RENUNGAN GALATIA 6: 1 – 10: BINSAN SADIHARI DO PE ULAHON MA NA DENGGAN

 

RENUNGAN GALATIA  6:  1 – 10:  BINSAN SADIHARI DO PE ULAHON MA NA DENGGAN

 

Horas ma di hita. Selamat Ari Minggu IIi dung Trinitatis. Las ma rohanta marsomba tu Tuhanta, mamuji pasangap goar-Na, huhut tumangihon hata-Na. Disoarahon hata ni Debata sian Galatia 6: 1-10 do, asa manongtong hita

mangulahon na denggan di ngolunta on, di ganup tingki manang binsan sadihari do pe tingki na nilehon ni Tuhanta i di hita.

1. Parbue ni holong ni roha do ulaon na denggan.

Nasa ulaon na denggan parbue ni holong ni roha do i. Molo holong roha di dongan, ndang tagamon so ulahonon na denggan tu dongan i. Molo holong roha di inganan pangulaonniba, ndang tagamon so ulaon na denggan di inganan pangulaon i. Jadi ndang mungkin halak mangulahon na denggan anggo so adong holong ni roha di ibana. Ala ni i do umbahen diajarhon Jesus tu angka siseanna masihaholongan, so mardiaimbar tu manang ise pe. Holong ni roha tu dongan i do hataridaan ni holong ni roha tu Debata. Didok apostel Johannes, pargabus do halak na mandok holong rohana ni Debata hape dihosomi manang dihasogohon do dongan ( 1 Joh. 4: 20). Jala sada ihot do i dipatikhon Debata, ima: manghaholongi Debata sian nasa ateate, sian na nasa hosa,dohot sian nasa roha, jala manghaholongi dongan dos dohot diriniba (Mat. 22: 37-39) Ulaon na denggan i ma ulaon na hombar tu lomo ni roha Debata, jala na manghorhon na hasea di ngolu on. Jadi ndang holan na denggan na hombar tu rohanta, jala na hombar tu hagiotta siulaonta. Ulaon na denggan na tau pauliulihon parsaoran manang hubungan na denggan tu dongan.

2. Mangulahon na denggan tu saluhut halak. Ala parbue ni holong ni roha do ulaon na denggan i, ingkon tu saluhut halak do siulahonon na denggan. Ndang mardiaimbar manang tu ise pe i, tarmasuk tu angka halak na mangulahon na roa tu dirinta, isara ni na mansusai hita, manang na manghasogohon dirinta. Nasa ulaon hajahaton ingkon sitaluhonon do i marhite ulaon na dengan, songon na niajarhon ni apostel Paulus di Rom 12: 20-21: Onpe, jumpa male musum, lehon ibana mangan; jumpa mauas ibana, painum! Ai songon na pagukgukkon gara do ho tu atas uluna, anggo dibahen ho songo i. Unang ma talu ho dibahen hajahaton; alai taluhon ma hajahaton i marhitehite na denggan!". Jadi ndada holan tu halak na mambahen na denggan tu dirinta sibahenonta angka na denggan.

3. Mangulahon na denggan tu dongan sahaporseaon. Adong manang piga dipangido apostel Paulus siulahonon ni angka na porsea tu Jesus tu donganna sahaporseaon. Deba sian i na diondolhon dison, i ma masipatureturean di angka pangalaho na humurang. Didok apostel Paulus, di ay.1 ni turpuk on: Ale angka dongan, molo tung tarsomong jolma mardosa, hamu angka naung taruli di Tondi ma patureturehon ibana marhitehite tondi na lambok; alai matahon dirim, so tung dohot ho tarunjun! Dipatuduhon i do hagaleon ni hita jolma. Nang pe naung ditaluhon Jesus dosa i, boi do pe hita jolma tarsomong madabu tu dosa. Di pangalaho na songon on do angka na porsea i boi masipaturerurean, ndada masisegaan, manang masipaurahan. Di pangajarion ni Jesus tu angka siseanna pe, adong do didok di Mateus 18:15, Alai molo mardosa donganmi, topot jala ajari ibana, holan hamu padua. Molo ditangihon ho, dapot ho do ibana gabe donganmu muse. On do sada ojahan ni huria laho patupahon ruhut parmahanion dohot paminsangon tu ruas ni huria na tarsomong mangulahon dosa, asa tubu panandaon ni dirina di dosa na diulahon, dungi adong ma di ibana hamubaon ni roha.

Angkup ni i didok masiurupan mamorsan na dokdok. Saleleng ditano on, ala ni panghorhon ni dosa i, sai adong do na dokdok siporsanon ni ganup halak. Sai adong do siparungkilhononna be. Di son do angka na porsea i boi masiurupan, ndang masipasombuan. Paling saotik boi masitangiangan. Didok apostel Paulus na masiurupan i do sada dalan mangaradoti patik ni Kristus.

4. Unang adong na paburnangburnang diri. Di sude angka na denggan na niulahon ndang jadi pangeahonon laho patimbohon diri. Ingkon tongtong do hita di bagasan haserepon laho mangulahon saluhut angka na denggan i.Tung na so jadi do sihaginjanghononta dirinta, alai ingkon tongtong do hita patutoruhon diri, songonn Jesus na olo patutoruhon diri laho manghophop hita jolma. Ala ni i do di angka na denggan na taulahon unang ma hita manabur tu daging, alai ingkon manabur tu tondi do. Na manabur tu daging, i ma na mangulahon i marguru tu hagiotna, mangulului pujipujian tu diri, manang hasangapon tu diri. Angka na songon i ingkon manggotil do tu dirina hamagoan. Alai naeng ma manabur tu tondi, i ma angka na mangharingkothon ngolu partondion, dungi manggotil ma muse sian tondina hangoluan salelenglelengna.

5. Manongtong mangulahon na denggan. Di sude tingki na na nilehon ni Debata di ngolunta, ingkon sai pangkeonta do i mangulahon na denggan. Ndang jadi adong ombas ni ngolunta na so mangulahon na denggan, tu dirinta nang tu donganta. Marhite na songon i do hita mamparhaseang tingki na nilehon ni Debata tu dirinta. Ndang jadi pangkeonta tingki na nilehon ni Debata tu angka ulaon na roa, na manghorhon hasusaan dohot hamagoan tu dirinta. Alai tapangken ma i tu angka ulaon na denggan na manghorhon hangoluan na saleleng ni lelengna. (MSM PANJAITAN)

Galatia 6:1-10

Tongtong ma di bagasan holong ni roha

1.Ale angka dongan, molo tung tarsomong jolma mardosa, hamu angka naung taruli di Tondi ma patureturehon ibana marhitehite tondi na lambok; alai matahon dirim, so tung dohot ho tarunjun!

2.Masiurupan ma hamu mamorsan angka na dokdok i; i ma dalan mangaradoti patik ni Kristus.

3.Ai molo dipaburnang halak dirina, hape so adong di ibana, sipaotooto diri do i.

4.Alai ganup ma manangkasi ulaonna be; dung i tu ibana sandiri ma pujipujian, ndada maradophon na asing.

5.Alai adong di ganup siporsanonna be.

Unang mansadi mambahen na denggan

6.Alai na mamodahon hata ni Debata, tama do taruli di nasa parsaulian ni na pinodaanna i.

7.Unang hamu lilu; ndang olo Debata leaan! Ai ia i disabur halak, i do gotilonna!

8.Ai na manabur tu dagingna, manggotil do sian dagingna hamagoan; alai na manabur tu tondi, manggotil do sian tondi i hangoluan salelenglelengna!

9.Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng.

10.Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon!