RENUNGAN YESYA 45: 1-7, JAHOWA DO MUAL NI HALUAON ( TUHAN SUMBER KESELAMATAN)

 JAHOWA DO MUAL NI HALUAON ( TUHAN SUMBER KESELAMATAN)

Horas ma di hita. Selamat Ari Minggu XX dung Trinitatis ( 22 Oktober 2023). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku panuirang Jesaya bindu 45: 1-7, na Debata Jahowa do mual ni haluaon di hita angka na porsea di Ibana.

1. Jahowa paluahon bangso-Na sian habuangan.

Tarbuang do halak Juda ( Israel Selatan ) tu harajaon Babel ala ni na so hot nasida marhaporseaon tu Debata Jahowa, songon naung dipadanhon nasida tu Debata, jala ndang unduk

nasida di patik dohot uhum ni Debata. Nunga marsomba nasida tu angka debata baal, jala nunga jotjot masa angka pangalaho na so uhum di tongatonga ni bangso i, na so hombar be tu pangalaho ni bangso ni Debata. Songon na didok di turpuk dua minggu na salpu (Jesaya 5: 7), sai dipaima Debata uhum parangehonon nasida hape pangarupaon do na diulahon, sai dipaima Debata hatigoran, hape angka anggukangguk manang partangisan do na masa di tongatonga ni bangso i, ala na jotjot masa angka pangalaho na so uhum di tongatonga ni bangso i. Ala ni i do umbahen diuhum Debata nasida, jala dipangke Debata raja Nebukadnesar, i ma raja ni harajaon Babel laho mangaleksehon huta nasida, huhut mamboan nasida tarbuang tu huta Babel. Uhuman ni Debata na sarupa nunga jumolo dihonahon tu harajaon Israel Utara ( 10 marga Israel) na maribukota di Samaria, naung dibuanghon tu harajaon Assur taon 722 seb.M. Mulai sian tingki i nunga marujung harajaon i, jala bangso i pe gabe marserak ma jala mago. Harajaon Israel Selatan ( dua marga, i ma marga Juda dohot Benjamin), na laos digoari harajaon Juda, dibuang tu huta Babel di bagasan tolu tahap. Tahap parjolo i ma taon 605, seb.M, sude angka na pistar ni bangso i, tarmasuk si Daniel diangkut tu huta Babel songon tawanan. Tahap paduahon i ma taon 597 seb. M, jala tahap patoluhon ima taon 586 seb. M, laos mangaleksehon huta Jerusalem dohot Bagasjoro na di huta i. Mulai sian i marujung ma harajaon i di bidang pemerintahan (politik), ai gabe angka harajaon na asing na ma na mangarajai bangso i marsorinsorin. Disangkapi Debata do tingki ni habuangan i lobi hurang 70 taon. Tujuan ni Debata umbahen na diloas nasida tarbuang, asa diboto nasida do naung mardosa nasida tu Debata Jahowa, naung nilaosi nasida parjanjian nasida tu Jahowa,

huhut asa marhite nasida dipapatar Debata Jahowa huaso-Na tu angka bangso na asing. Dung adong lobi hurang 70 taon nasida naung tarbuang i, dipalua Debata ma nasida mulak muse tu hutanasida di Jerusalem,alai ndang songon sada harajaon na merdeka be, hot do di bagasan gomgoman ni harajaon na asing, alai bebas do nasida laho mangaradoti parugamoon nasida.

2.Dipangke Debata Jahowa Raja Kores, i ma raja ni harajaon Persia paluahon bangsoNa sian gomgoman ni harajaon Babel. Harajaon Persia niuluhon ni raja Kores gabe sada harajaon na balga jala na gogo ma na tuk manaluhon harajaon Babel. Hatop dung dipatunduk raja Kores harajaon Babel, dohot angka harajaon na asing na humaliang, manigor diparentahon ibana ma asa mulak halak Juda naung leleng digomgomi harajaon Babel tu hutanasida di Jerusalem, jala diloas laho pajongjong bagas joro inganan panombaon nasida tu Debata Jahowa, naung dileksehon raja Nebukadnesar, huhut mangaradoti parugamoon nasida. Ala ditoru ni huaso ni Debata do sude nang angka raja na di portibion, dipangke Debata do raja Kores i laho paluahon halak Juda manang halak Israel i. Laho pasauthon ulaon i dimiahi Debata do Raja Kores i. Jadi targoar do ibana raja na miniahan

(meshiakh). Sian hata on do muse gelar mesias, na di hata Junani Kristos, na dipangke tu Jesus. Alai hamesiason ni raja Kores khusus do laho paluahon halak Israel sian gomgoman ni halak Babel, alai ha Mesiason ni Jesus i ma paluahon sude jolma sian gomgoman ni dosa. Jadi nang pe so sisomba Debata Jahowa raja Kores i, boi do ibana dimiahi Debata laho pasauthon sangkapna. Huaso na pinasahat ni Debata tu ibana i ma papatuhon angka bangso parbegu di jolona, mananggali hohos panggantungan ni sinjata sian gonting ni angka raja na asing, mangungkap di jolona angka pintu dohot bahal unang hinsu di dapot. Laho mandalahon huaso i, Jahowa mardalan di jolona, pahornophon angka buntulbuntul, mangaropuhi angka pintu tombaga, manegai angka sordak ni pintu. Alai ndada holan pasahat huaso i Debata tu si Kores, alai dohot do pasahat angka arta na buni, arta na so tarida do pe, alai na ingkon sahat do i tu ibana di na mangulahon tugas na pinasahat ni Jahowa tu ibana. Tujuan ni Debata na mamiahi si Kores i songon na dihatahon di turpukta on, i ma:

Parjolo "Ala ni

Jakob naposongKi dohot ala ni Israel na Hupillit i". Lapatanna bahen haluaon ni bangso-Na i.

Paduahon, dipalua Debata bangso-Na i, ndada holan ala ni kepentingan nasida, alai asa diboto saluhut halak manang saluhut bangso do sian habinsaran sahat ro di hasundutan, na so adong debata dunghon ni Debata Jahowa. Laos asa diboto si Kores, Jahowa do Debata ni Israel. Sian na jolo pe di sude pambahen ni Debata, na pajongjong halak Israel gabe bangsona, paluahon dohot manobus bangso i sian tangan ni raja Parao, ndada holan ala ni bangso i, alai asa diboto saluhut bangso do marhite pambahenan-Na tu bangso i na sasada Debata Jahowa do Debata na marhuaso di sandok portibi on, marhuaso di tongatonga ni angka bangso, marhuaso di sejarah di pirtibion dohot sude hajolma on.

3. Haluaon na pinatupa ni Debata tu bangso Jehuda marhite si Kores na miniahan ni Jahowa i ma patujolo ni haluaon ni sude hajolmaon marhite Jesus, Mesias na miniahan ni Debata. Songon naung pinatorang di jolo, Debata paluahon bangsoNa sian gomgoman ni parhuaso di portibion, ndada holan na ringkot di bangso i, alai patujolo ni ulaon ni Debata na umbalga sian i do pe, i ma haluaon ni hajolmaon dohot sude angka bangso sian gomgoman ni dosa i. On do tong na ringkot sadaran ni halak Isrsel nian,molo dipillit Debata pe nasida gabe bangso-Na, ndada holan ala ni kepentingan nasida i, alai naeng pangkeon ni Debata do nasida pasahathon missi ni Debata na umbalga do pe i ma sangkap haluaon ni sandok hajolmaon. Sude pambahenan ni Debata tu nasida, sian mulai panjouon ni Debata tu ompu nasida si Abraham, panotophonon ni Debata di nasida gabe bangso-Na marhite padan, dohot panogunoguon ni Debata di nasida, asa marhite nasida tandaon jala haporseaan ni angka bangso na di portibion Debata Jahowa na marhuaso di portibion dohot di sude angka bangso. Alai ndang boi diulahon bangso i non i dohot singkop, gariada nasida do na gabe jotjot manimbil sian haporseaon di Debata Jahowa. Ala ni i do umbahen na diuhum Debata nasida. Alai panguhumon ni Debata di nasida tong do domu tu sangkap hatuaon ni Debata na balga i, i ma papatarhon diri ni Debata Jahowa tu angka bangso, jala patuduhon na ditoru ni huaso ni Debata Jahowa do sude angka raja dohot bangso na di portibi on. Alai nang pe gagal do bangso Israel laho mandalanhon missi ni Debata, ndang sundat Debata pasauthon sangkap-Na paluahon hajolmaon sian gomgoman ni dosa. Ala ni i do Ibana sandiri tuat tu portibion marhite Anak-Na Jesus Kristus. Ibana ma dimiahi Debata gabe Mesias na paluahon sandok hajolmaon, na manghophop jolma pardosa i marhite na rade maneahon hosa-Na mate di silang i. Di bagasan Jesus dipaimbaru Debata ma padan-Na. Molo di padan na robi i, Israel ma dipabangkit Debata gabe bangso-Na, alai ala ndang tarulahon nasida i, gabe di padan na pinaimbaru ni Debata, gabe sude ma angka na porsea di Jesus Kristus gabe bangso ni Debata. Aha missi ni Debata na pinasahat-Na tu bangso Israel dung dipabangkit nasida gabe bangso-Na di dolok Sinai gabe tu angka na porsea di Jesus manang huria i ma hasahatan ni i. Di dolok Sinai didok Debata do tu halak Israel songon na tarsueat di 2 Musa 19:6: "Manjadi harajaon malimmalim ma hamu di Ahu, jala bangso na badia". Hata on do muse na sahat tu halak Kristen manang huria i, songon na nidok ni apostel Petrus di 1 Petrus 2: 9, "Alai marga na pinillit do hamu, hamalimon na raja, bangso na badia, houm na ginomgoman-Na, asa tung dibaritahon hamu denggan ni harohaon ni Ibana, naung manjou hamu sian na holom tu hatiuron-Na halongangan i". Jadi on do hadirion ni huria i, i ma naung pinillit ni Debata gabe bangso-Na, gabe harajaon hamalimon, bangso na badia, laho mambaritahon ( manghatindanghon) denggan ni naung binahen ni Debata tu hita naung paluahon hita sian gomgoman ni dosa( haholomon) tu hatiuron. Sada tugas panjouon ni Debata tu angka na porsea manang huria i, i ma mambarirahon barita na uli i, i ma barita taringot tu denggan ni naung binahen ni Debata tu hita naung paluahon hita sian gomgoman ni dosa tu hatiuron. Tugas on ndada holan tugas ni angka apostel, manang angka evangelis, manang angka pandita ro di sude angka parhalado do, alai tugas ni sude angka na porsea do di Jesus Kristus, marhite na manghatindanghon manang manghangoluhon barita na uli i di ngoluna siganup ari sahat ro di na dohot mandukung manang manangianghon ulaon ni parbarita na uli na khusus tarjou tu ulaon i.

________________

Jesaya 45:1-7

1 Songon on do hata ni Jahowa tu na miniahanNa tu si Kores, na Hutiop di tanganna siamun papatuhon angka bangso parbegu di jolona, jala mangkarhari sinjata sian gonting ni angka raja, mangungkap di jolona angka pintu dohot bahal, unang hinsu di dapot.

2 Ahu mardalan di jolom jala pahornophon angka buntulbuntul; ropuhanHu ma angka pintu tombaga jala segaanHu angka sordak bosi.

3 Jala lehononHu ma di ho arta angka na di haholomon dohot homitan angka na tinabunihon, asa ditanda ho ahu do Jahowa, Debata ni Israel na manjou goarmu.

4 Ala ni Jakob naposongHi dohot ala ni Israel na Hupilliti umbahen na Hujou ho di goarmu, pola marsahala goarmu Hubahen tagan so ditanda ho dope Ahu.

5 Ahu do Jahowa, jala ndang adong be Debata dungkon ni ahu; Huhohosi do ho tagan so ditanda ho dope Ahu.

6 Asa ditanda halak angka na sian habinsaran dohot sian hasundutan na soadong Debata dungkon ni Ahu; Ahu do Jahowa, jala dungkon ni Ahu ndang adong.

7 Ahu Sijadi hatiuron dohot sitompa haholomon; sibahen hadameon dohot sitompa hamagoan. Ahu do Jahowa, sibahen saluhutna i.