AJARI MA HAMI MAMILANGI ANGKA ARIARINAMI (Psalmen 90: 1-12)

 

AJARI MA HAMI MAMILANGI ANGKA ARIARINAMI (Psalmen 90: 1-12)

Horas ma di hita.

Selamat Ari Minggu Ujung Taon Parhuriaon ma di hita na laos Parningotan di angka na monding. Ndang tahilala nunga tasalpuhon sataon ariari ni ngolunta dohot parhuriaonta. Di ari minggu na ro masuk ma hita tu taon baru parhuriaon. Ala ni i las ma rohanta marsomba tu Tuhanta sadarion, mandok mauliate tu Ibana siala pangaramotion-Na di hita na sataon on, huhut mamuji pasangaphon Goar-Na. Tatangihon ma nang hata-Na na gabe hangoluanta, patoguhon rohanta mandalani ariari ni ngolunta dohot mangulahon angka na denggan di bagasan panogunoguon ni Tuhan i.

Disosohon hata ni Tuhanta na dienet sian Psalmen 90: 1-12 do, asa:

1. Tapangido pangajarion sian Tuhan i, laho mamilangi angka ariari ni ngolunta". Didok di ayat 12 ni turpuk on: "Sai parroha i ma hami mamilangi angka ariarinami, asa dapotan roha na bisuk hami".

2. Mamilangi ariari ni ngolu, tontu nanidokna ndada holan mamilangi sadia godang ma ariari na nilehon ni Tuhan i naung tadalani. Alai tarlumobi ma mamilangi angka denggan basa ni Tuhan i naung tajalo di ngolunta, jala sadia godang ma sian denggan basa-Na i na taparhaseang manang tapangke laho pasangaphon Goar ni Tuhan i.

3. Laos tabilangi ma sadia leleng ma sian ariari na nilehon ni Tuhan i tapangke laho marsaor tu Tuhanta marhite partangiangon dohot na marsomba ( beribadah) tu Ibana, marsaor tu keluarganta, marsaor tu angka donganta, lumobi manogunogu angka anakhonta asa mananda di asi no roha ni Debata di ngoluna. Betak beha do gumodang ariari ni ngolunta i tapansuasaehon tu angka ulaon na naso marguna, manang laho pasombuhon hagiothagiot ni rohanta sambing.

4. Marhite na taboto mamilangi ariari ni ngolunta dohot mamilangi sude na taulahon i do hita dapotan roha na bisuk. Roha na bisuk ndang dos i dohot hapistaran secara intelektual, manang godang ni parbinotoan manang ilmu na diguruhon, alai silehonlehon ni Debata sambing do i marhite haradeonta manjalo pangajarion-Na laho mamilangi ariari ni ngolunta.

5. Taboto do ala ni panghorhon ni dosa i, hangaluton dohot halojaon na ma jambar ni ngolunta, jala jempek na ma tingki na na nilehon ni Tuhan i di hita di ngolunta di portibion, pardosdosanna 70 taon ro di 80 taon, ai atop do laho salpu jala habang do hita.Na marlapatan do i, sude do hita jolma ingkon marujung ngoluna. Alai marhite turpuk hata ni Debata sadarion disungguli do hita, asa taingot mangido pangajarion ni Tuhan i laho mamangke ariari ni ngolunta na jempek i mangula angka denggan, ndada holan di dirinta, alai dohot do di angka donganta jolma lumobi nang di harajaon ni Debata.

...