DIPASUPASU ASA GABE PASUPASU (DIBERKATI UNTUK MENJADI BERKAT)
1 Musa 12: 1-5
Horas ma di hita. Selamat Ari Minggu Sexagesima (8 Pebruari 2026). Sexagesima marlapatan onom pulu ari andorang so ari haheheon ni Tuhanta.Hira dos do pangatusionna dohot Septuagesima, paihutihuthon ulaon ni Tuhan i laho paluahon hita jolma, na laos mangidohon haradeon ni hita jolma mangihuthon Ibana huhut pangkeon-Na laho pasauthon sangkap-Na. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku 1 Musa 12: 1-5, i ma laho pasunggulhon hita angka naung dipasupasu Debata asa gabe pasupasu tu dongan jolma di portibion. Songon si Abraham, na dipillit, dijou jala dipasupasu Debata, asa gabe pasupasu do tu sude angka bangso. Dipangke Debata ibana dohot pinompar-Na gabe ulaula-Na laho pasauthon sangkap haluaon ni Debata tu angka bangso na di portibion naung ni gomgoman ni dosa.
1. Adong haporseaon tu hata ni Tuhan i na manjou hita manadinghon angka na mangihoti ngolunta di portibion. On ma pamilliton dohot panjouon na tu si Abram. Dijou Debata ibana bungkas sian inganan ni parngoluonna na leleng, i ma tano hagodanganna, tano hatubuanna, dohot bagas ni amangna tu tano sipatuduhonon ni Debata tu ibana. Ndang dipaboa Debata manang tu dia ibana borhat, alai mangoloi hata ni Debata sambing do ibana. Porsea do ibana di hata ni Debata na manjou ibana, ndang adong ganggu ni roha di ibana laho mangoloi hata ni Tuhan i. Ndang pola dipaboa, boasa ingkon ibana dijou, manang aha ojahan ni pamilliton ni Debata di ibana. Jadi marojahan di habebason ni Debata sambing do i. Lapatanna ndang na adong haistimewaon ni si Abram sian angka jolma na asing i. Ndang naung adong hian panandaon ni ibana di Debata Jahowa di ibana. I do pe dipatandahon Jahowa diri-Na, alai manigor porsea ibana jala unduk tu Tuhan i. Sandok ibana dipillit Debata laho mamulai sejarah haluaon sipatupaon ni Debata tu hajolmaon. Jadi tu Ibana dipatandahon Debata diri-Na, Debata sasadasa na ingkon sioloan jala sisombaon ni sandok jolma asa dapotan haluaon sian dosa. Porsea do ibana di Debata na manjouo ibana, gabe dioloi hata ni Tuhan i na marsuru ibana madadingkon inganan parngoluon na leleleng tu inganan sipatuduhonon ni Debata tu ibana na so diboto do pe manang di dia. Hita pe di bagasan Jesus Kristus nunga dipillit hita jala dijou mangihuthon Ibana. Ala ni i ingkon rade do rohanta manadingkon angka na mangihoti rohanta di portibion. Ingkon hibul rohanta mangihuthon Tuhanta jala marsigantung tu Ibana. Nuaeng nunga tontu tujuan ni pardalananta, i ma surgo sambulo ni tondinta. Alai di pardalanan ni ngolunta ndang taboto na naeng masa tu hita. Alai pos do rohanta di pangaramotion ni Tuhan i di ngolunta. Ala ni i ndang jadi ganggu rohanta di ngolunta on, ingkon tongtong do porsea hita di hata ni Tuhan i.
2. Dipasupasu Debata do angka na porsea di Ibana, asa gabe pasupasu di portibi on.
Bagabaga ni Debata tu si Abram, di na jinou-Na i ibana manadinghon huta hatubuan dohot hagodanganna, i ma; mambahen goarna balga, mambahen ibana gabe bangso na bolon, mamasumasu, mangaramoti ibana. Dipasupasu Debata ibana, asa marhite ibana sude angka bangso di portibion dapotan pasupasu. Dihaporseai ibana do i atik pe hatiha i ndang adong do pe anakna, hape ibana nunga matua marumur pitu pulu lima taon, jala dongan saripena nunga matua. Jadi dipasupasu Debata ibana, ndada holan na ringkot di ibana pasupasu na jinalona i sian Debata. Naeng pangkeon ni Debata do ibana gabe ulaula ni Tuhan i mamboan pasupasu ni Tuhan tu sude angka bangso. Pasupasu ni Tuhan i, i ma sude silehonlehon ni Tuhan na jinalona, haluaon naung dapot ibana sian Tuhan i, tarmasuk panandaon dohot haporseaon di Tuhan i. Ala ni marhite ibana dohot pinomparna, naeng sude angka bangso mananda jala mangihuthon Debata Jahowa asa dapotan haluaon . I do umbahen tardok, ibana ma dohot pinomparna dipangke Debata laho mangulahon sangkap ni Debata paluahon hajolmaon sian huaso ni sibolis, paluahon sian pardebata silebanon, asa mangihuthon jala marsomba holan tu Debata Jahowa. Jadi saut do na pinasupasuhon ni Debata, gabe balga goarna, ai ndada holan ompu ni halak Israel ibana, alai ompu ni saluhut na porsea do. Gabe sada bangso na bolon pinomparna, i ma Israel, alai ndada holan pinompar secara pardagingon na nidok ni Debata, alai lumobi do pinomparna mangihuthon partondion manang haporseaon. Dipasaut Debata do i marhite Jesus Kristus, ai di bagasan Jesus Kristus, nunga tarpasupasu angka bangso ala ni panghophopon ni Jesus Kristus Tuhanta i. Alai hita naung dapotan pasupasu haluaon, ingkon gabe pasupasu do tu saluhut hajolmaon. Gabe pasupasu marhite sinamot na tajalo sian Tuhan i, gabe pasupasu marhite parbinotoan, gabe pasupasu marhite ulaonta, ro di ragam ni silehonlehon ni Tuhan i di hita.
3. Pangoloion di Debata songon tanda ni haporseaon. Ala porsea do si Abram di hata ni Debata, manigor diulahon ibana do songon na nidok ni Debata tu ibana. Nang pe naung marumur 75 taon ibana, ndang marpainte ibana laho patuduhon haunduhonna tu Debata. Diboan ibana ma jolmana si Sarai, dohot anak ni hahana ima si Lot, dohot sude sinamotna na adong di ibana, ro di angka jolma naposona na tinuhorna di huta Haran. Songon i do pe masa na jolo, masa do manuhor jolma bahen hatobanna, manang parkarejona laho mangaramoti angka sinamotna i. Borhat nasida tu Tano Kanan, hombar tu inganan na pinatuduhon ni Debata. I ma muse na digoari, tano parpadanan ni Debata na dipasahat Debata bahen ingananna dohot inganan ni angka pinomparna muse. Di si ma muse pinomparna halak Israel na dipillit Debata marhite parpadanan gabe bangsona maringanan. Marhite gelombang sejarah ni bangsoi, disi ma bangso i ditopa gabe bangso-Na, asa boi nian songon na hinirim ni Debata gabe pasupasu nasida tu angka bangso, tiruan di haporseaon tu Debata Jahowa jala tiruan di parange na denggan songon bangso ni Debata. Alai ndang dapot songon na hinirim ni Debata sian nasida, ai manimbil do nasida sian naung pinadanhon nasida tu Debata. Ujungna gabe hona uhum ni Debata do nasida. Mago do muse bangso i, jala tano bagabagai gabe madabu do tu tangan ni angka harajaon na asing. Alai ndang boi sundat sangkap ni Debata paluahon hajolmaon naung nigomgoman ni dosa. Ala ni do gabe ro Jesus. Di bagasan Jesus ma saut sangkap ni Debata, mamboan pasupasu dohot haluaon tu saluhut bangso. Angka na porsea di Jesus ma, na dipillit Debata gabe bangso-Na, Israel na imbaru, na gabe pinompar ni si Abram mangihuthon haporseaon.
___________________________
Evangelium: 1 Musa 12:1-5
1 Dung i ninna Jahowa ma mandok si Abram: Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononHu tu ho.
2 Hubahen pe ho gabe bangso na bolon, jala pasupasuonHu ma ho, jala pabalgaonHu goarmu, asa gabe pasupasu ho.
3 Jala pasupasuonHu angka na mamasumasu ho, jala toruanHu angka na mamurai ho, jala dapotan pasupasu marhitehite ho saluhut angka bangso ni tano on.
4 Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitupulu lima taon si Abram, di na bungkas i ibana sian Haran.
5 Dung i diarahon si Abram ma si Sarai, jolmana i dohot si Lot, anak ni hahaNa i ro di sude na sinamotsamotnasida, dohot jolma, angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.
______________________
Epistel: Epesus 1:3-10
3 Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus.
4 Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanNa i, di bagasan holong ni roha.
5 Ditodo hian do hita bahen anakNa, marhitehite Jesus Kristus, asa tu Ibana, mangihuthon halomoan ni rohaNa,
6 asa tarpuji asi ni rohaNa na marmulia i, na niasihonNa tu hita di bagasan na hinaholonganNa i.
7 Di bagasan Ibana dapot hita haluaon i, binahen ni mudarNa i, i ma hasesaan ni angka pangalaosion, mangihuthon asi ni rohaNa na tarlobi i,
8 naung buas niusehonNa i tu hita mardongan hapistaran dohot habisuhon godang.
9 Ai dipabotohon Ibana do tu hita tahi ni rohaNa, na buni hian mangihuthon halolomoNa, naung pinahotNa i di bagasan diriNa,
10 laho pasauthonsa di hagogok ni tingkina, mandok: Pasadahon di bagasan Kristus i sasudena, na di banua ginjang dohot na diatas tano on.
Tidak ada komentar:
Posting Komentar