SERMON (JAMITA ) TU LANSIA: PSALMEN 139: 7-10

SERMON ( JAMITA) TU LANSIA

ENDE NO. 161: 1+3, Tangihon angukanggukhon (BL 133 )

♫     Tangihon anggukanggukhon,  asi rohaM Jahowa

Mansai tarponjot rohangkon Dibaen godang ni dosa.

Tung sura dibaloshon Ho luhut na sala dompak Ho, tung ise tartahansa.

♫     Debata do haposanki Indada  pambaenanku. Na burju  do basaNa i haposan ni rohangku;

Sai tongtong do hataNa i, Na mangapuli  rohangki, ido hupangasahon.

TURPUK (minggu, 24 Mei 2020):  Psalmen 139: 7-10.

7.  Tung tudia ma tarbahen ahu laho maradophon tondim, jala tung tudia ma tarbahen ahu maporus maradophon bohim?

8.   Tung sura * manaek ahu tu banua ginjang, disi do Ho, jala tung sura hubahen banua toru podomanku, ida ma disi do Ho.

9.   Tung sura manginjam ahu di angka habong ni buha siang ari, laho * songgop nian tu bariba ni laut.

10. Nang disi sai toguon ni tanganmu do ahu, jala tiopon ni siamunmu ahu.

                Minggunta  sadarion margoar Exaudi na marlapatan: Tangihon ahu. Na marojahan do i di Psalmen 27: 7, na mandok:  “Sai tangihon ma soarangku, ale Jahowa, molo joujou ahu, asi ma roham mida ahu, jala alusi ahu”. Nang pe sada pangidoan do i asa ditangihon Debata soara ni manang ise na joujou tu Ibana, alai anggo na porsea di Debata, sai tongtong do pos rohana,  sai ditangihon Debata do soarana, molo joujou ibana tu Debata, jala dibagasan asi ni roha-Na, sai na alusan ni Debata  do ibana. I do nang na tarida di turpukta on, sada panindangion ni si David, taringot tu pengalamanna maradophon Debata, na pahothon rohana marsihohot di bagasan haporseaon tu Debata, jala marsihohot mambahen angka na denggan  halomoan ni roha ni Debata. Ndang tarbahen manang ise ipe maporus sian adopan ni Debata, manang paholangkon dirina sian Tondi ni Debata, ai  ndang tarbatas inganan ni Debata, i di sude inganan do adong Ibana.  Ndada holan di banua ginjang, ima inganan di ginjang ni saluhut Ibana maringanan, alai dohot di banuatoru, di inganan ni angka mate.  Songon molo adong pe na boi habang  sahat tu  bariba laut ni, tu sude suhisuhi ni hasiangan on, tong do pajumpang ibana dohot Debata disi, manogunogu ibana jala mangondihon ibana marhite tangan siamun-Na.  Di bagasan haporseaon na songon i do ndang hea ganggu si David mangula ulaonna, dohot mangalangkahon dalan sidalananna, ala pos do rohana di pandonganion dohot panguripion ni Dabata. 

Jala ido nang na ringkot hatindanghononta, paboa na ro do Debata di sude ngolunta, manang di dia pe hita, jala manang sadihari pe. Ndang dibatasi inganan dohot partingkian Debata, ai Tondi do Debata. On ma na nidokna “omni present” ni Debata, ke mahadiran ni Debata di saluhut inganan dohot tingki.  Parbinegean-Na pe ndang tarbatas, tung sura pe sahali joujou sude jolma na tinompa-Na di i di bagasan sada ombas na sarupa, boi do i sahali sude ditangihon Debata. Ndada songon jolma rupani, holan soara ni sada halak do na boi ditangihon manang dibege  di bagasan sada partingkian. Angkupni “kemaha hadiran”,  ni Debata laos domu do tusi “kemahatuan”ni Debata. Parbinoto na sun do Ibana. Songon i do nang panandaon ni Debata di dirinta. Tumanda do Debata di dirinta sian panandaonta sandiri di dirinta. Jotjot do hita ndang mananda dirinta, gabe alani i boi do palobihu pangalahonta lobi sian na sasintongna.  Ala na jotjot do hita jolma ndang mananda dirinta, gabe jotjot madabu tu ginjang ni roha, manang pangalaho na sai patimbohon dirina, lobi sian na sasintongna. Angka halak na mananda dirina, ingkon sai tongtong do marserep ni roha, patutoruhon dina di jolo ni Debata.

Tangkas do nang diboto Debata, sude na masa di ngolunta. Ala ni ndang boi hita  martabuni maradophon bohi ni Debata, jala ndang tarbahen hita manggabusi Debata. Diboto Debata do  manang dia hita, jala manang aha na taulahon. Laos songon i do diboto do sude aha na tapingkiri,manang aha na tubu di bagasan rohanta. Molo tu dongan jolma, boi do hita manabunihon dirinta, manggabusi aha na taula, aha na tahatahon dohot na tubu di bagasan pingkiranna, alai anggo tu Debata ndang boi hita martabuni manang margabus. I do umbahen, angka siula hajahaton, boi jotjot manabunihon hajahatonna, marhite malona manghatai, malona mengalabui halak, gabe olo ma parjahat i di portibion, gabe hira na so parjahat anggo dipamerengan ni donganna jolma, jala angka siulahon hatigoran i, gabe boi hira siula hajahaton. Alai anggo Debata patar do saluhutna dibereng, ndang adong na buni di adopanna.  Jadi i do pos ni rohanta marsigantung tu Tuhan i, pasahathon sandok dirinta tu Ibana. Di sude na masa di ngolunta, di arsak ni roha, di las ni roha, di na dokdok rohanta,manang neang panghilalaanta diboto Tuhan i do i sudena. Ala ni i tapasahat ma sandok ngolunta tu Ibana, jala tu Ibana ma hita joujou, molo ponjot rohanta ala ni angka na porsuk dohot hangaluton, ai ditangihon do hita. Amen ( Pdt MSM Panjaitan ).