RENUNGAN 2 KORINT 8: 1-7, MARHASURUNGAN MA HAMU DI ULAON ASI NI ROHA

 MARHASURUNGAN MA HAMU DI ULAON ASI NI ROHA

Horas ma di hita. Selamat Ari Minggu XIII dung Trinitatis ( 3 September 2023). Las m rohanta marsomba tu Tuhanta, mamuji pasangaohon goar- Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian 2 Korint 8: 1-7, asa marhasurungan hita di ulaon asi ni roha marhite na mangurupi angka na hurangan dohot angka na di bagasan hasusaan. Taulahon ulaon asi ni roha tu angka dongan na patut siurupan ala nunga jumolo Tuhanta i patupahon asi ni roha tu hita angka jolma pardosa na hinaholongan ni roha-Na.

1. Ndang pangambati hapogoson laho mangulahon ulaon asi ni roha. Sosososo ni apostel Paulus do on di mulana tu huria Korint, alai laos sosososo tu sude hita halak Kristen sahat tu tingkion. Laho manosoi angka halak Kristen na di huria Korint asa parsidohot mangulahon asi ni roha marhite na mangurupi angka halak Kristen na di huria induk di Jerusalem na mangae haraparon ujui ala ni hapogoson dohot haporsuhon bolon na mangonai tu nasida, dipabotohon apostel Paulus do tu huria i pambahen ni angka huria na di Makedonia songon sitiruon di nasida. Ndada na diparentahon apostel Paulus halak Kristen na di Makedonia i asa parsidohot mangulahon pangurupion i. Nasida sandiri do na mangidohon tu si Paulus asa parsidohot nasida mangulahon ulaon asi ni roha i, dung dibege nasida barita taringot tu hasusaan na na niae ni halak Kristen na di Jerusalem i. Na marharoroan sian Jahudi do angka halak Kristen na di Jerusalem dohot Judea i. Alai ndang pangambati i di halak Kristen na so sian Jahudi i laho mangarupi angka halak Kristen na sian Jahudi. Nunga disuanhon apostel Paulus tu nasida hasadaon ni sude na porsea di Jesus Kristus nang pe paasingasing haroroan nasida. Jala Jesus sandiri pe nunga ditangianghon angka na porsea i asa sada di bagasan Jesus Kristus. Angkup ni dipabotohon si Paulus do ndada ala na mamora angka halak Kristen na di Makedonia i umbahen na taronjar rohanasida dohot mangurupi. Mangihuthon si Paulus di bagasan haporsuhon dohot sungkot ni hapogoson do nasida. Ndang apala dipaboa boasa dibagasan haporsuhon dohot hapogoson angka huria na di Makedonia i. Boi do i ala ni bencana alam na masa di luat nasida, alai boi do i ala ni pangeleleon na masa tu nasida, sian na humaliang. Alai manang ala ni aha pe i, ndang pangambati haporsuhon dohot hapogoson na na masa tu nasida laho mangurupi donganna na di bagasan haporsuhon dohot hapogoson na di huria Jerusalem. Angka huria na di Makedonia i, i masa isara ni huria Pilipi dohot Tessalonika. Didok apostel Paulus asi ni roha ni Debata do i tu nasida, dilehon Debata tu nasida boi parsidohot mangurupi angka donganna na patut siurupan. Alai nang pe pogos nasida di ngolu pardagingon, alai mamora do nasida nasida di holong ni roha dohot di ulaon asi ni roha. Laos i do tiruan di sude halak Kristen saleleng di ngoluna. Ndada jolo singkop manang jolo marlobilobi hita di sinadongan asa dohot hita manguurupi donganta na patut siurupan. Sian na adong di hita i do hita mangurupi, so pola marpingkir na gabe hurangan hita molo dohot hita mangurupi donganta. Anggo angka na porsea tongtong do pos rohana sai na patuduhon ni Debata do na porlu di ngoluna so pola hurangan, molo dihangoluhon asi ni roha ni Debata di ngoluna.

2. Mamelehon diri jumolo tu Debata. Tung dipuji apostel Paulus do pambaen ni huria Makenonia, ai dipatupa nasida lobi sian na hinirim ni apostel i, ai dilehon nasida sian nasa na tarpatusa, gariada lobi sian gogona. Lapatanna ndada mangasahon gogo dohot sinadongan nasida laho patupahon i, alai mangasahon gogo dohot basabasa ni Tuhan i do. Hombar tusi, ala dirajumi nasida do dirina nampuna ni Debata, gabe jumolo ma dirina dipelehon nasida tu Debata. Jadi tiruan ni angka na porsea na dipatuduhon huria Makedonia songon na hinatidanghon ni apostel Paulus, i ma nasida jomo mangalehon dirina tu Debata, dungi tu angka tu apostel i dohot angka na badia, mangihuthon lomo ni roha ni Debata. Jadi hita pe ingkon jumolo do pelehononta dirinta tu Debata, dungi ihut ma angka na adong di hita. Lapatanna di na mamelehon dirinta hita tu Debata, tapelehon do nang sude na adong di hita, hombar tu lomo ni roha ni Debata.Ndang mardebadeba pelehononta, sude do. Ai aha na tapangke di ngolunta dohot na tapasahat tu Debata, ndada nampunanta i, alai nampuna ni Debata do. Jadi aha na tapelehon tu ulaon asi ni roha ni Debata, ndang tagamon jaloon ni Debata non i, anggo so jumolo dirinta hibul tapelehon tu Debata. Marhite na tapelehon do dirinta tu Debata, ditogutogu hita mangula angka ulaon n denggan, paholanghon diri sian ulaon hajahaton. Ndang tagamon jaloon ni Debata, molo na tapelehon i tu ulaon asi ni roha dapot hita sian ulaon hajahaton, isara ni sian na nidobo manang korupsi.

3. Marhasurungan di ulaon asi ni roha.

Sada pangalaho na dipangido Tuhanta sian angka na porsea di Ibana i ma gabe parasi ni roha. Di Lukas 6:36, diajarhon Tuhan Jesus tu angka sianna: "Gabe parasiroha ma hamu, songon Amamuna, Parasiroha i!". I do nang disosohon apostel Paulus tu huria Korint, asa marhasurungan huria i dohot sude halak Kristen na disi, asadi ulaon asi ni roha. Godang do silehonlehon asi ni roha ni Debata na dipasahat tu angka halak Kristen na di Korint, na mambahen nasida marhasurungan sian angka na asing. Marhasurungan do nasida di haporseaon, di hata, di parbinotoan, di haringgason, di holong ni roha di angka parbarita na uli, naeng songon i ma nasida marhasurungan di ulaon asi ni roha, marhite na rade mangurupi angka halak na patut siurupan. Nunga sahat tu nasida hata ni Debata, na patubuhon haporseaon dohot parbinotoan taringot tu lomo ni roha ni Debata. Nunga dipatuduhon nasida nang haringgason dohot holong ni roha di na rade nasida laho manghophop apostel Paulus dohot angka donganna maradophon angka parjahat, jala parsidohot patulushon ulaon parbaritanaulion di huta Korint. Alai disosohon si Paulus, ndang sae holan disi nasida marhasurungan alai ingkon dohot do di ulaon asi ni roha, i ma mangurupi angka na di bagasan hasusaan dohot! hapogoson. Songon i do naeng tarida nang di ngolunta songon na porsea di Jesus Kristus. Nunga tajalo ragam ni silehonlehon marhite asi ni roha ni Tuhanta i, naung patolhashon barita na uli i sahat tu hita. Torop naung marhasurungan di sinadongan, di parbinotoan. Alai angkup ni i dipillit do hita gabe parsidohot manjalo haluaon ni tondinta. Dilehon do di hita hataNa, dilehon haporseaon, dipasanga hita boi marsaor dohot angka donganta, boi hita rap mamuji pasangaphon goarNa. Sude i masuk hasurungan do i di ngolu ni tondinta . Alai ndang sae holan disi hasurunganta, ingkon marhasurungan do hita di ulaon asi ni roha, marhite na mangurupi angka dongan na susah, na pogos, dohot patuduhon kepedulian tu angka dongan na humaliang. Taingot ma hata ni Tuhan Jesus di Mat. 5: 7, na mandok: "Martua ma na asi roha, ai siasian do nasida!".

_______________

2 KORINT 8: 1-7

1 Alai hupabotohon hami ma tu hamu, angka dongan, asi ni roha ni Debata, na nilehonna i tu angka huria na di Makedonia:

2 Ai atik pe di bagasan pangunjunan dohot haporsuhon godang nasida, dihorhon halalas ni rohanasida na sumurung angkup ni sungkot ni hinapogosnasida do habasaon na lumobi.

3 Huhatindangkon do, naung dilehon nasida nasa na tarpatupasa, lobi tahe sian gogona; jala sian lomona do!

4 Gogo do diapoi nasida hami jala dipangido asi ni roha, i ma na naeng gabe parsidohot mangurupi angka na badia i.

5 Jala gumodang sian na huhirim hami: Tung dirina do dilehon nasida parjolo tu Tuhan i, dung i tu hami, mangihuthon lomo ni roha ni Debata.

6 Gabe huapoi hami si Titus, asa laos dipaujung di tongatongamuna ulaon asi ni roha on, songon naung pinungkana i.

7 Alai songon hasurunganmuna di na saluhut, di haporseaon, di hata, di parbinotoan, di nasa haringgason, di pangkaholongimuna di hami, naeng songon i ma hasurunganmuna nang di ulaon asi ni roha on.

Semua tanggapan:

2Jones Simamora dan Leiden Rah Panjaitan