NDANG MULAK BOTI HATA NI DEBATA (RENUNGAN YESYA 55: 10-13)

 

RENUNGAN YESYA 55: 10-13,   NDANG MULAK BOTI HATA NI DEBATA

 

Horas ma di hita.Selamat Ari Minggu. Nuaeng nunga sahat hita tu minggu Estomihi na marlapatan: "Sai Ho ma na gabe partano batoanhu'" ( Psalmen 25: 6). Las ma rohanta marsomba tu Tuhanta, mamuji pasangaphon goar-Na, huhut tumangihon hata sihangoluhononta. Disoarahon hata ni Debata do tu hita sian Jesaya 55: 10-13: NDANG MULAK BOTI HATA NI DEBATA. Alani ingkon sai tajangkon jala taauhon do Hata ni Debata gabe hagogoon na pangoluhon hita.

1. Ndada holan hata-hata sambing hata ni Debata, alai di bagasan hataNa i do hagogoon dohot huaso ni Debata. Ala ni ndang tarsirang hata ni Debata sian hadirion-Na. Marhite hata-Na do Debata manompa langit dohot tanoon ro di nasa isina. Laos marhite hata-Na i do Debata marmudumudu, mangaramoti dohot mangondihon na tinompa-Na, asa gabe hapataran ni hadirion ni Debata na tinompaNa i. Marhite jadi-jadian-Na i boi tabereng huaso dohot hamuliaon ni Debata. Laos marhite hata-Na i do Debata paluaon hita jolma pardosa. Jesus Kristus na gabe Sipalua hajolmaon i ma hata ni Debata na gabe jolma.

2. Ala di bagasan hata-Na do huaso dohot hagogoon ni Debata, hata ni Debata na ruar sian pamangan-Na ndang mulak boti tu Debata. Ingkon manjadi do i hombar tu na sinangkapan ni Debata. Marhuaso do hata ni Debata pasauthon lomo ni roha-Na di ngolunta. Ala ni i do molo naeng saut sangkap dohot lomo ni roha ni Debata di ngolunta, ingkon sai hata ni Debata do mangingani rohanta. Molo so mian hata ni Debata di ngolunta, gabe lomo ni rohanta sambing ma na taulahon, pasauthon hagiothagiot ni rohanta, na mambahen hita madabu tu hamagoan. Ala ni i ingkon sai taparade ma rohanta gabe inganan ni hata ni Debata.

3. Dipatudos do hata ni Debata na ruar sian pamangan-Na tu udan dohot ambolas na madabu sian langit, ndang mulak boti tu langit ia so jolo dibornohi tano hadabuanna, gabe martubuan ma di tano i angka suansuan na marpaue, jala parbuena ma muse deba gabe boni tu angka panabur asa boi marudut panompaon ni Debata. Na deba nari gabe sipanganon ni jolma dohot angka na tinompa na asing.Jadi marhite dalan na songon i ma Debata marmudumudu dohot mangaramoti na tinompana. Nunga diatur parngoluon ni na tinompaNa i marhite ekosistem, na saling tergantung do na tinompa na sada tu na tinompa na sada nari..Ala ni.molo sega ekosistem i ala ni pangalaho ni hita jolma na so unduk tu hata ni Debata, gabe sega ( hona bencana) ma jadijadian ni Debata na mansusai ngolu ni hita jolma.

4. Dihatahon panurirang Jesaya hata on tu halak Israel na di habuangan Babel, asa pos roha nasida di hata ni Debata na manariashon haluaon nasida sian habuangan i. Ingkon saut do naung sinangkapan ni Debata tu nasida. Molo dihatahon Debata uhum ala ni hajahaton nasida ingkon saut do uhum i, songon na niae nasida di habuangan Babel i. Alai molo didok paluaon-Na ma nasida ingkon saut do malua. Ai boi do patupaon ni Debata sibahenon-Na di ruar ni pangantusion dohot kemampuan ni bangso i. Di bagasan tingki na jonok na ma paluaon ni Debata nasida, jala ndada holan malua boti, . alai ingkon pataruon ni Debata do nasida sahat tu tano nasida di bagasan las ni roha dohot hadameon marhite raja Kores na dipangke Debata paluahon.nasida sian habuangan Babel i. Sude jadijadian ni Debata dohot marlas ni roha jala marolopolop siala ni i. Jala molo porsea nasida, muba ma parngoluon nasida. Tarpasupasu ma parngoluon nasida, tubu ma angka suansuanan na denggan di tano nasida ganti ni angka suansuanan na so marguna na tubu disi ala naung leleng tarulang tano i.

5. Dipangido Tuhanta do nang hita tongtong porsea di hata ni Debata, manghangoluhon hata ni Debata, mangaloas hata ni Debata mangingani roha dohot pingkiranta, asa dipalua hita sian roha portibi na mangarajai ngolunta, jala tarbahen hita mangadopi dohot mangalo ragam ni angka elaela ni portibion na boi mangagohon hita. Tabahen ma hata ni Debata gogonta na mamboan hita tu parngoluon na lam tu dengganna.

__________________________ 

10 Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martumburi, jala dilehon boni tu halak panabur dohot roti tu halak na manganhon.

11 Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos.

12 Ai ingkon di bagasan * las ni roha hamu borhat, jala di bagasan hadameon hamu pataruon; pangiaron ni angka * dolok dohot robean soarana marolopolop di jolomuna, jala nasa hau di ladang martopaptopap tangan.

13 Singkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar.

 

 

 

 

TAJANGKON MA JESUS AI DI BAGASAN IBANA GABE DONGANTA MA DEBATA( IMMANUEL) (RENUNGAN YESAYA 7: 10-16)

 

TAJANGKON MA JESUS AI DI BAGASAN IBANA GABE DONGANTA MA DEBATA( IMMANUEL) (RENUNGAN YESAYA 7: 10-16)

 

Horas ma di hita. Selamat ari minggu Adven IV. On ma minggu Adven na parpudi di pangaradeonta laho manomunomu haroro ni Jesus tu tongatonganta. Ndang piga ari nari sahat ma hita tu ari na balga jala na badia situtu di hita, ima ari parningotan hatutubu ni Jesus manang na somal tadok ari Natal. Las ma rohanta laho marsomba tu Tuhanta sadarion mamuji pasangaphon goar-Na, huhut tumangihon hata-Na na gabe hangoluanta, asa tarbahen hita laho mangantusi lapatan ni hatutubu ni Jesus i di ngolunta dohot di tongatonga ni hajolmaon. Disosohon hata ni Debata do tu hita, asa "tajangkon ma Jesus i, ai di bagasan Ibana gabe donganta ma Debata (Immanuel)", songon na sinuriranghon ni Panurirang Jesaya di Jesaya 7: 10-16.

1. Hatutubu ni Jesus songon jolma, ndang sian sangkap ni jolma, jala ndang ulaon ni jolma non i, alai sian sangkap dohot ulaon ni Debata sambing do. I do umbahen na tubu Ibana sian sada na marbaju na so habubuhan.

2. Atik pe tubu Ibana songon jolma, di na mamestahon hatubu ni Jesus hita marhite pesta Natal i, ndang dos i dohot na mamestahon ari hatutu ni jolma ( ulang tahun). Ala ni nang pola sidohononta songon na somal tadok tu dongan jolma na marulang tahun, selamat ulang tahun tu Jesus, ai ndang na marulang tahun Jesus marhite pesta Natal i. Angkup ni i tu dongan jolma do sidohonon ucapan selamat ulang tahun, anggo tu Jesus ndang pola sidohonon ucapan selamat, ai siboan keselamatan do Ibana di hita jolma marhite hatutubuNa i.

3. Rade Debata saor di tongatonganta gabe donganta, ala ni holong ni roha ni Debata do di hita jolma na tinompaNa i asa unang mago ala ni dosa, songon na hinatindangkonna di Johannes 3: 16: " Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di Ibana".

4. Di haradeonNa gabe dongan ni hita jolma, rade do Jesus tubu di bagasan hapogoson, di bagasan haleaon, manaon godang haporsuhon, sahat tu rade muse maneahon hosa-Na laho manghophop hita jolma na hinaholongan-Na. Dipatuduhon Jesus do nang tiruan di hita jolma, ai molo olo Debata gabe dongan di hita jolma, asa hita pe angka na porsea di Ibana, ingkon olo do gabe dongan na tutu manang aleale tu ganup dongan jolma na manghaporluhon pangarupionta. Unang ma hita olo gabe dongan holan tu halak na taetong boi tongtong mangalehon paruntungan manang pangomoan tu dirinta sambing.

5. Dipagodanggodang do Jesus songon jolma na somal. Ditingki dakdanak Ibana, mantega dohot situak ni loba do sipanganonna, i ma sipanganon na margizi hatiha i tu dakdanak asa denggan magodang gabe jolma na cerdas jala marroha. Di Lukas 2: 40 didok: "Ia Dakdanak (Jesus) i, lam magodang do, lam margogo huhut marroha situtu, laos didongani asi ni roha ni Debata Ibana". Alai mambahen lam magodang jolma gabe umboto mambolonghon na jat jala mamillit na denggan, ndada holan sipanganon pardagingon sambing ala i dohot do ala ni sipanganon partontion ima hata ni Debata. Jala ido nang na tarida di diri ni Jesus, ai Hata ni Debata na gabe jolma do Ibana.

__________________________________

Yesaya 7: 10-16

10 Angkup ni didok Jahowa ma mandok si Ahas, songon on:

11 Pangido sada tanda di ho sian Jahowa Debatam, pangido sian banua toru, manang sian banua ginjang sahali.

12 Jadi ninna si Ahas ma: Ndang olo ahu mangido, asa unang huunjuni Jahowa.

13 Jadi ninna si Jesaya ma: Ua tangihon hamu ma, ale pinompar ni si Daud! Ndang dope sae hamu pauruuruhon jolma, dohot do Debatangku naeng lojaanmuna.

14 Dibahen i apala Tuhan i sandiri ma mangalehon sada * tanda di hamu: ** Ida ma, gabegabean ma sada namarbaju, jala tumubuhon sada anak, jala bahenonna ma goarna: * Immanuel.

15 Mantega dohot situak ni loba panganonna, paima diboto mambolongkon na jat, jala mamillit na denggan.

16 Ai * tagan so diboto dakdanak i dope mambolongkon na jat, jala mamillit na denggan, * tarulang ma tano i na nirajaan ni na dua raja hinabiaranmu i

 

MARTUA DO HALAK NA MARHAPOSAN TU JAHOWA (RENUNGAN YEREMIA 17: 5-10)

 

RENUNGAN YEREMIA 17: 5-10,  MARTUA DO HALAK NA MARHAPOSAN TU JAHOWA

 

Horas ma di hita. Selamat Ari Minggu. Sadarion nunga sahat hita tu minggu, Septuagesima, na marlapatan pitu pulu ari andorang so ari haheheon ni Tuhan Jesus. Mulai sian minggu Septuagesima on nunga diarahon hita paihutihut sitaonon ni Jesus laho paluahon hita jolma pardosa, na marhapatean tu hamonangan-Na di hahaheon-Na sian na mate. Las ma rohanta marsomba tu Tuhanta mamuji pasangap goar-Na huhut tumangihon hata-Na na gabe hangoluanta. Disoarahon hata ni Debata sian Jeremia 17: 5-10, : "Martua do na marhaposan tu Jahowa". Martua lapatanna, tarpasupasu, jala marhite pasupasu i sonang parngoluonna, dame panghilaanna, gabe gok las ni roha (berbahagia) ibana di ngoluna.

1. Suharsuhar ni i marhaposan tu Jahowa i ma na marhaposan tu jolma, na mangasahon bolon ni botohonna manang gogona. Halak na songon i ingkon marjea do ujungna. Marjea lapatanna hona bura manang terkutuk, gabe ndang adong hasonangan dohot hadameon di ngoluna. Tongtong gaor pingkiranna. Ai dipatudos do ibana tu halak na marbahudung di tano na mahiang, na so tagamaon marnida na denggan manang na uli, songon suansuanan na rahar di tano bangkalbangkal di halongonan na mansai gersang, manang di tano na ansim, na so niinganan ni halak. Ala ni sai hira na punjung do panghilaanna, ndang hea sonang rohana.

2. Boasa songon i halak na marhaposan tu jolma? Ala jolma na pinangasahonna naung digohi dosa, terbatas do gogogona, terbatas do holong ni rohana, ndang manongtong gogona. Boi sadarion mansai togos berengon alai marsogot nunga peak so margogo be. Ia so i boi do sadarion hira na dilean rohana tu hita, alai marsogot nunga marbalik gabe manghasogohon hita. Jadi ala ni i do ndang sipangasahonon jolma, ise pe halakna, na marhuaso, na marpangkat, na mora, na pistar, na sangap, ala jolma i naung nigomgoman ni dosa, tong do gok hagaleon, gok hahurangan dohot angkalangkal na sai mamingkirhon dirina sandiri. Alai ingkon sihaholonganta do sude dongan jolma songon dirinta sandiri.

3. Hapistaran dohot parbinotoan ni jolma pe ndang sipangasahonon. Boha pe timbo ni hapistaran dohot parbinotoan ni jolma adong do keterbatasan ni i. Tutu silehonlehon ni Debata do i di jolma na boi sipangkeon laho mangeahi hamajuon ni parngoluon dohot mangatasi persoalan ni ngolu. Alai ndang boi sipangasahonon i manang siasanghononhon, alai sipangkeon do di bagasan tanggung-jawab. Nunga tarida i di hamamasa ni pandemi covid 19 naung dua taon ne lelengna di sandok portibion dohot di bangsonta. Tarida ma marhite i keterbatasan ni parbinotoan ni jolma laho mangalo sahit. Alai boi do i gabe pendorong i di jolma patambahon parbinotoanna dohot hapistaran molo dipangke parbinotoan na adong mangasahahon Tuhan i.

4. Ala ni i do disoarahon hata ni Debata marhite panurirang Jeremia tu hita asa tongtong hita marhaposan tu Jahowa jala Jahowa haporusanta tabahen. Halak sisongon i do halak na martua, ai tudos ma ibana tu hau na sinuan di topi ni batang aek, manjarar uratna di topi ni batang aek i, ndang mabiar molo ro hamohopon, tongtong rata bulungna, ndang holsoan di taon haraharon, jala tongtong marparbue. Ido hatuaon ni halak na marhaposan tu Jahowa, sonang panghilalaanna, dame rohana, huhut tongtong aktif marusaha di ngoluna jala tongtong marparbuehon na denggan tu donganna jolma. Halak na mangasahon Tuhan i ima halak ns tarpasupasu jala na gabe pasupasu tu donganna na humaliang.

5. Diboto Debata do roha ni jolma parbagasan, ala i i ndang boi manang ise pe marpalemsem di adopan ni Debata, ndang boi sai songon na Debata dipangasahon, hape dirina, gogona, pingkiranna, parbinotoanna, sinadonganna do dipangasahon. Jahowa do sidodo roha, siuji piapia jala mangalehon tu ganup hombar tu dalanna, hombar tu parbue ni pambahenan. Ala ni ganup do mampartanggung jawabhon na niulana di adopan ni Debata.

___________________________________  

5 Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa.

6 Songon halak * parbahudung di tano na mahiang do ibana, ndang tagamon idaonna ro na denggan i, jala maringan ibana di * tano bangkalbangkal di halongonan, di tano na ansim na so hinundulan ni halak.

7 Alai martua ma baoa na marhaposan tu Jahowa, jala Jahowa haporusanna dibahen.

8 Tudos do ibana tu hau na sinuan di topi ni batang aek, jala manjarar uratna di lambung batang aek, jala ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue.

9 Tung na angkal situtu do roha ni jolma, jala na ganggu, tung ise ma na tuk mandodoisa?

10 Ahu Jahowa do * Sidodo roha, siuji piapia jala * mangalehon tu ganup jolma hombar tu dalanna, hombar tu parbue ni pambahenanna.

 

 

DIJOU DEBATA DO HITA NA PORSEA DI IBANA MAMARITAHON HATANA (RENUNGAN YEREMIA 1: 4-10)

 

RENUNGAN YEREMIA 1: 4-10, DIJOU DEBATA DO HITA NA PORSEA DI IBANA MAMARITAHON HATANA

 

Horas ma di hita. Selamat Ari Minggu IV dung Epiphanias. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na na gabe hangoluanta. Disoarahon hata ni Debata na dipasahat tu si Jeremia laho pabangkithon ibana gabe panurirang tu angka bangso ( Jeremia 1: 4-10), na dohot do hita naung porsea di Debata laho manghangoluhon hata-Na huhut mamaritahon hata-Na i di tongatonga ni parngoluonta siganup ari.

1. Ulaon gabe panurirang na pinasahat ni Debata tu si Jeremia, ndada ulaon na tompu dipasahat, ai tagan so dijadihon Debata do pe ibana di bortian ni inana nunga diparade Debata ibana gabe panurirang. Nunga ditanda jala diparbadia i Debata ibana. On porlu dihatahon tu Jeremia laho paposhon rohana naung sian sangkap ni Debata do ibana gabe panurirang, ndada sian sangkap ni jolma. Ulaon hapanurirangon mamaritahon hata ni Debata ndada ulaon ni jolma, alai ulaon ni Debata do. Jala sude do angka na porsea di Debata tarjou mamaritahon hata ni Debata naung sinuanhon ni Debata tu roha ni angka na porsea i. Tutu ndang sai holan marhite hata manang pamangan pardagingon i diulahon, alai lumobi do marhite parange dohot tiruan di pangulaon na denggan.

2. Sadar do si Jeremia na ulaon na borat situtu do na pinasahat ni Denata tu ibana. Ditanda ibana do dirina dohot hagaleonna na so tau ibana nian mangulahon ulaon i. Ala ni i do alus ni ibana tu Debata: "I ale Tuhan Jahowa, ndang huboto manghata i ai bajar do pe au". Molo didok bajar tontu na mansai poso do pe i. Dibereng ibana dirina ndang tau tu ulaon i, ai songon nidok ni umpasa ni halak Batak: ramba na poso do pe ibana na so tubuan lata, halak na poso na so umboto hata. Diboto di Jeremia do ulaon ni sahalak panurirang ima manghatahon hata ni Debata tu tongatonga ni bangso i. Ala ni ingkon sahalak na malo.manghata i ma nian dijou tusi. Apalagi hatiha i diboto ibana do situasi ni bangso i di bagasan pangalaho na gok halumlamon, di situasi sosial-politis dohot ngolu parugamoon na krisis.

3.Sada sikap.na denggan do molo adong panandaon ni diri di sadasada halak laho manjalo sada ulaon na borat.Alai torop do halak asal dijaloi sada ulaon hape ndang ditanda dirina na so tau tu ulaon i. Diboto Debata do pandandaon ni diri ni si Jeremia na tubu sian roha na ias do i dohot haserepon ni roha, ndada na naeng mangalo sangkap ni Debata ibana disi, ai songon naung nidok Debata, nunga ditanda Debata hian dirina dohot rohana, jala nunga diparbadiai Debata ibana tagan sian bortian do pe tu ulaon i. Ala ni i ma didok Debata tu ibana: "Unang dok.na bajar do pe.Ai manang tu dia pe husuru, ingkon tusi ho lao, jala manang aha hutonahon tu ho, ingkon i do, hatahanononmu". Lapatanna ndang hata ni si Jeremia na naeng sihatahanononna, alai hata ni Debata na dipasahat tu ibana do. Ala ni dipapos Debata rohana asa unang mabiar ibana, ai molo nunga Debata na marsuru.ndang tagamon pasombuon ni Debata ibana disi. Ala ni i dipatoltol Debata ma tanganna, dijama ma pamangan ni Jeremia huhut didok: "idama,nunga nunga hulehon angka hatangku tu bagasan pamanganmu".

4. Sude hata sihatahonon ni si Jeremia ingkon hata ni Debata do, ndada hatana sambing jala ulaonna ima; mangaranapi angka bangso dohot angka harajaon, laho mangurati dohot.maniaphon, mangago dohot.mangaloha, paulihon dohot manuan. Sada ulaon na borat do on, ai ingkon barani ibana maminsang dohot mangalumbahon uhum ni Debata tu bangso i, molo diranapi ndang unduk bangso i tu Debata. Alai angkup ni ingkon boi do ibana manogunogu bangso i tu dalan ni Debata dohot pauliulihon tu parngoluon na hombar tu hata ni Debata.

5. Tu hita do nang hasahatan ni hata on. Ai ganup na porsea tarjou do manghatahon hata ni Debata di tongatonga ni parngoluon siganup ari, di keluarga, di inganan pangulaon dohot di parsaoran siganup ari. Alai asa tarbahen hita i ingkon jolo tahangoluhon do hata ni Debata naung tajalo i, jala lam matoras ( dewasa) hita di hata ni Debata. Angka naung matoras di hata ni Debata, i ma naung tau mangadopi ragam ni tantangan dohot parsoalan ni ngolu, na umboto mambedahon na denggan dohot na roa, na so sarombang dohot portibion, ndang mura be dipalindaklindak na masa di portibion, jala hibul ngoluna marsigantung tu Debata (msm).

________________________ 

4 Jadi na ro ma hata ni Jahowa tu ahu mandok songon on:

5 Tagan so hujadihon dope ho di bortian, nunga hutanda hian ho; jala tagan so ruar dope ho sian ampuan ni natorasmu, nunga huparbadiai hian ho: Hupabangkit ho gabe panurirang tu angka bangso.

6 Dung i ningku ma: Iale Tuhan Jahowa, ida ma, * ndang huboto mangkatai, ai na bajar dope ahu.

7 Jadi ninna Jahowa ma mandok ahu: Unang dok: Na bajar dope ahu. Ai manang tudia pe ho husuru, ingkon tusi ho laho, jala manang aha hutonahon tu ho, ingkon i do hatahononmu.

8 Unang ho mabiar maradophon nasida, ai sai ahu do donganmu, paluahon ho, ninna Jahowa.

9 Dung i dipatoltol Jahowa ma tanganna, jala * dijama pamanganku, jala ninna Jahowa mandok ahu: Ida ma *  nunga sahat hulehon angka hatangku tu bagasan pamanganmu.

10 Ida ma, hupabangkit do ho sadarion mangaranapi angka bangso dohot angka harajaon, laho mangurati dohot maniaphon, mangago dohot mangaloha, paulihon dohot manuan.

 

 

HABURJUHON MA MARTANGIANG (RENUNGAN YAKOBUS 5: 13 – 18)

 

RENUNGAN YAKOBUS 5:  13 – 18:  HABURJUHON MA MARTANGIANG
 
Horas ma di hita. Selamat Ari Minggu. Nuaeng nunga sahat tu minggu na margoar R0GATE na marlapatan "martangiang" marojahan di Jer. 29: 12, na mandok: "Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu”. Las ma rohanta marsomba tu Tuhanta sadarion, mamuji pasangap Ibana, huhut tumangihon hata-Na sihangoluhononta. Disoarahon hata ni Debata do sadarion do tu hita, na dienet sian Jakobus 5: 13-18, asa "tahaburjuhon martangiang", ai na margogo situtu do tangiang i di ngolunta.
1. Rogate na marharoroan sian hata Latin “Rogare”, marlapatan mangido. Di kalender parhuriaon, minggu Rogate, ima minggu sadarion, dipatupa dung minggu Kantate, manang andorang so ari Parningotan di Hananaek ni Tuhan Jesus tu banuaginjang. Ndang tarsirang ngolunta sian ngolu partangiangon. Marhite na martangiang do hita mangido tu Tuhan i, pasahathon aha na di bagasan rohanta, na taparungkilhon, manang na masa di ngolunta. Nian diboto Tuhan i do aha na tahaporluhon di ngolunta, andorang so mangido do pe hita tu Ibana. Alai diigil Tuhan i do sian hita, asa sai mangido hita tu Ibana, songon dalanta laho manghatai manang markomunikasi tu Ibana, jala asa marhite i taboto na sai tongtong do marsigantung ngolunta tu Ibana. Manang boha pe didok rohanta tuk ni huaso, gogo, hapistaran dohot sinadongan di hita, ndang boi hita mangolu holan sian i.
Marhite na martangiang i boi ma nang tasadari paboa sude na adong di ngolunta on na sian Tuhan i do i. Ala ni i do sai disosohon Tuhan i huriaNa, ro di sude angka na porsea di Ibana, asa sai martangiang tu Ibana. Tuhan Jesus sandiri pe, diajari do angka siseanna dohot sude angka na mangihuthon Ibana asa sai dihaburjuhon martangiang tu Debata Ama i.
Alai dipajamot Tuhan i do asa unang adong martangiang “na demonstratif”, songon angka pangansi na sai manghalomohon jongjong martangiang di parguruan dohot di dalan balobung, asa diida jolma i nasida. Angka partangiang sisongon i didok Tuhanta, ndang jaloonna na pinangidona i. Songon i muse dipajamot do asa unang songon partangiangon ni angka sipelebegu, na mangarimpu tangihonon ni Debata nasida ala ni deak ni hatahata nasida. Lapatanna, ndang marguru tu godang ni hatanta, manang uli ni untaian ni angka hatanta Tuhan i mangalusi tangiangta, ai ndang dos tangiang dohot jampijampi manang tabastas ni angka parhapandean ni portibi on. (Mat. 6: 5-15)
2. Di sude partingkian dohot na masa di ngolunta do hita martangiang. Ndang marombasombas manang marsanggasangga hita martangiang tu Tuhan i. Ndang holan di tingki adong na porlu di dirinta asa martangiang hita tu Tuhan i, ai ndada holan na porlu di hita si tangianghononta, alai dohot do na porlu di Debata manang di harajaon-Na. Jala ingkon sai ido sipatujuloonta songon tangiang na niajarhon ni Tuhan Jesus di tangiang " Ale Amanami,". Angkup ni i di sude na masa di ngolunta do hita martangiang, di haporsuhon nang di las ni roha songon na didok di turpukta on: "Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana". Tontu uju masa haporsuhon, marhite tangiang mangido gogo hita tu Tuhan i, asa dipatau hita manaon haporsuhon, jala dipalua sian haporsuhon i. Molo masa pe las ni roha didok di turpuk on, marende ma hamu. Tontu ende na nidokna ende tangiang do na mandok mauliate tu Tuhan i do, huhut mangido asa unang las ni roha na nilehon ni Tuhan i mambahen hita lupa tu Tuhan i, manang patubu ginjang ni roha di hita.
3. Masitangiangan do angka na porsea manang huria i. Molo adong na marsahit di huria i dijou ma sintua ni huria i asa ditangiangkon ibana. Sintua di hatiha na di goari "presbyteros" di hata Junani, i do parmahan di huria i na mangaradoti ngolu partondion ni huria. Nunga dihamham i sude naginoaranna parhalado ni huria di tingkion tarmasuk pandita. Ndang sae holan ditangianghon alai dohot do diubati. Pangubation na denggan na ditanda halak hatiha i i ma pandampolon marhite miak Jetun. Ndang adong do pe ditanda halak pangubation medis songon na ditanda ni halak di tingkion. Aut naung ditanda halak i, tontu do dohononna do ditangiangkon ma ibana laos diubati. Jadi ndang boi alasan ayat on songon nidok ni na deba halak Kristen, ndang ringkot marubat sungkup ma ditangiangkon jala didampol dohot miak. Tontu di na martangiangan angka na porsea, ndada holan parhalado ni huria manangiangkon ruas, angka ruas pe dipangido do manangiangkon parhalado. Ido ngolu na masitangiangan.
4. Na margogo disitu do tangiang ni partigor. Partigor i ma halak na mangolu di bagasan hatigoran ni Debata. Na sai pajolohon na ringkot di harajaon ni Debata. Partigor i ma na olo masiseaan dosa jala masitangiangan. Ndang adong roha hosom dohot pamaloson di dosa ni donganna. Dosa ni halak na olo manesa dosa ni donganna do disesa Tuhan i, jala halak na songon on do na tardok halak partigor. Partigor i ma na olo maneahon dirina laho laho mamorangi angka debata sileban jala na manghamonanghon Debata Jahowa songon si Elia. Ala ni i ditangihon Debata do tangiang ni si Elia asa unang ro udan, jala ndang ro udan tolu taon onom bulan lelengna di tano i. Dungi diulahi ma muse martangiang asa ro udan, gabe ro ma udan na mamornohi tano i asa dipantubuhon angka suansuanan na marparbue. Jadi na pinangidona ndang kepentingan ni dirina sambing, alai na ringkot di harajaon ni Debata, asa diboto bangso i na Debata Jahowa do nampuna huaso di hasiangan on, jala sisombaon ni sandok bangso. Jadi molo pabalgahon diri ni sadasada halak do na pinangidona i, ndang tagamon oloan ni Debata na pinangidona.
Jakobus 5:13-18
13. Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana.
14. Molo adong na marsahit di hamu, dijou ma angka sintua ni huria i; asa ditangiangkon ibana; didampol ma ibana dohot miak marhitehite Goar ni Tuhan i.
15. Dung i pangoluon ni tangiang haporseaon i ma na marsahit i, jala paheheon ni Tuhan i ma ibana; sesa ma nang dosana, molo tung adong diulahon.
16.Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon.
17.Jolma do si Elia, sabangko dohot hita; gogo do ibana martangiang, unang jolo ro udan; jala ndang ro udan di tano i, tolu taon onom bulan lelengna.
18.Dung i diulahi ma martangiang, jala dilehon langit i ma udan; dung i dipantubuhon tano i ma parbuena.
 

JALAHI MA HABISUHON NA SIAN GINJANG (RENUNGAN YAKOBUS 3: 13 – 18)

 

RENUNGAN YAKOBUS 3: 13 – 18:  JALAHI MA HABISUHON NA SIAN GINJANG 

 

Horas ma di hita. Selamat Ari Minggu pa VII dung Trinitatis. Las ma rohanta marsomba tu Tuhanta sadarion, mamuji pasangaphon goar-

Na, huhut tumangihonbhata-Na sihangoluhononta. Disoarahon hata ni Debata sadarion sian Jakobus 3: 13-18 do tu hita asa tahangoluhon habisuhon na sian ginjang manang na sian Debata, unang habisuhon na sian tano on, na sian sibolis. Dipatuduhon do di turpuk on adong dua rumang ni habisuhon na boi manggohi rohanta, i ma habisuhon na sian ginjang manang habisuhon na sian Debata dohot habisuhon na sian tano, habisuhon na sian jolma manang sibolis. Alai disosohon do asa talului habisuhon na sian ginjang, unang habisuhon na sian tano manang portibi on.

1. Sian sibolis do habisuhon na sian tanoon. Didok di 1 Musa 3: 1, ulok do na umbisuk sian nasa na manggulmit di ladang. Alai sian sibolis do habisuhonna i, na dipangke sibolis i do ulok i laho pasauthon sangkapna laho mandabuhon jolma i tu dosa, manang mangalo Debata. Marhite habisuhonna i dipaotooto sibolis i jolma i marhite na pabalikhon hata ni Debata. Ala naeng dos jolma i dohot Debata, gabe dioloi nasida ma hata ni sibolis i. Ala ni sega ma hubungan ni jolma tu Debata. Songon i do sahat tu saonari dibahen sobolis i tu jolma, mangunjuni jolma asa dipados dirina dohot Debata marhite parbinotoanna, marhite sinadonganna, marhite huasona dohot jabatanna. Ujungna dirina manang na adong di dirina i pe dipardebata ma, ndang unduk be tu Debata, ndang unduk be tu hata dohot patik ni Debata. Ujungna aha na pinarhagiot ni rohana i ma diulahon, na dirajumi boi pasombuhon uas ni rohana. Angka halak na songon on ndang hea boi manghasabamhon na adong di ibana, ndang diboto manghamaulistehon basabasa ni Debata, ala dirina dohot gogona do dipangasahon.

2. Habisuhon na sian sibolis patubuhon pangiburuon dohot hatongkaron. Pangiburuon i ma na so olo manghamauliatehon na adong di dirina. Ndang las rohana molo dumenggan parngoluon ni donganna sian ibana. Tubu pangalaho na songon on ala sai torus mamparbandingkon dirina tu donganna na asing. Boi do jorbut panghorhon ni pangiburuon on, boi do i manghorhon roha late, boi manghorhon sogo ni roha, hosom dohot parmusuon sahat ro di na masibunuan. Mangiburu do si Kain mamereng anggina si Abel, ala pelean ni si Abel dijalo Debata, ia peleanna ndang dijalo, gabe sogo ma rohana mamereng anggina i laos dibunu ( 1 Musa 4: 2-16). Mangiburu do do si Saul mamereng si David, ala si David dipapujipuji natorop dung marhasil manaluhon musunasida halak Falistin. Alani i sai naeng ma bunuon ni Saul si David i ( 1 Sam. 18: 16 d.u). Pangiburuon na tubu do i sian roha diri, dohot na so adong panandaon ni dirina. Domu tuson do nang hatongkaron. Ummura antusan na di hata Indonesia i i ma " mementingkan diri sendiri". Na mementingkan diri sendiri do halak na tongkar, na mangarajumi dirina sumintong jala humebat sian donganna. Ala ni na sai adong do halak mementingkan diri sandiri umbahen olo tubu partongkaron manamg pargulutan, na manghorhon hagaoron dohot ulaon hajahaton. Pangalaho on do deba jotjot mambahen sega hasadaon ni sadasada punguan.

3. Hangoluhon ma habisuhon na sian ginjang i ma habisuhon na sian Debata. Suharsuhar ni habisuhon tanoon do habisuhon na sian ginjang.

Silehonlehon ni Debata do i na dapot marhite biar mida Jahowa (Poda 1: 7; 9: 1; Psalmen 111: 10). Ndang dapot i guruhonon marhite na mamangke utokutok, holan marhite biar mida Debata do i dapot. Molo didok biar mida Debata ndang dos i dohot na mandao sian Debata. Di Bibel si sada ihot do pangantusion ni biar mida Jahowa dohot haporseaon tu Debata dohot holong tu Debata. Na mabiar tu Debata i ma na porsea tu Debata jala na holong rohana di Debata.Biar tu Debata mambahen hita tongtong masihol tu Debata, mangolu di bagasan Debata, mauas tongtong di hata ni Debata. Marhite ngolu na songon i tubu habisuhon na sian Debata. Hataridaanna, i ma ngolu na bontor, olo mardame, lambok, pangoloi, gok asi ni roha dohot parbue hadengganon, dao sian hagangguon dohot pangansion. Jadi habisuhon ndada holan di hata alai marhite parange do dohot pambahenan. Na bontor, i ma halak polin rohana, ndang marlaok maradophon Debata nang dongan jolma. Na olo mardame i ma na olo mamolushon na hurang na binahen ni dongan, ndada na pajujurjur hatigoranna sambing. Halak na songon on do na nidok Jesus halak na martua, ai goaron do nasida anak ni Debata ( Mat. 5: 9). Na lambok roha ( peramah didok di hata Indonesia), ima na sai tabo hatana tu panghilalaan ni donganna.Ndang kasar hatana na boi parohon rimas dohot hansit ni roha. Halak na lambok roha pe digoari Jesus do halak na martua, ai teanon nasida do tanoon ( Mat. 5: 5). Angkup ni didok halak na bisuk i ma pangoloi di Debata, pangoloi di patik dohot uhum ni Debata. Gok asi ni roha dohot ragam ni ulaon na denggan do angka na bisuk, ai parasi roha jala pardenggan basa do Debata silehon habisuhon i. Ndang ganggu rohana di ngoluna ala pos do rohana tongtong di panarihon dohot pandonganion ni Debata. Ias do rohana, songon i di bagasan songon i do di duru, ndang adong pangansion (munafik). Na manggabusi dirina dohot manggabusi Debata do halak pangansi manang na munafik.

_____________________

Jakobus 3:13-18 Habisuhon na sian ginjang

13 Ise hamu na bisuk jala na pantas marroha? Sian denggan ni parangena ma dipataridahon ibana angka ulaonna marhitehite halambohon ni habisuhon!

14 Alai molo ditiop hamu pangiburuon na paet dohot hatongkaron di bagasan rohamuna, unang ma puji hamu dirimuna maralohon hasintongan, huhut margabus!

15 Ndada i habisuhon na ro sian ginjang; na sian tano do i, sian roha ni jolma, sian sibolis.

16 Ai ia disi pangiburuon dohot hatongkaron, disi ma hagaoron dohot sandok ulaon hajahaton.

17 Alai anggo habisuhon na sian ginjang i, sandok na bontor do i, olo mardame, lambok, pangoloi, gok asi ni roha dohot parbue hadengganon, dao sian hagangguon nang pangansion.

18 Alai di bagasan dame do disaburhon parbue hatigoran di angka na mangulahon dame i.

 

UNANG TOIS ROHAM DI ASI DOHOT HOLONG NI ROHA NI DEBATA RENUNGAN HOSEA 1: 2 - 9 )

 

RENUNGAN HOSEA 1:  2 - 9 :  UNANG TOIS ROHAM DI ASI DOHOT HOLONG NI ROHA NI DEBATA

Horas ma di hita. Selamat ari minggu VI dung Trinitatis. Las ma rohanta marsomba tu Tuhanta, mamuji pasangaphon goar-Na, huhut tumamgihon hata-Na sihangoluhononta. Disoarahon hata ni Tuhanta sian Hosea 1: 2-9 asa unang tois rohanta di asi dohot holong ni roha ni Debata na manongtong di hita.
1. Uhumon ni Debata do angka na tois rohana di asi ni roha ni Debata, songon na binahenna tu bangso Israel. Dung salpu harajaon ni si Salomo tarbagi do dua harajaon Isaerl, i ma parjolo sampulu marga di utara, na mamboanhon goar Israel, jala paduahon dua marga di Selatan na mamboanhon goar harajaon Juda. Harajaon Israel bagian utara hatop do manimbil sian padanna tu Debata. Ditadingkon nasida do Debata Jahowa naung pabangkit nasida gabe bangsona. Ndang diradoti nasida padan ni Debata. Ditundalhon do Debata, ndang diradoti patik dohot uhumna. Ndang sian keturunan si David be rajanasida, alai nunga marsigulut na gabe raja di harajaon i. Hombar tusi dipangke angka na naeng manggulut harajaon i do nasa cara portibion, tarmasuk manjalin hubungan tu angka bangso parbegu na humaliang.Masuk ma dohot haporseaon sileban tu tungatonga ni bangso i. Ndang satia be nasida tu Debata Jahowa, alai na pinasombasomba nasida debata baalna na ma. Di bagasan pangalaho na songon i dirajumi Debata Jahowa do nasida naung marmainan manang mangalangkup di bagasan haporseaon ala jotjot dipatudos do hubungan ni Debata tu bangso i songon hubungan pardonganbsaripeon. Tarrimas do Debata mamereng pangalaho ni halak Israel na songon i. Ala ni i disuru ma panurirang Hosea mamangkuli jala paingothon nasida. Alai disuru Debata si Hosea, ndang songon panurirang na somal na patohashon hata ni Debata marhite pamanganna, alai marhite simbol do, ima marhite rumang ni pardongan saripeonna Disuru Debata do si Hosea mambuat boru sibabijalang gabe dongan saripena, na manggombarhon naung songon boruboru sibabijalang i pangalaho ni bangso na hinaholonganna i. Sada ulaon na mansai borat do i di si Hosea, ai ingkon siparengkelan manang sibursikhonon ni halak ibana siala i. Alai songon panurirang na satia tu Debata, dioloi si Hosea do i. Dibuat ma sada boruboru sibabijalang jala tubu ni sibabijalang na margoar si Gomer boru ni si Diblaim.Marhite pardongan saripeonna dohot si Gomer i ditubuhon ma di ibana tolu anakhon, i ma dua anak dohot sada boru. Anakna na parjolo disuru Debata ma bahenona goarna Jisreel. Goar ni sada rura na uli jala na mansai napu do Jisreel i. Dua do lapatan ni goar i, boi do i marlapatan Debata manabur, jala na paduahon Debata marlulu manang manguhum. Marhite goar i naeng dohonon ni Debata tu bangso i: luluhonon ni Debata ma angka utang mudar ni Jisreel tu pinompar ni si Jehu, i ma sada raja hatiha i di Israel. Lapatanna, leksehonon ni Debata ma harajaon Israel, gabe ndang adong be harajaon Israel bagian utara i. Saut do on masa, ai taon 722 sm dileksehonhon Debata ma harajaon Israel i marhite harajaon Assur sian utara. Marserak ma bangso i, gabe sian mulai i ndang adong be ma harajaon Israel i, alai anggo harajaon Juda hot do pe dipasombu Debata ala Jahowa do pe disomba nasida. I ma uhum ni Debata tu angka halak na tois rohana di asi ni roha ni Debata.
2. Marbatas do tingki parasian na nilehon ni Debata tu bangsona. Nang pe parasi ni roha na manongtong do Debata, alai marbatas do tingki parasian ni Debata tu jolma. Songon i do na pinatuduhonna tu bangso Israel. Ala ditoishon bangso Israel do asi ni roha ni Debata marhite na manimbil nasida tu angka debata sileban na di portibi on, gabe digotap Debata do asi ni rohana tu bangso i, gabe ndang bangso na niasian ni Debata be nasida. Dipasahat Debata sikapna i tu bangso i marhite goar ni boru na tinubuhon ni si Gomer di si Hosea. Ai disuru Debata do bahenon ni si Hosea goar ni boruna i: Lo Ruhama, lapatanna Nai Sohinasian. Molo na sailaonna i hasian ni Debata do bangso i, alai ala ni panimbilon ni pangalaho ni bangso i maradophon Debata gabe ndang dihasiani manang ndang diasi i Debata be nasida. Nunga salpu tingki parasian na nilehon ni Debata tu nasida. Ndang dipangke bangso i tingki parasian ni Debata, gabe digotap Debata ma asi ni rohana tu bangso i. Songon i do tu hita. Molo tois rohanta di asi ni roha ni Debata, jala ndang tapangke tingki parasian ni Debata na nilehonna tu hita, marhite na manghaholongi Ibana sian nasa roha, dohot sian nasa gogo dohot ateatenta, jala ndang manghaholongi dongan jolma songon dirinta, gabe buaton ni Debata do tingki parasian i, gabe ndang na niasian ni Debata be hita. Dungi gabe halak na so niadian Debata. Mansai parir do ngolunta molo.pola ndang diasii Debata be hita.
3. Ndang bangso ni Debata be angka na manoishon asi ni roha ni Debata. Deba nari uhum ni Debata tu bangso Israel, ala ditoishon nasida asi ni roha ni Debata na tu nasida, i ma ndang bangso ni Debata be nasida. Sikap ni Debata na so mangarajumi bangso Israel disuru Debata soarahonon ni panurirang Hosea marhite na mambahen goar ni anakhonna na patoluhon, i ma sada anak, na margoar Lo Ami, lapatanna, ndang bangsongku. Ndang bangso ni Debata be bangso Israel sian mulai dileksehon halak Assur bangso i taon 722, songon naung tinaringotan di ginjang i, jala dipaserak Debata marhite na mambuang nasida tu gogomgoman ni angka bangso na asing. Sian mulai holan bangso Juda ma na targoar bangso ni Debata. Ala ni i do didok di ayat 7 ni turpuk on, alai marpangulahi do rohangku di pinompar ni Juda. Lapatanna asi do pe roha ni Debata anggo di pinompar ni Juda, ala hatiha i hot do pe Debata Jahowa diihuthon nasida na disomba di bagas joro na di hutaJerusalem. Alai harajaon Juda on pe tong do diuhum Debata muse marhite na tarbuang di huta Babel mulai taon 586, ala dohot do nasida muse mangalo Debata, marhite ragam ni angka hajahaton dohot na so uhum na niula ni bangso i. Sian mulai i nunga mago hadirion ni bangso Juda songon sada harajaon dohot bangso na berdiri sendiri. . Sian mulai i torus na ma bangso i di bagasan gomgoman ni angka bangso na asing sahat tu na roJesus. .Di bagasan Jesus ma muse Israel na imbaru dipabangkit Debata ima huria i, alai pangalahona ndang dos dohot harajaon portibion be alai harajaon banuaginjang manang harajaon partondion . Alai na masa tu harajaon Israel dohot Juda boi masa do i tu huria i, molo tois roha ni ni huria di asi dohot holong ni roha ni Debata.(MSM PANJAITAN)

Hosea 1:2-9
2. Mula ni hata ni Jahowa marhitehite si Hosea: ninna Jahowa ma tu si Hosea: Laho ma ho, buat ma sada boruboru sibabijalang dohot angka tubu ni sibabijalang! Ai sai didatdati isi ni tano i do marmainan, marbalik sian Jahowa.
3.Jadi laho ma ibana, jala dibuat ma si Gomer, boru ni si Diblaim, gabegabean ma nasida jala ditubuhon di ibana sada anak.
4. Dung i didok Jahowa ma tu ibana: Jou ma goarna si Jesreel; ai otik nari marlulu ma ahu di angka utang mudar ni si Jesreel tu pinompar ni si Jehu, jala ahu pasiaphon harajaon ni pinompar ni Israel.
5. Jadi di ari na sasada i ponggolhononku ma sior ni Israel di rura Jesreel.
6. Dung i gabegabean muse ma boruboru i, jala ditubuhon sada boru. Dung i didok Jahowa ma tu ibana: Jou ma goarna Nai Sohinasian; ai ndang be marpangulahi rohangku tu pinompar ni Israel, manang marpamuati rohangku tu nasida.
7. Alai marpangulahi ma rohangku anggo tu pinompar ni Juda jala paluaonku nasida marhitehite Jahowa, Debatanasida i; alai ndang paluaonku marhitehite sior manang podang manang hamusuon, manang hoda manang jolma parsihundul pe.
8. Jadi dung sirang susu Nai Sohinasian, gabegabean muse ma boruboru i, jala ditubuhon sada anak.
9. Jadi ninna Jahowa ma: Jou ma goarna Lo Ami, ai ndang bangsongku hamu, jala ndang hamu nampuna ahu. 

MANGOLU SONGON ANGKA ANAK NI DEBATA DI BAGASAN HAPORSEAON TU KRISTUS (RENUNGAN GALATIA 3: 23 - 29)

 

RENUNGAN GALATIA 3: 23 - 29 : MANGOLU SONGON ANGKA ANAK NI DEBATA DI BAGASAN HAPORSEAON TU KRISTUS.

 

Horas ma di hita. Selamat Ari Minggu, i ma Minggu I dung Trinitatis. Las ma rohanta marsomba tu Tuhanta, mamuji pasangaphon goar-Na, huhuhut tumangihon hata-Na sihangoluhononta. Disoarahon hata ni Debata do tu hita na dienet sian Galatia 3: 23-29, asa mangolu hita di bagasan haporseaon tu Jesus Kristus, ai nunga dipalua haporseaon i hita sian parhatobanan ni dosa gabe angka anak ni Debata.

1. Siparorot do patik i.

Dihata Gorik didok "paedagogos". Di tongatonga ni keluarga ni halak Junani, somal do adong na marhobas songon "paedagogos", manang siparorot. Ndang guru na mangajari ibana. Sahalak parhobas naung leleng marhobas di sada keluarga jala naung tangkas dihaposi gabe siparorot ni anakhon ni keluarga i asa mar parange na denggan sahat rodi na tang di parrohaon. Ibana do na manaruhon anakhon na pinarorotna i tu parsingkolaan manang tu guruna jala mangalap muse laho mulak. Mangihuthon si Paulus sarupa tusi do fungsi ni patik na nilehon ni Debata tu bansona sian mulana i ma manogunogu bangsona sahat tu na marhaporseaon tu Debata na paluahon nasida sian parhatobanan ni Misir. Mangihuthon si Paulus patik i do na mamboan jolma sahat tu haporseaon tu Kristus. Patik i do manogunogu jolma sahat ro di na boi mambuat haputusan sandiri laho manghaporseai Jesus. Jadi patik i do mangalehon kesadaran di jolma, na so boi marhite usahana sandiri ibana sahat tu haporseaon dibagasan Kristus. Alai di pardalanan ni sejarah ni bangso Israel sahat tu sejarah ni hajahudion muse, dipahebaheba nasida do patik na sampulu gabe mansai godang pola tu na adong 613 patik. Mangihuthon nasida ondo dalan tu haluaon. Angka na mangalaosi patik i mansai borat do uhumanna. Tarhurung manang tarihot ma nasida di bagasan patik i. Haroro ni Jesus tongtong laho paluahon jolma sia hurungan ni patik manang rumang ni angka patik di tongatonga ni angka suku bangso isara ni adat di habatahon. Nga jotjot nang adat habatahon mangihoti halak Batak tu adat i, umbiar rohana di adat i sian pangajarion ni Kristus. Nunga tingkina halak Batak menilai tuntutan ni angka adat i marhite sinondang ni barita na uli. Angka adat na so relevan be di parngoluon si ganup ari hombar tu parhusoran ni zaman ndang sai partahanhononhon be. Alani i tapangke ma patik dohot adat gabe sipanogunogu mamboan hita tu Jesus.

2. Gabe angka anak ni Debata ma hita, unang be angka na pinarhatoban ni dosa. Marhite pandidion di bagasan goar ni Debata Ama, Anak dohot Tondi Porbadia, nunga ditubuhon angka na porsea i paduahalihon gabe angka anak ni Debata. Ala ni molo nunga anak hita tama ma hita marparange songon angka anak ni Debata, ndada be songon hatoban ni dosa na paolooloi hagiotna manang hisaphisap ni portibion naung nirajaan ni si bolis i. Ala naung anak hita disuru Debata do tu bagasan rohanta Tondi ni Anak i, asa margogo hita manjouhon "Abba", ale Amang tu Debata. Margogo hita nang marparange na denggan songon angka anak ni Debata. Angkup ni didok apostel Paulus di Gal. 4: 7, dibahen na so hatoban be hita nunga gabe anak ni Debata, gabe dohot ma hita panean ( pewaris) sian Debata di hangoluan na saleleng ni lelengna. Partohap di harajaon ni Debata.

3. Marparuloshon ( marpahean) Kristus.

Saluhut naung tardidi tu bagasan Kristus, nunga marparuloshon Kristus. Alani i angka na porsea di bagasan Kristus, nunga gabe sada saluhutna, ndang mardia imbar be halak Jahudi, halak Gorik, hatoban manak anak mata, baoa manang parompuan. Songon i ma di huria i, ndang adong be imbar ni angka ruas ni huria i, ai nunga sude angka anak ni Debata. Ndang boi be ruas ni huria i dibedabedahon mangihuthon status sosial, manang parbangsoon, manang jenis kelamin. Di halak Jahudi memang di anggap do toru status ni boruboru, dianggap do lea angka na pogos manang hatoban, dianggap do toru angka bangso na so Jahudi isara ni halak Gorik rupani, na di anggap songon halak sipelebegu manang kapir. Alai di bagasan Kristus ndang adong be panghilalaan na songon i. Ndang na mandok gabe mago ma parbangsoon i, mago mago status sosial i, mago ma nang hadirion songon baoa manang boru- boru. Ndada na gabe diagohon angka status i, alai di bagasan Jesus nunga sada saluhutna, ndang adong be parbolatbolatan, ai sarupa do arga ni jolma i di adopan ni Debata. Parasingasingan na adong patuduhon hamoraon ni Debata i do i, asa boi marhite parasingan i boi angka na porsea i masitumpahan jala madipasingkopan na sada tu sada.

(MSM PANJAITAN)

Galatia 3:23-29

23. Alai tagan so ro haporseaon, tarhurung do hita di bagasan patik jala dihinsu, managam haporseaon, na naeng patandahonon dope.

24. Asa gabe songon siparorot do patik i, mamboan hita tu Kristus, asa sian haporseaon hita dipintori.

25. Alai dung ro haporseaon i, ndang be ginomgoman ni siparorot i hita.

26. Ai saluhut do hamu anak ni Debata marhitehite haporseaon di Kristus Jesus.

27. Ai Kristus i do diparuloshon hamu, sude hamu, naung tardidi tubagasan Kristus.

28. Ndang mardiaimbar disi Jahudi manang Gorik, hatoban manang anak mata, baoa manang parompuan, ai sada do hamu saluhutna di bagasan Kristus Jesus.

29. Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.

RENUNGAN GALATIA 6: 1 – 10: BINSAN SADIHARI DO PE ULAHON MA NA DENGGAN

 

RENUNGAN GALATIA  6:  1 – 10:  BINSAN SADIHARI DO PE ULAHON MA NA DENGGAN

 

Horas ma di hita. Selamat Ari Minggu IIi dung Trinitatis. Las ma rohanta marsomba tu Tuhanta, mamuji pasangap goar-Na, huhut tumangihon hata-Na. Disoarahon hata ni Debata sian Galatia 6: 1-10 do, asa manongtong hita

mangulahon na denggan di ngolunta on, di ganup tingki manang binsan sadihari do pe tingki na nilehon ni Tuhanta i di hita.

1. Parbue ni holong ni roha do ulaon na denggan.

Nasa ulaon na denggan parbue ni holong ni roha do i. Molo holong roha di dongan, ndang tagamon so ulahonon na denggan tu dongan i. Molo holong roha di inganan pangulaonniba, ndang tagamon so ulaon na denggan di inganan pangulaon i. Jadi ndang mungkin halak mangulahon na denggan anggo so adong holong ni roha di ibana. Ala ni i do umbahen diajarhon Jesus tu angka siseanna masihaholongan, so mardiaimbar tu manang ise pe. Holong ni roha tu dongan i do hataridaan ni holong ni roha tu Debata. Didok apostel Johannes, pargabus do halak na mandok holong rohana ni Debata hape dihosomi manang dihasogohon do dongan ( 1 Joh. 4: 20). Jala sada ihot do i dipatikhon Debata, ima: manghaholongi Debata sian nasa ateate, sian na nasa hosa,dohot sian nasa roha, jala manghaholongi dongan dos dohot diriniba (Mat. 22: 37-39) Ulaon na denggan i ma ulaon na hombar tu lomo ni roha Debata, jala na manghorhon na hasea di ngolu on. Jadi ndang holan na denggan na hombar tu rohanta, jala na hombar tu hagiotta siulaonta. Ulaon na denggan na tau pauliulihon parsaoran manang hubungan na denggan tu dongan.

2. Mangulahon na denggan tu saluhut halak. Ala parbue ni holong ni roha do ulaon na denggan i, ingkon tu saluhut halak do siulahonon na denggan. Ndang mardiaimbar manang tu ise pe i, tarmasuk tu angka halak na mangulahon na roa tu dirinta, isara ni na mansusai hita, manang na manghasogohon dirinta. Nasa ulaon hajahaton ingkon sitaluhonon do i marhite ulaon na dengan, songon na niajarhon ni apostel Paulus di Rom 12: 20-21: Onpe, jumpa male musum, lehon ibana mangan; jumpa mauas ibana, painum! Ai songon na pagukgukkon gara do ho tu atas uluna, anggo dibahen ho songo i. Unang ma talu ho dibahen hajahaton; alai taluhon ma hajahaton i marhitehite na denggan!". Jadi ndada holan tu halak na mambahen na denggan tu dirinta sibahenonta angka na denggan.

3. Mangulahon na denggan tu dongan sahaporseaon. Adong manang piga dipangido apostel Paulus siulahonon ni angka na porsea tu Jesus tu donganna sahaporseaon. Deba sian i na diondolhon dison, i ma masipatureturean di angka pangalaho na humurang. Didok apostel Paulus, di ay.1 ni turpuk on: Ale angka dongan, molo tung tarsomong jolma mardosa, hamu angka naung taruli di Tondi ma patureturehon ibana marhitehite tondi na lambok; alai matahon dirim, so tung dohot ho tarunjun! Dipatuduhon i do hagaleon ni hita jolma. Nang pe naung ditaluhon Jesus dosa i, boi do pe hita jolma tarsomong madabu tu dosa. Di pangalaho na songon on do angka na porsea i boi masipaturerurean, ndada masisegaan, manang masipaurahan. Di pangajarion ni Jesus tu angka siseanna pe, adong do didok di Mateus 18:15, Alai molo mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse. On do sada ojahan ni huria laho patupahon ruhut parmahanion dohot paminsangon tu ruas ni huria na tarsomong mangulahon dosa, asa tubu panandaon ni dirina di dosa na diulahon, dungi adong ma di ibana hamubaon ni roha.

Angkup ni i didok masiurupan mamorsan na dokdok. Saleleng ditano on, ala ni panghorhon ni dosa i, sai adong do na dokdok siporsanon ni ganup halak. Sai adong do siparungkilhononna be. Di son do angka na porsea i boi masiurupan, ndang masipasombuan. Paling saotik boi masitangiangan. Didok apostel Paulus na masiurupan i do sada dalan mangaradoti patik ni Kristus.

4. Unang adong na paburnangburnang diri. Di sude angka na denggan na niulahon ndang jadi pangeahonon laho patimbohon diri. Ingkon tongtong do hita di bagasan haserepon laho mangulahon saluhut angka na denggan i.Tung na so jadi do sihaginjanghononta dirinta, alai ingkon tongtong do hita patutoruhon diri, songonn Jesus na olo patutoruhon diri laho manghophop hita jolma. Ala ni i do di angka na denggan na taulahon unang ma hita manabur tu daging, alai ingkon manabur tu tondi do. Na manabur tu daging, i ma na mangulahon i marguru tu hagiotna, mangulului pujipujian tu diri, manang hasangapon tu diri. Angka na songon i ingkon manggotil do tu dirina hamagoan. Alai naeng ma manabur tu tondi, i ma angka na mangharingkothon ngolu partondion, dungi manggotil ma muse sian tondina hangoluan salelenglelengna.

5. Manongtong mangulahon na denggan. Di sude tingki na na nilehon ni Debata di ngolunta, ingkon sai pangkeonta do i mangulahon na denggan. Ndang jadi adong ombas ni ngolunta na so mangulahon na denggan, tu dirinta nang tu donganta. Marhite na songon i do hita mamparhaseang tingki na nilehon ni Debata tu dirinta. Ndang jadi pangkeonta tingki na nilehon ni Debata tu angka ulaon na roa, na manghorhon hasusaan dohot hamagoan tu dirinta. Alai tapangken ma i tu angka ulaon na denggan na manghorhon hangoluan na saleleng ni lelengna. (MSM PANJAITAN)

Galatia 6:1-10

Tongtong ma di bagasan holong ni roha

1.Ale angka dongan, molo tung tarsomong jolma mardosa, hamu angka naung taruli di Tondi ma patureturehon ibana marhitehite tondi na lambok; alai matahon dirim, so tung dohot ho tarunjun!

2.Masiurupan ma hamu mamorsan angka na dokdok i; i ma dalan mangaradoti patik ni Kristus.

3.Ai molo dipaburnang halak dirina, hape so adong di ibana, sipaotooto diri do i.

4.Alai ganup ma manangkasi ulaonna be; dung i tu ibana sandiri ma pujipujian, ndada maradophon na asing.

5.Alai adong di ganup siporsanonna be.

Unang mansadi mambahen na denggan

6.Alai na mamodahon hata ni Debata, tama do taruli di nasa parsaulian ni na pinodaanna i.

7.Unang hamu lilu; ndang olo Debata leaan! Ai ia i disabur halak, i do gotilonna!

8.Ai na manabur tu dagingna, manggotil do sian dagingna hamagoan; alai na manabur tu tondi, manggotil do sian tondi i hangoluan salelenglelengna!

9.Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng.

10.Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon!

 

MELAKUKAN KEHENDAK ALLAH ( RENUNGAN 8 sEPTEMBER 2013, MATIUS 7: 15-23)

 

Renungan 8 September 2013; Ev.  Mat. 7: 15-23;  Ep. YOH. 4: 31-42

Melakukan kehendak Allah

                Pada akhir khotbahnya di atas bukit, Yesus memperingatkan murid-muridNya akan munculnya nabi-nabi palsu yang masuk ke tengah-tengah jemaat. Mereka menyamar dengan mengenakan bulu domba, tetapi mereka adalah serigala yang buas. Mereka  berlakon  pura-pura baik, pura-pura hidup suci dan hidup beriman, tetapi hati mereka adalah jahat, ganas dan buas, yang memangsa orang-orang Kristen atau anggota jemaat itu sendiri. Dari luar memang para nabi palsu itu kelihatan persis seperti domba, sehingga sulit untuk membedakan mereka dari domba-domba yang lain.

                Nabi-nabi palsu yang Yesus maksudkan ialah orang-orang yang mengaku diutus oleh Tuhan memberitakan Firman Tuhan pada  hal sebenarnya tidak. Bisa saja banyak orang yang tertarik kepada mereka dengan kepura-puraan berlaku sebagai utusan Tuhan yang benar. Tutur katanya yang bagus, soaranya yang enak di dengar, dan bahkan berusaha meniru-niru perbuatan Yesus mengusir setan, menyembuhkan orang sakit, membuat mujizat demi nama Yesus. Menurut Yesus  nabi-nabi palsu  melakukan perbuatan-perbuatan mereka pada dasarnya bukan untuk membesarkan nama Yesus, tetapi membesarkan nama mereka sendiri, dengan mencari popularitas mereka sekaligus mencari kemuliaan dan keuntungan mereka sendiri. Ini juga berhubungan dengan banyaknya bermunculan belakangan ini orang-orang yang menyebut dirinya sebagai hamba Tuhan, orang yang mendapat panggilan dari Tuhan untuk memberitakan FirmanNya, tetapi sering menyalahgunakan kedudukan dan posisi mereka untuk memperkaya diri sendiri. Dalam menjalankan pekerjaannya mereka sering mengatakan bahwa mereka menjalankan tugas pelayanan, tetapi pada dasarnya mereka sering berharap bahwa merekalah yang harus dilayani. Karena kehadiran orang-orang seperti inilah Yesus memperingatkan murid-muridnya dan orang-orang percaya kepadaNya sepanjang zaman: “Waspadalah terhadap nabi-nabi palsu”. Untuk membedakan nabi yang benar dan nabi yang palsu bukan dari kata-katanya, tetapi dari tindakan dan perbuatannya  sehari-hari terhadap sesamanya. Nabi yang benar adalah orang yang murni menerima tuntunan dari Roh Kudus, dan tidak cukup hanya mengatakan bahwa  Roh Kudus berdiam dalam dirinya, tetapi harus membuahkan buah-buah roh seperti yang disebut oleh Rasul Paulus  dalam Galatia 5: 22, yakni: kasih, sukacita, damai-sejahtera, kesabaran, kemurahan, kebaikan kesetiaan, kelemah-lembutan dan penguasaan diri.

                Khotbah Yesus ini tidak hanya mengingatkan kita supaya waspada terhadap nabi-nabi palsu, tetapi juga mengingatkan kita supaya jangan ada kepalsuan (munafik) dalam hidup beribadah kepada Tuhan. Tidak semua  orang yang berseru kepada Yesus: “Tuhan, Tuhan”, masuk ke dalam Kerajaan Sorga, melainkan dia yang melakukan kehendak Bapa yang di sorga. Jadi di sini jelas terlihat ada relasi dari iman dan perbuatan yang baik, yakni perbuatan yang melakukan kehendak Allah dengan taat dan takut kepada Tuhan. Kepada orang-orang yang tidak melakukan kehendak Allah dalam hidupnya, Tuhan Yesus pada hari penghakiman yang terakhir itu akan mengatakan: “Aku tidak pernah mengenal kamu! Enyahlah dari padaKu, kamu sekalian pembuat kejahatan”.   Amin. (msm).