RENUNGAN YESAYA 5: 1-7, DIHALOMOHON JAHOWA DO UHUM DOHOT HATIGORAN ( TUHAN MENGHENDAKI KEADILAN DAN KEBENARAN)

 DIHALOMOHON JAHOWA DO UHUM DOHOT HATIGORAN ( TUHAN MENGHENDAKI KEADILAN DAN KEBENARAN)

Horas ma di hita. Selamat Ari Minggu XVIII dung Trinitatis ( 8 Oktober 2023). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Panurirang Jesaya 5: 1-7, na dihalomohon Jahowa do sian hita bangso-Na dohot huria-Na uhum dohot hatigoran. I do parbue ni haporseaon na diigil Debata sian hita songon angka na porsea di Ibana marhite Tuhan Jesus Kristus.

1. Dipasahat Hata ni Debata tu bangso i marhite ende. Laho manait roha ni na umbegesa, dipasahat panurirang Jesaya do hata ni Debata tu bangso Jehuda marhite sada ende. Hata ni Debata na digubah di bagasan ende i i ma marrumang panurirangon taringot tu uhuman na naeng pasahaton ni Debata tu bangso i, ala so diparbuehon nasida parbue na denggan songon na hinirim ni Debata sian nasida songon bangso na pinillit ni Debata. Di bagasan ende i dipatudos ma bangso i tu sada porlak anggur ni na hinaholongan ni si Jesaya. Porlak anggur i mansai denggan do diradoti nampunasa di sada inganan na mansai napu di punsu ni sada dolok. Mansai denggan do diolah tano ni porlak i, dipangkuri mansai denggan, dijomputi angka batu sian i, dungi disuan ma lopok ni hau anggur pilihan, na unggul, na diharaphon boi mamparbuehon parbue na mararga ima anggur na tonggi. Domu tu arop ni rohana i, diurus parporlak i ma hau anggur na sinuanna i dohot denggan, dipauli parik humaliang porlak i, asa unang masuk angka binatang mansegai porlak i , dipauli dohot tungkup di parsitongaan ni porlak i bahen inganan ni panjaga asa unang adong parjahat na mamasuhi porlak i. Angkup ni dihali ma inganan pangilangan ni anggur i molo dung dapot tingkina marparbue anggur i. Digombarhon i do panghirimon ni nampuna porlak i na mansai balga di hasil ni porlakna i. Alai tarhirim do nampuna porlak i, na manghorhon kekecewaan na balga situtu. Ai nang pe nunga songon i pangalehonon ni rohana laho mangurus porlak, ndang dapot parbue ni hau anggur na sinuanna i songon na hinirim ni rohana. Na diparbuehon angka parbue na metmet do jala asom, na so mararga manang aha pe. Di bagasan kekecewaan situtu, tarrsimas ma parporlak i, diumpat ma handangna, diloha parikna, asa suda digagat jala diluntak angka binatang porlak i. Marlapatan do i dipasahat ma porlak i tu angka binatang di ladang na humaliang asa dipasuda jala disega i. Tarulang ma porlak i jala tubu ma disi angka suansuanan na marsugasuga, jala dipangidohon nampuna porlak i unang ro tu si udan, asa mahiang sude angka suansuanan na disi jala mate.

2. Jahowa do nampuna porlak anggur i jala bangso Israerl sandiri do porlak anggur i. Di ujung ni turpuk on tangkas ma dipataridahon si Jesaya, na Jahowa do nampuna porlak i, i ma na nidok ni panurirang i na hinaholongan ni rohana, jala bangso Israerl do porlak anggur ni Debata. Dihirim Debata hian do boi bangso i mamparbuehon na tonggi, i ma parbue na denggan na mambahen las roha ni Debata, marhite na magaradoti patik dohot uhum ni Debata. Alai parbue na asom dohot angka na busuk do diparbuehon nasida, na mambahen tarrimas Debata gabe diuhum Debata ma nasida. Angka parbue na busuk i, i ma angka pangalaho na so uhum, angka hageduhon, pangarupaon manang penindasan tu dongan jolma, ro di angka pamunuon, na masa ditongatonga ni bangso i. Laho manggombarhon i dipangke panurirang i do permainan ni hata Ibrani na puitis. Didok, sai dipaimaima "mishpat" ( uhum), hape idama "mispakh" ( pangarupaon, penindasan) do na ro. Dipaimaima "tsedaqah" ( hatigoran, hasintongan), hape idama "tse'aqah" ( anggukangguk) do na masa. Jadi dosa ni bangso i ima ndang mangargahon holong ni Debata tu nasida jala ndang marparange hombar tu pamilliton dohot panjouon ni Debata na tu nasida. Di angka ayat na mangihut dung turpuk on di patorang panurirang Jesaya do angka dosa na niula bangso i na mambahen nasida marjea, hona uhum ni Debata i ma: Hamongkuson di arta portibion (ay.8-10), parmabuhon ala ni siinumon na koras ( ay. 11-12), pargabuson ( ay 18-19), na papeolhon uhum hasintongan dohot hatigoran ( ay. 20), na manghaginjanghon dirina jala mangarajumi dirina na bisuk jala marroha ( ay. 21), na patingkos uhum tu parjahat ala sisip ( ay. 23) sahat ro di na manggarishon patik ni Debata (ay 24-25). Sudena i mambahen tarrimas Debata, gabe diuhum Debata ma bangso i marhite na mangaloas bangso parbegu laho mamorangi huhut manoluk tano nasida i. Parjolo ma diuhum Debata harajaon Israel par-Utara, na sinoluk ni harajaon Assur taon 722 seb. M. Sian mulai tingki i ndang adong be harajaon i, nunga mago ma bangso si sampulu marga i sahat ro di tingkion. Jala di pudian ni ari di taon 596 diuhum Debata ma harajaon Juda ( Israel Selatan, si dua marga, Juda dohot Benjamin) marhite na disoluk harajaon Babel. Jala mulai sian i ndang hea be harajaon Juda i gabe harajaon na berdaulat, tongtong na ma di bagasan gomgoman ni harajaon ( negara) na asing, ala naung diuhum Debata nasida.

3. Dihalomohon Jahowa do angka na porsea di Ibana mangulahon uhum dohot hatigoran. Hita angka na porsea di Jesus Kristus na ma Israel na imbaru. Marhite pandidion i nunga tarjou hita gabe bangso ni Debata. Marhite panghophopon ni Jesus Kristus nunga dipatuduhon Debata holong ni rohaNa tu hita. Nunga dipillit Debata hita marhite Jesus Kristus asa laho hita marparbue, songon na nidokNa tu angka siseanNa di Johannes 15: 16: "Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i ". Parbue na hinalomohon ni Debata sian hita i ma pangaradotion di uhum dohot hatigoran ni Debata. Uhum na marharoroan sian hata Ibrani "mishpat", marlapatan sude angka panimbangion na marojahan di patik manang aturan na adong. Jala hatigoran na marharoroan sian hata "tsedaqah", ima hasintongan, ndang adong di bagasan hageduhon, manang angka sipaotooto na mangasahon roharohana sandiri. Hira sadalan do na dua pangalaho on, jala di buku na badia i jotjot do i dihatahon hira na marpasangan. Pandohan "uhum dohot hatigoran" manang sipata didok "hatigoran dohot uhum" mansai godang do i dapot di buku na badia i, ala i do pangalaho na dihalomohon Debata siparangehon ni jolma marsadasada nang angka bangso pe. I do nang dihalomohon Debata sian bangso na pinillit-Na i, songon naung tataringoti di jolo. Jadi angka pangalaho, parulaon, parange, na so hombar tu uhum dohot hatigoran tung dihasogohon Debata do i. I do umbahen mansai sogo roha ni Debata mida bangso Israel di na so mamparangehon uhum dohot hatigoran, alai sai mangulahon na so uhum dohot hageduhon ni portibion. Jala i do na jotjot disoarahon angka panurirang ulahonon ni bangso Israel asa tarpasupasu nasida.Jadi molo porsea do di Debata jala olo tongtong unduk tu Debata , ingkon dihabiari do mangulahon na so uhum dohot hageduhon, ai ndang dihalomohon Debata non i. Ingkon lumlam do sada bangso manang masyarakat molo so dapot be disi uhum dohot hatigoran. Panghorhon ni halumlamon i godang ma masa di si angka ragam ni hajahaton, pangarupaon (penindasan), na mangasahon gogo dohot huaso, pamunuon, pangangkalangkalion, roha diri, angka na papeol uhum ala ni sisip, korupsi, dohot angka hajahaton na asing. Alai sabalikna sai na demak do sadasada bangso molo togu do bangso i marojahan di uhum dohot hatigoran. Sonang ma ganup halak mangula ulaonna be, denggan parsaoran di tongatonga ni masyarakat, hehe parngoluon na lam tu majuna, dao angka ulaon hajahaton. Ala ni tarjou do angka na porsea di Jesus Kristus mangulahon uhum dohot hatigoran di tongatonga ni masyarakat, bangso nang di huria pe, ai ido lomo ni roha ni Debata.

_______________

Jesaya 5:1-7

1 Marende ma ahu nuaeng taringot tu hasianku, sada ende ni haholonganku taringot tu porlak anggurna: Marporlak anggur do hasianku di punsu ni sada dolok na napu.

2 Jala dipangkuri, jala dijomputi angka batu sian i, jala disuanhon lopok na denggan tusi, jala dipauli sada tungkup di tongatongana, jala dihali sada pangilangan di bagasan, paimahon parbue na tonggi, hape na asom ditubuhon.

3 Antong hamu isi ni Jerusalem, jala hamu baoa sian Juda, ua uhum hamu Ahu dohot porlak anggurHu.

4 Tung aha dope sibahenon nian tu porlak anggurHu, na so Hubahen tusi? Boasa sai Hupaimaima parbuehononna parbue na tonggi, hape na asom do diparbuehon.

5 On pe pabotohononHu ma tu hamu sibahenonHu tu porlak anggurHu: UmpatonHu ma handangna, asa suda digagat binatang, lohaonHu ma parikna, asa diluntak.

6 BahenonHu ma ibana gabe halongonan, asa unang dirantingi manang dipangkuri, asa tubuan suga dohot sihupi, jala dohononHu angka ombun, asa unang mangalehon udan tu ibana.

7 Alai porlak anggur ni Jahowa Zebaot, i ma pinompar ni Israel dohot angka baoa sian Juda, suansuanan hasudunganNa. Sai dipaimaima uhum, hape ida ma pangarupaon do, hatigoran hape ida ma angguhangguk do.

Semua tanggapan:

7Leiden Rah Panjaitan, Luga Smsong dan 5 lainnya