RENUNGAN 1 MUSA (KEJADIAN) 8: 15-22, DIPASUANG JAHOWA HINADENGGAN NI NGOLU NI JOLMA

 DIPASUANG JAHOWA HINADENGGAN NI NGOLU NI JOLMA

Horas ma di hita. Selamat ari minggu XVI dung Trinitatis ( 24 September 2023). Las ma rohanta marsomba tu Tuhanta sadarion, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata do tu hita sadarion, na dienet sian buku 1 Musa 8: 15-22, na dipasuang DebataJahowa do hinadenggan ni ngolu ni jolma, dung diuhum jolma i ro di nasa ma mangolu hinorhon ni na lam manimbukbuk hajahaton ni jolma ala ni dosa i. Diparo Debata aek na sumar laho mangaripashon jolma na tinompaNa i rap dohot tanoon, ala nunga manolsoli Debata siala na tinompaNa i jolma i. Alai asi do roha ni Jahowa di si Noak, dohot nasida na saripe, ala holan nasida na ma na tongtong marunduk ni roha tu Debata. Dipalua Debata do nasida, marhite na disuru Debata si Noak paulihon sada parau na balga situtu laho paluahon si Noak dohot nasida na saripe sian aek na sumar i, ro di angka binatang, pinahan, angka pidong na martongatonga langit, nang angka binatang na manjirir di atas tano on, na tinompa ni Debata.Songon dia do hita manghangoluhon naung dipasuang Debata hidadenggan ni ngolu ni hita jolma?

1.Tongtong pangoloi tu hata ni Debata. Ala ni pangoloion tu hata ni Debata do umbahen na malua si Noak dohot nasida na saripe. Pangoloion ni si Noak i tangkas tarida mulai sian na disuru Debata ibana mambahen sada parau na balga situtu, unjurna 300 elak, bohangna 50 elak, jala timbona 30 elak. Sa elak lobi hurang satonga meter. Sian ukuranna i tarida, nunga hira sada kapal na balga situtu non i. Angkup ni i di bahen di bagasan marbilutbilut, ai ndada holan nasida na saripe bongot tu si, alai dohot do marmansam angka binatang na jinadihon ni Debata. Ndada ulaon na mura paulihon parau songon i balgana hatiha i, marhite tenaga na so sadia dohot ulaula na sederhana. Tontu nunga manggallang tingki na mansai leleng i. Alai songon i pe i ndang manjua si Noak laho mangulahon i.

Tangkas do dipaboa Debata na naeng paroonNa aek na sumar laho mangaripashon nasa na mardaging, na marhosa hangoluan na ditoru ni langit asa tos hosa ni saluhut na di tano on. Alai marhite paraui malua ma si Noak dohot nasida, dohot sude angka binatang sipamasuhonna tu si sapasang be ganup tu mansamna, tamba ni angka pinahan na ganjing pitu pasang be ganup tu mansamna.

Songon dia si Noak laho papunguhon i saluhutna ndang pola dipatorang di son. Alai ala Debata do marsuru ibana laho mangulahon i tontu mangasahon huaso ni Debata do ibana mangulahon i saluhutna. Asing do pe ingkon paradeon ni ibana bohal nasida dohot bohal ni sude angka binatang ro di pinahan sipamasuhonna tu parao haporluan nasida saleleng tingki na so dipaboa Debata manang sadia leleng. Alai nang pe ulaon na borat situtu i ndang manjua si Noak laho mangulahonsa, ai pos do rohana molo Debata do na marsuru ibana mangulahon i saluhutna ndang tagamon so pargogooan jala ajaran ni Debata ibana laho mangulahon i. Sude i diulahon ibana nionjar ni haporseaon tu Debata do. Ndang ganggu rohana di hata ni Debata. Dung sidung dipauli ibana parau i, jala diparade ibana bohal nasida saleleng mian di bagasan parau, disuru Debata ibana bongot tu bagasan parau dohot sude pangisi ni bagasna, ualu halak toropna, i ma ibana, dohot dongan saripena dohot tolu anakna rap dohot tolu parumaenna.Marudurudur ma masuk nang sude angka binatang ro di pinahan masiboan mansamna hombar tu na sinuru ni Debata. Haunduhon dohot pangoloion ni si Noak tu hata ni Debata i mambahen malua ibana, dohot sude na bongot tu parau i. Opat pulu ari opat pulu borngin torus manorus ro udan, asing ni aek na haruar marbuhalbuhal sian toru ni tano i, mambahen sumar ma aek di tano on sahat ro di sampulu lima elak timbona

manalpui dolok na tumimbo. Jadi tos ma hosa ni nasa na mardaging, angka na manjirir di atas tanoon, ro di pidong dohot pinahan dohot binatang, ro di sude na manggulmit di atas tanoon, ro di jolma sudena. Saratus lima pulu ari leleng ni aek na sumar i asa mulai sumurut, alai dung pe lobi sataon lelengna asa marsik aek i. Jadi di bagasan parau i ma si Noak dohot sude pangisi ni parau i sataon sampulu ari lelengna. Tontu di son tarida habengeton ni si Noak, paimahon sadihari ma ro hata ni Debata laho marsuru nasida ruar sian parau i. Nang pe naung diboto ibana naung marsik aek i, alai ndang manigor martindak sandiri ibana laho ruar. Dipaima do pe hata ni Debata laho marsuru ibana ruar sian parau. Molo Debata na marsuru ibana laho bongot tu parau, ingkon Debata do na marsuru ibana laho ruar muse. Jadi dung sataon sampulu ari nasida di Parau i, ro ma hata ni Debata

mandok asa ruar ibana sian parau i, rap dohot pangisi ni bagasna ro di saluhut angka binatang, pidong, pinahan na adong di parau i.

2. Ngolu na sai patujolohon parsombaon (ibadah)tu Debata. Marhite parsombaon i do hita mandok mauliate huhut pasahathon pelean tu Debata. Dung ruar si Noak sian parau i, jala malua nasida sian aek na sumar na mangaripashon saluhut na marhosa sian tano on, ulaon na parjolo dipatupa ibana i ma mandok mauliate tu Debata. Mauliate ni rohana i dipatuduhon marhite na paulihon sada langgatan pamelean tu Debata. Anggo na paulihon langgatan on dohot pasahathon pelean situtungon di atasna, ndada pola dipaima ibana jolo adong parenta ni Debata. Nunga hatontuan ni Debata non i na niulahon ni halak pangoloi di Debata jala na mananda asi ni roha ni Debata. Halak na mananda asi ni roha ni Debata di ngoluna, diboto do mandok mauliate tu Debata, ndada ala ni na nipaksa alai na nionjar ni rohana do. I do ulaon na parjolo dipatupa ibana dung ruar ibana sian parau i, jala malua sian uhum ni Debata. Dipelehon ibana ma di langgatan i sian nasa pinahan na ganjing dohot sian nasa pidong na ganjing bahen pelean situtungon tu Debata. Holan sian binatang dohot pidong na ganjing ( na halal) do dipelehon. Ndang diplehon ibana anggo sian binatang na so ganjing manang na ramun, ai diboto ibana do ndang tagamon jaloon ni Debata pelean na songon i. Nang pe persediaan ni binatang na ganjing i mansai otik do, jala i pe nunga tung loja ibana mangarawat i saleleng di parau i, alai ndang alang rohana jala ndang merasa rugi ibana laho mamelehon i tu Debata.Nda boi do nian dohononna jolo matorop pe angka pinahan on asa pinelehon, songon on mansai otik do pe unang ma jo. Alai ndang songon i roha ni si Noak. Ias do rohana i mamelehon pinahan naung ni halojahonna i mamiaro, ala pos do rohana martambatamba do i muse pasupasuon ni Debata. Tangkas do dihangoluhon ibana ala ni haporseaonna, ndang magopo na pasahathon pelean tu Debata sian hasil ni na hinalojahon, jala ndang sian dalan na ramun, manang sian hajahaton, manang na tinangko. Ingkon sian dalan na ias jala badia do. Pelean na songon i do na hinalomohon ni Debata, na gabe uap na hushus di adopan ni Debata, na mambahen las roha ni Debata laho manjalo.

3. Mangolu mangasahon asi dohot holong ni roha ni Debata. Ala ni sude pangoloion ni si Noak, dohot pelean na pinasahat ni si Noak gabe las ma roha ni Debata. Lomo roha ni Debata di sude haunduhon, pangoloion, pengorbanan, ro di habengeton ni si Noak. Mombun ma rimas ni Debata mida jolma pardosa i, mulak ma rohaNa siala asi dohot holong ni rohaNa di jolma na tinompaNa i gabe didok Ibana ma:

"Ndang be ulahanKu manorui tano on ala jolma i, ai na jat do pingkiran ni roha ni jolma sian sietehetehonna; jala ndang be ulahanKu mangaragehon nasa na mangolu, songon na Hubahen i." Jadi pelean ni si Noak i, na gabe tiruan ni angka pelean di pudian ni ari, boi mangondihon angka pardosa maradophon rimas ni Debata. Dihirim Debata do hita jolma i rade mamelehon diri dohot sinadonganta bahen pujipujian dohot hamuliaon ni Debata. Alai laos martudutudu do pelean ni si Noak i tu pamelehonon ni Kristus di diriNa bahen tobus ni sude jolma pardosa. Dung pelean ni si Noak i, marpadan ma Debata, paboa na so uhumonna be jolma dohot nasa na marhosa marhite aek na sumar. Molo di bindu 6: 6 didok disolsoli Debata ma rohaNa ala na tinompaNa i jolma na siala na lam tu jahatna , nuaeng dung dibereng naung rasip sude jolma ala ni aek na sumar i, gabe disolsoli Debata muse rohaNa. Dipauba Debata ma dalan haluaon ni jolma. Ndang ulahanna be manoru i tano on, jala ndang ulahanna be mangaragehon jolma i. Lapatanna boi sajo do Debata parorohon malapetaka tu marsasahalak, keluarga- keluarga manang bangso tertentu ala ni hajahatonna, alai ndang jadi be leksehononNa sandok jolma i dohot tanoon paima ro tingki ni ajal ni hasiangan on. Jadi nang pe na jahat do jolma i sian sieteketehonna, ingkon tongtong na ma patuduhonon ni Debata asi dohot holong ni rohana tu jolma i, ai sude angka hajahaton na niulana i ma panghorhon ni dosa naung manggomgomi roha ni jolma i sian mulana. Ala ni dosa i ndang tarbahen jolma i malua sian dirina, ingkon na adong na ma paluahon ibana. I do sangkap haluaon na pinatupa ni Debata, marhite na manogunogu jolma asa mananda dosana, sahat ro di na marsuru Jesus Kristus. Ala ni saleleng adong tano on, ndang jadi mansohot be saburon dohot gotilon, ari ngali dohot ari las, ari logo dohot rondo ni ari, arian dohot borngin. Tontu di patuduhon pandohan i do na so torus adong tanoon on, adong do ajal ni hasiangan on, di ujung ni partingkian. Disi pe asa malekese sandok tanoon on ro di nasa isina, ala i manghirim ma hita di langit na imbaru dohot tano na imbaru lehonon ni Debata tu angka na mangolu di bagasan gomgoman ni asi dohot holong ni rohaNa. Alai saleleng adong tano on, tongtong do pangaramotion ni Debata di portibion, mangatur sude angka partingkian, dohot parngoluon ni sude na tinompa i. Ala ni i do di bagasan partingkian on do hita ingkon sai unduk jala pangoloi di Debata. Ndang adong na tapangasahon laho paluahon hita sian rimas dohot uhum ni Debata. Holan asi dohot holong ni rohaNa naung dipapatar di bagasan Jesus Kristus na rade mamelehon diriNa humophop hita pardosa i na ma na tapangasahon.

________________

1 Musa 8:15-22

15 Jadi ninna Debata ma mandok si Noak:

16 Ruar ma ho sian parau i, ho dohot jolmam dohot angka anakmu dohot jolma ni anakmu rap dohot ho.

17 Paruar ma rap dohot ho nasa binatang sian nasa na mardaging, angka pidong dohot pinahan dohot nasa na manjirir di tano i, asa rodot nasida, jala lam torop di tano on.

18 Jadi ruar ma si Noak rap dohot anakna dohot jolmana dohot jolma ni angka anakna i.

19 Ruar ma sian parau i dohot sude binatang, sude gulokgulok dohot sude pidong, sude na manjirir di tano on masiboan mansamna be.

20 Dung i dipajok si Noak ma sada langgatan di Jahowa, jala dibuat sian nasa pinahan na ganjing dohot sian nasa pidong na ganjing bahen pelean situtungon, pelehononna di langgatan i.

21 Jadi dung dianggo Jahowa uap na hushus i, ninna Jahowa ma di bagasan rohaNa: "Ndang be ulahanKu manorui tano on ala jolma i, ai na jat do pingkiran ni roha ni jolma sian sietehetehonna; jala ndang be ulahanKu mangaragehon nasa na mangolu, songon na Hubahen i.

22 Onpe, saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin."

Semua tanggapan:

5Jones Simamora, Leiden Rah Panjaitan dan 3 lainnya

RENUNGAN 1 KORINTUS 4: 1-5, UNANG HAMU MANGUHUMI

 UNANG HAMU MANGUHUMI

Horas ma di hita. Selamat Ari Minggu

XV dung Trinitatis ( 17 September 2023)..Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian 1 Korint 4: 1-5, asa unang hita angka naung hinophop ni Tuhantai manguhumi donganta jolma, ala holan Debata do nampuna huaso manguhumi sandok jolma na tinompa-Na i. Ibana do na umboto roha parbagasan ni jolma, aha na sinangkapan dohot na piningkiranna.

1. Taauhon tongtong dirinta songon naposo ni Debata. Di na masa parbolatbolatan di tongatonga ni halak Kristen na di huta Korint, dibereng apostel Paulus do na masa i ala na sala do halak Kristen na di luat i mangantusi hadirion ni angka parbarita na uli i na ro tu luat i dohot mangantusi hadirion nasida be songon halak Kristen. Dibereng halak Kristen na di huta Korint i do hadirion ni angka parbarita na uli i holan songon pemimpin ni angka kelompok sambing, songon na torop hatiha i ro tu huta Korint mangadu hapandean nasida be, laho mangalului angka pengikut. Hombar do i tu situasi ni huta Korint hatiha i songon pusat ni parbinotoan filsafat. Jadi torop do angka parhapadean filsafat na ro tu huta i laho mangadu parbinotoan nasida be. Marsiadu nasida laho manait roha ni pangisi ni huta i gabe siihuthon nasida. Jadi targantung tu hamaloon ni angka pande filsafat i do manait roha ni angka na umbege pangajarion nasida torop ni halak na gabe siihuthon nasida be. Jadi tubu ma nang angka horong manang aliran di tongatonga ni masyarakat i, mamboanhon goargoar ni angka guruguru filsafat na niihuthonna. Songon i do dirajumi nasida nang haroro ni angka parbarita na uli tu huta i, mulai sian si Paulus, si Apollos, dohot si Kepas (Petrus). Ala marasingasing do penilaian nasida tu angka parbarita na uli i, gabe tubu ma angka horong ni angka halak Kristen, hombar tu angka pangajari na manait rohanasida. Adong ma na manggoari dirina horong ni si Paulus, adong horong ni si Apollos adong horong ni si Kepas, jala adong na mandok dirina horong ni Kristus. Torop do na tartait rohana tu si Paulus, lumobi angka na marharoroan sian sipelebegu (non Jahudi), ala ni pangajarion ni di Paulus taringot tu habebason ni halak Kristen, naung malua sian gomgoman ni angka patik hajahudion, na dirajumi nasida mangihoti ngolu ni jolma i. Adong do na tartait rohana tu si Apollos, sahalak Kristen Jahudi pangajari na marharoroan sian huta Alexandria Mesir. Mansai malo do ibana di parbinotoan taringot tu buku na badia (Padan na robi), mansai malo patoranghon dohot manafsirhon, jala mansai malo manghatai (orator ulung). Mansai torop do na mangihuthon ibana ala ni hapandeanna i.Adong do na gabe siihuthon si Kepas, ala hea ro mangebati huria na di Korint i. Torop na tartait rohana tu si Kepas, lumobi na marharoroan sian Jahudi, ala ibana langsung sisean ni Kristus na pinabangkit ni Jesus gabe apostel. Alai adong do sian halak Kristen i na so olo masuk tu horong na tolu i, alai langsung manggoari dirina horong ni Kristus. Dibereng di Paulus marmara do sikap na marhoronghorong mangihuthon goar ni patbarita na uli i, na boi patubu parbolatbolatan di huria i. Alani i do unang ma marpingkir angka halak Kristen i tu angka parbarita na uli songon angka pemimpin na pinatimbo ni angka na mengagumi nasida, alai manang ise pe jala manang songon dia pe hapandean nasida na boi manait roha ni na mangihuthon nasida tongtong ma nasida dibereng songon naposo ni Debata. Hata na dipangke diterjemahan Bibel Toba i, parhalado. Alai na marharoroan do i sian hata Junani "huperetes". Di mulana pandohan dipangke tu angka hatoban (budak) na mandayung kapal porang ni halak Romawi/ Junani na mardalan di tonga lautan. Ingkon unduk do angka "huperetes" ( pandayung ) i tu komando ni nahoda ni kapal i. Molo so i ingkon marmara do kapal i. Laos on gombaran na pinangke ni si Paulus tu angka naposo ni Tuhanta manang parhalado na marhobas di huria i. Kristus do nakhoda ni huria i na mangamudihon pardalan ni huria i, jala si Paulus ro di sude na mangula di huria i ma songon naposo na manjalo parenta sian Tuhanta, jala mangulahon songon na diparentahon Tuhan i. Ndang boi parhalado ni huria manang aha pe fungsi manang jabatanna mangula hombar tu hagiotna. Molo songon i ingkon malonglong do huria i diauphon galumbang ni portibion. Sude do angka na porsea, naung tarjou gabe siiuhuthon Kristus boi dipangke Tuhanta i gabe naposona laho mangulahon parsuruon ni Tuhan di huria i nang di parngoluon siganup ari. Ala ni manang aha pe ulaon na pinasahat ni Tuhan ingkon taulahon do i di bagasan haunduhon dohot pangoloion tu Tuhan i.

2. Gabe juarabagas haposan.

Songon parhalado manang naposo ni Tuhan i, dirajumi si Paulus do dirina nang sude sude na tarjou marhobas di huria i ro di sude angka na porsea songon juara bagas ni angka hahomion ni Debata. Juarabagas na marharoroansian hata Junani "oikonomos" (pengatur rumah), namangatur angka parhobas na dipasahat tu ibana, ro di mangatur angka parbohalon nasida. Alai songon dia pe kepercayaan na dipasahat tu nasida be tongtong do nasida naposo na dibagasan gonggoman ni tuanna. Na boi do talapathon on, songon dia pe posisi, fungsi manang jabatan na dipercayahon tu sahalak parhalado, ingkon tongtong do ibana ingot di hadirionna songon naposo ni Tuhan na ingkon unduk tu Tuhan jala mangula ulaonna hombar tu na niaturhon ni Tuhan i. Songon ido sude angka na porsea, ganup do manjalo ulaon dohot tanggung jawab sian Tuhan i sidalanhononna laho pahembanghon harajaon ni Debata. Alai manang ise pe, parhalado manang songon ruas ni huria angka na porsea di Tuhan i, ingkon haposan do di sude ulaon nang tanggung-jawab na ni pinasahat ni Tuhan i tu nasida be. Angka parhalado,

ingkon haposan do mangulahon ulaon haparhaladoon na sahat tu nasida be, angkup ni na ingkon haposan mangulahon ulaonna siganup ari. Ai angka ulaon si ganup ari i pe di ruar ni ulaon huria, Tuhan ido na pasahathon i. Songon ido nang ganup ruas ni huria marsadasada, atik pe so targoar parhalado di huria i, alai juara bagas ni Tuhan i do nasida di bagas nasida be. Molo targoar hita halak na porsea, na manjalo ragam ni silehonlehon dohot ulaon siganup ari sian Tuhan i, ingkon boi do hita dihaporseai Tuhan i laho laho mangulahon dohot pahembanghonsa. Songon i do halak na haposan di Tuhan i.

3. Unang hamu manguhumi. Di na masa parbolatbolat di tongatonga ni halak Kristen na di huta Korint, dibereng si Paulus, masa pe i tong do ala na ragat halak Kristen i manguhumi angka parhalado ni Tuhan i. Ragam penilaian nasida taringot tu naposo ni Tuhan i, gabe dapot angka kesimpulan nasida be, on do parhalado na sintong, anggo na asing parhalado na so hasea do i. Jadi parhalado na dianggap sintong i ma diihuthon jala dipapujipuji, na asing ditinggalhon jala olo do i diparoaroa. Jadi ise do na marhak manimbangi manang na haposan sahalak parhalado di ulaonna manang ndang, holan Tuhan i do. Anggo di roha ni si Paulus ndada pola dia molo adong halak Kristen Korint i na manguhumi dirina. Ndang pola dibela ibana dirina disi, ai sadar do ibana songon halak pardosa godang do hahuranganna. Ndang na dirajumi na sintong ibana di saluhut hata nang parulaonna. Alai na dipangido ibana, lot ma Tuhan i na manguhumi ibana di ulaonna. Unang ma ibana manguhumi dirina, marhite na mamuji dirina. Jadi ndang hea dipuji si Paulus dirina. Molo dirajumi rohana pe na denggan na niulana i, ndada na mamuji dirina ibana disi, alai na mamuji asi ni roha ni Debata do. Ai sudena i boi diulahon ala ni asi ni roha ni Debata do. Jadi halak Kristen ndang boi manguhumi angka naposo ni Debata. Na boi manguhumi holan Tuhan i do. Laos i do dipaingothon tu sude halak Kristen na di huta Korint hatiha i, dohot halak kristen sepanjang zaman. Unang manguhumi di na so tingkina, tagan so ro Tuhan i. Molo adong na manguhumi donganna tagan so ro Tuhan i, marlapatan do i mambahen dirina di posisi ni Debata jala mambuat huaso ni Debata. Holan Debata do na boi sintong manimbangi ulaon nang panghobasion ni ganup naposona nang ganup jolma. Tuhan Jesus sandiri pe di jamitana di dolok tu angka siseanNa dohot tu angka na mangihuthon ibana. Di Mateus 7: 1-2, didok: "Unang hamu manguhumuhumi, asa unang hona uhum hamu,

ai panguhumonmuna i do siuhumhononhon tu hamu, parsuhatonmuna i do sisuhathononhon tu hamu". Mansai tarbatas do pamerengan ni jolma taringot donganna jolma, ala nunga samasama mardosa. Ndang tarbahen jolma mangantusi songon dia Tondi ni Debata boi mangula nang pe marhite hagaleon dohot hahurangan ni hita jolma. I do umbahen ndang jalojalo angka jolma i diuhum Debata molo adong pe hasalaanna. Ai diigil Debata do boi hita jolma marhamubaon di tingki parasian na nilehon ni Debata. Molo adong uhuman dibahen Debata tu sasahalak tagan di ngoluna di portibion ala ni hasalaanna manang pangaloonna tu Debata, ndada uhuman na sasintongna do pe i, alai songon pinsangpinsang do i asa muba rohana. Songon uhum huria i do na pinasahat ni huria tu ruas ni huria na mangalaosi aturan ni huria. Marrumang paminsangon do i asa ditanda dosana dungi ro ma muse manopoti tu jolo ni Tuhan i marhite huria i. Anggo parumuhan na sasintongna sian Tuhan i di ari parpudi i do, di na ro Tuhan Jesus paduahalihon lahon papatarhon huasona manguhumi na mangolu dohot na mate. Disi patiuron ni Tuhan i ma na buni di na holom, jala papataronna tahitahi na buni ni ganup halak. Disi " ndang adong na buni, na so patar muse; jala ndang adong na simo, na so tangkas tandaon muse jala mullop." (Luk. 8:17).Di paruhuman i, ganup halak naung tarbukti haposan mangula ulaonna, dapot pujipujian ma sian Debata. Jadi ndang pujipujian na sian dongan jolma na tahirim, molo denggan pe tarajumi na taula i, alai pujipujian sian Debata do. Tabo do memang molo dipuji halak hita siala denggan ulaonta, alai pujipujian ni dongan jolma ndang hot i, boi do i marubauba. Boi do dipuji halak hita sadarion, alai di sada tingki dipalea muse. Ala ni na tahirim pujipujian na sian Debata do di ari sogot i. Jadi di ngolunta, taula ulaonta dohot denggan, ndada asa mambahen las roha ni dongan di hita jala asa dipuji hita siala ni i, alai naeng mambahen las roha ni Debata do. Dungi dohonan-Na ma tu hita di ari paruhuman sogot i: "Taho ma i, ale naposo na denggan roha jala haposan; haposan do ho di na otik, pasahatonku ma tu ho godang. Bongot ma ho tu halasan ni roha ni tuanmu!". Jadi ala ni unang ma hita manguhumi donganta, taloas ma Tuhan i manguhumi sude angka na tinompa-Na i di ari paruhuman sogot i.

__________________

1 Korintus 4:1-5

1 Dirajumi jolma i ma hami: Parhalado ni Kristus jala juarabagas ni angka hahomion ni Debata.

2 Jumolo dipangido di angka juarabagas; naeng haposan nasida jumpang.

3 Otik do i huetong, anggo hamu manang rapot paruhuman ni jolma manguhumi ahu; ahu pe, ndang huuhumi diringku.

4 Ai ndang adong salangku, anggo na huboto; alai ndada gabe pintor ahu hinorhon ni i. Tuhan i do manguhumi ahu.

5 Dibahen i, unang hamu manguhumi di na so tingkina tagan so ro Tuhan i; patiuronNa do na buni di na holom, jala papataronNa do tahitahi ni roha. Disi ma dapotan pujipujian ganup sian Debata.

RENUNGAN YEHEZKIEL 33: 7-11, DIHALOMOHON JAHOWA DO HAMUMULAK NI PARJAHAT TUMADINGHON DALANNA ASA MANGOLU IBANA

 DIHALOMOHON JAHOWA DO HAMUMULAK NI PARJAHAT TUMADINGHON DALANNA ASA MANGOLU IBANA

Horas ma di hita. Selamat Ari Minggu XIV dung Trinitatis (10 September 2023). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata na dienet sian Hesekiel 33: 7-11 do tu hita sadarion, asi ni roha dohot denggan basa ni Debata na so lomo roha-Na mida hamatean ni angka parjahat, alai dihalomohon roha-Na do hamumulak ni parjahat i tumadinghon dalanna asa mangolu ibana.

1. Disuru Debata do naposo-Na palumbahon halak parjahat asa mulak tumadinghon dalanna. Di turpukta on dibaritahon do tu hita panurirang Hesekiel na sinuru ni Debata laho paingothon halak Israel asa marhamubaon. Hona uhum ni Debata do bangso i di habuangan Babel ala ni pangalaosion nasida di patik dohot uhum ni Debata. Alai ala ni holong ni roha ni Debata di bangso i, disuru do panurirang Hesekiel, na dohot tarbuang ujui, laho paingothon nasida asa mulak tu dalan ni Debata asa mangolu nasida. Dipatudos do panurirang i tu sahalak parjaga na pinabangkit Debata tu pinompar ni Israel . Tudosan i dibuat sian ulaon ni sahalak parjaga ni sada huta di luat Israel. Di ganup huta ni halak Israel ujui na hinaliangan ni angka parik na togu, sai adong do parjaga ni huta i. Parjaga i, na jongjong di palaspalas ni parik ni huta i, ima na pabotohon tu pangisi ni huta i, marhite na mamalu sangka manang sarune, molo adong halak na asing isara ni musu na naeng mamasuhi huta i, asa mangarade pangisi ni huta i laho mandopang musu i, unang mate nasida dibahen musu i. Molo tarlalap do parjaga i, gabe sanga ma musu i mamorangi pangisi ni huta i, gabe marmatean ma pangisi ni huta i. Angka parjaga na tarlalap na songon i na so mangulahon tanggung jawabna, ingkon hona uhum do. Tu ibana do ditunggu hosa ni angka pangisi ni huta na jinagana i naung marmatean. Alai molo dipabotohon parjaga i do haroro ni musu i, hape ndang ditangihon pangisi ni huta i soarana i, ndada pola be ditunggu hosa ni pangisi ni huta naung marmatean i sian ibana, malua do ibana sian uhum. Songon i do ulaon ni angka panurirang, songon parjaga ni pinompar ni Israel i. Songon parjaga ni bangso Israel, ingkon ramotan ni angka panurirang i do bangso i maradophon musu dohot hamatean. Ingkon pasahatonna do hata ni Debata na paingothon bangso i molo manimbil nasida sian dalan ni Debata. Nang pe marrumang pinsangpinsang na koras do hata ni Debata i, alai ingkon pasahatonna do i asa malua bangso i sian hamatean. Molo so dipasahat panurirang i non i, ingkon dohot do panurirang i hona uhum hamatean. Alai molo dipasahat do i hape ndang ditangihon bangso i hata ni Debata, ndang olo nasida marhamubaon, malua do panurirang i, nang pe ingkon hona uhum bangso i. Songon i do nang sahat tu sadarion, disuru do naposona mangaramoti manang marmahani huriana. Diulahon angka naposo ni Debata do i marhite parjamitaon, marhite panogunoguon, marhite pangajarion, nang marhite ruhut paminsangon dohot parmahanion ni huria. Tujuanna asa adong hamubaon ni angka parjahat jala asa mulak tu dalan ni Debata tumadingkon dalanna na jahat i.

2. Sude do angka na porsea tarjou gabe parjaga. Angka na porsea nunga diparbohali marhite hata ni Debata. I do sihangoluhonon ni angka na porsea laho mangaramoti dirina, asa unang tarela tu angka ulaon hajahaton. Angkup ni sude do angka na porsea tarjou gabe parjaga tu dirina, tu angka na na jonok tu dirina, tu keluargana, anakhonna, donganna saulaon, ro di donganna saparsaoran. Mangaramoti maradophon angka ulaon hajahaton, dohot angka poda haliluon, ro di sude angka ulaon na so lomo ni roha ni Debata. Ulaon na borat do na paingothon dongan, alai ingkon ulahononta do i songon naposo ni Debata manang songon angka halak naung tarjou porsea tu Debata.Molo so diulahon tungguon ni Debata do i tu ibana di ari uhum sogot.Mungkin maol do i ulahononta marhite hata, alai paling saotik boi ulahononta i marhite na mambahen tiruan na denggan tu dongan. Ai olo do hita borat paingothon dongan marhite hata, ala mungkin boi do na tahatahon i sala diantusi angka donganta, gabe boi masa na so masiantusan, manang parsalisian. Ala ni asa margogo hatanta tu angka donganta, ingkon hombar do na tahatahon dohot na taulahon. Unang maralo hatanta dohot pangulaonta. Unang rupani tapaingot donganta asa haposan di angka siulaon, alai dirinta sandiri ndang haposan. Molo songon i ndang margogo sipaingotta, gabe ndang tangihonon ni halak.

3. Ndang lomo roha ni Debata mida hamatean ni angka parjahat. Di na tarbuang halak Israel tu huta Babel, pola nunga tung mandate nasida sialani i, dihilala nasida do tutu i hira panginona ni dosa dohot pangalaosion nasida di patik dohot uhum Debata do i tu nasida.Alai ala ni panghilalaan nasida naung mandate, gabe hira so adong be panghirimon nasida malua sian i. Nunga hira na mate panghilalaan nasida di habuangan i. Ala ni i do disuru Debata panurirang Hesekiel pasahathon hata ni Debata na papos rohanasida asa unang mandele nasida. Nang pe dipasahat panurirang hata ni Debata tu nasida na mandok, ingkon mate do parjahat i ala ni hajatonna, alai boi do malua nasida molo adong hamubaon ni roha, ala parasi roha jala pardenggan basa do Jahowa. Jala hata i mangonai do tu sude jolma, tu sude angka bangso, nang tu naposo ni Debata. Sian mulana pe nunga dilumbahon Debata tu si Adam dohot si Hawa, molo dilaosi nasida do patik ni Debata ingkon mate do nasida. Alai ala parholong ni roha do Debata, sai dipatuduhon do dalan asa malua jolma sian uhum hamatean i. Ditogutogu do jolma asa marhamubaon ni roha, ai ndang lomo roha ni Debata mida hamatean ni angka parjahat, alai hamumulak ni parjahat i tumadingkon dalanna, asa mangolu ibana ido dihalomohon roha ni Debata. Hombar tusi do nang parsuruon ni Debata di angka panurirang, tarmasuk panurirang Hesekiel, lao manjouhon tu halak Israel na tarbuang ala ni dosanasida, asa muba roha nasida. Alai ala halak Israel songon gombaran ni sude hajolmaon, nunga martangkang ala ni dosa i, gabe torop do sian nasida na mamillit hamatean i sian hangoluan, ndang olo marhamubaon. I do umbahen ro hata ni Debata marhite panurirang Hesekiel mandok, boasa tagonan mate hamu ale pinompar ni Israel?. Sian na so nisadaran ni hita jolma pardosa, torop do halak gabe manghalomohon hamatean i, ala ni godaan ni dosa na jotjot mangalehon hinatabo ni parngoluon di portibion. Ala nunga tung sange jolma mardosa, gabe ndang ditangihon be hata ni Debata na pinasahatNa marhite angka panurirang, gabe Debata sandiri ma tuat tu portibion marhite AnakNa na sadasada i i ma Jesus Kristus. Tangkas ma dipatuduhon Debata asi ni roha dohot denggan ni basaNa i tu hita marhite Jesus Kristus na rade manaon sahat tu na maneahon hosaNa laho humophop hita pardosa. I bana ma manean uhum hamatea ala ni dosanta i, asa malua hita sian panginona ni dosa i, jala asa dapotan hita di hangoluan na selelenglelengna. Asa boi tahaporseai jala taauhon i di ngolunta, ingkon rade do hita mangolu di bagasan Jesus Kristus. Unang ma hita songon halak Israel na papirhon rohana, na so olo tumangihon hata ni Debata marhite panurirang Hesekiel na manjouhon hamubaon ni roha asa mangolu nasida, alai tumagon do dipllit nasida hamatean sian hangoluan.

_________________

Hesekiel 33:7-11

7 Ia ho ale anak ni jolma, nunga Hupabangkit ho bahen parjaga di pinompar ni Israel, ia adong hata nanggo sada dibege ho sian pamanganHu, ingkon sipasingothononmu do i tu nasida sian Ahu.

8 Molo Ahu mandok tu halak parjahat: Ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di bagasan hajahatonna, alai anggo mudarna sian tanganmu do tungguonHu.

9 Alai anggo dipalumba ho do halak parjahat i tumundalhon dalanna i nian, asa mulak sian i nian, hape ndang olo ibana mulak tumadinghon dalanna i, mate di bagasan hajahatonna ma ibana, alai anggo ho malua do hosam dibahen ho.

10 Dibahen i, ho ale anak ni jolma, dok ma tu pinompar ni Israel: Ia hatahatamuna songon on do: Molo naung manginona pangalaosionnami dohot dosanami tu hami, pola tung mandate hami binahen ni, beha ma pambahenna mangolu dope hami?

11 Dok ma tu nasida: Songon sintongna mangolu Ahu", ninna Tuhan Jahowa, "tung na so lomo do rohangHu mida hamatean ni halak parjahat i, so ingkon mida hamumulak ni parjahat i tumadinghon dalanna i nian, asa mangolu ibana. Antong sai mulak ma hamu tumadinghon dalanmuna angka na jahat i! Boasa tung tagonan mate hamu, ale pinompar ni Israel?

Semua tanggapan:

10Jones Simamora, Leiden Rah Panjaitan dan 8 lainnya

2

Suka

Komentari

Bagikan

RENUNGAN 2 KORINT 8: 1-7, MARHASURUNGAN MA HAMU DI ULAON ASI NI ROHA

 MARHASURUNGAN MA HAMU DI ULAON ASI NI ROHA

Horas ma di hita. Selamat Ari Minggu XIII dung Trinitatis ( 3 September 2023). Las m rohanta marsomba tu Tuhanta, mamuji pasangaohon goar- Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian 2 Korint 8: 1-7, asa marhasurungan hita di ulaon asi ni roha marhite na mangurupi angka na hurangan dohot angka na di bagasan hasusaan. Taulahon ulaon asi ni roha tu angka dongan na patut siurupan ala nunga jumolo Tuhanta i patupahon asi ni roha tu hita angka jolma pardosa na hinaholongan ni roha-Na.

1. Ndang pangambati hapogoson laho mangulahon ulaon asi ni roha. Sosososo ni apostel Paulus do on di mulana tu huria Korint, alai laos sosososo tu sude hita halak Kristen sahat tu tingkion. Laho manosoi angka halak Kristen na di huria Korint asa parsidohot mangulahon asi ni roha marhite na mangurupi angka halak Kristen na di huria induk di Jerusalem na mangae haraparon ujui ala ni hapogoson dohot haporsuhon bolon na mangonai tu nasida, dipabotohon apostel Paulus do tu huria i pambahen ni angka huria na di Makedonia songon sitiruon di nasida. Ndada na diparentahon apostel Paulus halak Kristen na di Makedonia i asa parsidohot mangulahon pangurupion i. Nasida sandiri do na mangidohon tu si Paulus asa parsidohot nasida mangulahon ulaon asi ni roha i, dung dibege nasida barita taringot tu hasusaan na na niae ni halak Kristen na di Jerusalem i. Na marharoroan sian Jahudi do angka halak Kristen na di Jerusalem dohot Judea i. Alai ndang pangambati i di halak Kristen na so sian Jahudi i laho mangarupi angka halak Kristen na sian Jahudi. Nunga disuanhon apostel Paulus tu nasida hasadaon ni sude na porsea di Jesus Kristus nang pe paasingasing haroroan nasida. Jala Jesus sandiri pe nunga ditangianghon angka na porsea i asa sada di bagasan Jesus Kristus. Angkup ni dipabotohon si Paulus do ndada ala na mamora angka halak Kristen na di Makedonia i umbahen na taronjar rohanasida dohot mangurupi. Mangihuthon si Paulus di bagasan haporsuhon dohot sungkot ni hapogoson do nasida. Ndang apala dipaboa boasa dibagasan haporsuhon dohot hapogoson angka huria na di Makedonia i. Boi do i ala ni bencana alam na masa di luat nasida, alai boi do i ala ni pangeleleon na masa tu nasida, sian na humaliang. Alai manang ala ni aha pe i, ndang pangambati haporsuhon dohot hapogoson na na masa tu nasida laho mangurupi donganna na di bagasan haporsuhon dohot hapogoson na di huria Jerusalem. Angka huria na di Makedonia i, i masa isara ni huria Pilipi dohot Tessalonika. Didok apostel Paulus asi ni roha ni Debata do i tu nasida, dilehon Debata tu nasida boi parsidohot mangurupi angka donganna na patut siurupan. Alai nang pe pogos nasida di ngolu pardagingon, alai mamora do nasida nasida di holong ni roha dohot di ulaon asi ni roha. Laos i do tiruan di sude halak Kristen saleleng di ngoluna. Ndada jolo singkop manang jolo marlobilobi hita di sinadongan asa dohot hita manguurupi donganta na patut siurupan. Sian na adong di hita i do hita mangurupi, so pola marpingkir na gabe hurangan hita molo dohot hita mangurupi donganta. Anggo angka na porsea tongtong do pos rohana sai na patuduhon ni Debata do na porlu di ngoluna so pola hurangan, molo dihangoluhon asi ni roha ni Debata di ngoluna.

2. Mamelehon diri jumolo tu Debata. Tung dipuji apostel Paulus do pambaen ni huria Makenonia, ai dipatupa nasida lobi sian na hinirim ni apostel i, ai dilehon nasida sian nasa na tarpatusa, gariada lobi sian gogona. Lapatanna ndada mangasahon gogo dohot sinadongan nasida laho patupahon i, alai mangasahon gogo dohot basabasa ni Tuhan i do. Hombar tusi, ala dirajumi nasida do dirina nampuna ni Debata, gabe jumolo ma dirina dipelehon nasida tu Debata. Jadi tiruan ni angka na porsea na dipatuduhon huria Makedonia songon na hinatidanghon ni apostel Paulus, i ma nasida jomo mangalehon dirina tu Debata, dungi tu angka tu apostel i dohot angka na badia, mangihuthon lomo ni roha ni Debata. Jadi hita pe ingkon jumolo do pelehononta dirinta tu Debata, dungi ihut ma angka na adong di hita. Lapatanna di na mamelehon dirinta hita tu Debata, tapelehon do nang sude na adong di hita, hombar tu lomo ni roha ni Debata.Ndang mardebadeba pelehononta, sude do. Ai aha na tapangke di ngolunta dohot na tapasahat tu Debata, ndada nampunanta i, alai nampuna ni Debata do. Jadi aha na tapelehon tu ulaon asi ni roha ni Debata, ndang tagamon jaloon ni Debata non i, anggo so jumolo dirinta hibul tapelehon tu Debata. Marhite na tapelehon do dirinta tu Debata, ditogutogu hita mangula angka ulaon n denggan, paholanghon diri sian ulaon hajahaton. Ndang tagamon jaloon ni Debata, molo na tapelehon i tu ulaon asi ni roha dapot hita sian ulaon hajahaton, isara ni sian na nidobo manang korupsi.

3. Marhasurungan di ulaon asi ni roha.

Sada pangalaho na dipangido Tuhanta sian angka na porsea di Ibana i ma gabe parasi ni roha. Di Lukas 6:36, diajarhon Tuhan Jesus tu angka sianna: "Gabe parasiroha ma hamu, songon Amamuna, Parasiroha i!". I do nang disosohon apostel Paulus tu huria Korint, asa marhasurungan huria i dohot sude halak Kristen na disi, asadi ulaon asi ni roha. Godang do silehonlehon asi ni roha ni Debata na dipasahat tu angka halak Kristen na di Korint, na mambahen nasida marhasurungan sian angka na asing. Marhasurungan do nasida di haporseaon, di hata, di parbinotoan, di haringgason, di holong ni roha di angka parbarita na uli, naeng songon i ma nasida marhasurungan di ulaon asi ni roha, marhite na rade mangurupi angka halak na patut siurupan. Nunga sahat tu nasida hata ni Debata, na patubuhon haporseaon dohot parbinotoan taringot tu lomo ni roha ni Debata. Nunga dipatuduhon nasida nang haringgason dohot holong ni roha di na rade nasida laho manghophop apostel Paulus dohot angka donganna maradophon angka parjahat, jala parsidohot patulushon ulaon parbaritanaulion di huta Korint. Alai disosohon si Paulus, ndang sae holan disi nasida marhasurungan alai ingkon dohot do di ulaon asi ni roha, i ma mangurupi angka na di bagasan hasusaan dohot! hapogoson. Songon i do naeng tarida nang di ngolunta songon na porsea di Jesus Kristus. Nunga tajalo ragam ni silehonlehon marhite asi ni roha ni Tuhanta i, naung patolhashon barita na uli i sahat tu hita. Torop naung marhasurungan di sinadongan, di parbinotoan. Alai angkup ni i dipillit do hita gabe parsidohot manjalo haluaon ni tondinta. Dilehon do di hita hataNa, dilehon haporseaon, dipasanga hita boi marsaor dohot angka donganta, boi hita rap mamuji pasangaphon goarNa. Sude i masuk hasurungan do i di ngolu ni tondinta . Alai ndang sae holan disi hasurunganta, ingkon marhasurungan do hita di ulaon asi ni roha, marhite na mangurupi angka dongan na susah, na pogos, dohot patuduhon kepedulian tu angka dongan na humaliang. Taingot ma hata ni Tuhan Jesus di Mat. 5: 7, na mandok: "Martua ma na asi roha, ai siasian do nasida!".

_______________

2 KORINT 8: 1-7

1 Alai hupabotohon hami ma tu hamu, angka dongan, asi ni roha ni Debata, na nilehonna i tu angka huria na di Makedonia:

2 Ai atik pe di bagasan pangunjunan dohot haporsuhon godang nasida, dihorhon halalas ni rohanasida na sumurung angkup ni sungkot ni hinapogosnasida do habasaon na lumobi.

3 Huhatindangkon do, naung dilehon nasida nasa na tarpatupasa, lobi tahe sian gogona; jala sian lomona do!

4 Gogo do diapoi nasida hami jala dipangido asi ni roha, i ma na naeng gabe parsidohot mangurupi angka na badia i.

5 Jala gumodang sian na huhirim hami: Tung dirina do dilehon nasida parjolo tu Tuhan i, dung i tu hami, mangihuthon lomo ni roha ni Debata.

6 Gabe huapoi hami si Titus, asa laos dipaujung di tongatongamuna ulaon asi ni roha on, songon naung pinungkana i.

7 Alai songon hasurunganmuna di na saluhut, di haporseaon, di hata, di parbinotoan, di nasa haringgason, di pangkaholongimuna di hami, naeng songon i ma hasurunganmuna nang di ulaon asi ni roha on.

Semua tanggapan:

2Jones Simamora dan Leiden Rah Panjaitan