parumpamaan taringot pesta parunjuhan manigor boi do i diantusi nasida martudutudu tu zaman ni Mesias do i, ro di sude angka las ni roha dohot hasonangan na masa disi. Molo dibege nasida taringot tu halak na jinou tu pesta i, manigor boi do i diantusi, na halak Israel sandiri do na jinouna i. Jadi tingki ni haroro ni Mesias i, i ma haroro ni Jesus Kristus tu portibion. Di na ro Jesus tu tongatonga ni halak Jahudi, dijou Debata do nasida marhite si Johannes Pandidi asa dohot nasida manghalashon dohot manjanghon naung ro Mesias pajongjong harajaon ni Debata, marhite na paubahon roha. Alai ndang ditangihon nasida si Johannes Pandidi. Langsung muse Jesus manjou nasida asa dijanghon nasida haroro ni Mesias marhite na mangarahon nasida paubahon roha, alai dipasipal jala dibunu nasida do Jesus. Tarimas do Debata siala na so dijanghon halak Jahudi Jesus i, gabe disuru Debata ma tentara ni halak Romawi na manggomgomi halak Jahudi uju i laho mangaleksehon nasida, huhut manurbu huta Jerusalem dohot bagas joro na adong di huta i. I ma na masa di taon 70 Masehi.
3. Ala ni panulahon ni halak Jahudi gabe taripar ma joujou i tu angka bangso na so Jahudi, tarmasuk tu hita on.
Nang pe ditulak halak Jahudi joujou ni Debata, ndang sundat sangkap hatuaon ni Debata na balga i. Nunga dipadiri Debata hian angka naposo-Na marhite pangajarion ni Jesus tu angka sisean-Na dohot tu angka na mangihuthon Ibana. Nasida ma disuru Jesus Kristus muse mamaritahon barita na uli i tu angka bangso na di portibion, asa dohot nasida panean di haroan bolon na dinarade di harajaon-Na i. Alai dalan asa boi bongot tu si i ma marhite hamubaon ni roha dohot haporseaon di Jesus Kristus huhut padidihon dirina di bagasan goar ni Debata Sitolusada. Ido pahean laho bongot tu haroan bolon naung pinarade ni Debata nampuna harajaon i. Angka na so porsea tudos ma tu na so marpahean pesta na niusir ni raja i sian parpestaan na pinatupana i. Jadi angka na so marpahean pesta, i ma angka na so olo paubahon rohana jala na so porsea di Jesus Kristus. Ndang dohot angka halak na songon i tu haroan bolon naung pinarade ni Debata, alai dipabali Jesus Kristus do i di ari uhum sogot tu api na so ra mintop ro di salelengnilelengna. Ala ni ndang sude na dijou ni Debata marhite Jesus, tarpillit bongot tu haroan bolon naung pinarade ni Debata, holan angka na porsea di Jesus Kristus i do. I do nang na tinonahon ni Jesus tu angka sisean-Na di na sinuru-Na mamaritahon barita na uli i tu nasa na tinompa. Didok Jesus: "Na porsea jala tardidi, dapotan haluaon; alai na so porsea i, hona uhum do!" ( Markus 16: 16). Jadi haporseaon i do pahean pesta laho bongot tu haroan na pinarade ni Jesus. Jadi ndang sungkup holan tardidi jala tardaftar gabe ruas ni huria. Jala tanda ni na porsea ndang sungkup holan mangihuthon angka kegiatan-kegiatan ritual na pinatupa ni huria i. Alai ingkon tarida do di pangulaon siganup ari i ma manghangoluhon songon na niajarhon dohot na hinangoluhon ni Jesus Kristus. Haporseaon i sadalan do i dohot holong ni roha dohot roha panghophopon tu dongan jolma. Jadi unang ma hita holan na dohot tarjou, alai ingkon dohot ma na tarpillit bongot tu harajaon ni Debata. Molo didok Jesus di ujung ni turpukta on " lan do na tarjou alai otik do na tarpillit", molo adong do di hita haporseaon na sintong dohot haradeon tongtong mangihuthon Tuhan i sian nasa rohanta, boi ma pos rohanta dohot do hita masuk tu na tarpillit i.
________________
Mateus 22:1-14
1 Dung i diulahi Jesus ma marumpama tu nasida songon on:
2 Tarpatudos do harajaon banua ginjang i tu sada raja na mamestahon anakna na mangoli.
3Jadi disuru ma angka naposona, manjou angka na ginonghonna hian tu pestana i, hape ndang olo nasida ro.
4 Dung i diulahi ma, disuru ma naposo na asing, ninna ma: Paboa hamu ma tu angka naung ginonghon: Nunga huparade panganon pesta i, nunga hupotong angka horbo dohot lombu; nunga rade saluhutna. Ipe, ro ma hamu tu pesta i!
5 Alai na laho be do nasida di tois ni rohanasida: Na sada tu haumana, na sada tu partigatigaonna.
6 Alai ditangkup na deba angka naposona, dipasipalsipal jala dipusa.
7 Jadi tarrimas ma raja i, disuru ma soldaduna mangalengsehon angka pamunu i jala manurbu hutanasida.
8 Dung i ninna ma mandok angka naposona: Nunga rade nian na hasea tu pesta i, alai ndang tau angka na pinio i.
9 On pe, laho ma hamu tu angka dalan balobung, arahon hamu ma tu haroan on nasa na dapot hamu!
10 Jadi saut ma laho angka naposo i tu angka dalan, ditogihon ma saluhut na jumpang nasida, angka na jahat dohot na denggan, gabe gok tamue ma parpestaan i.
11 Alai laho bongot raja i mamereng angka tamuena, dapot matana ma disi sada halak na so marpahean pesta.
12 Jadi didok ma tu ibana: Na beha do parmasukmu tuson, amang, ai ndang marpahean pesta ho? Gabe manghohom ma ibana.
13 Dung i didok raja i ma tu angka naposona: Tali hamu ma patna dohot tanganna, laos pabali hamu ma ibana tu na holom marimpotimpot; disi ma masa angguhangguk dohot na patungoripon.
14 Ai lan do na jinou; alai otik do na tarpillit.
Tidak ada komentar:
Posting Komentar