R O G A T E

R O G A T E

                Rogate na marharoroan sian hata Latin “Rogare”, marlapatan mangido. Alai di hurianta gabe jumotjot ma i dilapathon dohot  “martangiang”. Di kalender parhuriaon, minggu Rogate, ima minggu sadarion, dipatupa dung minggu Kantate, manang andorang so ari Parningotan di Hananaek ni Tuhan Jesus tu banuaginjang. Di Almanak HKBP dibahen do lapatan ni minggu Rogate i, “Martangiang”, na marojahan di Jeremia 29: 12: “Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu”. Marhite na martangiang do hita mangido tu Tuhan i, pasahathon aha na di bagasan rohanta, na taparungkilhon, manang na masa di ngolunta. Nian diboto Tuhan i do aha na tahaporluhon di ngolunta, andorang so mangido do pe hita tu Ibana. Alai sai diigil Tuhan i do sian hita, asa sai mangido tu Ibana, songon dalanta laho manghatai manang markomunikasi tu Ibana, jala asa marhite i taboto na sai tongtong do marsigantung ngolunta tu Ibana. Manang boha pe didok rohanta tuk ni huaso, gogo, hapistaran dohot sinadongan di hita,  ndang boi hita mangolu holan sian dirinta; marhite na martangiang i boi ma nang tasadari paboa sude na adong di ngolunta on na sian Tuhan i do i. Ala ni i do sai  disosohon Tuhan i huriaNa, manang angka na porsea di Ibana, ingkon sai martangiang tu Ibana. Tuhan Jesus sandiri pe, diajari do angka siseanna dohot sude angka na mangihuthon Ibana asa sai dihaburjuhon martangiang tu Debata Ama i. Alai dipajamot Tuhan i do asa unang adong martangiang “na demonstratif”, songon angka pangansi na sai manghalomohon jongjong martangiang di parguruan dohot di dalan balobung, asa diida jolma i nasida. Angka partangiang sisongon i didok Tuhanta, ndang jaoloona na pinangidona i. Songon i muse dipajamot do asa unang songon partangiangon ni angka sipelebegu, na mangarimpu tangihonon ni Debata nasida ala ni deak ni hatahata nasida. Lapatanna, ndang marguru tu  godang ni hatanta, manang uli ni untaian ni angka hatanta Tuhan i mangalusi tangiangta, ai ndang dos tangiang dohot jampijampi manang tabastas ni angka parhapandean ni portibi on.

                Diajari Tuhan i do angka siseanna martangiang, marhite “Tangiang Ale Amanami” ( Mat. 6: 9-13), ima tangiang na bulus, na sai jumolo pasangaphon Tuhan, marhite na pabadiahon GorNa di ngolu on, asa harajaon Ni Debata na mangarajai ngolunta, jala asa sai lomo ni roha ni Debata na saut tongtong di ngolunta dohot di sandok portibi on. Ala ni i ingkon tangkas do hasahatan (alamat ) ni tangiang i, i ma Debata Ama, parhitean do Jesus Kristus, songon na jotjot diajarhon tu angka siseanna di kesempatan na asing (Joh.14: 13-14 ). Di sipangidoon na ringkot di ngolunta pe di tangiang i ndang pola ganjang, holan opat sipangidoon do, ima hangoluan siapari, hasesaan ni dosa, pangaramotion ni Debata di ngolunta dohot haluaon sian angka na jahat. Alai molo tapangido “Lehon ma d hami sadarion hangoluan siap ari”, nunga masuk disi  sipanganon dohot parabiton , sinamot,  bagas, dongan saripe dohot anakhon na burju, pangurupi na burju, raja na tigor, dame, hisar ni daging manang hahipason,  sangap, aleale na denggan roha, dongan sahuta na ture, ro di nasa na hasea di hajolmaon. Nang pe so tagoari i sada-sada secara rinci, diboto Tuhan i do i saluhutna na porlu di ngolunta, jala lehononna hombar tu lomo ni rohana. Jadi ingkon sai tongtong do hita marguru tu lomo ni roha ni Debata, ndang boi paksahahononta pangidoanta tu Tuhan i. Tuhan i do umboto tangkas manang na hasea na tapangido i di ngolunta, manang na ndang. Dungi parpudi dipaujung dohot pujipujian (doksologi), jala ditutup dohot Amen, na marlapatan na tutu situtu do sian nasa roha  dohot haporseaon hita pasahatothon tangiang i, huhut pos rohanta sai jaloon ni Debata do na tapangido di tangiang i hombar tu lomo ni roha ni Debata.

                Songon i do nang na tarida di tangiang ni Raja David di turpuk sadarion ( 1 Kronika 17: 16-27). Tangiangna i gumodang do manghatindangkon dohot manghamauliatehon sude na binahen ni Jahowa tu tu ibana sandiri dohot tu bangsoNa, bangso Israel na nirajaanna. Di na pinasahat ni panurirang Natan hata ni Debata tu ibana, pabotohon na so dipasaut Debata sangkap ni rohana laho pajongjonghon bagas joro ni Debata di huta Jerusalem, nang pe naung marsitutu bana laho patupahon i, ndada gabe menek rohana, manang gabe moru haporseaon dohot pangoloionna tu Debata. Gariada mandok mauliate situtu do ibana tu Debata, ala anakna sandiri na naeng  mangganti ibana do muse dibagabagahon Debata laho pajongjonghon bagas i. Tangiangna i dipasahat di undungundung inganan ni poti parpadanan ni Debata na pinaulina di Jerusalem. Jadi tangkas do hasahatan ni tangiangna i , ima tu Debata Jahowa. Na parjolo dipatuduhon ibana di tangiangna i panandaon ni dirina, na so tama ibana nian di rohana dipabangkit Debata gabe raja gumomgom bangso ni Debata. Dipillit Debata ibana gabe raja ndada ala ni halak na luar biasa ibana. Tangkas do ditanda ibana dirina jolma biasa na so talup  laho  manjalo hamuliaon na songon i balbaga sian Debata. Laos diparhatutu ibana do molo boi pe ibana mangarajai bangso i, jala patundukhon angka musu ni bangso i di tano na nilehon Debata tu nasida, ndada ala ni gogona sandiri  i, alai tung ala ni ni hagogoon ni Debata do na so ada tudosna. Dihantindangkon ibana muse, sude na binahen ni Debata manghophop bangso i, mulai na manobus sian tano Misir, sahat ro di na patolhashon tu tano naung dipasahat gabe inganan ni halak Israel. Jadi di tangiangna i gumodang do ibana patimbulhon Goar ni Debata Jahowa, hasasaut ni sangkap ni Debata marhite dirina dohot bangsomarhite bangsona huhut mandok mauliate di sude naung binahen ni Debata tu bangsoNa dohot tu dirina sandiri. Sada do pangidoanna, ima asa dipahot Debata hata naung pinarbaganai tu ibana taringot tu pinomparna sahat ro di salelenglengna, i ma na anakna sandiri na mangganti ibana gumomgom bangso i, jala laos pajongjongjonghon bagas joro ni Debata.

Jadi on do rumang di tangiang siihuthononnta, asa ganup martangiang hita tu Debata, ingkon tapasahat i di bagasan serep ni roha dohor haunduhon tu Debata, jala sai  jumolo hita patimbuhon Debata, ndada patimbulhon dirinta sandiri. Ndada pola ala ni godang ni pangidoan, ai diboto Debata do na patut sipasahatonna tu ngolunta, asalma hita pasahathon dirinta hibul tu ibana, jala manang aha pe na pinarsinta ni rohanta, taloas ma Debata na pasauthon i hombar tu naung binagabagahonna tu hita di panarihonNa di ngolunta. Ndang boi paksahanonta, asa sude hagiot ni rohanta, dipasaut Debata. Sude do pangalehon ni Debata marguru tu sangkapNa dohot lomo ni rohana. Jadi molo pe so dioloi Debata pangidoanta, unang pola menek rohanta, jala unang gabe marpanghurangi holong ni rohanta dohot haporseaonta tu Ibana. Ingkon parhatutuonta do Debata do umboto dia na dumenggan sibahenonna di ngolunta. Amen. Selamat ari minggu, 17 Mei 2020. (pdt msm Panjaitan)