RENUNGAN YEHEZKIEL 33: 7-11, DIHALOMOHON JAHOWA DO HAMUMULAK NI PARJAHAT TUMADINGHON DALANNA ASA MANGOLU IBANA

 DIHALOMOHON JAHOWA DO HAMUMULAK NI PARJAHAT TUMADINGHON DALANNA ASA MANGOLU IBANA

Horas ma di hita. Selamat Ari Minggu XIV dung Trinitatis (10 September 2023). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata na dienet sian Hesekiel 33: 7-11 do tu hita sadarion, asi ni roha dohot denggan basa ni Debata na so lomo roha-Na mida hamatean ni angka parjahat, alai dihalomohon roha-Na do hamumulak ni parjahat i tumadinghon dalanna asa mangolu ibana.

1. Disuru Debata do naposo-Na palumbahon halak parjahat asa mulak tumadinghon dalanna. Di turpukta on dibaritahon do tu hita panurirang Hesekiel na sinuru ni Debata laho paingothon halak Israel asa marhamubaon. Hona uhum ni Debata do bangso i di habuangan Babel ala ni pangalaosion nasida di patik dohot uhum ni Debata. Alai ala ni holong ni roha ni Debata di bangso i, disuru do panurirang Hesekiel, na dohot tarbuang ujui, laho paingothon nasida asa mulak tu dalan ni Debata asa mangolu nasida. Dipatudos do panurirang i tu sahalak parjaga na pinabangkit Debata tu pinompar ni Israel . Tudosan i dibuat sian ulaon ni sahalak parjaga ni sada huta di luat Israel. Di ganup huta ni halak Israel ujui na hinaliangan ni angka parik na togu, sai adong do parjaga ni huta i. Parjaga i, na jongjong di palaspalas ni parik ni huta i, ima na pabotohon tu pangisi ni huta i, marhite na mamalu sangka manang sarune, molo adong halak na asing isara ni musu na naeng mamasuhi huta i, asa mangarade pangisi ni huta i laho mandopang musu i, unang mate nasida dibahen musu i. Molo tarlalap do parjaga i, gabe sanga ma musu i mamorangi pangisi ni huta i, gabe marmatean ma pangisi ni huta i. Angka parjaga na tarlalap na songon i na so mangulahon tanggung jawabna, ingkon hona uhum do. Tu ibana do ditunggu hosa ni angka pangisi ni huta na jinagana i naung marmatean. Alai molo dipabotohon parjaga i do haroro ni musu i, hape ndang ditangihon pangisi ni huta i soarana i, ndada pola be ditunggu hosa ni pangisi ni huta naung marmatean i sian ibana, malua do ibana sian uhum. Songon i do ulaon ni angka panurirang, songon parjaga ni pinompar ni Israel i. Songon parjaga ni bangso Israel, ingkon ramotan ni angka panurirang i do bangso i maradophon musu dohot hamatean. Ingkon pasahatonna do hata ni Debata na paingothon bangso i molo manimbil nasida sian dalan ni Debata. Nang pe marrumang pinsangpinsang na koras do hata ni Debata i, alai ingkon pasahatonna do i asa malua bangso i sian hamatean. Molo so dipasahat panurirang i non i, ingkon dohot do panurirang i hona uhum hamatean. Alai molo dipasahat do i hape ndang ditangihon bangso i hata ni Debata, ndang olo nasida marhamubaon, malua do panurirang i, nang pe ingkon hona uhum bangso i. Songon i do nang sahat tu sadarion, disuru do naposona mangaramoti manang marmahani huriana. Diulahon angka naposo ni Debata do i marhite parjamitaon, marhite panogunoguon, marhite pangajarion, nang marhite ruhut paminsangon dohot parmahanion ni huria. Tujuanna asa adong hamubaon ni angka parjahat jala asa mulak tu dalan ni Debata tumadingkon dalanna na jahat i.

2. Sude do angka na porsea tarjou gabe parjaga. Angka na porsea nunga diparbohali marhite hata ni Debata. I do sihangoluhonon ni angka na porsea laho mangaramoti dirina, asa unang tarela tu angka ulaon hajahaton. Angkup ni sude do angka na porsea tarjou gabe parjaga tu dirina, tu angka na na jonok tu dirina, tu keluargana, anakhonna, donganna saulaon, ro di donganna saparsaoran. Mangaramoti maradophon angka ulaon hajahaton, dohot angka poda haliluon, ro di sude angka ulaon na so lomo ni roha ni Debata. Ulaon na borat do na paingothon dongan, alai ingkon ulahononta do i songon naposo ni Debata manang songon angka halak naung tarjou porsea tu Debata.Molo so diulahon tungguon ni Debata do i tu ibana di ari uhum sogot.Mungkin maol do i ulahononta marhite hata, alai paling saotik boi ulahononta i marhite na mambahen tiruan na denggan tu dongan. Ai olo do hita borat paingothon dongan marhite hata, ala mungkin boi do na tahatahon i sala diantusi angka donganta, gabe boi masa na so masiantusan, manang parsalisian. Ala ni asa margogo hatanta tu angka donganta, ingkon hombar do na tahatahon dohot na taulahon. Unang maralo hatanta dohot pangulaonta. Unang rupani tapaingot donganta asa haposan di angka siulaon, alai dirinta sandiri ndang haposan. Molo songon i ndang margogo sipaingotta, gabe ndang tangihonon ni halak.

3. Ndang lomo roha ni Debata mida hamatean ni angka parjahat. Di na tarbuang halak Israel tu huta Babel, pola nunga tung mandate nasida sialani i, dihilala nasida do tutu i hira panginona ni dosa dohot pangalaosion nasida di patik dohot uhum Debata do i tu nasida.Alai ala ni panghilalaan nasida naung mandate, gabe hira so adong be panghirimon nasida malua sian i. Nunga hira na mate panghilalaan nasida di habuangan i. Ala ni i do disuru Debata panurirang Hesekiel pasahathon hata ni Debata na papos rohanasida asa unang mandele nasida. Nang pe dipasahat panurirang hata ni Debata tu nasida na mandok, ingkon mate do parjahat i ala ni hajatonna, alai boi do malua nasida molo adong hamubaon ni roha, ala parasi roha jala pardenggan basa do Jahowa. Jala hata i mangonai do tu sude jolma, tu sude angka bangso, nang tu naposo ni Debata. Sian mulana pe nunga dilumbahon Debata tu si Adam dohot si Hawa, molo dilaosi nasida do patik ni Debata ingkon mate do nasida. Alai ala parholong ni roha do Debata, sai dipatuduhon do dalan asa malua jolma sian uhum hamatean i. Ditogutogu do jolma asa marhamubaon ni roha, ai ndang lomo roha ni Debata mida hamatean ni angka parjahat, alai hamumulak ni parjahat i tumadingkon dalanna, asa mangolu ibana ido dihalomohon roha ni Debata. Hombar tusi do nang parsuruon ni Debata di angka panurirang, tarmasuk panurirang Hesekiel, lao manjouhon tu halak Israel na tarbuang ala ni dosanasida, asa muba roha nasida. Alai ala halak Israel songon gombaran ni sude hajolmaon, nunga martangkang ala ni dosa i, gabe torop do sian nasida na mamillit hamatean i sian hangoluan, ndang olo marhamubaon. I do umbahen ro hata ni Debata marhite panurirang Hesekiel mandok, boasa tagonan mate hamu ale pinompar ni Israel?. Sian na so nisadaran ni hita jolma pardosa, torop do halak gabe manghalomohon hamatean i, ala ni godaan ni dosa na jotjot mangalehon hinatabo ni parngoluon di portibion. Ala nunga tung sange jolma mardosa, gabe ndang ditangihon be hata ni Debata na pinasahatNa marhite angka panurirang, gabe Debata sandiri ma tuat tu portibion marhite AnakNa na sadasada i i ma Jesus Kristus. Tangkas ma dipatuduhon Debata asi ni roha dohot denggan ni basaNa i tu hita marhite Jesus Kristus na rade manaon sahat tu na maneahon hosaNa laho humophop hita pardosa. I bana ma manean uhum hamatea ala ni dosanta i, asa malua hita sian panginona ni dosa i, jala asa dapotan hita di hangoluan na selelenglelengna. Asa boi tahaporseai jala taauhon i di ngolunta, ingkon rade do hita mangolu di bagasan Jesus Kristus. Unang ma hita songon halak Israel na papirhon rohana, na so olo tumangihon hata ni Debata marhite panurirang Hesekiel na manjouhon hamubaon ni roha asa mangolu nasida, alai tumagon do dipllit nasida hamatean sian hangoluan.

_________________

Hesekiel 33:7-11

7 Ia ho ale anak ni jolma, nunga Hupabangkit ho bahen parjaga di pinompar ni Israel, ia adong hata nanggo sada dibege ho sian pamanganHu, ingkon sipasingothononmu do i tu nasida sian Ahu.

8 Molo Ahu mandok tu halak parjahat: Ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di bagasan hajahatonna, alai anggo mudarna sian tanganmu do tungguonHu.

9 Alai anggo dipalumba ho do halak parjahat i tumundalhon dalanna i nian, asa mulak sian i nian, hape ndang olo ibana mulak tumadinghon dalanna i, mate di bagasan hajahatonna ma ibana, alai anggo ho malua do hosam dibahen ho.

10 Dibahen i, ho ale anak ni jolma, dok ma tu pinompar ni Israel: Ia hatahatamuna songon on do: Molo naung manginona pangalaosionnami dohot dosanami tu hami, pola tung mandate hami binahen ni, beha ma pambahenna mangolu dope hami?

11 Dok ma tu nasida: Songon sintongna mangolu Ahu", ninna Tuhan Jahowa, "tung na so lomo do rohangHu mida hamatean ni halak parjahat i, so ingkon mida hamumulak ni parjahat i tumadinghon dalanna i nian, asa mangolu ibana. Antong sai mulak ma hamu tumadinghon dalanmuna angka na jahat i! Boasa tung tagonan mate hamu, ale pinompar ni Israel?

Semua tanggapan:

10Jones Simamora, Leiden Rah Panjaitan dan 8 lainnya

2

Suka

Komentari

Bagikan