RENUNGAN RATAPAN (ANDUNG) 3: 49-57, JONOK DO DEBATA UJU JOUJOU AHU (TUHAN DEKAT TATKALA AKU MEMANGGIL)

 JONOK DO DEBATA UJU JOUJOU AHU (TUHAN DEKAT TATKALA AKU MEMANGGIL)

Andung 3: 49-57

Horas ma di hita. Selamat Ari Minggu Invocavit (22 Pebruari 2026). Invocavit lapatanna: "Jouonna ma Ahu, jadi alusanHu ma Ibana". Na marojahan do goar ni minggu on di Psalmen 91: 15a na mandok:

"Jouonna ma Ahu, jadi alusanku ma ibana, sai dongananHu do ibana jumpa di hagogotan." Sàda sosososo do i asa sai tajou tongtong Debata di sude na masa di ngolunta, tarlomobi di na masa hagogotan dohot na mangaràsahi rohanta. Las marohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita, na dienet sian buku Andung ni si Jeremia 3: 49-57, jonok do Debata uju joujou hita tu Ibana.

1. Taandunghon ma lungun ni rohanta dohot sude na pasorathon rohanta tu Debata.

Buku Andung ni si Jeremia on patuduhon andung ni panurirang Jeremia laho manangishon pardangolan ni bangso Juda di na ro raja Nebukadnesar manghubu huta Jerusalem, mangaleksehon huta i dohot Bagasjoro ni Debata na disi. Dungi diboan ma pangisi ni huta i tarbuang tu huta Babel, jala angka na mangalo, dipasiaksiak ia so i dibunu. Ndang tarpaberengbereng ibana na masa i. Pola didok ibaba: "Sai mabakbak do iluilu ni matangku, ndang marpansadian, ndang marhasonangan." Ndang adong na tarbahen ibana paluahon bangso i sian na masa i. Holan tu Tuhan i na ma ibana marhaporusan. Tu Tuhan i na ma diandunghon ibana na masa i, mardongan iluilu na mabakbak ala ni lungun ni rohana. Jala porsea do ibana Tuhan i do na mangatur sude angka na masa tarmasuk na masa tu bangso i. Jala sai na paluaon ni Jahowa do nasida molo olo nasida marhamubaon, jala pasahathon sandok ngoluna tu Debata. Laos on do nang sososo tu hita. Godang do angka na masa di portibion na pasorathon rohanta, na mambahen marsak rohanta jala maheu panghilalaanta. Ndang tarpaberengbereng hita godang ni angka hajahaton di tongatonga ni angka na humaliang hita. Alai laos ditogutogu do hita nang mamereng angka dosanta, na jotjot mambahen susa roha dohot pingkiranta. Boi do godang na pasorathon rohanta ala ni halembaon dohot hahuranganta. Alai sudena i ingkon tu Debata do pasahatonna, jala tongtong do Ibana rade laho manangihon hita, ai jonok do Ibana di lambungta. Diboto do sude na masa di ngolunta.

2. Tajou ma Ibana sian godung ni haparironta. Laos dihatindanghon panurirang Jeremia do, godang ni sitaononna na mansai parir ala ni ulaonna songon panurirang. Sai dipaburuburu musuna do ibana, songon pidong, soada alana. Alai sude angka na paburuburu ibana i, i ma na so manghalomohon hata ni Debata na sintong, i ma hata ni Debata na maminsang angka pangalaho nasida na so hombar tu lomo ni roha ni Debata. Sogo do rohanasida di hata panurirangon ni Jeremia, na mandok ingkon tarbuang bangso i saleleng ni pitupulu taon lelengna tu tano ni harajaon Babel, ala ni dosa pangalaosion nasida. Alai dung pitu pulu taon ebatan ni Jahowa, mamboan mulak muse tu Jerusalem. (Jer. 29: 11 du). Alai sogo do roha ni bangso dohot raja ni Juda mambege i. Lumobi muse ala sai dipandok angka panurirang pargapgap, na so mungkin tarbuang bangso Juda, ai bangso ni Debata do nasida, jala ndang mungkin loason ni Debata Jahowa gargaron ni halak Babel bagas joro na di Jerusalem ai bagas ni Debata do i. Alai ditariashon panurirang Jeremia do na Jahowa marsuru ibana taringot habuangan na ingkon masa tu bangso i dohot taringot tu halelekse ni bagas joro na di Jerusalem, songon uhum tu nasida ala ni pangalaho nasida. Jala domu tusi dipaingot si Jeremia do nasida mandok: "On pe padenggan hamu ma dalanmuna dohot pambahenanmuna jala tangihon hamu soara ni Jahowa, Debatamuna i, asa marpangulahi roha ni Jahowa taringot tu hamagoan naung nilumbahonna i tu hamu. (Jer. 26:13). Alai ndang porsea angka induk ni bangso i di hata ni di Jeremia, jala ndang olo nasida marhamubaon, gariada naeng bunuon nasida do si Jeremia, marhite na mandabu tu godung na mansai bagas, na so mungkin ibana boi malua sian i anggo sian dirina (Jer. 38: 6). Alai joujou do ibana sian gambo lisop tu Jahowa, jala ditangihon Jahowa do joujoujouna i songon na dihatindanghon si Jeremia di andungna na diturpukta on. Dipalua do ibana sian godung i, marhite si Ebed Melek, naposo ni raja Sedekia, raja ni Juda. (Jer. 38: 7 d.u). Aha na masa tu si Jeremia, i do gombaran ni na masa jotjot di parngoluonta. Jotjot do halak partigor, dohot halak siulahon na sintong dihasogohon halak parjahat, ala dietong parjahat i do angka halak partigor i mangambati paruntungan dohot hasangaponna. I do na masa tu Jesus Kristus laho manghophop hita jolma pardosa. Jala boi do i masa tu dirinta. Alai turpuk on mangarahon hita asa joujou tu Debata sian godung hapariron na di portibi on.

3. Dipapos Debata do roha ni angka na joujou tu Ibana asa unang mabiar. Ninna si Jeremia do di andungna i:

"Jonok do Ho di ari uju na joujou ahu tu Ho, nimMu do: "Unang ho mabiar!" Sian haporseaon do si Jeremia manghatindanghon i, hombar tu naung nialamanna sandiri. Dipalua Debata do ibana sian hagogotan dohot parmaraan naung talpe tu hamatean, di na didabu angka alona i ibana tu godung na mansai bagas i. Marhite i disoarahon do tu hita, molo joujou hita tu Debata, jonok do Ibana di lambungta. Ditangihon do joujounta i. Ala ni ndang jadi hita mabiar di ngolunta on. Godang do angka na masa na mambahen mabiar hita, alana talpe do tongtong parmaraan manghaliangi hita. Boi do masa bencana alam na so panagamanta, songon na masa di manang piga daerah di taon na salpu. Ala ni i do dipapos hata ni Debata na di turpuk on do hita asa tongtong tajou Debata mangaramoti ngolunta. Unang hita mangasahon dirinta sandiri, mangasahon gogo dohot pingkiranta, alai mangasahon Debata ma, ai Ibana do na marhuaso di ngolunta dohot di sandok portibion.***

______________________________________

Evangelium: Andung-Andung 3:49-57

49 Sai mabakbak do iluilu ni matangku, ndang marpansadian, ndang marhasonangan.

50 Paima manatap manonggor Jahowa sian banuaginjang.

51 Matangku paholso rohangku taringot tu saluhut boru ni hutangku.

52 Sai dipaburuburu musungku do ahu songon pidong, soada paralaan.

53 Nunga direndephon nasida ngolungku di bagasan godung, lam ditompashon dope batu tu ahu.

54 Nunga pola disalpui aek ulungku, pola hudok: "Tos ma annon hosangki."

Ditangihon Debata do Anggukangguk

ni na Tarjepol

55 Jadi hupajoujou ma goarMu, ale Jahowa, sian godung apala na bagas i.

56 Ditangihon Ho do soarangku, unang tung padao pinggolMu sian hoihoingki dohot sian angguhanggukhi.

57 Jonok do Ho di ari uju na joujou ahu tu Ho, nimMu do: "Unang ho mabiar!"

Epistel: Mateus 4:1-11

11 Dung i ditogihon Tondi i ma Jesus tu halongonan, asa diunjuni sibolis i Ibana.

12 Jadi dung opatpulu ari, opatpulu borngin lelengna so mangan Ibana, male ma dihilala.

3 Dung i didapothon sipangunjuni i ma Ibana, ninna ma: "Molo na tutu Ho Anak ni Debata, dokhon ma batu on gabe sipanganon."

4 Alai ninna ma mangalusi: "Na didok Surat i do: Apala holan sipanganon hangoluan ni jolma; tung nasa hata ni Debata do, na ro sian Ibana. "

5 Dung i ditogihon sibolis i ma Ibana tu huta na badia i, dipajongjong ma Ibana tu atas bagas joro i, dung i ninna ma mandok Ibana:

6 "Molo Anak ni Debata Ho, timbunghon ma diriM tu toru, ai didok Surat i do: Dohononna do angka surusuruanna manangannangan Ho, asa unang tartuktuk patmu tu batu."

7 Dung i ninna Jesus ma mandok ibana: "Dohot do on didok Surat i: Ndang jadi unjunanmu Tuhan Debatam! "

8 Dung i diulahi sibolis i ma manogihon Ibana tu punsu ni dolok na timbo situtu, dipatuduhon ma tu Ibana nasa harajaon na di portibi on ro di hasangaponna, dung i ninna ma mandok Ibana:

9 "Saluhutna i lehononhu do tu Ho, molo olo Ho marsomba tu ahu."

10 Dung i didok Jesus ma mandok ibana: "Laho ma ne ho, bolis; ai didok Surat i do: Tuhan Debatam do sisombaonmu, Sasadasa do sioloanmu! "

11 Dung i ditadinghon sibolis i ma Ibana; jadi ro ma angka pardisurgo marhobasi di Ibana.