RENUNGAN Ulaon ni apostel 9: 1- 6: MARHAMUBAON DUNG PAJUMPANG DOHOT JESUS.
Horas ma di hita. Selamat ari minggu. On ma minggu parjolo dung Ari Pesta
Paskah di hurianta, na digoari: Quasimodogeniti, na marlapatan: Songon posoposo
na imbaru tubu, na marojahan di 1 Petrus 2: 2-, na mandok: "Songon
posoposo na imbaru tubu, uasan ma hamu di susu na tama, na so marlaok, asa lam
magodang hamu, horhonon ni i, bahen haluaon,
molo tung naung didai hamu habasaron ni Tuhan i". Las ma rohanta
marsomba tu Tuhanta, mamuji pasangap goar-Na, huhut tumangihon hata-Na
sihangoluhononta. Disoarahon hata ni Debata na dienet sian Ulaon ni Apostel 9:
1-6 do, asa adong hamubaon dohot haimbaruon di ngolunta, dung dijou Tuhan i
hita gabe sisean-Na. Gabe posoposo na imbaru tubu ma hita, dung tubu
paduahalihon. Hataridaanna ndada na ingkon tardidi paduahalihon, alai marhite
na patuduhon sikap dohot ngolu na imbaru do.
1. Na gabe tiruan i ma si Paulus. Muba ibana sian silelei halak Kristen i,
gabe siondihon hakristenon marhite na marbarita na uli, mambaritahon
panghophopon ni Jesus i di hajolmaon. Tanggal ma sian ibana ngoluna na leleng
i, manang ngolu na buruk i gabe ngolu na imbaru. Ibana na mangolu di hapariseon
na manghasogohon Kristus hian ala dirajumi do poda pangajarion ni Kristus i
mangaleai Debata gabe siihuthon Kristus na sintong. Marsitutu hian do ibana
dohot mamusa angka halak Kristen i, ala dirajumi ibana do pambahenanna na
mangelele siihuthon Kristus i na pasangaphon Debata. Pola do dijalo ibana surat
sian sintua ni malim laho mangulahon sangkapna i. Ndada holan tu halak Kristen
na di tano Palestina dibahen ibana songon i, alai dohot do tu halak Kristen
naung marserak tu luat na asing, ima tu luat Damaskus di tano Syria. Alai sian
na so panagamanna di tongan dalan diambati Jesus do ibana marhite sillam na
gogo situtu na mabahen ibana madabu tu tano jala sanga ndang marnida. Marhite i
ditangkup Jedus ma si Paulus na margoar si Saulus i hian asa gabe sisean-Na na
dohot gabe parbarita na uli manang apostel tu halak sipelebegu. Marhite na
dipagkulingi jala ditangkup Jesus ibana, diboto ibana ma na mangolu do Jesus,
na pinusa ni halak Jahudi i, hehe sian na mate. Ndang tutu songon na sai
binaritahon ni halak Parise dohot angka sintua ni halak Jahudi na ditangko
angka siseaanna i bangke ni Jesus, dungi sai didok ma naung hehe Jesus.
2. Ndada holan marhamubaon hita dipangido Debata, alai ingkon magodang do
di bagasan Kristus. Isara ni posoposo na imbaru tubu ndada holan magodang di
bagasan pardagingon ibana dihirim natorasna, alai ingkon magodang do di
parrohaaon dohot parbinotoan na mambahen ibana lam tang laho mangadopi
tantangan ni ngolu. Songon do i halak Kristen ingko lam magodang do di
haporseaon tu Jesus, asa unang muramura dipalindaklindak na masa di portibi on,
unang mura dihasut sibolis i. Ingkon magodang do haporseaon ni halak Kristen,
asa manahan ibana ia tung godang pe dibolus hamaolon dohot sitaonon ala ni
haporseaonna tu Jesus. Songon si Paulus atik pe dung ditangkup jala dipangke
Debata ibana marbarita na uli tu sipelebegu godang do hasusaan dohot haporsuhon
diae ibana. Alai ala naung tang haporseaonna pinargogooan ni Tondi Porbadia,
manahan do ibana di sitaonon dohot haporsuhon i sahat ro do ujung ni ngoluna di
portibi on.
3. Asa lam magodang hita di haporseaon ingkon sai uasan do hita di susu na
na tama, susu na polin na so marlaok, i ma hata ni Debata. Hata ni Debata do na
gabe hangoluan di hita, na mambahen magodang manang bertumbuh hita di bagasan
haporseaon. Hata ni Debata do na boi patoguhon rohanta, asa unang muramura
ganggu molo sipata ingkon tabolus hasusaan dohot sitaonon di portibion. Marhite
hata ni Debata do nang boi mambahen hita manahan di angka pangunjunan dohot
mangalo angka hagogoon ni sibolis na manghaliangi ngolunta. Ala ni i ingkon
ringgas do hita tumangihon dohot manggurohon hata ni Debata. Ndang sude hata ni
Debata tabo begeon tu panghilalaanta. Sipata doi posi maminsang manang
paingothon hita asa marhamubaon. (MSM PANJAITAN)
Tidak ada komentar:
Posting Komentar