RENUNGAN: 1 TIMOTEUS 6: 6 9: HADAULATON MARDONGAN SABAM NI ROHA

 

RENUNGAN: 1 TIMOTEUS 6: 6  9: HADAULATON MARDONGAN SABAM NI ROHA

 

Horas ma di hita. Selamat Ari Minggu XV dung Trinitatis. Las ma rohanta marsomba tu Tuhanta, mamuji pasangaohon goar-Na, huhut tumangihon hata-Na sihangoluhononta. Disoarahon hata ni Debata sian 1 Timoteus 6: 6-9 do tub hita asa taulahon hadaulaton ( ibadah) mardongan sabam ni roha, ai pangomoan godang i do hita.

1. Mangulahon hadaulaton. Hadaulaton i ma ibadah, ngolu parsombaon tu Tuhan i, na sai tongtong manghaburjuhon parsaoran tu Tuhan i dohot tu dongan jolma. Tujuanna i ma asa dapot habadiaon ni ngolu, paiashon diri sian ragam ni dosa na diulahon siganup ari. Ngolu ni halak Kristen i ma ngolu na marhadaulaton. Tangkas do i di paingothon apostel Paulus tu si Timoteus naung dirajumi songon anakna, jala na ditogutogu gabe naposo ni Debata mamaritahon barita na uli i huhut marmahani huria i. Sada sian sipaingot ni apostel Paulus tu ibana jala na gabe sipaingot tu sandok siihuthon Kristus, ima asa di pasomalsomal dirina mangulahon hadaulaton ( melatih diri untuk beribadah) ( 1 Tim.4: 7). Didok apostel Paulu, humaseaan do i sian na pabosihon daging ( melatih fisik ), ai marhite i hangoluan salelenglelengna dibagabagahon.Jadi ndada ngolu portibion na parjolo dibagagahon, alai ngolu na salelengleng ni leleng do, atik pe tongtong do panarihon ni Debata di angka na porsea di ibana di hangoluan na ringkot di portibion. Alai adong do na sala mangantusi hatiha i, jala sahat tu saonari pe torop do na marpangantusion na songon, i ma molo di haburjuhon sadasada halak mangulahon hadaulaton, asa dilehon Debata do di ibana hamoraon, dioloi Tuhan i nasa tangiangna na mangidohon angka na ringkot di ngolu portibion. Sahat tu saonari sai adong do angka parjamita na mambagabagahon na songon i, i ma molo dihaburjuhon beribadah, dihaburjuhon martangiang tu Tuhan i, ingkon sai pasupsuon ni Debata do ngoluna di ngolu pardagingon, marhasil tongtong ulaonna, lujuluju pangomoan, dohot angka na asing.

2. Mardongan sabam ni roha. Anggo hadaulaton na tutu hombar tu na pinodahon ni apostel Paulus di turpuk on, i ma hadaulaton na mardongan sabam ni roha. Di hata Indonesia didok " ibadah yang disertai rasa cukup". Boi manghasabamhon na adong di ibana. Ojahanna didok: "Ai ndang adong taboan tu hasiangan on, jala ndang tarboan hita agia aha laho ruar. Alai molo adong di hita sipanganon dohot parabiton, tahasamhon ma i (ay. 7-8). Aha do lapatan ni na manghasabamhon na adong. I ma, parjolo: boi tongtong manghalashon dohot manghamauliatehon aha na dijalo sian Tuhan i, nang pe ndang sai hombar i tu na pinarhagiot ni rohana. Paduahon, boi mamparhaseang dohot mamangke aha na pinasahat ni Tuhan i di bagasan tanggung-jawab.

Patoluhon, porsea na singkop do panarihonon ni Debata di ngolu on, ala ni ndang porlu holsoan di aha na ringkot di ngolu on.

Jadi sabam ni roha, ndang na menyerah tu nasib manang keadaan. Ndada dihorhon i halosohon mulaulaon, ndang passif, alai ingkon gogo do mulaulaon laho mamangke potensi na adong di dirina dohot pahembanghon aha na nilehon ni Tuhan i di ngoluon.

3. Mara tu na naeng mamora. Ingkon manat do hita mangantusi on. Ndada hamoraon i na sala, seolaholah ndang dihalomohon Tuhan i mamora angka anakhonna. Torop do angka na porsea di Tuhan i na dibaritahon di Buku Na Badia i na diloas Tuhan i mamora, isara ni si Abraham, Raja Salomo dohot angka na asing. Dipasupasu Tuhan i do nasida gabe mamora asa gabe pasupasu tu na humaliang. Na dipajamot di turpuk on, i ma angka na naeng mamora do. Lapatanna, i ma angka halak na hagiot manang tujuan ni ngoluna i ma naeng mamora. Hagiot na naeng mamora i na manggohi rohana.Didok apostel Paulus, "ia angka na naeng gabe mamora, madabu do tu bagasan pangunjunan dohot sambil dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan". Memang molo tujuan ni ngolu ni sadasada halak do asa mamora di portibion, ingkon sai tarunjun do i mangulahon ragam ni hajahaton, laho mangeahi hamoraon i, isara ni: manangko, manipu halak, korupsi, mangarampok, mamunu halak, d.a.n. Jadi parulaon na songon i do na manghorhon jea dohot hamagoan tu jolma. Raja Salomo na gabe mamora situtu ndang hea dipangido tu Tuhan i asa mamora ibana. Alai na dipangido pantas ni roha do, asa diboto mangarajai bangso Israel di bagasan uhum hatigoran. Alai dilehon Debata do di ibana hamoraon. Jadi sipangidoonta pantas ni roha do asa taboto mangula ulaon na denggan di ngolu on. Domu tu hagiot na naeng mamora i do, na nidokna di udut di turpukta on (ay.10), ima roha na holongan di hepeng, na gabe urat ni nasa hajahaton. On pe, ndada hepeng i na sala, manang ndada na mandok na so ringkot hepeng. Mansai ringkot do hepeng di ngoluon. Alai na sala i ma roha na holongan di hepeng. Humolong rohana di hepeng sian donganna jolma. Sipata ala ni hepeng dijehehon donganna, dihosomi, dipaotooto, sahat ro di na dibunu.

4. Pangomoan godang sian hadaulaton na mardongan sabam ni roha. Tontu ndada pangomoan manang paruntungan materiel, manang paruntungan portibion na nidokna disi, alai pangomoan di ngolu partondion do, i ma manean arta ni harajaon ni Debata. Marhite hadaulaton na mardongan sabam ni roha tarbahen hita manaluhon roha portibi na mamboan hita tu hamagoan salelelelengna. Arta ni harajaon ni Debata ndang hasuhatan argana, jala i do na ni omohon ni halak na mangulahon hadaulaton mardongan sabam ni roha. I do hamoraon partondion, na dos lapatanna dohot parbue ni tondi songon na nidokna di Galatia 5: 22 i, i ma: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon.

________________

1 Timoteus 6:6-9

6 Pangomoan godang do tutu hadaulaton, anggo mardongan sabam ni roha.

7 Ai ndang adong taboan tu hasiangan on, jala ndang tarboan hita agia aha laho ruar.

8 Alai molo adong di hita sipanganon dohot parabiton, tahasabamhon ma i!

9 Ia angka na naeng gabe mamora, madabu do tubagasan pangunjunan dohot sambil dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan.