KANTATE
Lapatanna: Marende ma hamu. Ido goar ni minggu sadarion
marojahan di Psalmen 98: 1, na mandok: "Endehon hamu di Jahowa ende na
imbaru sada"
Marende
ima sada bagian ni ngolu ni halak Kristen. Hata ni Debata adong do na disurat
marrumang ende, isarana: Buku Psalmen. Di angka ibadah ni halak Israel pe na
jolo sai adong do ende, laos i do muse diihuthon halak Kristen. Di Epistel
sadarion pe ( 5 Musa 31: 14-22),disuru Jahowa do si Musa manurathon ende
partadingan tu halak Israel, na gabe sitindangi tu nasida taringot tu na
binahen ni Jahowa tu bangso i.
Di ulaon marbarita na uli pe lumobi tu halak Batak, mansai
balga do panghorhon ni angka ende. Torop do halak Batak na tartait rohana tu
Barita na uli i siala mambege ende ni angka parbarita na uli, tarlumobi mambege
soara ni alat musik na mansai uli, na ni pangke ni angka parbarita na uli i.
Ido deba dalan ni angka parbarita na uli laho papunguhon halak Batak, dungi
diajarhon ma hata ni Debata tu nasida. Bagianbagian ni agenda parmingguon dohot
partangiangan pe sai diholangholangi do dohot ende. Dimulana andorang so masuk
parmingguon sai jolo diajarhon do angka ende i tu ruas ni huria i. Di parsingkolaan
pe sai diajarhon do angka ende i tu angka dakdanak singkola. Pada umumna angka
ende i na disadur do tu hata Batak sian angka ende na adong di Eropa. Dungi
dipapungu ma i, jala dibungkuhon. Lam martambatamba do bilangan ni angka ende
i. Di Buku Ende na parjolo ( taon 1881), holan 121 ende do pe, dungi martamba
muse gabe 162 ( cetakan 2 hon 1886), dungi tamba muse gabe 373. Ro ma muse
parbarita na uli parompuan, na margoar Zuster Elfride Harder, dipatomutomu ma
muse sada buku Ende na digoari Haluan Nagok, godangna 183 ende. Jala na parpudi diharuarhon HKBP ma
muse sada Buku Ende Sangap Di Jahowa, godangna 388 ende. Nuaeng dipapungu ma i
gabe sada Buku Ende HKBP, na marisi 864 ende. Nunga diterjemahon i tu hata Indonesia.
Jadi tardok nunga tung godang ende ni HKBP. Molo boi i sude diendehon angka
ruas ni huria i, nunga tung mamora HKBP di parendeon. Asing do pe muse angka
ende koor na diajarhon tu angka punguan ni huria, na tong diendehon di
parmingguan manang partangiangan. Sian i berengonta tardok sada partanda ni
HKBP i ma parendeon.
Mansai ringkot do memang parendeon i di ngolunta, ai marhite ende i boi hita
mamuji Debata, boi palumbangkon isi ni rohanta na ponjot, boi mambahen las
rohanta, boi gabe patoguhon haporseaon, boi gabe jamita tu na mangendehon dohot
tu umbegesa, alana hata ni angka ende i sudena marisi hata ni Debata do, manang
marisi angka panindangion di na binahen ni Debata di ngolunta. Ido umbahen
mansai ringkot parendeon i di ngolunta songon halak Kristen. Molo adong
diaturhon di huria sada goar ni
minggu Kantate, i ma sada sosososo tu
angka na porsea asa sai marende,
mangendehon Ende na imbaru sada. Molo didok ende na imbaru, ndada
marlapatan i na ingkon sai ende na baru digubah
komponis. Alai ende na imbaru ima angka ende partondion, na
manghatindanghon dohot mamuji habalgaon ni Debata. Laos boi ma angka ende i
gabe tangiang, mangido pangurupion ni Debata di ngolunta, isara molo masa angka
hasusaan, dohot angka na dokdok di bagasan rohanta. Isara ni angka halak
Kristen na parjolo i, na manaon godang na bernit dohot haorsuhon. Songon i
nang hita di pardalanan ni ngolunta di
portibion jotjot do godang angka na
dokdok dohot hangaluton na pasorathon rohanta. Alai marhitehitehite ende, boi
do numeang panghilalaanta, jala tamba gogonta. Songon i do dohot halak Kristen
na parjolo i manaon godang haporsuhon,
siala pangaleleon dohot gosagosa na ro sian panggomgomi ni portibi on. Turpuk na sian Pangungkapon 12: 10-12, mangalehon pos ni roha di halak Kristen na mangae haporsuhon i di Jesus Kristus,
naung manghamonangkon harajaon ni Debata, jala manaluhon harajaon portibion,
ima angka pangasung na mangasungi angka halak Kristen di portibion arian dohot
borngin. Marhite hamonangan i nunga rade haluaon ni angka na porsea di Jesus
Kristus. On ma pangungkapon sian Debata, taringot tu ngolu sihirimon ni halak
Kristen di banuaginjang, laho patoguhon rohanasida maniop dohot manghalashon
tongtong haluaon na sian Tuhan i, di na mangae haporsuhon, haleaon dohot ragam
ni sitaonon nasida hatiha i sian angka
na manghasogohon halak Kristen. Torop do halak Kristen i na so manahan di haporsuhon i gabe marbalik sian haporseaonna.
Alai torop do na manahan atik pe ingkon
manaon na porsuk nasida, sahat tu na rade mate martyr mampartahanhon
haporseaonna. Tardok angka
na rade manaon na porsuk sahat ro di na
rade mate martir ala ni haporseaon tu Tuhan i, ima angka pejuang ni
haporseaon laho manaluhon angka musu ni
Kristus, ima angka na sai olo mangasanghon hagogoon manang huasona di portibion
maradapothon angka na porsea di Jesus Kristus.
Jadi
marhite i na naeng dohon ni soara ni Debata sian banuaginjang tu angka Kristen
i, molo tung pe ingkon manaon na porsuk nasida siala na mangihuthon Jesus,
nunga jumolo dihamonangkon Jesus Kristus nasida i. Molo marbenget ni roha do
nasida manaon di haporsuhon i jala marsihohot di haporseaonna, nunga diparade
Debata siteanon ni nasida, i ma arta na so marlindang, na so ra malos,
na sinimpan di banuaginjang. Ndang pasombuon ni Debata angka na porsea laho
mamolus godang na bernit di portibion. Dilehon Debata do gogo di angka na
marsihohot di haporseaon, asa sahat tu haluaon naung pinaradena di angka na
porsea. I do tongtong sihalashonon ni hita angka na porsea marhite angka ende
dohot olopolop, nang pe marsak satongkin nuaeng di bagasan ragam ni angka
pangunjunan. Songon i ma nang hita nuaeng siala haporsuhon na tasdopi di
tongatonga ni bangsonta marhite sahit virus korona na jorbut on. Marhite na masa on, boi do diunjuni Debata
hita di hatauon ni haporseaonta, alai manang ise na monang di pangunjunan ido
na dapot tumpal hangoluan, songon na nidok ni apostel Jakobus ( 1:12): ” Martua
do halak na manaon di pangunjunan i: Ai dung tau ibana, jaloonna ma tumpal
hangoluan, naung diparbagabaga tu angka na holong roha di Ibana”. Amen. Selamat
ari minggu ma di hita.
(Pdt MSM Panjaitan)
Tidak ada komentar:
Posting Komentar