ARI RAYA PENTAKOSTA

ARI RAYA PENTAKOSTA

Ari Raya Pentakosta na tapestahon sadarion, ido sada ari na balga di huria dohot di hakristenonta rap dohot Ari Raya Natal dohot Ari Raya Paskah. Nang pe so boi do pe tapestahon ari Peantakosta sadarion di gareja rap dohot angka donganta sahaporseaon ruas ni huria i, tontu ndada pola marpanghurangi hiras ni rohanta, ai di ganup inganan do Tuhanta i hadir marhite hite TondiNa.   Ari on  ima laos  ari pesta  parningotan di hasasaor ni Tondi Porbadia tu angka sisean ni Tuhan Jesus di na pungu nasida di sada inganan di huta Jerusalem. Dibahen goar ni ari i ari Pentakosta, na marlapatan ari palimapuluhon, ala tongon do na masa i di Ari Raya Pentakosta ni halak Jahudi. Nunga dipatikhon Debata i  marhite si Musa, ulahonon ni halak Israel, ima pitu minggu ( lima pulu ari ) dung ari raya Paskah ( 3 Musa 23: 15-16). Sipata do digoari ari raya i di halak Israel “ari raya minggu minggu”  ( 5 Musa 16: 9-10): “Ingkon pitu minggu bilangonmu di ho; olat ni dung mamungka madabu sasabi tu eme, pungkaonmu ma mamilangi na pitu minggu i. Dung i marari raya minggu ma ho di Jahowa, Debatam, marguru tu pangalehon ni tanganmu di pelean sian lomo ni roha silehononmu, hombar tu pamasumasu ni Jahowa, Debatam di ho”. Sipata do digoari ari raya i, ari raya goliton, manang ari raya patumonaan ni gotilon, ala dipatupa do ari raya i di tingki pamuhai ni gotilon, jala boanon  nasida ma pelean nasida tu Jahowa sian patumonaan  gogo ni naniulanasida. Ingkon marlas ni roha do sude halak Israel di ari i, sian dakdanak sahat ro di na magodang, nang angka naposo nasida baoa nang naposo nasida parompuan, nang angka halak dagang na adong di huta i.

                Dung habuangan Babel, dibahen halak Yahudi ma Bagas Joro na di Jerusalem, gabe pusat parugamoon Jahudi, jala dipatikhon ma nasa baoa naung magodang ingkon marpungu ma sian ganup luat dohot parserahan,  ganup ari raya ni halak Jahudi  di Jerusalem pasahathon pelean dohot guguan nasida tu Bagas Joro i. Tongon ma di ari raya Pentakosta ni Jahudi i, di na torop halak Jahudi marpungu di Jerusalem, ro sian 16 luat ni angka bangso na adong di portibion ( Partia, Media, Elamit, Mesopotamia, Kappadosia, Pontus, Asia, Prigia, Pampilia, Misir, Libia, Kirene, Rom, Kreta, dohot Arab: Ulaon 2: 9-) songgop Tondi Porbagia tu angka sisean ni Tuhan Jesus di na pungu nasida di sada bagas na somal parpunguan nasida, songon naung nibagabagahon ni Tuhan Jesus tu angka isean i andorang so manaek Ibana tu banuginjang. Arion do na nijanjihon ni Tuhan Jesus tu angka siseanan di na laho manaek Ibana tu banuaginjang songon na nidokNa di  Ulaon ni Apostel 1: 8,: “Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on”. Dipasaut Ibana do i dung lima puluh ari sian haheheon ni Jesus, manang dung sampulu ari dung hananaek ni Tuhan Jesus tu banuginjang.  Di buku Ulaon ni Apostel 2: 1-4, didok: “Jadi dung jumpang ari palimapuluhon i (Pentakoste), pungu ma nasida saluhutna di sada inganan. Jadi masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i. Jadi tarida ma di nasida suman tu dila ni api na marjillamjillam, disonggopi ma ganup nasida. Gabe gok Tondi Parbadia ma nasida saluhutna, jadi mamungka marpangkuling na asing ma nasida, marguru tu pangalehon ni Tondi i tu nasida mangkatahonsa”. Sada panghorhon ni hasosonggop ni Tondi Porbadia di angka sisean i, ima hatauonnasida marpangkuling na asing, di hata Junani didok “lalein heterais glossais”, jala di hata Indonesia “berkata-kata dalam bahasa-bahasa lain”.  Na nidokna “marpangkuling na asing”, manghatai angka sisean i di hata nasida do, alai boi diantusi  angka na umbegesa na ro sian 15 bangso dohot luat i di hata nasida be. Alai adong do muse aliran kristen tertentu na asing mangantusi lapatan ni “na marpangkuling na asing on’, ima na gabe “marhata na leban” na diterjemahon dohot hata Indonesia “ berbahasa roh” (glosse na gabe margeser tu “ glossolalia”), i ma na masipandok hata be, ndang adong manang ise na boi mangantusi ia so holan Tondi i ninna. Sahat tu saonari gabe perdebatan teologis do on, dohot na maniop pangantusion na sasintongna songon na dihatahon di Ulaon ni Apostel on. Ndang adong didok di Ulaon ni Apostel on, angka sisean i gabe manghatai di bagasan tondi (berbahasa roh ), alai gabe marpangkuling na asing do dung disonggopi tondi i nasida. Jala ndang bahasa lidah na hinatahon nasida i, ai songon na somal do nasida manghatai, alai boi diantusi angka halak na asing na umbegesa di hatana be.

Ala tongon do haroro ni Tondi Porbadia i di ari raya Pentakosta ( ari palimapuluhon dung Paskah ) ni Jahudi, gabe laos digoari huria na parjolo i ma ari haroro ni Tondi Porbadia Ari Raya Pentakosta. Laos umbuk do i nang tu sintuhu ni ari Pentakosta ni Jahudi, songon pesta patumonaan ni gotilon. Haroro ni Tondi Porbadia i, gabe patumonaan gotilon ni huria i do ari i, ala di sadari i dipatupa ma pandidion parjolo tu angka na porsea di Jesus Kristus, ima angka Jahudi na marpungu hatiha i sian ganup luat na marragam. Torop ni na tardidi di ari nasadari marhite jamita di si Petrus dohot angka donganna tolu ribu halak. “Asa tardidi ma angka na manjangkon hatana i, gabe arga toluribu ma torop ni halak na manamba di na sadari i”.( Ulaon 2: 41). Ima hatutubu ni huria na parjolo. Jadi di na marningot ari raya Pentakosta manang ari haroro ni Tondi Porbadia, laos na marningot do hita di ari hatutubu ni huria ni Tuhanta di portibion. Sian mulai i molo taetong, lobi hurang ma umur ni huria i hampir dua ribu taon ma umur ni huria i  sahat tu tingki on. Patut do i sihamauliatehononta tu Tuhan i. Alai Tondi Porbadia i i ndada holan manubuhon huria i, alai laos dohot do mangaramoti, manogunogu huhut mampargogoi laho pararathon Barita Na uli na binoan ni Jesus i tu sandok bangso. Marhite Barita na Uli na pinararat ni huria i marhite angka apostel dohot angka parbarita na uli na pinabangkit ni Deabata,  nunga marjongjongan angka huria di tongatong ni angka bangso na di portibion, tarmasuk di tongatonga ni bangsonta Indonesia, khususna di tongatonga ni bangso Batak. Nunga sahat tu hita barita na uli marhite angka parbarita na uli sian luat na dao i ma sian Eropa, jala nunga porsea hita di Jesus Kristus,  tardidi tu bagasan Goar ni Debata Sitolusada, gabe angka sisean jala siihuthon Jesus Kristus ma hita nuaeng. Ala ni i dohot do tu hita hasahatan ni hata ni Jesus andorang so manaek Ibana tu banuaginjang, na mandok asa gabe sintindangi ni Jesus Kristus hita di portibion, di tongaonga ni luatta dohot bangsonta. Molo dipangido hita gabe sitindangi (saksi), ndada gabe sintindangi pargapgap (palsu), manang sipaulaula, alai sitindangi na tutu do, na olo manaon mamelehon dirina ala ni barita na uli i.

Di hamamasa ni sahit virus korona na mansai jorbut di tingkion, naung mansusai torop angka bangso na di portibi on, tarmasuk bangsonta Indonesia,  ingkon tong do huria i dohot sude angka na porsea gabe sitindangi ni Tuhanta i, na paposhon roha ni sude angka na mangihuthon Ibana, paboa ngolunta on, Tuhan i do nampunasa. Alani i laos  Tuhan i do nang na mangaturhon ngolunta on hombar tu lomo ni rohaNa. Taboto do Tuhan i do nampuna huaso di sude na masa di portibion, jala Ibana do na mangaturhon sude angka na masa i hombar tu lomo ni rohana. Ndang boi paksahonononta Tuhanta i bertindak hombar tu hagiotta sandiri, sandok ingkon pasahatonta do saguru tu lomo ni roha-Na. Dison do memang dituntut penyerahan ni ngolunta sandok tu Ibana. Boi do dipangke nang pamarenta ni portibion, dohot angka ahli naung dipercayahon laho mangatasi angka na masa on, parhitean ni Tuhanta i. Ala ni ingkon unduk ma hita tu angka arahan-arahan dohot angka aturan na binaen nasida, bahen haluaonta. Dipargogoi Tuhanta ma hita laho mangulahon i, saluhutna di bagasan habengeton.  Tapangido ma asa sai saor Tondi Porbadia di huria ni Tuhanta, dohot di ngolunta marsadasada, laho mampargogoi hita. Selamat Ari Raya Pentakosta ma di hita. Tuhanta ma na masumasu jala mangaramoti hita . ( Pdt MSM Panjaitan ).