RENUNGAN YAKOBUS 5: 7-11, BENGET MANGULAHON LOMO NI ROHA NI DEBATA

 BENGET MANGULAHON LOMO NI ROHA NI DEBATA

Horas ma di hita. Selamat Ari Minggu XVII dung trinitatis (1 Oktober 2023). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni apostel Jakobus bindu 5: 7-11, asa benget hita mangula lomo ni roha ni Tuhan i, sahat ro di haroro ni Tuhan i.

1. Na maimaima do hita di haroro ni Tuhanta padua halihon. Sada pokok haporseaon ni hita halak kristen na sai tahatindanghon hombar tu hata haporseaonta i ma na ro do muse Tuhan Yesus paduahalihon laho manguhumi halak na mangolu dohot na mate. Alai ndang songon haroroNa na parjolo i be Haroro-Na na paduahalihon on. Molo di haroro-Na na parjolo i di bagasan hajolmaon na mangae godang sitaonon dohot haporsuhon do Ibana sahat tu na maneahon hosa-Na mate humophop hita. Alai di haroro-Na paduahon on ro do Ibana songon Raja na papatarhon hasangapon dohot hamuliaon-Na. Ibana ma Raja ni angka raja jala Tuhan ni angka tuan. Hata na gumodang dipangke taringot tu haroro ni Jesus Kristus paduahalihon i i ma "parusia". Hata i marlapatan "haroro" ni parbanuaginjang laho patundukhon nasa huaso dohot hagogon na di portibi on tu tu toru ni huaso-Na. Jala ndang adong be angka na di portibi on na boi mangasahon huasona maradophon Kristus. Di si ma uhumon-Na sude na so porsea jala na so marunduk ni roha tu Ibana, tagan di ngoluna di portibion. Alai laos tingki las ni roha na so hapalang ma i di angka na porsea, na marsihohot mangoloi Ibana tagan di ngoluna. Ai disi ma pamasuhon ni Jesus Kristus angka na porsea i tu inganan naung pinarade-Na di banua ginjang i, i ma surgo hasonangan i. Manang sadihari i masa ndang adong na umbotosa. Alai masa do i diujung ni partingkian ni portibion. Jala tompu do i masa, songon hilap manang songon panangko borngin. Di pangajarion ni huria di mulana i masa do i di tingki na hatop na so pola sadia leleng nari dung hananaek ni Jesus tu banuaginjang. Apostel Paulus sandiri pe sanga do porsea na ingkon masa i di sundut parjolo ni halak Kristen i. Jala adong do na barani mangetongi arina i, gabe ala ni i adong ma na so marsitutu be mangula ulaonna. Alai dung lam leleng lam diantusi huria na parjolo i do na so boi etongon ni jolma sadihari tingki ni Tuhan i. Ai ndang dos tingki ni jolma dohot tingki ni Debata. Sadari di Debata boi do lobi saribu taon di jolma. Ala ni sai dipodahon angka parbarita na uli i i ma tu angka halak Kristen i asa tongtong dungo jala martangiang, songon na pinaingothon ni apostel Petrus. Di 1 Petrus 4: 7: "Antong, marroha ma hamu, jala manangkas ma rohamuna tu tangiang!". Jala di bindu 5: 8, didok: "Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna".

2. Benget ma hita mangula ulaon na denggan sahat ro di haroro ni Tuhan i. Di na paimahon haroro ni Tuhan i boi ragam na masa na ni adopan ni hita halak Kristen. Songon di huria na parjolo i diadopi do pangaleleon manang persekusi sian parhuaso ni portibion dohot sian angka na marsogo ni roha di Tuhanta i, na marsogo ni roha di huria i dohot hakristenon i sandiri. Godang do angka haporsuhon diadopi angka halak Kristen i, deba dipasiaksiak, jala pola do torop na hona pusa. Alai di bagasan pangalaho na songon dipaingothon apostel Jakobus ma asa marbenget ni roha angka halak Kristen i sahat ro di haroro ni Tuhan i. Benget, lapatanna tabah, sabar, di bagasan haporseaon na togu mandalani dalan sidalananna, huhut mangula ulaon na patut siulaonna. Ndang mura mandele, ndang sumurut hiras ni rohana manghirim, partondi na girgir di bagasan panogunoguon ni Tuhanta i. Didok apostel Jakobus, songon benget ni roha ni parhauma paimahon gogo ni tano na niulana i, jala marbenget ni roha paimahon "udan manogot dohot bodari". Tar maol do taantusi lapatan ni "udan manogot dohot bodari", ala ndang apala pas i tu lapatan ni pandohan i na sasintongna. Di terjemahan bahasa Indonesia pe na mandok "hujan musim gugur dan hujan musim semi pe", tong do ndang apala pas tu situasi ni tano Palestina. Anggo maksudna na sasintongna " parmulaan ni ari parudan dohot ujung ni ari parudan do" ( hujan awal dan hujan akhir songon na didok di 5 Musa 11: 14). Parmulaan ni ari parudan masa di ujung ni bulan Oktober sahat tu bona ni bulan Nopember, mansai porlu di partani ni halak Palestina, i ma na manontuhon hatutubu ni boni na sinuanna. Jala ari parudan parpudi masa di bulan April sahat bulan Mei, i ma na manontuhon parmasak ni parpue ni gandum na sinuanna. Songon angka partani i porlu marbenget ni roha paimahon ari parudan di tingkina na manontuhon gogo ni na niulana i, songon i ma porluna halak Kristen marbenget ni roha paimahon haroro ni Kristus i, asa partohap di hangoluan naung pinarade ni Tuhanta i. Di na paimahon i, ingkon togu do roha ni hita halak Kristen di bagasan haporseaon. Ndang jadi masipabalian hasalaan tu dongan, jala ndang boi masiuhumuhuman songon jamita dua minggu na salpu. Ai molo diulahon halak Kristen songon i nunga maralo tu pangajarion ni Tuhanta songon na tarsurat di Mat. 7: 1: Unang hamu manguhumi asa unang hona uhum hamu. Manang ise na mangalaosi i, ingkon hona uhum ni Debata do di ari paruhuman sogot i, na mangihuthon apostel Jakobus nunga jonok tingkina. Ai didok ibana, nunga jongjong di pintu i Panguhum i.

3. Tatiru ma habengeton ni angka panurirang dohot habengeton ni si Job.

Taringot tu habengeton dohot hatoguon ni roha di bagasan haporseaon, diarahon apostel Jakobus do hita asa maniru habengeton ni angka panurirang dohot habengeton ni Job. Angka panurirang i ma nasinuru ni Debata patolhashon hata-Na tu tongatonga ni bangso-Na. Jotjot do ndang boi nasida patolhashon hata ni Debata, ala ndang olo halak tumangihon nasida. Jala jotjot do nasida manaon pangareheon dohot insakinsak ( Jer. 20: , jala dipaburuburu halak. Jadi nasida jotjot manaon na porsuk ala ni na mangulahon parsuruon ni Debata, manang ala ni na mangoloi Debata, ndada ala ni na mangulahon na sala nasida. Alai nang pe songon i tongtong do benget nasida. Ndang tagamon boi angka panurirang rodi angka halak ni Debata mandalanhon ulaon na pinasahat ni Debata tu nasida anggo so di bagasan habengeton nasida laho manaon ragam ni angka haporsuhon dohot sitaonon i. Habengeton nasida i porlu gabe sitiruon ni angka halak Kristen saleleng ni partingkian sahat ro di haroro ni Tuhan i. Martua do angka na marhabengeton i.

Angkup ni diarahon do hita maniru habengeton ni si Job. Mansai manait do tu rohanta barita ni si Job. Ibana ma sada tiruan di Bibel i taringot tu habengeton dohot togu ni roha di sitaonon dohot haporsuhon. Ndang adong tudosan ni bernit ni sitaononna. Nang pe songon i borat ni sitaononna, habis sude artana, mate sude anakhonna, jala malala sude dagingnna dibahen sahit puru ndang sumurur ibana sian haporseaonna tu Tuhan i. Porsea do ibana tongtong tu Debata nang pe ndang diantusi ibana sitaononna i. Maniak do ateatena mambege hata ni angka alealena na mandok, naung ditadinghon Debata ibana ala ni angka dosana i. Alai ndang porsea ibana hata ni angka na alealena, alai tongtong do ibana benget manaon sitaononna songon ujian tu dirina sian Debata. Ala na benget do ibana manaon, jala ndang talu ibana di pangunjunan na tu ibana, dipaujung Debata do sitaononna i marhite na pasuanghon artana na magoi dua hali lipat, dipasuang muse angka anakhonna na mate i, songon i muse dipasuang hahipasonna jala dipagajang Debata umurna, boi do pe leleng ibana rap marlas ni roha dohot angka sisolhotna dohot angka alealena sahat ro di na mate sarimatua ma ibana, songon na dibaritahon di Buku Job 42: 20-17. Jadi sintong ma ibana gabe halak na martua. Alai di sude hatuaon na sahat tu ibana di ujung ni sitaononna i, ala parasi roha jala pardenggan basa do Jahowa (Psalmen 103: . Denggan basa dohot asi ni roha ni Debata sai na jaloon ni angka na marbenget ni roha do i mangula ulaon na denggan.

________________

Jakobus 5:7-11

7 Antong, pabenget hamu ma rohamuna, ale angka dongan, sahat ro di haroro ni Tuhan i! Ai parhauma i pe, dipaimaima do parbue na arga, na sian tano i, jala dihabengethon do, paima dijalo udan manogot nang bodari.

8 Hamu pe, marbenget ni roha ma, patogu hamu ma rohamuna, ai donok do haroro ni Tuhan i.

9 Unang marhoi hamu maralohon hamu, ale angka dongan, asa unang hona uhum hamu. Nunga jongjong di pintu i Panguhum i!

10 Ale angka dongan; angka panurirang, na marjamita marhitehite Goar ni Tuhan i, ma tiru hamu di haporsuhon dohot di habengeton.

11 Taparhatua do angka naung marhabengeton. Dibege hamu do habengeton ni si Job, jala diida hamu do ujung na binahen ni Tuhan i; ai parasiroha bolon do Tuhan i jala partalup ni roha.

Semua tanggapan:

13Dolok Panjaitan, Jones Simamora dan 11 lainnya

6

Suka

Komentari

Bagikan