SERMON ( JAMITA ) TU LANSIA ( JOHANNES 14; 15-17 )

SERMON ( JAMITA ) TU LANSIA

BE No. 461: 1+3,  Songgop tu hami ( BL 407 )

♫    Songgop tu hami na di joloMon, o Tondi, ni Debatangki.Uhir patikMu tu rohangkinon, O Tondi  ni Debatangki. Bereng siholhu di haroroMi, Molo Ho ro, nda hisar ton-dingki. Didihon ma tu au on apiMi. O Tondi ni Debatangki.

♫     Lehon hataM, I  ma tau podangki, Debatangki na gogo I,Asa sai talu sude musuMi. Debatangki na gogo i. Mangkatindangkon tongtong   goarMi, asa malua pardosa disi, Asa dijangkon Tuhanta ma i. Debatangki na gogo i.

TURPUK:  Johannes  14: 15-17 ( 31 Mei 2020: Parningotan Hasasaor ni Tondi Porbadia )

15 Molo na holong rohamuna di Ahu, radotanmuna do angka patikku.

16 Jala pangidoonku ma tu Ama i, asa dilehon tu hamu sada Pangondian na asing, asa I mandongani hamu salelengna i.

17 I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana.

JAMITA:

Turpuk on, i ma deba sian hata parsirangan ni Jesus tu angka siseanNa. Dung  jonok tingkina tinggalhonon-Na ma angka sisean di potibion, di pasahat Jesus ma angka hata apoapo na boi patoguhon roha ni angka sisean i, asa unang bonsa roha nasida di parsirangan i. Ai  nang pe ingkon marsirang nasida, mangihuthon hajolmaon ni Jesus, ndada na  sirang anggo sian hadebataon ni Jesus. Dung mulak Ibana tu banuaginjang, manigor pangidohon-Na do Amai, asa disuru Tondi Porbadia, laho mangondihon nasida singkat ni Jesus. Adong dua pokok hata ni Jesus di turpukta on tu angka sisean i, i ma:

Parjolo, asa hot holong ni rohanasida tu Jesus, unang sumurut , nang pe ingkon tadinghonon ni Jesus nasida. Jala tanda ni holong ni rohanasida i, ima molo tongtong diradoti nasida patik ni Jesus i. Pangibulan ni angka patik na niajarhon Jesus, ima manghaholongi Debata sian nasa  ateate, sian nasa hosa dohot sian nasa roha. Dung i manghaholongi dongan jolma dos dohot diriniba. On do na manghamham  nasa patik ni Debata marhite si Musa dohot angka panurirang di Padan Na Robi          ( Mateus 22: 37-40). I do nang na sai niajarhon ni Jesus tu angka sisean i. Molo tuat Jesus tu portibion, ima laho patandahon Debata Ama i tu hajolmaon, ai di bagasan Jesus nunga patar Debata Ama i. Ala ni dalan laho manghaholongi Debata, ima marhite na manghaholongi Jesus Kristus, jala dalan manghaholongi Jesus ima marhite na mangaradoti angka patik ni Jesus. Jadi ingkon tongtong do patik i borhat sian holong. Diajarhon halak Jahudi do mansai godang angka patik, alai sude patik na niajarhonna i holan na mardomu  tu pangaradotion di angka  ritus dohot angka seremoni ni parugamoon ni Jahudi i do  marguru tu ruhut parduru sambing, na jotjot mansoadahon  holong tu dongan jolma. Hape ndang sintong molo didok halak holong roha-Na di Debata, hape dihosomi do dongan-Na jolma. Patik na songon on do na pinatingkos ni Jesus, marhite pangajarionNa tu angka sisean i. Pangajarion ni Jesus i ndada holan marhite hata sambing, alai langsung do marhite tiruan di pambahenan, sahat ro di na rade Ibana berkorban, maneahon hosana ala ni holong ni roha-Na laho manghophop jolma. Jadi holong ni roha, ima haradeon berkorban tu Deabata dohot tu dongan jolma.

Paduahon, dipapos Jesus roha ni angka  sisean i, na so  pasombuon-Na  nasida so marama.  Hatop do pangidohonon-Na  tu Ama i, asa manigor dilehon tu nasida Pangondian na sing, na mangondihon nasida singkat ni Jesus salelengna di portibion.  Pangondian i, ima Tondi Hasintongan, . manang  Tondi Porbadia. Ibana ma hapataran ni Debata na patoluhon, di bagasan Debata Sitolusada, Debata Ama, Anak dohot Tondi Porbadia. Ibana ma na mangulahon hasintongan na pinapatar ni Jesus, marhite angka sisean i. Ndang tarjalo portibi, na nirajaan ni sibolis on Ibana, ala ndang diida jala ndang ditanda. Alai angka sisean i ditanda do Ibana, ala marhite pangajarion dohot ulaon ni Jesus, nunga diboto nasida pangalaho ni Tondi i. Tondi i ma na mangaramoti jala mangula di bagasan nasida. Goar Pangondian i, di hata Junani “parakletos”. Di hata Indonesia didok “penolong”. Alai tumingkos do terjemahan hata Batak i, i ma Pangondian, ai tondi i ndada holan mangurupi nasida di angka siulaoanna, alai dohot do mangondihon nasida maradophon ulaon ni sibolis parjahat i di portibion. Hira dos do lapatan ni  “parakletos”  dohot sahalak “pembela” ni halak na marpangkaro di jolo ni panguhum. Di tingki di portibioan, Jesus do na mangondihon angka sisean-Na i, marhite na mangajari,  manguluhon, mangurupi, membela  dohot patoguhon roha nasida, maradophon portibion dung mulak Jesus tu banuaginjang. Di ayat na asing udut ni turpukta on, i ma dia ayat 26 didok Jesus do: “Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu!”

            Porlu  taringotanta saotik di son, betak beha naung hea tabege, na dikutip do di Al-Kuran ni Silom, Johannes 14: 16-17 on, alai dibagasan penafsiran sala, ima di Sura 61: 6. Didok nasida,martudu tu si Muhammad do Pangondian na ni bagabagahon ni Jesus di son.  Hape na dipapeol nasida do hata “parakletos” i, gabe “perikletos”. Hira na mirip memang begeon hata “parakletos” dohot “perikletos”, alai mansai marasing do lapatanna. Alai sangaja ma dipapeol nasida hata “parakletos” gabe “perikletos”, asa boi dohonon nasida, na si Muhammad do na tinudu ni hata i. Songon naung tinaringotan di jolo, “parakletos” lapatanna Pangondian do, jala “perikletos”, hira dos lapatanna dohot “ahmad” di hata Arab, na marlapatan, halak na tarbarita. Goar Muhammad sipata ma didok nasida Ahmad, asa boi dohonon nasida na si Muhammab na “nasinurirangkon” ni Jesus di Joh. 14: 16-17. Hape dison Jesus ndang manurirangkon, alai na manjajihon do. Jala tangkas do “patakletos” na  nijanjihon  ni Jesus i lehonon ni Amai,  , ndang martudutu tu sahalak jolma songon si Muhammad, alai martudutudu tu Tondi Paorbadia do.  Nunga ro Tondi Porbadia i saor tu angka sisean ni Jesus, sampulu ari dung hananaek-Na tu banuginjang,  tongon ditingki Ari Raya Pentakosta ni Jahudi. Angka halak Jahudi  na torop marpungu hatiha i di huta Jerusalem siala pesta Pentakosta i,  na  ro sian tongatonga ni 15 bangso di portibi on hatiha i, ima gabe sitindangi (saksi) ni haroro ni Tondi Porbadia i. Hape si Muhammad na nidok nasida, jolma na somal sambing do, ndada Tondi, jala hatutuna nunga lobi 500 taon dung hasasaor ni Tondi Porbadia. Tondi Porbadia ido na manubuhon huria na parjolo, marhite na tardidi torop ni tolu ribu halak di na sadari i, songon na dibaritahon ni Buku Ulaon ni Apostel Bindu 2.

            Sahat tu saonari, molo martambatamba angka huria, Tondi Porbadia i do na manubuhon i, marhite panindangion ni angka na porsea di Jesus, ndada  na pinajongjong ni jolma hombar tu hagiotna.  Alai laos Tondi Porbadia  i do na mandongani dohot mangondihon huria i, ro di sude angka na porsea di Ibana, saleleng di portibion, maralohon hagogoon ni angka parjahat na naeng mangago  hura i. Di pardalanan ni huria i di portibi on sian mulana sahat ro di tingkion, godang do angka usaha naeng mangagohon huria i sian angka huaso ni portibi on. Alai manang beha pe hagogoon ni portibi on, molo marsihohot do angka halak Krsiten i di haporseaonna tu Debata Sitolusada, sai na diondihon Tondi Porbadia do huria i.

 Sian hatorangan na di ginjang i boi ma na gabe sitioponta.|

Parjolo, Ndada ditadingkon Jesus hita songon i di portibi on, alai dilehon do “parakelotos” na gabe  pangondian di hita, i ma Tondi Porbadia. Ndada jolma na somal Pangondian i, ala Tondi do, i ma Tondi Hasintongan, na margogoihon hita laho mangulahon hasintongan. Laos i do nang margogoihon hita laho mangaradoti patik ni Kristus i.

Paduahon, Tondi Porbadia, ido na sai tongtong mandongani, mangajari, mangapuli, mampargogoi, jala patoguhon roha ni angka na porsea, laho mangaradoti patik ni Jesus. Tanda ni naung niinganan ni Tondi Poradia hita, ima molo tongtong holong rohanta di Jesus, jala mangihuthon hata-Na.

Sipahusorhusoron, angkup  ni na mangaradoti patik ni Kristus, angka dia do pe didok rohanta dalan na konkrit laho patuduhon holong ni rohanta tu Tuhan Jesus?

Beha boi do pe taida jala  tahilala di hamamasa ni covid 19 na so marnamansohot dope sahat ro di tingki on,  huaso ni Tondi Porbadia laho mangondihon hita? Songon dia ma dalan ni Tondi Porbadia na boi tabereng mangondihon hita di tingki on. Tabaen be ma jo angka alusta.Amen ( pdt msm panjaitan )