HABURJUHON MA MARTANGIANG (RENUNGAN YAKOBUS 5: 13 – 18)

 

RENUNGAN YAKOBUS 5:  13 – 18:  HABURJUHON MA MARTANGIANG
 
Horas ma di hita. Selamat Ari Minggu. Nuaeng nunga sahat tu minggu na margoar R0GATE na marlapatan "martangiang" marojahan di Jer. 29: 12, na mandok: "Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu”. Las ma rohanta marsomba tu Tuhanta sadarion, mamuji pasangap Ibana, huhut tumangihon hata-Na sihangoluhononta. Disoarahon hata ni Debata do sadarion do tu hita, na dienet sian Jakobus 5: 13-18, asa "tahaburjuhon martangiang", ai na margogo situtu do tangiang i di ngolunta.
1. Rogate na marharoroan sian hata Latin “Rogare”, marlapatan mangido. Di kalender parhuriaon, minggu Rogate, ima minggu sadarion, dipatupa dung minggu Kantate, manang andorang so ari Parningotan di Hananaek ni Tuhan Jesus tu banuaginjang. Ndang tarsirang ngolunta sian ngolu partangiangon. Marhite na martangiang do hita mangido tu Tuhan i, pasahathon aha na di bagasan rohanta, na taparungkilhon, manang na masa di ngolunta. Nian diboto Tuhan i do aha na tahaporluhon di ngolunta, andorang so mangido do pe hita tu Ibana. Alai diigil Tuhan i do sian hita, asa sai mangido hita tu Ibana, songon dalanta laho manghatai manang markomunikasi tu Ibana, jala asa marhite i taboto na sai tongtong do marsigantung ngolunta tu Ibana. Manang boha pe didok rohanta tuk ni huaso, gogo, hapistaran dohot sinadongan di hita, ndang boi hita mangolu holan sian i.
Marhite na martangiang i boi ma nang tasadari paboa sude na adong di ngolunta on na sian Tuhan i do i. Ala ni i do sai disosohon Tuhan i huriaNa, ro di sude angka na porsea di Ibana, asa sai martangiang tu Ibana. Tuhan Jesus sandiri pe, diajari do angka siseanna dohot sude angka na mangihuthon Ibana asa sai dihaburjuhon martangiang tu Debata Ama i.
Alai dipajamot Tuhan i do asa unang adong martangiang “na demonstratif”, songon angka pangansi na sai manghalomohon jongjong martangiang di parguruan dohot di dalan balobung, asa diida jolma i nasida. Angka partangiang sisongon i didok Tuhanta, ndang jaloonna na pinangidona i. Songon i muse dipajamot do asa unang songon partangiangon ni angka sipelebegu, na mangarimpu tangihonon ni Debata nasida ala ni deak ni hatahata nasida. Lapatanna, ndang marguru tu godang ni hatanta, manang uli ni untaian ni angka hatanta Tuhan i mangalusi tangiangta, ai ndang dos tangiang dohot jampijampi manang tabastas ni angka parhapandean ni portibi on. (Mat. 6: 5-15)
2. Di sude partingkian dohot na masa di ngolunta do hita martangiang. Ndang marombasombas manang marsanggasangga hita martangiang tu Tuhan i. Ndang holan di tingki adong na porlu di dirinta asa martangiang hita tu Tuhan i, ai ndada holan na porlu di hita si tangianghononta, alai dohot do na porlu di Debata manang di harajaon-Na. Jala ingkon sai ido sipatujuloonta songon tangiang na niajarhon ni Tuhan Jesus di tangiang " Ale Amanami,". Angkup ni i di sude na masa di ngolunta do hita martangiang, di haporsuhon nang di las ni roha songon na didok di turpukta on: "Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana". Tontu uju masa haporsuhon, marhite tangiang mangido gogo hita tu Tuhan i, asa dipatau hita manaon haporsuhon, jala dipalua sian haporsuhon i. Molo masa pe las ni roha didok di turpuk on, marende ma hamu. Tontu ende na nidokna ende tangiang do na mandok mauliate tu Tuhan i do, huhut mangido asa unang las ni roha na nilehon ni Tuhan i mambahen hita lupa tu Tuhan i, manang patubu ginjang ni roha di hita.
3. Masitangiangan do angka na porsea manang huria i. Molo adong na marsahit di huria i dijou ma sintua ni huria i asa ditangiangkon ibana. Sintua di hatiha na di goari "presbyteros" di hata Junani, i do parmahan di huria i na mangaradoti ngolu partondion ni huria. Nunga dihamham i sude naginoaranna parhalado ni huria di tingkion tarmasuk pandita. Ndang sae holan ditangianghon alai dohot do diubati. Pangubation na denggan na ditanda halak hatiha i i ma pandampolon marhite miak Jetun. Ndang adong do pe ditanda halak pangubation medis songon na ditanda ni halak di tingkion. Aut naung ditanda halak i, tontu do dohononna do ditangiangkon ma ibana laos diubati. Jadi ndang boi alasan ayat on songon nidok ni na deba halak Kristen, ndang ringkot marubat sungkup ma ditangiangkon jala didampol dohot miak. Tontu di na martangiangan angka na porsea, ndada holan parhalado ni huria manangiangkon ruas, angka ruas pe dipangido do manangiangkon parhalado. Ido ngolu na masitangiangan.
4. Na margogo disitu do tangiang ni partigor. Partigor i ma halak na mangolu di bagasan hatigoran ni Debata. Na sai pajolohon na ringkot di harajaon ni Debata. Partigor i ma na olo masiseaan dosa jala masitangiangan. Ndang adong roha hosom dohot pamaloson di dosa ni donganna. Dosa ni halak na olo manesa dosa ni donganna do disesa Tuhan i, jala halak na songon on do na tardok halak partigor. Partigor i ma na olo maneahon dirina laho laho mamorangi angka debata sileban jala na manghamonanghon Debata Jahowa songon si Elia. Ala ni i ditangihon Debata do tangiang ni si Elia asa unang ro udan, jala ndang ro udan tolu taon onom bulan lelengna di tano i. Dungi diulahi ma muse martangiang asa ro udan, gabe ro ma udan na mamornohi tano i asa dipantubuhon angka suansuanan na marparbue. Jadi na pinangidona ndang kepentingan ni dirina sambing, alai na ringkot di harajaon ni Debata, asa diboto bangso i na Debata Jahowa do nampuna huaso di hasiangan on, jala sisombaon ni sandok bangso. Jadi molo pabalgahon diri ni sadasada halak do na pinangidona i, ndang tagamon oloan ni Debata na pinangidona.
Jakobus 5:13-18
13. Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana.
14. Molo adong na marsahit di hamu, dijou ma angka sintua ni huria i; asa ditangiangkon ibana; didampol ma ibana dohot miak marhitehite Goar ni Tuhan i.
15. Dung i pangoluon ni tangiang haporseaon i ma na marsahit i, jala paheheon ni Tuhan i ma ibana; sesa ma nang dosana, molo tung adong diulahon.
16.Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon.
17.Jolma do si Elia, sabangko dohot hita; gogo do ibana martangiang, unang jolo ro udan; jala ndang ro udan di tano i, tolu taon onom bulan lelengna.
18.Dung i diulahi ma martangiang, jala dilehon langit i ma udan; dung i dipantubuhon tano i ma parbuena.