E X A U D I

E  X A U D I

Minggunta  sadarion margoar Exaudi, sian hata Latin na marlapatan: Tangihon ma ahu. Na marojahan do i di Psalmen 27: 7, na mandok:  “Sai tangihon ma soarangku, ale Jahowa, molo joujou ahu, asi ma roham mida ahu, jala alusi ahu”. Sada pangidoan do i tu Debata asa ditangihon soara ni halak na joujou tu Ibana. Alai nang pe sada pangidoan do i,   anggo angka halak na porsea di Debata, tongtong do pos rohana,  sai tangihonon ni  Debata do soarana, molo joujou ibana tu Debata, jala sian asi ni roha-Na, sai na alusan ni Debata  do joujouna i. I do nang na tarida di turpukta on ( Matius 20: 19-34), ditangihon Jesus do jojou ni  dua halak na mapitung, na mangido asi ni roha ni Jesus asa marnida mata nasida. Boi do taantusi songon dia hansit ni panghilalaan ni halak na mapitung. Ndang boi diida hatiuron, songon i dohot haulion ni jadijadian ni Debata. Ala ni na so marnida i, ndang boi nasida denggan mangula siulaon na boi gabe dalan ni ngoluna. I do umbahen jotjot do angka na mapitung, manggantunghon ngoluna tu asiasi ni halak. Jala asing ni na so boi marnida, tamba do hahansitonna, ala jotjot do hira na lea do pamerengan ni halak di nasida. Jala adong do na manganggap hapitungon i songon uhum ni Debata ala ni dosana.

Alai nang pe mapitung simalolong ni si dua halak i, tinggil do anggo sipareonna. Dibege nasida do barita ni Jesus, na ro di tongatonga ni halak Jahudi. Tontu nunga godang dibege nasida angka halongangan naung pinatupa  ni Jesus, paluahon angka halak na dibagasan hasusaan isara ni pamalum angka na marsahit, paluahon  na ginosagosa ni angka tondi na jahat, pamalumhon angk na mapitung gabe marnida, angka pangpang gabe boi mardalan, pangoluhon na mate, dohot angka na asing. Nunga dibege nasida paboa Jesus ido  “Anak ni si Daud” naung binagabagahon ni angka panurirang di Padan Na robi. Goar Anak ni si Daud, ido goar na pinandok ni halak Jahudi tu Raja manang Mesias na hinirim nasida, na tuk paluahon bangso i sian panggomgomi ni portibion, jala mamboan hadameon di tongatonga ni angka bangso. Mambege goar “ Anak ni si Daud”, manigor tubu ma sada panghirimon di na mapitung i, na boi ma marnida matanasida, molo asi roha ni Jesus i di nasida. Ala ni i do di na binoto nasida manolus Jesus sian dalan haruar ni huta Jeriko, manigor dihabaranihon nasida na dua naung sai hundul di pinggol ni dalan i, joujou tu  Jesus, mandok: “Asi ma roham di hami, Anak ni si Daud!”. Nang pe adong do na mangorai  nasida na joujou i, ndada gabe sumurut nasida. Ndang olo nasida sip, gariada lam digogohon  nasida do manjouhon: Asi ma roham di hami, Tuhan, Anak ni si Daud! Molo natorop i, nang pe nunga sai  mangihuthon Jesus nasida, ndang adong asi ni rohanasida marnida na mapitung i. Dirajuminasida do na mapitung sidua halak i, mangganggu pardalanan ni Jesus. Hape anggo Jesus manigor tinggil do sipareonna manangihon joujou ni na mapitung i. Hatop do Jesus mangulon, mangalusi joujou ni si dua halak na mapitung i mandok:  “Aha dipangido rohamuna sibahenonku tu hamu?”. Ndang godang dipangidohon nasida, alai aha ma  na rumingkot di ngolu nasida hatiha i, ido dipangido: “Naeng ma mungkap matanami, Tuhan!” Ala nunga dibereng Jesus sian haporseaon dohot bulus ni roha do nasida na pasahathon pangidoannasida i, gabe asi ma roha ni Jesus, dijama ma matanasida jadi pintor marnida ma. Dung marnida, ndada gabe laho nasida maninggalhon Jesus, alai diihuthon nasida ma Jesus. Silehonlehon naung jinalonasida i sian Jesus, ima naung boi nasida marnida,  dipangke nasida laho pasangaphon Tuhan i,marhite na dohot mangihuthon Jesus, mandukung ulaon ni Tuhan i.

                Turpuk on mangondolhon, na sai ditangihon Debata do angka na joujou tu Ibana, i ma angka na mananda dirina dohot na mananda hahansitonna diadopan ni Tuhan i. Unang ma joujou hita tu Tuhan i sian hahebatonta, seolaholah naeng patuduhon hahebatonta i tu Debata. Ingkon sian panandaon ni diri dohot roha haserepon do hita tongtong ro joujou tu Tuhan i asa ditangihon Debata hita. Ndang adong na boi asanghononta tu Debata, manang songon dia pe tahilala hagogoon, hapistaran, dohot sinadonganta.  Angka halak na olo mangasangkon hahebatonna nang tu donganna jolma, ima na so mananda dirina. Boi do tiur parnidaan ni simalolongna,alai mapitung do mata ni partondionna. Ra di tingkion sude do hita ro joujou tu Debata siala ni hasusaan na hinorhon ni sahit korona on.  Alai tahilala hira na so ditangihon Tuhan i do joujounta i, ala ndang marna mansohot sahit i, gariada lam martambatamba do tahe tabereng. Boi ra ala ni i hira na moru haporseaonta tu Tuhan i, ala hira na so ditangihon hoihointa . Di sada sisi adong do na anggap enteng  marnida sahit i, ala ni haporseaon na sala tu Tuhan i. Adong do na mandok, molo na porsea hita mangidohon tu Tuhan i, boi do i hatop agohononna. Holan hata sangkababa nidok mangasahon Goar ni Jesus, ingkon manigor sumurut do sahit i, ai ditoru ni huaso ni Tuhan i do i. Dungi adong na manguji palaohon sahit i mangasahon Goar ni Jesus . Ha pe tong do hira na so ditangihon Debata,  joujouna i, ala ro ibana sian sian hahebaton ni dirina, mangarajumi haporseaon dohot ngolu partondion humebat sian angka donganna na asing. Angka pangalaho  na songon i do na ginoaranna  “kesombongan rohani”. Ra marhite na masa on, godang do na boi sirenunghononta di ngolunta. Soal sahit korona on, ndada holan na menyangkut tu halak marsadasada, lai menyangkut sude portibion do, tarmasuk bangsonta di Indonesia.  Betak beha do di tingki na salpu, nunga lam torop jolma dohot angka bangso na di portibion, naung mangasanghon huaso, hapistaran, dohot sinadonganna, gabe diparsoada manang dihalupahon Tuhan i. Ia so i, betak beha do tong naung  torop angka halak na manggoari dirina na porsea di Tuhan i, jala seolaholah Tuhan i na dipangasahon di ngoluna, hape jotjot do mamangke Tuhan i pasauthon hagiotna sambing, hape ia  dung dilehon Tuhan pangidoanna, ndada Tuhan i na marsangap, ala i dirina sandiri do. Antong tajou ma Tuhan i, sian serep ni rohanta, dohot sian sandok rohanta marunduk ni roha tu Ibana, marhite unduk tu angka halak naung dihaposi Tuhan i parhiteanNa laho mangalo sahit,  ima pamarenta, gugus depan, dohot angka petugas kesehatan naung dapotan parbinotoan dohot keahlian taringot tu sahit i, sian Tuhanta. Amen. * pdt msm panjaitan *

Matius 20: 29-34

29 Jadi laho ruar sian Jeriko, torop ma halak mangihuthon Ibana.

30 Jala hundulhundul ma dua halak na mapitung di pinggol ni dalan i; jadi dung dibege mamolus Jesus, joujou ma nasida, ninna ma: Asi ma roham di hami, Anak ni si Daud!

31 Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud!

32 Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu?

33 Dung i didok nasida ma: Naeng ma mungkap matanami, Tuhan!

34 Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.