LAPATAN NI PARNINGOTAN DI HANANAEK NI TUHAN JESUS TU BANUAGINJANG DI NGOLUNTA

LAPATAN NI PARNINGOTAN DI HAHANAEK NI TUHAN JESUS TU BANUAGINJANG  DI NGOLUNTA
                Sada pokok panindangion ni halak Kristen taringot tu Jesus Kristus, ima hananaekNa mulak tu banuaginjang, haroroan-Na hian. Ndang sian tanoon haroroan ni Jesus Kristus, alai sian banuaginjang do, ai Anak ni Debata do Ibana. Molo ditubuhon si Maria pe Ibana songon jolma, alai ndang sian jolma haroroan-Na, ai na gabegabean sian Tondi Porbadiado si Maria na manubuhon i. Dung sun sude ulaon-Na di portibion, mulak do Ibana muse tu banuginjang, opat pulu ari dung haheheon-Na sian na mate. Di bagasan na opat pulu ari i do Ibana patuduhon diri-Na tu angka sisean-Na paboa na tutu do Ibana mulak mangolu, hehe sian hamatean. Dung manaek Ibana tu banuaginjang hundul ma Ibana di siamun ni Ama i. Ibana ma gabe Raja ni angka raja, Tuhan ni angka tuan, na mangarajai angka bangso, lumobi na gabe gabe ulu ni huria i, paima ro Ibana muse paduahalihon tu portibion di ari sogot na sobinoto tingkina sadihari, laho manguhumi halak na mangolu dohot na mate.
                Na mambaritahon hananaek ni Jesus tu banuginjang, ima buku Evangelium Markus, Lukas dohot Ulaon ni apostel. . Andorang so mananek Ibana tu banuginjang dipasahat do ulaon tu angka sisean-Na dohot sude na mangihuthon Ibana, asa gabe sitindangi ni Jesus di portibi on, manguduti ulaon ni Jesus i. Di buku Ulaon ni Apostel 1: 8. 9, didok: “Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on. Jadi dung didok songon i, tarhinsat ma Ibana dipanotnoti nasida. Dung i diholipi ombun i ma Ibana sian jolo ni matanasida”. Di Evangelium Markus didok, dung dipasahat Jesus angka tona siulaon ni angka sisean i, ima mambaritahon barita na uli tu nasa na tinompa,  dohot huaso sijaloon nasida laho patupahon i , tarhinsat ma Ibana tu banua ginjang, laho hundul tu siamun ni Debata” ( Mark.16: 19). Jala mangihuthon Evangelium Lukas: “Jadi ditogihon Ibana ma nasida ruar tungkan Betania, dung i dipaherbang ma tanganna mamasumasu nasida. Jadi di na mamasumasu nasida Ibana, sirang ma Ibana sian nasida jala tarhindat tu ginjang. Dung i disomba nasida ma Ibana jala mulak tu huta Jerusalem, marlas ni roha situtu.Jadi tongtong ma nasida di joro i mamujimuji Debata”.( Luk. 24: 50-53).  Di angka surat tinongos ni angka apostel, godang do dapot panindangion taringot tu naung manaek Jesus tu banuginjang, jala hundul di siamun ni Debata Ama i, mangondihon angka na porsea , isara ni:  Roma 8: 34; Epes. 1: 19-20; Kol. 3: 1; Fil. 2: 9-11; 1 Tim. 3: 16; 1 Petr. 3: 21-22; Ibr.1: 3; Ibr. 10: 12; d.a.n.
                Antong molo sai dipatupa huria i Parningotan di Ari Hananaek ni Jesus tu banuaginjang, aha do lapatan ni i di ngolunta songon halak Kristen.  Adong manang piga na mansai ringkot auhononta marhite hananaek ni Jesus i ima:             Parjolo paingothon angka na porsea di Jesus, paboa Jesus i, nunga mulak tu banua ginjang, jala hundul di siamun ni Debata Ama i mangondihon angka na porsea tu Ama i. Alai angka na niondihonna holan angka na porsea do, i ma na na rade manghatindangkon Jesus di jolo ni jolma. Didok Jesus sahali tu angka sisean-Na na sampulu dua di na pinaborhat-Na nasida mambaritahon barita na uli tu birubiru na mago sian pinompar ni Israel: ”Ganup na mangkatindangkon Ahu di jolo ni jolma, i do hatindangkononku di jolo ni Damang na di banua ginjang i; alai ganup na mansoadahon Ahu di jolo ni jolma, laos soadahononku do i di jolo ni Damang na di banua ginjang i!”. ( Mat. 10: 32-33). 

Paduahon, paingothon huria i, paboa Jesus naung marhabangsa di banuaginjang, Ibana do ulu ni huria i, pamatang-Na do huria i na ingkon unduk tu Jesus, marhite angka uluan na pinabangkit-Na di portibion. Jala angka uluan ni huria di portibion na pinabangkit-Na, wakil ni Jesus do i, na ingkon unduk tu Jesus Kristus Ulu manang Raja ni huria i. 

Patoluhon, nunga dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! ( Filipi 2: 9-11). 

Paopathon, pasunggulhon tu huria i dohot sude angka na porsea di Jesus, tona na di pasahat Jesus tu huria i dohot sude na porsea i di Ibana. Isi ni  tonana ima laho mambaritahon barita nauli tu sude bangso dohot tu nasa na tinompa. I do naung niulahon ni angka sisean i naung pinabangkit-Na gabe angka apostel, gabe rarat ma barita nauli mulai sian Jerusalem, Judea, Samaria sahat ro di ujung ni tanoon. I do nang na niudutan ni angka huria na porjolo i, dohot huria na mangihut, umbahen rarat barita na uli sahat tu sandok portibion, tarmasuk tu luatta di Indonesia dohot Tano Batak.

Alai ndang boi mansohot ulaon mambaritahon baita na uli, asa sude angka jolma na di portibion dapotan haluaon na pinatupa ni Jesus Kristus. I do tugas ni sude huria ro di sude angka na porsea di Jesus Kristus sepanjang zaman. Jala ulaon mamaritahon barita na uli, ndada holan tu jolma, alai tu sude na tinompa do (Markus 16: 15). Boasa tu sude na tinompa, ala panghorhon ni dosa i ndada holan tu jolma, alai dohot do tu sude na tinompa. ( 1 Musa 3: 17). Ala ni dosa ni jolma, sega do nasa na tinompa ni Debata, habis angka hau di harangan ditabai jolma, ala ni hamongkuson ni jolma, jala sega ma ekosistem ni tano on. Molo ro udan, ndang meresap be udan i tu bagasan tano, meluap ma tu sunge, masa ma aek magodang na manghorhon bencana. Molo ro logo ni ari, mahiang ma angka sunge, ndang adong be na mamornohi tano panuanan ni angka suansuanan na porlu di ngolu ni jolma. Masa ma pencemaran udara, na manghorhon ro angka ragam ni sahit di portibi on, na so terkendalihon jolma. Jadi ondo na sai ringkot siingoton ni jolma, paboa tugas ni sandok jolma do laho mangaramoti angka jadijadian ni Debata. I do ulaon marbarita na uli tu nasa na tinompa, boi muse paulakhon jadijadian ni Debata, tu pangalahona songon na hinirim ni Debata, ima patuduhon hamuliaon ni Debata, jala gabe pasupasu di jolma na tinompa ni Debata, ima angka anak ni Debata. Didok apostel Paulus di suratna tu huria Roma:  ”Ai malungun do nasa na tinompa i paimaimahon tingkina, asa dipapatar angka anak ni Debata. ... Huhut mangkirim: Paluaonna ma nang na tinompa i sian pangadopan hamagoan, sahat tu haluaon hasangapon na di angka anak ni Debata”. ( Roma 8: 19.21). 

Sahat tu saonari, ndang apala dirajumi huria dohot angka na porsea di Jesus, tugas na tinonahon ni Jesus, marbarita na uli tu nasa na tinompa, songon tugas ni huria i.  Hape nunga ditonahon Jesus hian i andorang so mananek Ibana tu banuginjang, paboa ingkon dohot do huria marbarita na uli tu nasa na tinompa, i ma marhite na paingothon sandok jolma laho manjaga kelestarian ni ni na tinompa idohot mambahen tiruan rodi angka usaha laho manjagahon dohot paluahon na tinompa i sian angka usaha ni halak na mansegai. Jala sada tugas ni huria dohot sude angka na porsea na sai nisosohon ni Dewan Gereja-gereja Se-Dunia (DGD)a, marhite Badan “Justice,  Peace and Integrity of Creation” ( Keadilan, Perdamaian dan Keutuhan Ciptaan Allah) ima mangaradoti keutuhan ciptaan ni Debata. Di ulaon on, ingkon sai tiruan do huria dohot sude angka na porsea, tu sude pangisi ni portibi on, unang ma nian dohot angka halak Kristen mansegai jadijadian ni Debata, jala mencemari lingkungan na boi parohon bencana di tongatonga ni portibi on. Selamat mamestahon ari hananaek ni Tuhan Jesus ma di hita.  ( Pdt MSM Panjaitan ).